1 ፍካሬ ፡ ዘጻድቃን ፡ ወዘኃጥኣን ፤ መዝሙር ፡ ዘዳዊት ፡ ሀሌሉያ ።

1 ብፁዕ ፡ ብእሲ ፡ ዘኢሖረ ፡ በምክረ ፡ ረሲዓን ፤ወዘኢቆመ ፡ ውስተ ፡ ፍኖተ ፡ ኃጥኣን ፤ ወዘኢነበረ ፡ ውስተ ፡ መንበረ ፡ መስተሣልቃን ።

2 ዘዳዕሙ ፡ ሕገ ፡ እግዚአብሔር ፡ ሥምረቱ ፤ ወዘሕጎ ፡ ያነብብ ፡ መዓልተ ፡ ወሌሊተ ።

3 ወይከውን ፡ ከመ ፡ ዕፅ ፡ እንተ ፡ ትክልት ፡ ኀበ ፡ ሙሓዘ ፡ ማይ ፤ እንተ ፡ ትሁብ ፡ ፍሬሃ ፡ በበጊዜሃ ።

4 ወቈጽላኒ ፡ ኢይትነገፍ ፤ወኵሎ ፡ ዘገብረ ፡ ይፌጽም ።

5 አኮ ፡ ከመዝ ፡ ኃጥኣንሰ ፡ አኮ ፡ ከመዝ ፤ ዳዕሙ ፡ ከመ ፡ መሬት ፡ ዘይግሕፎ ፡ ነፋስ ፡ እምገጸ ፡ ምድር ።

6 ወበእንተዝ ፡ ኢይትነሥኡ ፡ ረሲዓን ፡ እምደይን ፤ወኢኃጥኣን ፡ ውስተ ፡ ምክረ ፡ ጻድቃን ።

7 እስመ ፡ የአምር ፡ እግዚአብሔር ፡ ፍኖቶሙ ፡ ለጻድቃን ፤ ወፍኖቶሙሰ ፡ ለኃጥኣን ፡ ትጠፍእ ።

9 እግዚኦ ፡ እግዚእነ ፡ ጥቀ ፡ ተሰብሐ ፡ ስምከ ፡ በኵሉ ፡ ምድር ።

2 ትንቢት ፡ እንበይነ ፡ ክርስቶስ ፡ ወጽውዐ ፡ አሕዛብ ፤ መዝሙር ፡ ዘዳዊት ።

1 ለምንት ፡ አንገለጉ ፡ አሕዛብ ፤ ወሕዘብኒ ፡ ነበቡ ፡ ከንቶ ።

2 ወተንሥኡ ፡ ነገሥተ ፡ ምድር ፤ ወመላእክትኒ ፡ ተጋብኡ ፡ ምስሌሆሙ ፡ ኅብረ ፤ ላዕለ ፡ እግዚአብሔር ፡ ወላዕለ ፡ መሲሑ ።

3 ንበትክ ፡ እምኔነ ፡ ማእሠሪሆሙ ፤ ወንገድፍ ፡ እምላዕሌነ ፡ አርዑቶሙ ።

4 ዘይነብር ፡ ውስተ ፡ ሰማይ ፡ ይሥሕቆሙ ፤ ወእግዚአብሔር ፡ ይሳለቅ ፡ ላዕሌሆሙ ።

5 ሶበ ፡ ይነቦሙ ፡ በመዓቱ ፤ ወበመዓቱ ፡ የሀውኮሙ ።

6 ወአንሰ ፡ ተሠየምኩ ፡ ንጉሠ ፡ በላዕሌሆሙ ፤በጽዮን ፡ በደብረ ፡ መቅደሱ ።

7 ከመ ፡ እንግር ፡ ትእዛዞ ፡ ለእግዚአብሔር ፡ እግዚአብሔር ፡ ይቤለኒ ፡ ወልድየ ፡ እንተ ፤ ወአነ ፡ ዮም ፡ ወለድኩከ ።

8 ሰአል ፡ እምነየ ፡ እውህበከ ፡ አሕዛበ ፡ ለርስትከ ፤ ወምኵናኒከኒ ፡ እስከ ፡ አጽናፈ ፡ ምድር ።

9 ወትርዕዮሙ ፡ በበትረ ፡ ኀጺን ፤ ወከመ ፡ ንዋየ ፡ ለብሓ ፡ ትቀጠቅጦሙ ።

10 ወይእዜኒ ፡ ነገሥት ፡ ለብዉ ፤ ወተገሠጹ ፡ ኵልክሙ ፡ እለ ፡ ትኴንንዋ ፡ ለምድር ።

11 ተቀነዩ ፡ ለእግዚአብሔር ፡ በፍርሀት ፤ ወተሐሠዩ ፡ ሎቱ ፡ በረዓድ ።

12 አጽንዕዋ ፡ ለጥበብ ፡ ከመ ፡ ኢይትመዓዕ ፡ እግዚአብሔር ፡ ወኢትትሀጐሉ ፡ እምፍኖተ ፡ ጽድቅ ፡

13 ሶበ ፡ ነደት ፡ ፍጡነ ፡ መዐቱ ፤ ብፁዓን ፡ ኵሎሙ ፡ እለ ፡ ተወከሉ ፡ ቦቱ ።

3 መዝሙር ፡ ዘዳዊት ፡ ዘአመ ፡ ጐየ ፡ እምገጸ ፡ አቤሰሎም ።

1 አግዚኦ ፡ ሚ በዝኁ ፡ እለ ፡ ይሣቅዩኒ ፤ ብዙኃን ፡ ቆሙ ፡ ላዕሌየ ።

2 ብዙኃን ፡ ይቤልዋ ፡ ለነፍስየ ፤ ኢያድኅነኪ ፡ አምላክኪ ።

3 አንተሰ ፡ እግዚኦ ፡ ምስካይየ ፡ አንተ ፤ ክብርየ ፡ ወመልዕለ ፡ ርእስየ ።

4 ቃልየ ፡ ኀበ ፡ እግዚአብሔር ፡ ጸራኅኩ ፤ወሰምዐኒ ፡ እምደብረ ፡ መቅደሱ ።

5 አንሰ ፡ ሰከብኩ ፡ ወኖምኩ ፤ ወተንሣእኩ ፡ እስመ ፡ እግዚአብሔር ፡ አንሥአኒ ።

6 ኢይፈርህ ፡ እምአእላፍ ፡ አሕዛብ ፤እለ ፡ ዐገቱኒ ፡ ወቆሙ ፡ ላዕሌየ ።

7 ተንሥእ ፡ እግዚኦ ፡ አምላኪየ ፡ ወአድኅነኒ ፤ እስመ ፡ አንተ ፡ ቀሰፍኮሙ ፡ ለኵሎሙ ፡ እለ ፡ ይፃረሩኒ ፡ በከንቱ ። ስነኒሆሙ ፡ ለኃጥኣን ፡ ሰበርከ ።

