ስምዓኒ እግዚኦ ጸሎትየ፡ ሃሌ ሉያ ሃሌ ሉያ፡ ወይብጻሕ ቅድሜከ ገአርየ፡ ሃሌ ሉያ ሃሌ ሉያ፡ ወኢትሚጥ ገጸከ እምኔየ፡ በዕለተ ምንዳቤየ አጽምእ እዝነከ ኀቤየ፡ ሃሌ ሉያ ሃሌ ሉያ፡ አመ ዕለተ እጼውአከ ፍጡነ ስምዓኒ፡ ሃሌ ሉያ ሃሌ ሉያ፡ ለዓለም ወለዓለመ ዓለም፡ ሃሌ ሉያ ዘውእቱ ብሂል፡ ንወድሶ ለዘሃሎ እግዚአብሔር ልዑል፡ ስቡሕ ወውዱስ ዘሣረረ ኲሎ ዓለመ፡ በአሐቲ ቃል። መልክአ ሥላሴ ሰላም ለመታክፍቲክሙ መሠረተ ዓለም እለ ፆሩ: ኖትያተ ኖኅ ሥላሴ ወዕፀወ ዐባይ ሐመሩ: ዲበ መንበርክሙ ሰብአ ሶበ አምላክ ነጸሩ: ኪሩቤል ወሱራፌል ታህተ እገሪሁ ገረሩ: እስመ ለሊሁ አዘዘ ወእሉ ተፈጥሩ፡፡ ዚቅ እሉ ኪሩቤል ወሱራፌል የዐርጉ ሎቱ ስብሐተ እንዘ ይብሉ ቅዱስ ቅዱስ ቅዱስ አንተ እግዚአብሔር አብ ወወልድ ወመንፈስ ቅዱስ። ነግሥ ሰላም ለክሙ ሚካኤል ወገብርኤል: ሱራፌል ወኪሩቤል ዑራኤል ወሩፋኤል ሱርያል ወፋኑኤል: አፍኒን ወራጉኤል ወሳቁኤል: ሊቃናተ ነድ ዘሰማያዊት ማኅፈድ: በእንተ በግዑ ዕቀብዋ ለዛቲ አፀድ። ወረብ ለዛቲ አፀድ በእንተ በግዑ ዕቀብዋ ለዛቲ አፀድ/፪/ ሊቃናተ ነድ ሊቃናተ ነድ ነድ ሊቃናተ ነድ/፪/ ዚቅ መላእክተ ምሕረት እለ ድልዋን ለሣህል: ሰአሉ አስተምሕሩ ለነ እስመ በጸሎተ ትንብልናክሙ ትድኅን ወኢትማስን ሀገር። መልክአ ሚካኤል ሰላም ለአእናፊከ መዓዛ አርያም እለ ተመልዑ: ሱራፌል ምስሌከ አመ ይሠውዑ: ሚካኤል አንተ ለያዕቆብ ኖላዌ ዘርዑ: በሎሙ ለአብያጺከ ለሐውፆ አርክየ ንዑ: እስመ በአሐዱ ፍቁር ይሰሐብ ካልዑ፡፡ ዚቅ እኲት ወስቡሕ: ዕቀብ ኩልነ ኖላዊ ትጉህ: ሐውፀነ በምህረት ብዙኅ። ወረብ ኖላዊ ትጉህ ኖላዊ ትጉህ/፪/ ሐውፀነ በምህረት ብዙኅ/፬/ ነግሥ ሰላም ለዝክረ ስምኪ ዘመንክር ጣዕሙ: ለወልድኪ አምሳለ ደሙ: መሠረተ ሕይወት ማርያም ወጥንተ መድኃኒት ዘእምቀዲሙ: ኪያኪ ሠናይተ ዘፈጠረ ለቤዛ ዓለሙ: እግዚአብሔር ይትባረክ ወይትአኰት ስሙ፡፡ ዚቅ መላእክት በልሳነ እሳት ይሴብሑኪ: መላእክት በአክናፈ ብርሃን ይኬልሉኪ: ማርያም እምነ: ወእሙ ለእግዚእነ: መላእክት በቀለመ ወርቅ ይጽሕፉ ውዳሴኪ: እስከ ዳግም ምጽአቱ ለበኲርኪ። መልክአ ሩፋኤል ሰላም ለዝክረ ስምከ ተጸውዖ ዘቀደመ: በአፈ አምላክ አዳም እንበለ ይሰመይ ስመ: ሩፋኤል ምልዓኒ ወወስከኒ ዳግመ: መንፈስ ቅዱሳዌ አዕምሮ እንተ ይፈሪ ሰላመ: ወአምላካዌ ጥበበ ዘየአዱ አቅመ፡፡ ዚቅ ሀበነ እግዚኦ አዕይንተ አእምሮ ወትረ ኪያከ ይርአያ: ወአዕዛንነሂ ቃለ ዘባሕቲትከ ይስምዓ። ወረብ ሀበነ እግዚኦ አዕምሮ አዕይንተ አእምሮ ወትረ ኪያከ ይርአያ/፪/ ወአዕዛንነሂ ቃለ ዘባሕቲትከ ይስምዓ/፪/ መልክአ ሩፋኤል ሰላም ለቃልከ ዘይደምፅ እመብረቅ: ለእስትንፋስከኒ እስትንፋሰ መንፈስ ረቂቅ: ሩፋኤል ሐዋርያ ወመልአከ ጽድቅ: ይጸንሑከ እግዚኦ ዕሡራነ በዓል በጻሕቅ: ነዓ ነዓ እምሕላዌከ ምጡቅ ውስተ ቤትከ ዛቲ ክርስቶሳዊት ምርፋቅ፡፡ አመላለስ ሩፋኤል ሐዋርያ/፪/ ወመልአከ ጽድቅ/፪/ ዚቅ ሩፋኤል ግሩም: በመንፈስ ቅዱስ ሕቱም: መዓዛ ቅዳሴከ ጥዑም: ከመ ጽጌ ገዳም: ነዓ ነዓ ማዕከሌነ ቁም: በበዓልከ ባርከነ ዮም። ወረብ ነዐ ነዐ ማዕከሌነ ቁም/፪/ በበዓልከ ባርከነ ዮም/፪/ መልክዓ ሩፋኤል ሰላም ለመዛርዒከ ለአህጒሎ አርዌ ዘጸንዓ: ለኲርናዕከኒ እንበለ ተፈልጦ ዘጸብአ: ሩፋኤል መዋኢ እንተ ትትአጸፍ መዊአ: እምደዌ ኃጢአት ትትፈወስ አባልየ እምርጢንከ ቅብዓ: ለዓይነ ጦቢት ከመ ፈወስኮ ከዊነከ ሰብአ። ዚቅ መልአከ ፍሥሐ ዘይትአጸፍ ነደ: ኀበ ጦብያ ሩፋኤል ወረደ: እምከርሠ ዓሣ ነሢዖ ስብሐ ዘምስለ ዓሣ ዘምስለ ሐሞት ከብደ: አዕይንተ ጦቢት ከሠተ ወአጋንንተ ሰደደ። መልክአ ሩፋኤል ሰላም ለገበዋቲከ ስርግዋነ ምንትው አክናፍ: ለከርሥከሂ ሕሩመ ሲሲት ዘዘልፍ: ሩፋኤል አሐዱ ሊቀ አዕላፍ: አብሥረኒ ነገረ ሣህል ለወልደ ላሜህ ፍልሱፍ: ከመ ሕጸተ ማይ አብሠረቶ የዋሂት ዖፍ፡፡ አመላለስ ሩፋኤል አሐዱ/፪/ ሊቀ አዕላፍ/፪/ ዚቅ ውእቱ ሊቆሙ ወመልአኮሙ: ሩፋኤል ስሙ: ዐይኑ ዘርግብ ልብሱ ዘመብረቅ ሐመልማለ ወርቅ። ወረብ "ሐመልማለ ወርቅ"/፪/ ልብሱ ዘመብረቅ/፪/ ዓይኑ ዘርግብ/፬/ መልክአ ሩፋኤል ተወኪፈከ እግዚኦ ዘንተ አምኃየ: ዘአቅረብኩ ለከ መጠነ ክሂል ዘብየ: ሩፋኤል ባዕል እንተ ታብዕል ነዳየ: ዕስየኒ ለፍቁርከ ዕሤተ ሠናየ: ዘዕዝነ መዋቲ ኢሰምዐ ወዘዐይን ኢርእየ፡፡ ዚቅ ወሰሚአ ሀገር ከልሃት ሎቱ ወትቤ ተወከፈኒ አንተ መልአክ ቅዱስ ገብረ እግዚአብሔር። ወረብ ቅዱስ ቅዱስ ቅዱስ እግዚአብሔር/፪/ ገብረ እግዚአብሔር ተወከፈኒ አንተ መልአክ/፪/ እስመ ለዓለም ዑራኤል ወሩፋኤል: አስተምሕሩ ለነ በስኢል: ወበትህትና ኀበ ውእቱ ነበልባለ ኃይል አመ ይመጽእ በክብር: ምስለ ብዙኅ ስብሐት ወኃይል: ንርከብ ድኅነተ በዘአሜሃ ቀመር: በዐውዱ ፍጹም ዘኢይትነገር፣ ንዕርር ፍሥሐ በሐዳስ ምድር። ወረብ ዑራኤል ወሩፋኤል/፬/ አስተምሕሩ ለነ በስኢል ወበትህትና ኀበ ውእቱ ነበልባል/፪/ አንገርጋሪ ሃሌ ሉያ ይሰግዱ በብረኪሆሙ፡ ወያሌዕሉ ኅሊናሆሙ፡ በጥንቃቄ ወበኃሢሥ፡ ኀበ እግዚኦሙ ንጉሥ፡ ቀዋምያን ለነፍሳት፡ እሙንቱ ሊቃናት፡ ዑራኤል ወሩፋኤል፡ ይትፌነዉ ለሣህል: እምኀበ ልዑል። ወረብ ቀዋምያን ለነፍሳት እሙንቱ ሊቃናት ዑራኤል ወሩፋኤል/፪/ "ይትፌነዉ ለሣህል"/፪/እምኀበ ልዑል/፪/