መቅድመ ኪዳን

ካህን ተሠሃልከ እግዚኦ ምድረከ። ሃሌ ሃሌ ሉያ ፣ ሃሌ ሃሌ ሉያ ፣ ሃሌ ሉያ ፣ ሃሌ ሉያ ሕዝብ በአንድነት ተሠሃልከ እግዚኦ ምድረከ። ሃሌ ሃሌ ሉያ ፣ ሃሌ ሃሌ ሉያ ፣ ሃሌ ሉያ ፣ ሃሌ ሉያ

ይእቲ ማርያም እምነ ወእሙ ለእግዚእነ ሰአሊ በእንቲአነ ከመ ይምሐረነ ወይሣሃለነ ያስተርኢ ኂሩቶ በላዕሌነ። ሠርዐ ለነ ሰንበተ ለዕረፍተ ዚአነ ፍሥሓ ወሰላም ለእለ አመነ።

ካህን ወሚጥ መዓተከ እምኔነ ሕዝብ በአንድነት አርእየነ እግዚኦ ሣህለከ። ሃሌ ሃሌ ሉያ ፣ ሃሌ ሃሌ ሉያ ፣ ሃሌ ሉያ ፣ ሃሌ ሉያ

ይእቲ ማርያም እምነ ወእሙ ለእግዚእነ ሰአሊ በእንቲአነ ከመ ይምሐረነ ወይሣሃለነ ያስተርኢ ኂሩቶ በላዕሌነ። ሠርዐ ለነ ሰንበተ ለዕረፍተ ዚአነ ፍሥሓ ወሰላም ለእለ አመነ።

ካህን ሰላመ ኣብ ወወልድ ወመንፈስ ቅዱስ ወፍቅራ ለእግዝእትነ ማርያም ድንግል ወላዲተ አምላክ ሞገሰ መስቀሉ ወኀብተ ረድኤቱ ለእግዚእነ ወአምላክነ ወመድኃኒነ ኢየሱስ ክርስቶስ ወትረ ኢይርኃቅ እምኔነ ወእምነ ኵልክሙ እስከ ለዓለም።

በመቀባበል እግዚኦ መሐረነ ክርስቶስ።

ጸሎተ ኪዳን - ዘመንፈቀ ሌሊት

ካህን ኪዳን ዘነግህ መሥዋዕት ዘሥርክ ዘነገሮሙ እግዚእነ ለአርዳኢሁ ንጹሐን እምቅድመ ዕርገቱ ውስተ ሰማይ ድኅረ ትንሣኤሁ እሙታን ሣህሉ ወምሕረቱ የሃሉ ምስሌነ ለዓለመ ዓለም አሜን፡፡ ካህን:- ቅዱስ

ሕዝብ እግዚአብሔር ፤ ቅዱስ ኃያል ፤ ቅዱስ ሕያው ዘኢይመውት ፤ ዘተወልደ እም ማርያም እምቅድስት ድንግል ተሣሃለነ እግዚኦ። ቅዱስ እግዚአብሔር ቅዱስ ኃያል ቅዱስ ሕያው ዘኢይመውት ዘተጠምቀ በዮርዳኖስ ፤ ወተሰቅለ ዲበ ዕፀ መስቀል ቅዱስ ተሣሃለነ እግዚኦ። ቅዱስ እግዚአብሔር ቅዱስ ኃያል ቅዱስ ሕያው ዘኢይመውት ዘተንሥአ እሙታን አመ ሣልስት ዕለት።

ዐርገ በስብሓት ውስተ ሰማያት ወነበረ በየማነ አቡሁ ዳግመ ይመጽእ በስብሐት ይኮንን ሕያዋነ ወሙታነ ፤ ተሣሃለነ እግዚኦ። ስብሐት ለአብ ስብሐት ለወልድ ስብሐት ለመንፈስ ቅዱስ ይእዜኒ ወዘልፈኒ ወለዓለመ ዓለም አሜን ወአሜን ለይኩን ለይኩን። ቅዱስ ሥሉስ እግዚአብሔር ሕያው ተሣሃለነ።

ካህን ስብሐት ለእግዚአብሔር። ሕዝብ ርቱዕ ይደሉ።

ወብርሃነ ለነ ዘኢይጠፍእ አሰፈውከነ ስብሐተ ወአኰቴተ ንፌኑ ወቅድሳተ ንጹሐ ንብል ንሕነ እሊኣከ አግብርት። ወሕዝብኒ ኪያከ ይሴብሑ። ሕዝብ ኪያከ ንሴብሕ እግዚኦ።

ካህን አምላክ ብርሃን ወላዴ ሕይወት ርእሱ ለአእምሮ ወሀቤ ጸጋ ዘእምጸጋ ፍጹም ገባሬ ነፍስ በቋዒ ጸጋዌ መንፈስ ቅዱስ መዝገበ ጥበብ ረዳኢ መምህረ ቅዱሳን ወመሠረተ ዓለም ዘይትዌከፍ ጸሎተ ንጹሓን። ለከ ንሴብሕ ወልድ ዋሕድ። ቀዳሜ በኵር ቃለ አብ ዘለኵሉ ዚአከ ጸጋ ዘወሀብከነ ለእለ ንጼውኣከ። አብ ንጹሕ ዘአልቦ ነውር ዘቦቱ ጥሪት። ኅበ ፃፄ ወቊንቊኔ ኢያማስኖ ለዘበኵሉ ሕሊና ለእለ ይትዌከሉ ብከ ትሁብ።

ዘያፈትዎሙ ለመላእክት የሐውጽዎ ለዘእምድቅመ ዓለም ብርሃን ዐቃቢነ ዘኢይማስን፡ መዝገበ ጽልመት እንተ ብነ በሥምረተ አቡከ አብራህከ ለነ ዘአውፃእከነ እማዕምቅ ውስተ ብርሃን። ወወሀብከነ ሕይወተ እሞት። ወጸጎከነ እምግብርናት ግዕዛነ። ዘበመስቀልከ አቅረብከነ ኀበ አቡከ መልዕልተ ሰማያት በወንጌል መራሕከነ ወበነቢያት ናዘዝከነ ዘለሊከ አቅረብከነ አምላክ። ኣላ ብርሃነ ሀበነ እግዚኦ። ለከ ለአምላክነ ንዌድስ ከመ ወትር በዘኢያርምም አኰቴት ንብል ንሕነ እሊአከ አግብርት። ወሕዝብኒ ኪያከ ይዌድሱ።

ሕዝብ :- ኪያከ ንዌድስ እግዚኦ።

ካህን ንዌልስ ለከ ዘንተ ስብሐተ እምአፉነ ዘምስለ መንግሥትከ ዘለዓለም ኢየሱስ ወልደ እግዚአብሔር ዘመልዕልተ ኵሉ ምስለ አብ ኵሉ ፍጥረት ይሴብሐከ በረዓድ ወበፍርሃተ መንፈስ ዘኩሉ ነፍስ ይፈርሆ። ወኵሎሙ ነፍሳተ ጻድቃን ብከ ይጼወኑ ዘአዝኀንከ እምኔነ ማዕበላተ ውኁዛተ መናፍስት ዘኮንከነ መርሶ ሕይወት እሙስና ውዘኮንከነ ምጕያየ ዘቦቱ ተስፋ

መድኃኒት ዘለዓለም። በባሕር እለ ይትመነደቡ ታድኅን፡፡ ወእለ በበድው በጸጋ ትፌውስ ወእለ በመዋቅሕት ጽኑዓን ዘምስሌሆሙ ትሄሉ ዘእማእሰረ ሞት ፈትሐነ። ዘለምስኪናን ወለልሕዋን ይናዝዞሙ ወለእለ ፃመዉ በመስቀሉ ይባልሕ ዘኵሎ መዓተ ይመይጥ ወያሴስል እምኔነ ለእለ ቦቱ ተወከልከ። ዘነቢያት ወሐዋርያት አእኰቱከ በኅቡእ ኪያከ ንዌድስ እግዚኦ። ወንሴብሐከ ከመ ለቢወነ ብከ ናዕርፍ በማኅደረ ሕይወት እንዘ ንገብር ፈቃደከ። ሀበነ ንሑር በትእዛዝከ።

ወኵሎ እግዚኦ በምሕረትከ ሐውጽ ንኡሳነ ወዐቢያነ መኰንነ ወሕዝቦ ኖላዌ ወመርዔቶ። እስመ ዚአከ መንግሥት ቡሩክ እግዚኦ ኣምላክነ ስብሐት ለአብ ወወልድ ወመንፈስ ቅዱስ እምቅድመ ዓለም ይእዜኒ ወዘልፈኒ ለዓለም ወለትውልደ ትውልድ ዘኢየኀልቅ ለዓለመ ዓለም። ሕዝብ:- አሜን።