8 ዘእግዚአብሔር ፡ አድኅኖ ፤ ላዕለ ፡ ሕዝብከ ፡ ወበረከትከ ።

4 ፍጻሜ ፡ ዘአኩቴት ፤ መዝሙር ፡ ዘዳዊት

1 ሶበ ፡ ጸዋዕክዎ ፡ ለእግዚአብሔር፡ ሰምዐኒ ፡ ጽድቅየ ፡ ወእምንዳቤየ ፡ አርሐበ ፡ ሊተ ።

2 ተሥሀለኒ ፡ ወስምዐኒ ፡ ጸሎትየ ።

3 ደቂቀ ፡ እጓለ ፡ እመሕያው ፡ እስከ ፡ ማእዜኑ ፡ ታከብዱ ፡ ልብክሙ ፡ ለምንት ፡ ታፈቅሩ ፡ ከንቶ ፡ ወተኀሡ ፡ ሐሰተ ።

4 አእምሩ ፡ ከመ ፡ ተሰብሐ ፡ እግዚአብሔር ፡ በጻድቁ ፤ እግዚአብሔር፡ ይሰምዐኒ ፡ ሶበ ፡ ጸራኅኩ ፡ ኀቤሁ ።

5 ተምዑ ፡ ወኢተአብሱ ፤ ወዘትኄልዩ ፡ በልብክሙ ፡ ውስተ ፡ መስካቢክሙ ፡ ይትዐወቅሙ ።

6 ሡዑ ፡ መሥዋዕተ ፡ ጽድቅ ፡ ወተወከሉ ፡ በእግዚአብሔር ።

7 ብዙኃን ፡ እለ ይቤሉ ፡ መኑ ፡ ያርእየነ ፡ ሠናይቶ ፤ ተዐውቀ ፡ በላዕሌነ ፡ ብርሃነ ገጽከ ፡ እግዚኦ ።

8 ወወደይከ ፡ ትፍሥሕተ ፡ ውስተ ልብነ ፤ እምፍሬ ፡ ስርናይ ፡ ወወይን ፡ ወቅብዕ ፡ በዝኀ ።

9 በሰላም ፡ ቦቱ ፡ እሰክብ ፡ ወእነውም ።

10 እስመ ፡ እንተ ፡ እግዚኦ ፡ በተስፋ ባሕቲትከ ፡ አኅደርከኒ ።

5 ፍጻሜ ፡ በእንተ ፡ ተወርሶ ፤ መዝሙር ፡ ዘዳዊት

1 ቃልየ ፡ አፅምእ ፡ እግዚኦ ፡ ወለቡ ፡ ጽራኅየ ።

2 ወአፅምአኒ ፡ ቃለ ፡ ስእለትየ ፤ ንጉሥየኒ ፡ ወአምላክየኒ ።

3 እስመ ፡ ኀቤከ ፡ እጼሊ ። እግዚኦ ፡ በጽባሕ ፡ ስምዐኒ ፡ ቃልየ ።

4 በጽባሕ ፡እቀውም ፡ ቅድሜከ ፡ ወአስተርኢ ፡ ለከ ።

5 እስመ ፡ ኢኮንከ ፡ አምላከ ፡ ዘዐመፃ ፡ ያፈቅር ፡ ወኢየኀድሩ ፡ እኩያን ፡ ምስሌከ ።

6 ወኢይነብሩ ፡ ዐማፅያን ፡ ቅድመ ፡ አዕይንቲከ ፡ ጸላእከ ፡ እግዚኦ ፡ ኵሎሙ ፡ ገበርተ ፡ ዐመፃ ፤ ወኢይነብሩ ዐማፅያን ቅድመ አዕይንቲከ ጸላእከ እግዚኦ ኵሎሙ ገበርተ ዐመፃ ወትገድፎሙ ፡ ለኵሎሙ ፡ እለ ይነቡ ፡ ሐሰተ ።

7 ብእሴ ፡ ደም ፡ ወጕሕላዌ ፡ ይስቆርር ፡ እግዚአብሔር ።

8 ወአንሰ ፡ በብዝኀ ምሕረትከ ፡ እበውእ ፡ ቤተከ ፤ ወእሰግድ ፡ ውስተ ፡ ጽርሐ ፡ መቅደስከ ፡ በፍሪሆትከ ።

9 እግዚኦ ፡ ምርሐኒ ፡ በጽድቅከ ፤ እግዚኦ ምርሐኒ በጸድቅከ ወበእንተ ጸላእትየ ፡ አርትዕ ፡ ፍኖትየ ፡ ቅድሜከ ።

10 እስመ ፡ አልቦ ፡ ጽድቀ ፡ ውስተ ፡ አፉሆሙ ፤ ልቦሙኒ ፡ ከንቱ ።

11 ከመ ፡ መቃብር ፡ ክሡት ፡ ጐራዒቶሙ ፤ ወጸልሐዉ ፡ በልሳናቲሆሙ ።

12 ኰንኖሙ ፡ እግዚኦ ፡ ወይደቁ ፡ በውዴቶሙ ፤ ወበከመ ፡ ብዝኀ ፡ ሕብሎሙ ፡ ስድዶሙ ፤ እስመ ፡ አምረሩከ ፡ እግዚኦ ።

13 ወይትፌሥሑ ፡ ብከ ፡ ኵሎሙ ፡ እለ ፡ ይትዌከሉከ ፡ ለዓለም ፡ ይትሐሠዩ ፡ ወተኀድር ፡ ላዕሌሆሙ ። ወይትሜክሑ ፡ ብከ ፡ ኵሎሙ ፡ እለ ፡ ያፈቅሩ ፡ ስመከ ።

14 እስመ ፡ አንተ ፡ ትባርኮ ፡ ለጻድቅ ፤ ወይትሜክሑ ብከ ኲሎሙ እለ ያፈቅሩ ስመከ እስመ አንተ ትባርኮ ለጻድቅ እግዚኦ ፡ ከመ ፡ ወልታ ፡ ሥሙር ፡ ከለልከነ ።

6 ፍጹሜ ፡ ዘስብሐት ፡ በእንተ ፡ ሳምንት ፤ መዝሙር ፡ ዘዳዊት ።

1 እግዚኦ ፡ በመዓትከ ፡ ኢትቅሥፈኒ ፤ ወበመቅሠፍትከ ፡ ኢትገሥጸኒ ።

2 ተሣሀለኒ ፡ እግዚኦ ፡ እስመ ፡ ድውይ ፡ አነ ፤ ወፈውሰኒ ፡ እስመ ፡ ተሀውካ፡ አዕጽምትየ ።

3 ወነፍስየኒ ፡ ተሀውከት ፡ ፈድፋደ ፤ ወአንተኒ ፡ እግዚኦ ፡ እስከ ፡ ማእዜኑ ።

4 ተመየጥ ፡ እግዚኦ ፡ ወባልሓ ፡ ለነፍስየ ፤ ወአድኅነኒ ፡ በእንተ ምሕረትከ ።

5 እስመ ፡ አልቦ ፡ በውስተ ፡ ሞት ፡ ዘይዘከረከ ፤ ወበሲኦልኒ ፡ መኑ ፡ የአምነከ ።

6 ሰራሕኩ ፡ በምንዳቤየ ፡ ወአኀፅብ ፡ ኵሎ ፡ ሌሊተ ፡ ዐራትየ ፤ ወበአንብዕየ ፡ አርሐስኩ ፡ ምስካብየ ።

7 ወተሀውከት ፡ እመዓት ፡ ዐይንየ ፤ ወበለይኩ ፡ በኀበ ፡ ኵሎሙ ፡ ጸላእትየ ።

8 ረኀቁ ፡ እምኔየ ፡ ኵልክሙ ፡ ገበርተ ፡ ዐመፃ ፤ እስመ ፡ ሰምዐኒ ፡ እግዚአብሔር ፡ ቃለ ፡ ብካይየ ።

9 ወሰምዐኒ ፡ እግዚአብሔር ፡ ስእለትየ ፤ ወተወክፈ ፡ እግዚአብሔር ፡ ጸሎትየ ።

10 ለይትኀፈሩ ፡ ወይኅሰሩ ፡ ኵሎሙ ፡ ጸላእትየ ፤ ለይገብዑ ፡ ድኅሬሆሙ ፡ ወይትኀፈሩ ፡ ፈድፋደ ፡ ፍጡነ ።

7 መዝሙር ፡ ዘዳዊት ፤ ዘዘመረ ፡ ለእግዚአብሔር ፡ በእንተ ፡ ነገረ ፡ ኩዝ ፡ ወልደ ፡ አሚናዳብ ።

1 እግዚኦ ፡ አምላክየ ፡ ብከ ፡ ተወከልኩ ፡ ወኢትግድፈኒ ፤ ወአድኅነኒ ፡ እምኵሎሙ ፡ እለ ፡ ሮዱኒ ፡ ወባልሐኒ ።

2 ከመ ፡ ኢይምስጥዋ ፡ ከመ ፡ አንበሳ ፡ ለነፍስየ ፤ እንዘ ፡ አልቦ ፡ ዘያድኅን ፡ ወዘይባልሕ ።

3 እግዚኦ ፡ አምላክየ ፡ እመሰ ፡ ከመዝ ፡ ገበርኩ ፤ ወእመኒ ፡ ቦ ፡ ዐመፃ ፡ ውስተ እደውየ ።

4 ወእመኒ ፡ ፈደይክዎሙ ፡ ለእለ ይፈድዩኒ ፡ እኩየ ፤ ለያውድቁኒ ፡ ጸላእትየ ፡ ዕራቅየ ።

5 ወይዴግና ፡ ፀራዊ ፡ ለነፍስየ ፡ ወይርከባ ፤ ወይኪዳ ፡ ውስተ ፡ ምድር ፡ ለሕይወትየ ። ወያኅስሮ ፡ ውስተ ፡ መሬት ፡ ለክብርየ ።

6 ተንሥእ ፡ እግዚኦ ፡ በመዓትከ ፤ ወተለዐል ፡ መልዕልቶሙ ፡ ለጸላእትየ ።

7 ተንሥእ ፡ እግዚኦ ፡ አምላክየ ፡ በሥርዐት ፡ ዘአዘዝከ ። ወማኅበረ አሕዛብኒ ፡ የዐውደከ ፤

8 ወበእንተዝ ፡ ተመየጥ ፡ ውስተ አርያም ። እግዚአብሔር ፡ ይኴንኖሙ ፡ ለአሕዛብ ።

9 ፍታሕ ፡ ሊተ ፡ እግዚኦ ፡ በከመ ፡ ጽድቅከ ፤ ወይኩነኒ ፡ በከመ ፡ የዋሃትየ ።

10 የኀልቅ ፡ እከዮሙ ፡ ለኃጥኣን ፤ ወታረትዖሙ ፡ ለጻድቃን ይፈትን ፡ ልበ ፡ ወኵልያተ ፡ እግዚአብሔር ።

11 አማን ፡ ይረድአኒ ፡ እግዚአብሔር ፤ ዘያድኅኖሙ ፡ ለርቱዓነ ልብ ።

12 እግዚአብሔር ፡ መኰንነ ፡ ጽድቅ ፡ ኀያል ፡ ወመስተዐግስ ፤ ወኢያመጽእ ፡ መንሱተ ፡ ኵሎ ፡ አሚረ ።

13 እመሰ ፡ ኢተመየጥክሙ ፡ ሰይፎ ፡ ይመልኅ ፤ ቀስቶኒ ፡ ወተረ ፡ ወአስተዳለወ ።

14 ወአስተዳለወ ፡ ቦቱ ፡ ሕምዘ ፡ ዘይቀትል ፤ ወአሕጻሁኒ ፡ ለእለ ፡ ይነዱ ፡ ገብረ ።

15 ናሁ ፡ ሐመ ፡ ዐመፂ ፤ ወበዐመፃሁ ፀንሰ ፡ በፃዕረ ፡ ወወለደ ፡ ኃጢአተ ።

16 ግበ ፡ ከረየ ፡ ወደኀየ ፤ ወይወድቅ ፡ ውስተ ፡ ግብ ፡ ዘገብረ ።

17 ወይገብእ ፡ ጻማሁ ፡ ዲበ ርእሱ ፤ ወትወርድ ፡ ዐመፃሁ ፡ ዲበ ፡ ድማኁ ።

18 እገኒ ፡ ለእግዚአብሔር ፡ በከመ ፡ ጽድቁ ፤ ወእዜምር ፡ ለስመ ፡ እግዚአብሔር ፡ ልዑል ።

8 ፍጻሜ ፡ በእንተ ፡ መክብብት ፤ መዝሙር ፡ ዘዳዊት ።

1 እግዚኦ ፡ እግዚእነ ፡ ጥቀ ፡ ተሰብሐ ፡ ስምክ ፡ በኵሉ ፡ ምድር ፤

2 እስመ ፡ ተለዐለ ፡ እበየ ፡ ስብሓቲከ ፡ መልዕልተ ፡ ሰማያት ።

3 እምአፈ ፡ ደቂቅ ፡ ወሕፃናት ፡ አስተዳሉከ ፡ ስብሐተ ፡ በእንተ ፡ ጸላኢ ፤ ከመ ፡ ትንሥቶ ፡ ለጸላኢ ፡ ወለገፋዒ ።

4 እስመ ፡ ንሬኢ ፡ ሰማያተ ፡ ግብረ ፡ አጻብዒከ ፤ ወርኀ ፡ ወከዋክብተ ፡ ዘለሊከ ፡ ሳረርከ ።

5 ምንትኑ ፡ ውእቱ ፡ ሰብእ ፡ ከመ ፡ ትዝክሮ ፤ ወምንትኑ ፡ እጓለ ፡ እመሕያው ፡ ከመ ፡ ተሐውጾ ።

6 ሕቀ ፡ አሕጸጽኮ ፡ እምላእክቲከ ፤ ክብረ ፡ ወስብሐተ ፡ ከለልኮ ። ወሢምኮ ፡ ዲበ ፡ ኵሉ ፡ ግብረ ፡ እደዊከ ፤

7 ወኵሎ ፡ አግረርከ ፡ ሎቱ ፡ ታሕተ ፡ እገሪሁ ። አባግዐኒ ፡ ወኵሎ ፡ አልህምተ ፤ ወዓዲ ፡ እንስሳ ፡ ዘገዳም ።

8 አዕዋፈ ፡ ሰማይኒ ፡ ወዐሣተ ፡ ባሕር ፤ ወዘኒ ፡ የሐውር ፡ ውስተ ፡ ፍኖተ ፡ ባሕር ።

9 ፍጻሜ ፡ በእንተ ፡ ኅቡኣተ ፡ ወልድ ፤ መዝሙር ፡ ዘዳዊት ።

1 እገኒ ፡ ለከ ፡ እግዚኦ ፡ በኵሉ ፡ ልብየ ፤ ወእነግር ፡ ኵሎ ፡ ስብሓቲከ ።

2 እትፌሣሕ ፡ ወእትሐሠይ ፡ ብከ ፤ ወእዜምር ፡ ለስምከ ፡ ልዑል ።

3 ሶበ ፡ ገብኡ ፡ ጸላእትየ ፡ ድኅሬሆሙ ፤ ይድወዩ ፡ ወይትሐጐሉ ፡ እምቅድመ ፡ ገጽከ ።

4 እስመ ፡ ገበርከ ፡ ሊተ ፡ ፍትሕየ ፡ ወበቀልየ ፤ ወነበርከ ፡ ዲበ ፡ መንበርከ ፡ መኰንነ ፡ ጽድቅ ።

5 ገሠጽኮሙ ፡ ለአሕዛብ ፡ ወተሐጕሉ ፡ ረሲዓን ፤ ወደምሰስከ ፡ ስሞሙ ፡ ለዓለመ ፡ ዓለም ።

6 ፀርሰ ፡ ተገምሩ ፡ በኲናት ፡ ለዝሉፍ ። ወአህጒሪሆሙኒ ፡ ነሠትከ ፤

7 ወትስዕር ፡ ዝክሮሙ ፡ ኅቡረ ። ወእግዚአብሔር ፡ ይነብር ፡ ለዓለም ፤

8 ወአስትዳለወ ፡ መንበሮ ፡ ለኰንኖ ። ወውእቱ ፡ ይኴንና ፡ ለዓለም ፡ በጽድቅ ፤ ወይኴንኖሙ ፡ ለአሕዛብ ፡ በርትዕ ።

9 ወኮኖሙ ፡ እግዚአብሔር ፡ ምስካዮሙ ፡ ለነዳያን ፤ ወረዳኢሆሙ ፡ ውእቱ ፡ በጊዜ ፡ ምንዳቤሆሙ ።

10 ወይትዌከሉ ፡ ብከ ፡ ኵሎሙ ፡ እለ ፡ ያፈቅሩ ፡ ስመከ ፤ እስመ ፡ ኢተኀድጎሙ ፡ ለእለ ፡ የኀሡከ ፡ እግዚኦ ።

11 ዘምሩ ፡ ለእግዚአብሔር ፡ ዘየኀድር ፡ ውስተ ፡ ጽዮን ፤ ወንግርዎሙ ፡ ለአሕዛብ ፡ ምግባሮ ።

12 እስመ ፡ ተዘክረ ፡ ዘይትኃሠሥ ፡ ደሞሙ ፤ ወኢረስዐ ፡ ዐውያቶሙ ፡ ለነዳያን ።

