
መልክአ ሥላሴ ሥላሴክሙ ሥላሴ ይሬስየኒ መካነ ድኅረ ተወሐድኩሰ ዘሥላሴሁ ብርሃነ ዮርዳኖሰክሙ ዝየ እስመ ኵለንታየ ኮነ ኢየኃሥሥ እምዮርዳኖስ ሰማዕተክሙ ምዕመነ ወኢይትሜነዮ ለታቦር እስመ ታቦር አነ። ዚቅ፡ ሃሌ ሉያ (5) ፤ነአምን በአብ ወነአምን በወልድ ወነአምን በመንፈስ ቅዱስ፤ እማርያም ዘተወልደ አፍቂሮ ኪያነ መጽዓ ኀቤነ፤ዘነቢያት ሰበኩ ለነ በዮርዳኖስ ተጠምቀ፤ከመ ይፈጽም ኵሎ ሕገ ወአስተርአየ ገሃደ።
ማኅፀንኪ እግዝእትየ ማርያም ይከብር ምስብዒተ እምጽርሐ አርያም ዘላዕሉ ወእምኪሩቤል ትርብዕተ ፱ ተ አውራኃ ወ ፭ ተ ዕለተ ፆረ ዘኢይፀወር መለኮተ አግመረ ዘኢይትገመር እሳተ ይትባረክ ስምኪ ማርያም ዘአውፃእክነ እምጸድፍ በርኅራኄኪ ትሩፍ ይዌድሱኪ ኪሩቤል በዘኢያረምም አፍ ሐራ ሰማይ ትጉሃን እኁዛነ ሰይፍ ዄላቋሆሙ አእላፍ አምሳለ ደመና ይኬልሉኪ በክንፍ።
ሰላም ለዝክረ ስምኪ ዘመንክር ጣዕሙ ለወልድኪ አምሳለ ደሙ መሠረተ ሕይወት ማርያም ወጥንተ መድኃኒት ዘእምቀዲሙ ኪያኪ ሠናይተ ዘፈጠረ ለቤዛ ዓለሙ እግዚአብሔር ይትባረክ ወይትአኰት ስሙ።
መልክአ ሚካኤል ሰላም ለአጽፋረ እግርከ ፍናዋተ ረድኤት በተኃልፎ ዘኢተዳደቆን እብነ አዕቅፎ ሚካኤል ቀዳሲ ትሥልስተ አካላት በኢያዕርፎ ኢትኅድገኒ በዓለም እስመ ኪያከ እሴፎ አልቦ ብእሲ ዘየኀድግ ሱታፎ። ዚቅ ቅዱስ ቅዱስ ቅዱስ እግዚአብሔር ዘበተዋሕዶ ይሤለስ እምኀበ ትጉሃን ይትቄደስ እሳተ ሕይወት ዘኢይትገሰስ ወዘኢይጤየቅ ለዐይን ረቂቅ መንፈስ ንሰግድ ለትሥልስቱ አሐተ ስግደተ ወሎቱ ናቄርብ ስብሐታተ።
መልክአ ሚካኤል ሰላም ለአጽፋረ እግርከ ፍናዋተ ረድኤት በተኃልፎ ዘኢተዳደቆን እብነ አዕቅፎ ሚካኤል ቀዳሲ ትሥልስተ አካላት በኢያዕርፎ ኢትኅድገኒ በዓለም እስመ ኪያከ እሴፎ አልቦ ብእሲ ዘየኀድግ ሱታፎ። ዚቅ ይቤ ሚካኤል ሰባሕኩከ በዮርዳኖስ በቅድመ ዮሐንስ መጥምቅ ሰባሕኩከ በደብር በቅድመ ሙሴ ወኤልያስ ነቢያት ምዕመናኒከ ሰባሕኩከ ሰባሕኩከ ወዓዲ እሴብሐከ።
መልክአ ኢየሱስ ሰላም ለዝክረ ስምከ ስመ መሐላ ዘኢይሄሱ ዘአንበረ ቅድመ እግዚአብሔር በአትሮንሱ ኢየሱስ ክርስቶስ ለዳዊት ባህርየ ከርሱ አክሊለ ስምከ እንዘ ይትቄጸል በርእሱ አህጉረ ፀር ወረሰ ኢያሱ። ዚቅ ይትባረክ እግዚአብሔር አምላከ እሥራኤል ዘገብረ ዐቢየ ወመንክረ ባሕቲቱ ወይትባረክ ስመ ስብሐቲሁ ቅዱስ ወይምላዕ ስብሐቲሁ ኵሎ ምድረ ለይኩን ለይኩን።
መልክአ ኢየሱስ ሰላም ለክሳድከ ግብረ መንፈስ ቅዱስ ኬንያ አዳም ስና ወመንክር ላህያ ኢየሱስ ክርስቶስ ነቢይ ወሐዋርያ አመ ወጽአ ስሙዓቲከ በአድያመ ኵሉ ሦርያ ብፁዓት አይዕንት ኪያከ ዘርእያ ዚቅ ምድረ ዛብሎን ወንፍታሌም ፍኖተ ባሕር ማዕዶተ ሦርያ ዘገሊላ ሕዝብ ዘይነብር ውስተ ጽልመት ርእዩ ብርሃነ እስመ ብርሃን ሠረቀ ሎሙ ይትፌሣሕ ሰማይ ወትትሐሰይ ምድር እስመ ኢየሱስ ክርስቶስ መጽአ ውስተ ዓለም ንዑ ናንሶሱ በብርሃኑ።
መልክአ ኢየሱስ ሰላም ለመከየድከ አሐዱ አሐዱ ውስተ ቤተ መቅደስ ለምሕሮ እለ ገይሠ ለመዱ ኢየሱስ ክርስቶስ ለመዓዛ ፍቅርከ ዕቊረ ናርዱ አኃዊከ ሰማዕታት ቈላተ ሕማማት ወረዱ ወጻድቃኒከ ገዳማተ ዖዱ። ዚቅ ሠራዊተ መላእክቲሁ ለመድኃኔዓለም ይቀውሙ ቅድሜሁ ለመድኃኔዓለም ወይኬልልዎ ለመድኃኔዓለም ሥጋሁ ወደሙ ለመድኃኔዓለም ወንብጻሕ ቅድመ ገጹ ለመድኃኔዓለም በአሚነ ዚአሁ ሰማዕታት ከዓዉ ደሞሙ በእንቲአሁ።
ምስባክ ባሕርኒ ርእየት ወጐየት ወዮርዳኖስኒ ገብአ ድኅሬሁ አድባር አንፈርዐጹ ከመ ሐራጊት መዝ፣ 113 ቁ 3
ወንጌል የማቴዎስ ወንጌል ምዕራፍ 3 ቁ. 13-ፍፃሜ
ምልጣን እንዘ ሥውር እምኔነ ይእዜሰ ክሡተ ኮነ ማየ ረሰየ ወይነ ተአምረ ወመንክረ ገብረ መድኃኒነ በቃና ዘገሊላ ከብካብ ኮነ። እስመለዓለም ዘበዳዊት ተነበየ ወበዮሐንስ ጥምቀተ ኃርየ በቃና ዘገሊላ ማየ ወይነ ረሰየ መዓዛ ቃልከ ይትወከፍ ጸሎትየ
ዕዝል ሃሌ ሉያ አስተርአየ ዘኢያስተርኢ ኮነ እሙነ አስተርእዮቱ ለመድኃኒነ ክርስቶስ እንዘ ይገብር ተአምረ ወመንክረ በውስተ አሕዛብ ወለማይኒ ረሰየ ወይነ።እሬስዮ ወአነሂ በኵርየ እሬስዮ ምልጣን እንዘ ይገብር ተአምረ ወመንክረ በውስተ አሕዛብ ወለማይኒ ረሰየ ወይነ።
አቡን በ ፭ ሃሌ ሉያ፣ ሃሌ ሉያ፣ሃሌ ሉያ፣ሃሌ ሉያ፣ሃሌ ሉያ፣ ወእንዘ ሀለዉ ውስተ ከብካበ ቀርቡ ኃቤሁ ኵሎሙ አርዳኢሁ አንከርዎ ለማይ አዕኰትዎ ለኢየሱስ በእንተ ማይ ዘኮነ ወይነ። ምልጣን አንከርዎ ለማይ አንከርዎ አዕኰትዎ ለኢየሱስ አንከርዎ ለማይ አንከርዎ።ያበውኡ ቁርባነ።
ዓራራይ፡ ለዘተወልደ እምቅድስት ድንግል ምንተ ንብሎ ናስተማስሎ ለመድኃኒነ አርዌ ገዳምኑ አንበሳ ወሚመ ከራድዮን ዖፍ ፀዓዳ ንጉሥ አንበሳ እምዘርዓ ዳዊት ዘመጽአ። ቅንዋት፡ እምሰማያት ወረደ ወእማርያም ተወልደ ከመ ይሥዓር መርገማ ለሔዋ ዲበ ዕፅ ተሰቅለ በሠላሳ ክረምት በዮርዳኖስ ተጠምቀ ዘነቢያት ሰበክዎ ወአስተርአየ ገሃደ።
ሰላም፡ በ ፪ - ሃሌ ሉያ፣ ሃሌ ሉያ ዮም ተጠምቀ እግዚእ ወመድኅን በፍሥሐ ወበሰላም።