ጸሎተ ኪዳን - ዘነግህ

ካህን ጸጋ ዘእግዚአብሔር የሀሉ ምስሌክሙ። ሕዝብ ምስለ መንፈስከ።

ካህን ንሰብሖ ለአምላክነ፡፡ ። ሕዝብ ርቱዕ ይደሉ።

ካህን አጽንዑ ሕሊና ልብክሙ። ሕዝብ ብነ ኀበ እግዚአብሔር አቡነ ዘበሰማያት ዘበሰማያት አቡነ ዘበሰማያት ፤ አቡነ ዘበሰማያት ፤ ኢታብአነ እግዚኦ ውስተ መንሱት።

ካህን እግዚአብሔር አብ ወሀቤ ብርሃን ዘለኵሉ ኃይል ወለኵሉ ነፍስ ሐዋፂ ብርሃን ዘእምቅድም ዓለመ ሐታሚ መራሔ ሕይወት ወበቋዔ ተድላ ዘኢይመውት። ዘአውፃእከነ እምዕቅፍተ ጽልመት ወብርሃነ ዘኢይትረከብ ጸጎከነ። ዘእማዕሠር ለእለ የአምኑ ብከ ፈቲሐከ በሃይማኖት ከለልከነ። ዘኢይርኅቅ እምኣግብርቲሁ ወትረ ዘምስሌሆሙ ይሄሉ ዘኢይጸመም ለዘበፍርሃት ወበረዓድ ትስእሎ ነፍስ

እምቅድመ ሕሊና ኵሎ የአምር ወእምቅድመ ሕሊና ይፈትን። ወዘእንበለ ንስአል ይሁብ ፍትወተነ ዘእምፈቃዱ ወይሰምዐነ እለ እንበለ ኑፋቄ ንጼውዖ። ዘኢይትነገር ብርሃን ንጉሠ ሠራዊተ ሰማያት ሰማዒ ስብሐተ ማኅሌት ዘሊቃነ መላእክት ዘዲቤሆሙ የዕርፍ። ስምዐነ ንስእለከ እግዚኦ። ሀበነ በትውክልት ቃለ ዘኢያረምም። ኪያከ ንሰብሕ ኪያከ ናእኵት ወኪያከ ንባርክ ወከመ ብከ ንፀወን ንሕነ አግብርቲከ ነሴብሐከ እግዚኦ።

ሕዝብ ኪያከ ንሴብሕ እግዚኦ።

እግዚኦ ኢየሱስ ክርስቶስ ስምዐነ ቅዱሰ። ለበሐማን ኮኖሙ ቃለ ለስቡራን ምርጕዝ ወለዕውራን ብርሃነ ወለሐንካሳን ፍኖት ወለዘለምጽ መንጽሒ። እኁዛተ ሕማማት እግዚእ ፈወስከ ለጽሙማን መፈውስ። ለሞት ዘልፎ ወለጽልመት ሣቀዮ። ዘገብረ ብርሃነ ፀሓይ ዘኢየዐርብ ወማኅቶት ዘኢይጠፈእ። ፀሓይ ዘዘልፈ ያበርህ ዲበ ቅዱሳን ወኵሎ ተከለ ለሠርጐ ዓለም በሥምረት እቁም።

ገሃደ ለኵሉ ሠረቀ ለሰብእ መድኃኒት መያጢሃ ለነፍስ ወኵሎ በዘይደሉ አቅደምከ ሐልዮ። ገባሬ መላእክት አበ ኩሉ ሠርጐ ዓለም ሣራሪሃ ለምድር፡፡ ጥበብ ወአእምሮ እምአብ ዘሀሎ እምቅድም ውስተ ዓለም ተፈነወ ዝ ህሉና ዘኢይትነሠት ወዘኢይተረጐም መንፈስ ዘኢያስተርኢ። ዜናዊ ስቡሕ አንተ ወመንክር ስምከ ወበእንተ ዝንቱ ንሕነ አግብርቲከ ንዌድስ እግዚኦ።

ሕዝብ ኪያከ ንዌድስ እግዚኦ።

ካህን ንሄልስ ለከ ዘንተ ቅዱሰ ስብሐተ ዘወሀብከነ ዚአከ ሃይማኖተ ዘኢይትነሠት ወቦቱ ገበርከ ለነ ንማዕ ማዕሠሪሁ ለሞት። ዘፈጠርከ ሕሊናተ ርቱዓተ ለእለ የአምኑ ብከ ከመ እምሰብእ ይኩኑ አማልክተ ዘወሀብከነ በመንፈስ ንኪድ ኵሎ ኃይሎ ለጸላኢ ከመ ንፍታሕ ዘኢይትፈታሕ ፍቅረ ለነ ኀበ አቡከ ገበርከ ወዐረቀ ማእከሌነ።