13 ተሣሀለኒ ፡ እግዚኦ ፡ ወርኢ ፡ ዘከመ ፡ ያሐሙኒ ፡ ጸላእትየ ፤

14 ዘያሌዕለኒ ፡ እምአናቅጸ ፡ ሞት ። ከመ ፡ እንግር ፡ ኵሎ ፡ ስብሓቲከ ፤ በአናቅጺሃ ፡ ለወለተ ፡ ጽዮን ፤

15 ወንትፌሣሕ ፡ በአድኅኖትከ ። ጠግዑ ፡ አሕዛብ ፡ በጌጋዮሙ ፡ ዘገብሩ ፤

16 ወበይእቲ ፡ መሥገርት ፡ እንተ ፡ ኀብኡ ፡ ተሠግረ ፡ እግሮሙ ።

17 ያአምር ፡ እግዚአብሔር ፡ ገቢረ ፡ ፍትሕ ፤ ወበግብረ ፡ እደዊሁ ፡ ተሠግረ ፡ ኃጥእ ።

18 ያግብኡ ፡ ኃጥኣን ፡ ውስተ ፡ ሲኦል ፤ ወኵሎሙ ፡ አሕዛብ ፡ እለ ፡ ይረስዕዎ ፡ ለእግዚአብሔር ።

19 እስመ ፡ አኮ ፡ ለዝሉፉ ፡ ዘይትረሳዕ ፡ ነዳይ ፤ ወኢያሕጕሉ ፡ ትዕግሥቶሙ ፡ ነዳያን ፡ ለዓለም ።

20 ተንሥእ ፡ እግዚኦ ፡ ወኢይጽናዕ ፡ እጓለ ፡ እምሕያው ፤ ወይትኴነኑ ፡ አሕዛብ ፡ በቅድሜከ ።

21 ሢም ፡ እግዚኦ ፡ መምህረ ፡ ሕግ ፡ ላዕሌሆሙ ፤ ወያእምሩ ፡ አሕዛብ ፡ ከመ ፡ እጓለ ፡ እመሕያው ፡ እሙንቱ ።

22 ለምንት ፡ እግዚኦ ፡ ቆምከ ፡ እምርሑቅ ፤ ወትትዔወር ፡ በጊዜ ፡ ምንዳቤ ።

23 በትዕቢቱ ፡ ለኃጥእ ፡ ይውዒ ፡ ነዳይ ፤ ወይሠገሩ ፡ በውዴቶሙ ፡ እንተ ፡ ሐለዩ ።

24 እስመ ፡ ይትዌደስ ፡ ኃጥእ ፡ በፍትወተ ፡ ነፍሱ ፤ ወዐማፂኒ ፡ ይትባረክ ፡

25 ወሐኮ ፡ ኃጥእ ፡ ለእግዚአብሔር ። ወኢተኃሥሦ ፡ በከመ ፡ ብዝኀ ፡ መዐቱ ፤

26 ወአልቦ ፡ እግዚአብሔር ፡ በቅድሜሁ ። ወርኩስ ፡ ኵሉ ፡ ፍናዊሁ ፡

27 ወንሡት ፡ ኵነኔከ ፡ በቅድሜሁ ፤ ወይቀንዮሙ ፡ ለኵሎሙ ፡ ጸላእቱ ።

28 ወይብል ፡ በልቡ ፡ ኢይትሀወክ ፤ ለትውልደ ፡ ትውልድ ፡ ኢይረክበኒ ፡ እኩይ ።

29 ምሉእ ፡ አፉሁ ፡ መርገመ ፡ ወጽልሑተ ፤ ወታሕተ ፡ ልሳኑ ፡ ጻማ ፡ ወሕማም ።

30 ወይጸንሕ ፡ ወይንዑ ፡ ምስለ ፡ ብዑላን ፡ ከመ ፡ ይቅትሎ ፡ ለንጹሕ ፡ በጽሚት ፤

31 ወአዕይንቲሁኒ ፡ ኀበ ፡ ነዳይ ፡ ያስትሐይጻ ። ይጸንሕ ፡ ወይትኀባእ ፡ ከመ ፡ አንበሳ ፡ ውስተ ፡ ግብ ፡

32 ወይጸንሕ ፡ ከመ ፡ ይምስጦ ፡ ለነዳይ ፤ ወይመስጦ ፡ ለነዳይ ፡ ወይስሕቦ ፡

33 ወያኀስሮ ፡ በመሥገርቱ ። ይትቀጻዕ ፡ ወይወድቅ ፡ ሶበ ፡ ቀነዮ ፡ ለነዳይ ።

34 ወይብል ፡ በልቡ ፡ ይረስዐኒ ፡ እግዚአብሔር ፤ ወሜጠ ፡ ገጾ ፡ ከመ ፡ ኢይርአይ ፡ ለግሙራ ።

35 ተንሥእ ፡ እግዚኦ ፡ አምላክየ ፡ ወትትሌዐል ፡ እዴከ ፤ ወኢትርስዖሙ ፡ ለነዳያን ።

36 በእንተ ፡ ምንት ፡ አምዕዖ ፡ ኃጥእ ፡ ለእግዚአብሔር ፤ እስመ ፡ ይብል ፡ በልቡ ፡ ኢይትኃሠሠኒ ።

37 ትሬኢኑ ፡ ከመ ፡ ለሊከ ፡ ትኔጽር ፡ ጻማ ፡ ወመዐተ ፤ ወከመ ፡ ትመጥዎ ፡ ውስተ ፡ እዴከ ፤

38 ላዕሌከኑ ፡ እንከ ፡ ተገድፈ ፡ ነዳይ ፤ ወአንተኑ ፡ ረዳኢሁ ፡ ለእጓለ ፡ ማውታ ።

39 ቀጥቅጥ ፡ መዝራዕቶ ፡ ለኃጥእ ፡ ወለእኩይ ፤ ወትትኀሠሥ ፡ ኀጢአቱ ፡ በእንቲአሁ ፡ ወኢትትረከብ ።

40 ይነግሥ ፡ እግዚአብሔር ፡ ለዓለም ፡ ወለዓለመ ፡ ዓለም ፤ ወይትሐጕሉ ፡ አሕዛብ ፡ እምድር ።

41 ፍትወቶሙ ፡ ለነዳያን ፡ ሰምዐ ፡ እግዚአብሔር ፤ ወሕሊና ፡ ልቦሙኒ ፡ አፅምአት ፡ እዝኑ ።

42 ፍትሑ ፡ ለነዳይ ፡ ወለእጓለ ፡ ማውታ ፤ ከመ ፡ ኢይድግሙ ፡ እንከ ፡ እጓለ ፡ እምሕያው ፡ አዕብዮ ፡ አፉሆሙ ፡ በዲበ ፡ ምድር ።

10 ፍጻሜ ፡ መዝሙር ፡ ዘዳዊት ።

1 በእግዚአብሔር ፡ ተወከልኩ ፡ እፎ ፡ ትብልዋ ፡ ለነፍስየ ፤ ተዐይል ፡ ውስተ ፡ አድባር ፡ ከመ ፡ ዖፍ ።

2 እስመ ፡ ናሁ ፡ ኃጥኣን ፡ ወሰቁ ፡ ቀስቶሙ ፡ ወአስተዳለው ፡ አሕጻቲሆሙ ፡ ውስተ ፡ ምጕንጳቶሆሙ ፤ ከመ ፡ ይንድፍዎ ፡ ለርቱዓነ ፡ ልብ ፡ በጽሚት ።

3 እስመ ፡ ናሁ ፡ ዘአንተ ፡ ሠራዕከ ፡ እሙንቱ ፡ ነሠቱ ፤ ወጻድቅሰ ፡ ምንተ ፡ ገብረ ።

4 እግዚአብሔር፡ ውስተ ፡ ጽርሐ ፡ መቅድሱ ፡ እግዚአብሔር፡ ውስተ ፡ ሰማይ ፡ መንብሩ ፤

5 ወአዕይንቲሁኒ ፡ ኀበ ፡ ነዳይ ፡ ይኔጽራ ፡ ወቀራንብቲሁኒ ፡ የሐቶ ፡ ለእጓለ ፡ እመሕያው ።

6 እግዚአብሔር፡ የሐቶ ፡ ለጻድቅ ፡ ወለኃጥእ ፤ ወዘሰ ፡ አፍቀራ ፡ ለዐመፃ ፡ ጸልአ ፡ ነፍሶ ።

7 ይዘንም ፡ መሣግር ፡ ላዕለ ፡ ኃጥኣን ፤ እሳት ፡ ወተይ ፡ መንፈስ ፡ ዐውሎ ፡ መክፈልተ ፡ ጽዋዖሙ ።

8 እስመ ፡ ጻድቅ ፡ እግዚአብሔር ፡ ወጽድቀ ፡ አፍቀረ ፤ ወለርትዕሰ ፡ ትሬእዮ ፡ ገጹ ።

9 እግዚኦ ፡ እግዚእነ ፡ ጥቀ ፡ ተሰብሐ ፡ ስምከ ፡ በኵሉ ፡ ምድር ።

11 ፍጻሜ ፡ ስብሐት ፡ መዝሙር ፡ ዘዳዊት ፡ በእንተ ሳምንት ።

1 አድኅነኒ ፡ እግዚኦ ፡ እስመ ፡ ኀልቀ ፡ ኄር ፤ ወውሕደ ፡ ሀይማኖት ፡ እምአጓለ ፡ እምሕያው ።

2 ከንቶ ፡ ይትናገሩ ፡ አሐዱ ፡ ምስለ ፡ ካልኡ ፤ በከናፍረ ፡ ጕሕሉት ፡ በልብ ፡ ወበልብ ፡ ይትናገሩ ።

3 ይሤርዎን ፡ እግዚአብሔር ፡ ለከናፍረ ፡ ጕሕሉት ፤ ወለልሳን ፡ እንተ ፡ ታዐቢ ነቢበ ።

4 እለ ፡ ይብሉ ፡ ናዐቢ ፡ ልሳናቲነ ፡ ወከናፍሪነኒ ፡ ኀቤነ ፡ እሙንቱ ፤ መኑ ፡ ውእቱ ፡ እግዚእነ ።

5 በእንተ ፡ ሕማዎሙ ፡ ለነዳያን ፡ ወበእንተ ፡ ገዐሮሙ ፡ ለሙቁሓን ፤ ይእዜ ፡ እትነሣእ ፡ ይቤ ፡ እግዚአብሔር ፡

6 እሬሲ ፡ መድኀኒተ ፡ ወእግህድ ፡ ቦቱ ።

7 ቃለ ፡ እግዚአብሔር ፡ ቃል ፡ ንጹሕ ፤ ከመ ብሩር ፡ ጽሩይ ፡ ወንጡፍ ፡ ወፍቱን ፡ እምድር ፡ ዘአጽረይዎ ፡ ምስብዒተ ።

8 አንተ ፡ እግዚኦ ፡ ዕቀበነ ፤ ወተማኅፀነነ ፡ እምዛቲ ፡ ትውልድ ፡ ወእስከ ፡ ለዓለም ።

9 ዐውደ ፡ የሐውሩ ፡ ረሲዓን ፤ ወበከመ ፡ ልዕልናከ ፡ ሠራዕኮሙ ፡ ለደቂቀ ፡ እጓለ ፡ እመሕያው ።

12 ፍጻሜ ፡ መዝሙር ፡ ዘዳዊት ።

1 እስከ ፡ ማእዜኑ ፡ እግዚኦ ፡ ትረስዐኒ ፡ ለግሙራ ፡ እስከ ፡ ማእዜኑ ፡ ትመይጥ ፡ ገጸከ ፡ እምኔየ ።

2 እስከ ፡ ማእዜኑ ፡ ኣነብር ፡ ሐዘነ ፡ ውስተ ፡ ነፍስየ ፡ ወትጼዕረኒ ፡ ልብየ ፡ ኵሎ ፡ አሚረ ፤

3 እስከ ፡ ማእዜኑ ፡ ይትዔበዩ ፡ ጸላእትየ ፡ ላዕሌየ ። ነጽረኒ ፡ ወስምዐኒ ፡ እግዚኦ ፡ አምላኪየ ፤

4 አብርሆን ፡ ለአዕይንትየ ፡ ከመ ፡ ኢይኑማ ፡ ለመዊት ። ወከመ ፡ ኢይበሉኒ ፡ ጸላእትየ ፡ ሞእናሁ ፤

5 ወእለሰ ፡ ይሣቅዩኒ ፡ ይትፌሥሑ ፡ ለእመ ፡ ተሀወኩ ። ወአንሰ ፡ በምሕረትከ ፡ ተወከልኩ ፡

6 ይትፌሥሐኒ ፡ ልብየ ፡ በአድኅኖትከ ፤ እሴብሖ ፡ ለእግዚአብሔር፡ ዘረድአኒ ፡ ወእዜምር ፡ ለስመ ፡ እግዚአብሔር፡ ልዑል ።

13 ፍጻሜ ፡ መዝሙር ፡ ዘዳዊት ።

1 ይብል ፡ አብድ ፡ በልቡ ፡ አልቦ ፡ እግዚአብሔር ፤

2 ኀስሩ ፡ ወረኵሱ ፡ በምግባሪሆሙ ፤ አልቦ ፡ ዘይገብራ ፡ ለሠናይት ፡ አልቦ ፡ ወኢአሐዱ ።

3 እግዚአብሔር፡ ሐወጸ ፡ እምሰማይ ፡ ላዕለ ፡ እጓለ ፡ እምሕያው ፤ ከመ ፡ ይርአይ ፡ እመቦ ፡ ጠቢበ ፡ ዘየኀሦ ፡ ለእግዚአብሔር ።

4 ኵሉ ፡ ዐረየ ፡ ወኅቡረ ፡ ዐለወ ፤ አልቦ ፡ ዘይገብራ ፡ ለሠናይት ፡ አልቦ ፡ ወኢአሐዱ ።

5 ከመ ፡ መቃብር ፡ ክሡት ፡ ጐራዒቶሙ ፡ ወጸልሐዉ ፡ በልሳናቲሆሙ ፡ ሕምዘ ፡ አርዌ ፡ ምድር ፡ ታሕተ ፡ ከነፍሪሆሙ ።

6 መሪር ፡ አፋሆሙ ፡ ወምሉእ ፡ መርገም ፤ በሊኅ ፡ እገሪሆሙ ፡ ለክዒወ ፡ ደም ።

7 ኀሳር ፡ ወቅጥቃጤ ፡ ውስተ ፡ ፍኖቶሙ ፤ ወኢያአምርዋ ፡ ለፍኖተ ፡ ሰላም ። ወአልቦ ፡ ፍርሀተ ፡ እግዚአብሔር፡ ቅድመ ፡ አዕይንቲሆሙ ።

8 ወኢያአምሩ ፡ ኵሎሙ ፡ ገበርተ ፡ ዐመፃ ፤ እለ ፡ ይውኅጥዎሙ ፡ ለሕዝብየ ፡ ከመ ፡ በሊዐ ፡ እክል ።

9 ወለእግዚአብሔርሰ ፡ ኢጸውዕዎ ። ወበህየ ፡ ፈርሁ ፡ ወገረሞሙ ፡ ዘኢኮነ ፡ ግሩመ ፤

10 እስመ ፡ እግዚአብሔር፡ ውስተ ፡ ትውልደ ፡ ጻድቃን ። ወአስተኀፈርክሙ ፡ ምክረ ፡ ነዳይ ፤ እስመ ፡ እግዚአብሔር ፡ ተስፋሆሙ ፡ ውእቱ ።

11 መኑ ፡ ይሁብ ፡ መድኀኒተ ፡ እምጽዮን ፡ ለእስራኤል ። አመ ፡ ሜጠ ፡ እግዚአብሔር፡ ፄዋ ፡ ሕዝቡ ፤ ይትፌሣሕ ፡ ያዕቆብ ፡ ወይትሐሠይ ፡ እስራኤል ።

14 መዝሙር ፡ ዘዳዊት ።

1 እግዚኦ ፡ መኑ ፡ ይኀድር ፡ ውስተ ፡ ጽላሎትከ ፤ ወመኑ ፡ ያጸልል ፡ ውስተ ፡ ደብረ ፡ መቅድስከ ።

2 ዘየሐውር ፡ በንጹሕ ፡ ወይገብር ፡ ጽድቀ ፤

3 ወዘይነብብ ፡ ጽድቀ ፡ በልቡ ። ወዘኢጓሕለወ ፡ በልሳኑ ፡

4 ወዘኢገብረ ፡ እኩየ ፡ ዲበ ፡ ቢጹ ፤ ወዘኢያጽአለ ፡ አዝማዲሁ ።

5 ወዘምኑን ፡ በቅድሜሁ ፡ እኩይ ፡ ወዘያከብሮሙ ፡ ለፈራህያነ ፡ እግዚአብሔር፤

6 ዘይምሕል ፡ ለቢጹ ፡ ወኢይሔሱ ። ወዘኢለቅሐ ፡ ወርቆ ፡ በርዴ ፡ ወዘኢነሥአ ፡ ሕልያነ ፡ በላዕለ ፡ ንጹሕ ፤

7 ዘይገብር ፡ ከመዝ ፡ ኢይትሀወክ ፡ ለዓለም ።

15 ሥርዐተ ፡ አርአያ ፡ መጽሐፍ ፡ ዘዳዊት ።

1 ዕቀበኒ ፡ እግዚኦ ፡ እስመ ፡ ኪያከ ፡ ተወከልኩ ። እብሉ ፡ ለእግዚአብሔር ፡ እግዚእየ ፡ አንተ ፤ እስመ ፡ ኢትፈቅዳ ፡ ለሠናይትየ ፡

