ዘዘወትር

ተፈሥሒ ማርያም ድንግልተ ሥጋ ወሕሊና ፤ ተፈሥሒ ማርያም ወለተ ኢያቆም ወሐና ፤ ጳጦስ አንቲ ዘአስተርአይኪ በደብረ ሲና ፤ ጎመረ ወርቅየ መሥፈርቱ ለመና ፤ ማርያም ለዕበየኪ ይደሉ መሐና፡፡ ተፈሥሒ ማርያም ድንግልተ ሕሊና ወሥጋ ፤ ተፈሥሒ ማርያም እንበለ ሕፀዕ ወንትጋ ፤ ተፈሥሒ አንቀጽ ዘኢተርኀወ መንሥጋ ፤ ለነፍስ ዚአየ ውስተ ሲፆል ኢይኀድጋ ፤ ፍሬ ማሕፀንኪ ወልድ ይክፍለኒ ፀጋ ፤ ኀበ ይገብሩ ኀሩያን እንግልጋ፡፡ ተፈሥሒ ማርያም ደደልወኪ ተፈሥሖ ፤ ተራኅርኂ ድንግል ዘልማድኪ ተራኀርኆ ፤ ገብርኪ ኃጥእ ሶበ፡፡ ጸራኀኩ በከልሖ ፤ ለቃለ አፉየ ተወኪፈኪ ጽራኈ ኦሆ ኦሆ በልኒ ኦሆ ፤ ለቤተ መርዓ እሁበከ መርኆ። ተፈሥሒ ማርያም ወለተ ሣራ ወርብቃ ፤ ተፈሥሒ ማርያም ለደወለ ምስር ማዕንቃ ፤ ለረዲኦተየ ፍጡነ እንተ ትሰወጢ ከመ ባዚቃ ፤ ብጽሒ በኢጐንድዮ ኀበ ሃሎኩ ጥቃ ፤ ከመ ትፈጽሚ ለልብየ ጻሕቃ፡፡ ተፈሥሒ ማርያም እንተ አልብኪ ምሳሌ ፤ ተፈሥሒ ማርያም ታቦተ ኀርመት ወጽሌ ፤ ተፈሥሒ ጽሪት ዘዕረፍትየ ቢረሌ ፤ አስተበዕፅ አንሰ በጉባዔ ዘለኪ ድንጋሌ ፤ በኢውላውሌ እንዘ እንብ እሌ ፤ አንገፈኒ በትንባሌ እምብካይ ወወይሌ፡፡ ተፈሥሒ ማርያም በአክናፈ ንጽሕኪ ምንታዌ ፤ ዘአምሰጥኪ ቅድመ እምቄዓተ ሕምዙ ለአርዌ ፤ መጽሐፈ ብስራት ይብሉኪ እለ ሀለው ምድረ ጼዋዌ ፤ መክፈልተ ርስትየ አንቲ ማርያም እንተ አልብኪ ምንሣዌ ፤ ዘፈለጠ ሊተ ኢያሱ ዘነዌ፡፡ ተፈሥሒ ማርያም ወለተ አዳም ወሔዋ ፤ ተፈሥሒ ማርያም ሐዳስዩ ጣዕዋ ፡፡ ርጢነ መደኃኒት ወልድኪ ለቊስልየ ዘየሐይዋ ፤ ቀይዩ በሰይፍኪ ለፀርየ ነዋ ፤ ሰይጣን ስሙ ለነፍስየ ዕድዋ ፡፡ ተፈሥሒ እብለኪ ማርያም በከመ ገብርኤል መልአክ ፤ ቡርክት አንቲ እምአንስት ወፍሬ ከርሥኪ ቡሩክ ፤ ለዕበየ ንግሥኪ ዘልፈ እንዘ እሰግድ በብረክ ፤ አመሥጥ አንሰ በጽንዕኪ ዘእምጸርየ ድሩክ ፤ ዘይፈቅድ ይንእወኒ በጽባሕ ወሠርክ ። ተፈሥሒ ማርያም ሰርጐ አሮን ሌዋዊ ፤ ተፈሥሒ ማርያም ወለተ ዳዊት ሰንቃዊ ፤ ሙካፈ ስእለቱ ለኢዮብ አመ በቍስሉ ይደዊ ፤ ከመ ትሂጲዮ ለፀርየ ነፍሳተ ብዙኃን ነዓዊ ፤ በዲበ አብትር ቀስተኪ ቀስትዊ። . ተፈሥሒ ማርያም ዘኢየኃልቅ ትፍሥሕትኪ፤ተፈሥሒ ማርያም ዘኢይቀብል መዝገብኪ፤ ተፈሥሒ ማርያም ዘኢየሐጽጽ ዝክረ ውዳሴኪ ፤ ኢትመንኒ ለገብርኪ ዘአጥረይኒ ወልድኪ፤ እስመ አንቲ ሊተ ወአነ ለኪ ። በመኑ እትሜካህ ማርያም ዘንበሌኪ ምክህየ ቀርነ መድኃኒትየ ፤ ብኪ ፀናዕኪ እምከርሠ እምየ ፤ ማርያም ጠረቤዛሁ ለቍርባነ ወንጌል ብዕልየ ውስተ እዴኪ ገደፍኩ ነፍስየ ወሥጋየ። . በመኑ እትሜካህ ማርያም ዘንበሌኪ ክብረ ኵሉ ፤ ነቅዓ ምድር አንቲ ወጠለ ሰማይ ዘላዕሉ ፤ አንቲ ውእቱ ለዳዊት ሰንጐ አክሊሉ ፤ ብኪ እለ ተወከሉ ኢተኃፍሩ ወኢተኃጉሉ መገቦሙ ወመርሆሙ ወልድኪ በሣህሉ። በመኑ እትፌሣሕ ማርያም ዘእንበሌኪ ፍሥሐ ፤ እንተ ወለድኪ መሲሐ ፤ከመ አሐሊ ለኪ ምሕረተ ወፍትሐ ፤ ሶበ እዜከር ርኅራኄኪ ንሕኑሐ ፤ ወዝሕዙሐ እምሀኬቱ ኅሊናየ ነቅሐ። . ምንተኑ አዐሥየኪ ዕሤተ ፤ በእንተ ኵሉ ዘገበርኪ ሊተ ፤ ማርያም ሠናይት ዘታፈቅሪ ምሕረተ ፤ ሶበሰ ትትዓቀቢ ዘዚአየ ኀጢአተ ፤ እምኢሐየውኩ አሐተ ሰዓተ። በሰላመ ገብርኤል መልአክ እግዝእትየ ማርያም ሰላም ለኪ ፤ ድንግል በሕሊናኪ ወድንግል በሥጋኪ ፤ እመ እግዚአብሔር ጸባኦት ሰላም ለኪ ፤ ቡርክት አንቲ እምአንስት ወቡሩክ ፍሬ ከርሥኪ ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ።