ሰላም ለፍልሰተ ሥጋኪ ምስለ ነፍስኪ ኢመዋቲ።
በተሰናዕዎ አሐቲ። ድንግል በክልኤ ማርያም ወለተ ማቲ።
ሐመረ ተርሴስ ዘሰሎሞን አንቲ።
እንተ አእተዉ ጠቢባን ወርቀ ያፌር ባቲ።

ሰላም ለፍልሰተ ሥጋኪ መካነ ፍሥሐ ወኑዛዜ።
ኀበ ይረስእዎ ለላሕ ወኢይሄልይዎ ለትካዜ።
ማርያም ህሉት ውስተ ልበ አምላክ እምቅድመ ጊዜ።
ትፍሥሕተሰ ተፈሣሕኩ በፍልሰትኪ ይእዜ።
ገጸ ዚአኪ እሬኢ ማዕዜ።

ሰላም ለፍልሰተ ሥጋኪ እግዚአብሔር ዘባረካ።
ወአልዓለ ክብራ እምፍልሰተ ሄኖክ ወልደ ባረካ።
ማርያም ፍሥሕት ወብርህት ዕለተ ዋካ።
በእንቲአኪ ይገብሩ ውስተ ሰማያዊት ታዕካ።
ነገደ መላእክት አእላፍ ሱባዔ ፋሲካ።

ሰላም ለፍልሰተ ሥጋኪ ዘኢይቀብል ሞገሱ
ወዘኢይነጽፍ ባሕረ ተውዳሱ።
ማርያም ታዕካ ለእግዚአብሔር ጽርሐ መቅደሱ።
ተበሃሉ በሰማያት እለ ኪያኪ አፍለሱ።
ማርያም እንተ በምድር ታንሶሱ።

ሰላም ለፍልሰተ ሥጋኪ ውስተ ልበ ሰብእ ዘኢተሐለየ።
እንዘ ትትዓጸፊ ጸጋ ወትለብሲ ዕበየ።
ማርያም ሥጋኪ ዘተመሰለ ባሕርየ።
ተሀውከ ሞት አኮኑ ሶበ ነጸረ ወርእየ።
እንዘ በደመና ብሩህ የዓርግ ሰማየ።

ሰላም ለፍልሰተ ሥጋኪ ዘአፈድፈደ ስባሔ።
እምፍልሰተ ያዕቆብ ዓርከ ኤሎሄ።
ማርያም ቀንሞሰ ማርያም አፈወ ርኄ።
እንዘ ብርሃን ይለብሱ ወይትአጸፉ ሡራሔ።
ሞገሰ ፍልሰትኪ መላእክት ሰበኩ ኩለሄ።

ሰላም ለፍልሰተ ሥጋኪ ለሊቀ ካህናት ዘአደሞ።
መሥዋዕተ መድኃኒት ያዕርግ ቅድስተ ቅዱሳን ቀዊሞ።
ለመልአከ ሞት ጸዋግ መልአከ መልአከ በቀል ወተቀይሞ።
ሚ መጠነ አድወዮ ወሚ መጠነ አሕመሞ።
ሞገሰ ፍልሰትኪ ማርያም ዘአምላክ ሐተሞ።

ሰላም ለፍልሰተ ሥጋኪ እምዓለም መትሕት ኃላፊ።
ውስተ ዓውደ ኪሩብ ተሀሉ እንዘ የዓቅባ ሱራፊ።
ማርያም ምዕዝት እምስነ ጽጌያት ዘወርኃ ተውፊ።
ናሁ ተሰጠምኩ ውስተ ባሕረ ስሕተት ጸናፊ።
በሐመረ ንጽሕኪ ወትረ ኪያየ ሐድፊ።

ሰላም ለፍልሰተ ሥጋኪ ስቡሐ ዘተሰብሐ።
እንበሌኪ ድንግል ወእንበለ ወልድኪ በኵረ ፍሥሐ።
እምፀዳለ ፀሐይ ወወርኅ ሥነ ስብሐቲሁ አብርሃ።
አልቦ ለሞት ማዕሠሪሁ ዘፈትሐ። ወሙታነ ዘሲኦል አንቅሐ።

ሰላም ለፍልሰተ ሥጋኪ ዘአጥናን ኃይሉ።
ወአኤናዎን መዝራእተ ሣህሉ።
ማርያም ሣህልኪ ለትውልደ ትውልድ ዘይሄሉ።
አምጻዒተ ምሕረት ማርያም ለኃጥአነ ምድር ኵሉ።
ወቡርክት ማርያም ለክርስቶስ አባሉ።

ሰላም ለፍልሰተ ሥጋኪ በሰዋስወ ብርሃን ምጡቅ።
ከመ ትኵኒዮሙ እመ ለኅሩያን ደቂቅ።
ተሣየጥኒ ማርያም በንዋየ ሣህልኪ ጽድቅ።
ከመ ይሠየጡ በዕለተ ፍትወት ወጻሕቅ።
ዘመደ ኣእዋፍ ሐምስ በክልኤ ጸሪቅ።

ሰላም ለፍልሰተ ሥጋኪ እግዚአብሔር ዘተዋሐዳ።
ወተካፈለ ክበዳ።
ለፍልሰትኪ ድንግል እምኢየሩሳሌም ምድረ ይሁዳ።
አፈወ ስኂን ወተዝካረ ዕጣን ፀዓዳ።
ነገሥተ ተርሴስ ወደሰያት ያበውኡ ጋዳ።

ሰላም ለፍልሰተ ሥጋኪ እግዚአብሔር ዘዓልዓሎ።
እምፍልሰተ ኤልያስ ነቢየ ሴሎ።
ማርያም ሰድኒ ውስተ ብሔረ ትፍሥሕት በክነፈ አውሎ።
ለምንት ሊተ በነዘሕላል ውስተ ብሔረ ስሕተት እዴሎ።
እንዘ ይደግነኒ ሞት ዘይእኅዝ ኵሎ።

ሰላም ለፍልሰተ ሥጋኪ ውስተ ብሔር ሥዑር።
እንተ ኬንያሃ ወገባሪሃ ወልደ እግዚአብሔር።
ማርያም ኅብእኒ እምግብርናተ ሞት መሪር።
ሶበሰ ትፈቅዲ ንግሥተ ሰማያት ወምድር።
ኢይሰአነኪ አግዕዞቶ ለኃጥእ ገብር።

ሰላም ለፍልሰተ ሥጋኪ መካነ ፍሥሐ ምጡቀ።
በአዕባነ ባሕርይ ዘተነድቀ።
ማርያም ደብተራ እንተ ኢትትከደኒ ሰቀ።
ጽሒፈ ውዳሴኪ እምኢኀልቀ።
ሶበ ኮነ ጥቀ ዝናመ ክረምት ቀለመ ወሰማይ ረቀ።

ሰላም ለፍልሰተ ሥጋኪ ወለተ ንጉሥ ይሁዳ።
ወወለተ ሌዊ እኁሁ ዘሀብተ ክህነቱ አገዳ።
ማርያም ድንግል ምዕዝት ዘእምጽጌ ረዳ።
በጽሒፍ ኢይፌጽሞ ለስብሐትኪ እንግዳ።
እመ ኮነ በቅድሜየ ስፍሐ ምድር ሰሌዳ።

ሰላም ለፍልሰተ ሥጋኪ ደባትረ ብርሃን ኀበ ተተክሉ።
ለገነተ ጽባሕ በማዕከሉ።
ውድስት አንቲ ወስብሕት በአፈ ኵሉ።
እምነ ጻድቃን ዘታሕቱ ወእምትጕሃን ዘላዕሉ።
ማርያም ለኪ ስብሐተ አደሉ።

ሰላም ለትንሣኤ ሥጋኪ ዘትንሣኤ ክርስቶስ መንታ።
ርእሶ ሕያወ ድኅረ ኀብአ ውስቴታ።
በጽላሎትኪ ኅብእኒ ማርያም ርግበ ኤፍራታ።
ወሠውርኒ በአክናፍኪ አመ ይከውን ሓተታ።
ወአመ ታገብእ ምድር ዘነሥአት ማኅፀንታ።

ሰላም ለዕርገተ ሥጋኪ ዘተወጥነ ቦቱ።
ዕርገተ ቅዱሳን ሰብእ ዘበኀቤኪ ተአኵቱ።
ለሊቀ ካህናት አሮን ማርያም ሠርጐ ትርሢቱ።
ሥዑለ ይኩን በልብስኪ እንተ ላእሉ ወታሕቱ።
ፍሬ ከናፍር ወአፍ ውዳሴኪ ዝንቱ።

ሰላም ለጊዮርጊስ ተውላጠ ፃማሁ ወሕማሙ።
እንተ ተለዓለ ሞገሰ ስሙ።
በፍልሰትኪ ድንግል (ዮም) ተቶስሐ ፍልሰተ ዓፅሙ።
እንዘ ይብል ሶበ ጸለየ አሜሃ ቀዲሙ።
ምስለ ፍልሰትኪ ደምርኒ እሙ።

ስብሐት ለኪ ማርያም ለአብ መርዓቱ።
ስብሐት ለኪ ማርያም ለወልድ ወላዲቱ።
ስብሐት ለኪ ማርያም ለመንፈስ ቅዱስ ጽርሐ ቤቱ።
ወርቅሰ ብሩር ኃላፊ ውእቱ።
እምኵሉሰ ብዕለ ዓለም ኪያኪ እፈቱ።

(በዕዝል) ኀበ ተርኅወ ገነት።
ወኀበ ተነጽፈ ዕረፍት።
ይክፍለነ ነሃሉ ውስተ በአቶሙ ለቅዱሳን።