2 ለቅዱሳን ፡ እለ ፡ ውስተ ፡ ምድር ፤ ተሰብሐ ፡ ኵሉ ፡ ሥምረትከ ፡ በላዕሌሆሙ ።

3 በዝኀ ፡ ደዌሆሙ ፡ ወእምዝ ፡ አስፋጠኑ ፤

4 ወኢይትኃበር ፡ ውስተ ፡ ማኅበሮሙ ፡ ዘደም ፡ ወኢይዜከር ፡ አስማቲሆሙ ፡ በአፉየ ።

5 እግዚአብሔር፡ መክፈልተ ፡ ርስትየ ፡ ወጽዋዕየ ፤ አንተ ፡ ውእቱ ፡ ዘታገብአ ፡ ሊተ ፡ ርስትየ ።

6 አሕባለ ፡ ወረው ፡ ሊተ ፡ የአኅዙኒ ፤ ወርስትየሰ ፡ እኁዝ ፡ ውእቱ ፡ ሊተ ።

7 እባርኮ ፡ ለእግዚአብሔር ፡ ዘአለበወኒ ፤ ወዐዲ ፡ ሌሊተኒ ፡ ገሠጻኒ ፡ ኵልያትየ ።

8 ዘልፈ ፡ እሬእዮ ፡ ለእግዚአብሔር ፡ ቅድሜየ ፡ በኵሉ ፡ ጊዜ ፤ እስመ ፡ በየማንየ ፡ ውእቱ ፡ ከመ ፡ ኢይትሀወክ ።

9 በእንተዝ ፡ ተፈሥሐ ፡ ልብየ ፡ ወተሐሥየ ፡ ልሳንየ ፤ ወዐዲ ፡ በተስፋሁ ፡ ኀደረ ፡ ሥጋየ ።

10 እስመ ፡ ኢተኀድጋ ፡ ውስተ ፡ ሲኦል ፡ ለነፍስየ ፤ ወኢትሁቦ ፡ ለጻድቅከ ፡ ይርአይ ፡ ሙስና ።

11 ወአርአይከኒ ፡ ፍኖተ ፡ ሕይወት ፤ ወአጽገብከኒ ፡ ሐሤተ ፡ ምስለ ፡ ገጽከ ፡ ወትፍሥሕት ፡ ውስተ ፡ የማንከ ፡ ለዝሉፉ ።

16 መዝሙር ፡ ዘዳዊት ።

1 እግዚኦ ፡ ስምዐኒ ፡ ጽድቅየ ፡ ወአፅምአኒ ፡ ስእለትየ ።

2 ወአፅምአኒ ፡ ጸሎትየ ፤ ዘኢኮነ ፡ በከናፍረ ፡ ጕሕሉት ።

3 እምቅድመ ፡ ገጽከ ፡ ይወፅእ ፡ ፍትሕየ ፤ አዕይንትየኒ ፡ ርእያ ፡ ጽድቅከ ።

4 ሐወጽከኒ ፡ ሌሊተ ፡ ወፈተንኮ ፡ ለልብየ ፡ ወአመከርከኒ ፡ ወኢተረክበ ፡ ዐመፃ ፡ በላዕሌየ ።

5 ከመ ፡ ኢይንብብ ፡ አፉየ ፡ ግብረ ፡ እጓለ ፡ እመሕያው ፡ በእንተ ፡ ቃለ ፡ ከናፍሪከ ፤

6 አነ ፡ ዐቀብኩ ፡ ፍናወ ፡ ዕፁባተ ። አጽንዖን ፡ ለመካይድየ ፡ ውስተ ፡ ፍኖትከ ፤ ከመ ፡ ኢይድኀፃ ፡ ሰኰናየ ።

7 አንሰ ፡ ጸራኅኩ ፡ እስመ ፡ ሰምዐኒ ፡ እግዚአብሔር ፤ አፅምእ ፡ እዝነከ ፡ ኀቤየ ፡ ወስምዐኒ ፡ ቃልየ ።

8 ሰብሓ ፡ ለምሕረትከ ፡ ዘያድኅኖሙ ፡ ለእለ ፡ ይትዌከሉከ ፤ እምእለ ፡ ይትቃወምዋ ፡ ለየማንከ ።

9 ዕቀበኒ ፡ ከመ ፡ ብንተ ፡ ዐይን ፤ ወበጽላሎተ ፡ ክንፊከ ፡ ክድነኒ ። እምገጸ ፡ ኃጥኣን ፡ እለ ፡ ያኀስሩኒ ፤

10 ጸላእትየሰ ፡ አስተሐየጽዋ ፡ ለነፍስየ ። ወቈጸሩ ፡ አማዑቶሙ ፤ ወነበበ ፡ ትዕቢተ ፡ አፉሆሙ ።

11 ሰደዱኒ ፡ ይእዜኒ ፡ ዐገቱኒ ፤ ወአትሐቱ ፡ አዕይንቲሆሙ ፡ ውስተ-ምድር ።

12 ወተመጠዉኒ ፡ ከመ ፡ አንበሳ ፡ ዘጽኑሕ ፡ ለመሲጥ ፤ ወከመ ፡ እጓለ ፡ አንበሳ ፡ ዘይነብር ፡ ተኀቢኦ ።

13 ተንሥአ ፡ እግዚኦ ፡ በጽሖሙ ፡ ወአዕቅጾሙ ፤ ወበልሓ ፡ እምኲናት ፡ ለነፍስየ ። ሰይፍከ ፡ ላዕለ ፡ ፀረ ፡ እዴከ ፤

14 እግዚኦ ፡ እምውኁዳን ፡ ምድር ፡ ንፍቆሙ ፡ በሕይወቶሙ ፤ እምኅቡኣቲከ ፡ ጸግበት ፡ ከርሦሙ ።

15 ጸግቡ ፡ ደቂቆሙ ፡ ወኀደጉ ፡ ትራፋቲሆሙ ፡ ለሕፃናቲሆሙ ።

16 ወአንሰ ፡ በጽድቅከ ፡ እሬኢ ፡ ገጸከ፤ ወእጸግብ ፡ በርእየ ፡ ስብሐቲከ ።

17 ፍጻሜ ፡ ዘገብረ ፡ እግዚአብሔር ፡ ዘዳዊት ። ዘተናገሮ ፡ ለእግዚአብሔር ፡ በቃለ ፡ ማኅሌት ፤ በዕለተ ፡ አድኅኖ ፡ እግዚአብሔር ፡ እምእደ ፡ ኵሎሙ ፡ ጸላእቱ ፡ ወእምእደ ፡ ሳኦል ፡ ወይቤ ።

1 ኣፈቅረከ ፡ እግዚኦ ፡ በኀይልየ ። እግዚአብሔር ፡ ኀይልየ ፡ ወጸወንየ ፡ ወመድኀኒየ ።

2 አምላኪየ ፡ ወረዳኢየ ፡ ወእትዌከል ፡ ቦቱ ፤

3 ምእመንየ ፡ ወቀርነ ፡ ሕይወትየ ፡ ወምስካይየ ።

4 እንተ ፡ ሶበ ፡ ጸዋዕክዎ ፡ ለእግዚአብሔር ፤ እድኅን ፡ እምፀርየ ።

5 አኀዘኒ ፡ ጻዕረ ፡ ሞት ፤ ወውሒዘ ፡ ዐመፃ ፡ ሆከኒ ።

6 ወዐገተኒ ፡ ጻዕረ ፡ ሲኦል ፤ ወበጽሐኒ ፡ መሣግረ ፡ ሞት ።

7 ወሶበ ፡ ተመንድብኩ ፡ ጸዋዕክዎ ፡ ለእግዚአብሔር ፡ ወጸራኅኩ ፡ ኀበ ፡ አምላኪየ ።

8 ወሰምዐኒ ፡ በጽርሐ ፡ መቅደሱ ፡ ቃልየ ፤ ወጽራኅየኒ ፡ ቦአ ፡ ቅድሜሁ ፡ ውስተ ፡ እዝኒሁ ።

9 ርዕደት ፡ ወአድለቅለቀት ፡ ምድር ፡ ወአንቀልቀሉ ፡ መሰረታተ ፡ አድባር ፤ ወተሀውኩ ፡ እስመ ፡ ተምዖሙ ፡ ለእግዚአብሔር ።