ወረብ ፩ ኛ/ ይትባረክ እግዚአብሔር አምላከ እሥራኤል፤ ዘገብረ ዓቢየ ወመንክረ ባሕቲቱ እግዚአብሔር ፪ ኛ/ ኢየሱስ ክርስቶስ መጽአ ውስተ ዓለም በብርሃኑ ንዑ ናንሶሱ በብርሃኑ ንዑ ናንሶሱ ፫ ኛ/ ሠራዊተ መላእክቲሁ ለመድኃኔዓለም ይቀውሙ ቅድሜሁ ለመድኃኔዓለም በአሚነ ዚአሁ ሰማዕታት ከዓዉ ደሞሙ። ፬ ኛ/ ተአምረ ወመንከረ ገብረ መድኃኒነ በቃና ዘገሊላ ዘገሊላ ከብካብ ኮነ። ፭ ኛ/ አማኅኩኪ ቅድስት ቤተ ክርስቲያን ከብካብ ኮነ በቃና ዘገሊላ ደምፀ ዕንዚራ ውስተ ቤተ ሊቀ መላእክት።
መዝሙር፤ በ ፫ አጥምቆ ዮሐንስ ለኢየሱስ ወገሠሦ እንተ ኢትትገሠሥ ርእሶ አጥምቆ ዮሐንስ ለኢየሱስ ወገ ወገሠሦ እንተ ኢትትገሠሥ ርእሶ ተቀደሰት ማይ በጥምቀቱ አጥምቆ ዮሐንስ ለኢየሱስ ተቀደሰት ማይ በጥምቀቱ ፈልሑ ማያት ዲበ ርእሱ አጥምቆ ዮሐንስ ለኢየሱስ ኢየሱስ ክርስቶስ ቀደሳ ወአክበራ ወአልዓላ ለዕለተ ሰንበት።
መዝሙር፤ ሃሌ ሉያ (፫) ሖረ ኢየሱስ በትፍሥሕት ውስተ ከብካብ እንዘ ይገብር ተአምረ ወመንክረ በውስተ አሕዛብ ሖረ ኢየሱስ በትፍሥሕት ውስተ ከብካብ አርአዮሙ ሰብሐቲሁ አምኑ ቦቱ አርዳኢሁ ሖረ ኢየሱስ በትፍሥሕት ውስተ ከብካብ ወይቤሎሙ ቅድሁ ማየ ወምልእዎን ለመሳብክት እስከ አፉሆን ሖረ ኢየሱስ በትፍሥሕት ውስተ ከብካብ ጥኢሞ አንከረ ሊቀ ምርፋቅ በረከተ ዘአምላክ ገብረ ሖረ ኢየሱስ በትፍሥሕት ውስተ ከብካብ ቤዛነ ተስፋነ ወልደ አምላክ ወለማይኒ ረሰዮ ወይነ።
ሰላም፤ መንክር ምጽአቱ፤ ወመንክር ልደቱ፤ ወመንክር ጥምቀቱ ዘዮሐንስ አጥመቆ ርእየ ወስዕነ ጠይቆቶ በፍሥሐ ወበሰላም ተቀደሰት ማይ በጥምቀቱ
ዝማሬ፤ ንኡ ርእዩ ዘንተ መንክረ ዕፁበ ግብረ ዘገብረ መድኃኒነ በቃና ዘገሊላ ማየ ረሰየ ወይነ ይጸምእኑ ዘገሠጸ ባሕረ ወነፋሳተ ዘይቤ አነ ውእቱ ኅብስተ ሕይወት ዘበልዐ እምኔሁ ኢይመውት ለዓለም ዓለም ይጸምእኑ ዘገሠጸ ባሕረ ወነፋሳተ ዘይቤ አነ ውእቱ አፍላገ ማየ ሕይወት ዘይውኅዝ እምከርሡ ይጸምእኑ ዘገሠጸ ባሕረ ወነፋሳተ ዘአጽገቦሙ ኢየሱስ ለሃምሳ ምእት በክልኤ ዓሣ ወበኃምስቱ ኅብስት ይጸምእኑ ዘገሠጸ ባሕረ ወነፋሳተ ለዘከመዝ ግብሩ ምንት አጽሃቆ ይስተይ።

መልክአ ሥላሴ

ዚቅ፡

መልክአ ሚካኤል

ዚቅ

መልክአ ሚካኤል

ዚቅ

መልክአ ኢየሱስ

ዚቅ

መልክአ ኢየሱስ

ዚቅ

መልክአ ኢየሱስ

ዚቅ

ምስባክ

ወንጌል

ምልጣን

እስመለዓለም

ዕዝል

ምልጣን

አቡን በ ፭

ምልጣን

ዓራራይ፡

ቅንዋት፡

ሰላም፡

ወረብ

መዝሙር፤ በ ፫

መዝሙር፤ ሃሌ ሉያ (፫)

ሰላም፤

ዝማሬ፤