ጸሎተ ኪዳን ዘነግህ ስማዕ እግዚኦ እለ ኪያከ ይስእሉ። እግዚኦ እለ ንስእለከ ኢንሰተት አላ በስክየት ዲበ ጸላኢነ ነሀሉ። ሀበነ ዘወትር ጸሎተነ እምኂጠተ ጸላኢ ንትዐቀብ። ስማዕ ዘለዓለም ንጉሥ መዓስበ ናዝዝ እጓለ ማውታ ተወከፍ ሲያነ በምሕረትከ ኣንጽሕ አብዳነ ጥበብ ወኅላነ ሚጥ እለ ውስተ ሞቅሕ አድኅን ወለኵልነ ኩን ፀወነ እስመ ለከ እግዚኦ መንግሥት ቡሩክ።

ሕዝብ:- አሜን።

ካህን ለከ ለአብ ዘኢይማስን መድኃኔ ነፍስነ ወመሠረተ ጥበባት ዐቃቤ አልባቢነ፡ ዘእንተ ውስጥ ዓይነነ አብራህከ ወጽልመተ ሕሊናነ በዘዚአከ አእምሮ ከለልከነ አንተ። ዘተውህበ ለሙስና ዘትካት ብእሴ ኣድኀንከ በመስቀሉ ለዋሕድከ ወሐደስኮ በዘኢያማስን ዘስሕተታት በጠላ በትእዛዝከ ወበሞተ ወልድከ ቤዘወከ ወዘተገድፈ ኅሠሥከ። በእንተ ዝንቱ ንሕነ ኣግብርቲከ ንሴብሐከ እግዚኦ።

ካህን ኣእኵትዎ ለአምላክነ። ሕዝብ ርቱዕ ይደሉ።

ሕዝብ :- ንሴብሐከ እግዚኦ።

ካህን ንዌድስ እግዚኦ ዘወትረ ይሴብሑ ስብሐት ማኅሌት ዘሊቃነ መላክት በኢያረምሞ እንበለ ዕረፍት ውዳሴ ስብሐት ወአኰቴት ዘአጋዕዝት በመኃልይ ይሴብሑከ እግዚኦ ዘፈኖከ ምክረከ ዚኣከ ቃለ ዚኣከ ጥበበ ወዘዚአከ ሕዋጼ ዘሀሎ ምስሌከ እምቅድም ዓለም እንበለ ይትገበር ዘኢተገብረ ቃል ዘተርእየ በሥጋ ለመድኃኒተ ትዝምደ ሰብእ፡ ወልድከ ወፍቁርከ እግዚእነ ኢየሱስ ዘአግዐዘነ እምአርዑተ ኃጢኣት። ወበእንተ ዝንቱ ንሕነ አግብርቲከ ንዌድሰከ እግዚኦ።

ሕዝብ :- ንዌድሰከ እግዚኦ።

ካህን ለከ ዘእምልብነ ውዳሴ ንሄልስ ወሀቤ ሕይወት እግዚኦ። ሐዋዌ ነፍሰ ትሑታን መንፈሰ ምንዱባ ኢተሐየየ ዘይትዌከፎሙ ለእለ ይሰደዱ ረዳኢ ወለእለ ውስተ ሠርም ይትመነደቡ መድኅን ለርኁባን ዘይሄሊ ወይትቤቀል ለግፉዓን። ዐርከ መሐይምናን መስተናግር ለጻድቃን ወማኅደር ለንጹሓን፡ ወለእለ በጽድቅ ይጼውዕዎ ሰማዒ ለመበለት ከዳኒ ወባላሒ ለእጓለ ማውታ ዘይሁብ መርሐ ርቱዐ ለቤተ ክርስቲያን ዘተከላ ላቲ ምዕራፈ ስብሐተ ሃይማኖት ጉባኤ መንፈስ ሀብተ

ጸጋ ወኃይል። ለከ እንዘ ንዌድስ ወኢነዐርፍ ለዝሉፉ በአልባቢነ ናስተማስል አምሳለ መንግሥትከ ቦቱ። በእንቲአከ ወበእንተ ፍቁር ወልድከ እግዚእነ ኢየሱስ ዘቦቱ ለከ ስብሐት ወእኂዝ ለዓለመ ዓለም።

ሕዝብ:- አሜን።

ጸሎት አቡነ ዘበሰማያት ጸሎተ ቡራኬ