10 ዐርገ ፡ ጢስ ፡ እመዐቱ ፡ ወነደ ፡ እሳት ፡ እምቅድመ ፡ ገጹ ፤ ኀተወ ፡ አፍሓም ፡ እምኔሁ ።

11 አጽነነ ፡ ሰማያት ፡ ወወረደ ፤ ወቆባር ፡ ታሕተ ፡ እገሪሁ ።

12 ተጽእነ ፡ ላዕለ ፡ ኪሩቤል ፡ ወሠረረ ፤ ወሠረረ ፡ በክንፈ ፡ ነፋስ ።

13 ወረሰየ ፡ ጽልመት ፡ ምስዋር ፡ ወዐውዶሂ ፡ ጽላሎቱ ፤ ወጸልሙ ፡ ማያት ፡ በውስተ ፡ ደመናት ።

14 ወእምብርሃነ ፡ ገጹ ፡ ኀለፋ ፡ ደመናት ፡ ቅድሜሁ ፤ በረድ ፡ ወአፍሓመ ፡ እሳት ።

15 ወአንጐድጐደ ፡ እግዚአብሔር ፡ በሰማያት ፡ ወልዑል ፡ ወሀበ ፡ ቃሉ ፤

16 ፈነወ ፡ አሕፃሁ ፡ ወዘረዎሙ ፡ አብዝኀ ፡ መባርቅቲሁ ፡ ወሀኮሙ ።

17 ወአስተርአየ ፡ አንቅዕተ ፡ ማያት ፡ ወተከሥተ ፡ መሰረታተ ፡ ዓለም ።

18 እምተግሣጽከ ፡ እግዚኦ ፤ ወእምእስትንፋሰ ፡ መንፈሰ ፡ መዐትከ ።

19 ፈነወ ፡ እምአርያም ፡ ወነሥአኒ ፤ ወተመጠወኒ ፡ እማይ ፡ ብዙኅ ።

20 ወአድኀነኒ ፡ እምፀርየ ፡ ጽኑዓን ፤ ወእምጸላእትየ ፡ እስመ ፡ ይኄይሉኒ ።

21 ወበጽሑኒ ፡ በዕለተ ፡ መንዳቤየ ፤ ወኮነኒ ፡ እግዚአብሔር ፡ ምስካይየ ።

22 ወአውፅአኒ ፡ ውስተ ፡ መርሕብ ፤ ወአድኀነኒ ፡ እስመ ፡ ይፈቅደኒ ።

23 የዐስየኒ ፡ እግዚአብሔር ፡ በከመ ፡ ጽድቅየ ፤ ወይፈድየኒ ፡ በከመ ፡ ንጹሐ ፡ እደውየ ።

24 እስመ ፡ ዐቀብኩ ፡ ፍናዊሁ ፡ ለእግዚአብሔር ፤ ወኢአበስኩ ፡ ለአምላኪየ ።

25 እስመ ፡ ኵሉ ፡ ኵነኔሁ ፡ ቅድሜየ ፡ ውእቱ ፤ ወጽድቁኒ ፡ ኢርሕቀ ፡ እምኔየ ።

26 ወእከውን ፡ ንጹሐ ፡ ምስሌሁ ፤ ወእትዐቀብ ፡ እምኃጢአትየ ።

27 የዐስየኒ ፡ እግዚአብሔር ፡ በከመ ፡ ጽድቅየ ፤ ወይፈድየኒ ፡ በከመ ፡ ንጹሐ ፡ እደውየ ፡ በቅድመ ፡ አዕይንቲሁ ።

28 ምስለ ፡ ጻድቅ ፡ ትጸድቅ ፤ ወምስለ ፡ ብእሲ ፡ ንጹሕ ፡ ንጹሐ ፡ ትከውን ።

29 ወምስለ ፡ ኅሩይ ፡ ኅሩየ ፡ ትከውን ፤ ወምስለ ፡ ጠዋይ ፡ ትጠዊ ።

30 እስመ ፡ አንተ ፡ እግዚኦ ፡ ታድኅኖ ፡ ለሕዝብ ፡ ትሑት ፤ ወታኀስሮሙ ፡ ለአዕይንተ ፡ ዕቡያን ።

31 እስመ ፡ አንተ ፡ ታብርህ ፡ ማኅቶትየ ፡ እግዚኦ ፡ አምላኪየ ፡ ያበርህ ፡ ጽልመትየ ።

32 እስመ ፡ ብከ ፡ እድኅን ፡ እመንሱት ፤ ወበአምላኪየ ፡ እትዐደዋ ፡ ለአረፍት ።

33 ለአምላኪየሰ ፡ ንጹሕ ፡ ፍኖቱ ። ቃል ፡ እግዚአብሔር ፡ ርሱን ፤ ወምእመኖሙ ፡ ውእቱ ፡ ለኵሎሙ ፡ እለ ፡ ይትዌከሉ ፡ ቦቱ ።

34 ወኑ ፡ ውእቱ ፡ አምላክ ፡ ዘእንበለ ፡ እግዚአብሔር ፤ ወመኑ ፡ እግዚአብሔር ፡ ዘእንበለ ፡ አምላክነ ።

35 እግዚአብሔር፡ ዘያቀንተኒ ፡ ኀይለ ፤ ወረሰያ ፡ ንጹሐ ፡ ለፍኖተየ ።

36 ዘያረትዖን ፡ ከመ ፡ ኀየል ፡ ለእገርየ ፤ ወያቀውመኒ ፡ ውስተ ፡ መልዕልት ።

37 ዘይሜህሮን ፡ ፀብአ ፡ ለእደውየ ፤ ወረሰየ ፡ ቀስተ ፡ ብርት ፡ ለመዝራዕትየ ።

38 ወወሀበኒ ፡ ምእመነ ፡ ለመድኀኒትየ ። ወየማንከ ፡ ተወክፈኒ ፤

39 ወትምህርትከ ፡ ያጸንዐኒ ፡ ለዝሉፉ ። ወተግሣጽከ ፡ ውእቱ ፡ ዘይሜህረኒ ።

40 ወአርሐብከ ፡ መካይድየ ፡ በመትሕቴየ ፤ ወኢደክማ ፡ ሰኩናየ ።

41 እዴግኖሙ ፡ ለፀርየ ፡ ወእኅዞሙ ፤ ወኢይትመየጥ ፡ እስከ ፡ ኣጠፍኦሙ ።

42 ኣመነድቦሙ ፡ ወኢይድክሉ ፡ ቀዊመ ፤ ወይወድቁ ፡ ታሕተ ፡ እገርየ ።

43 ወታቀንተኒ ፡ ኀይለ ፡ በፀብእ ፤ አዕቀጽኮሙ ፡ ለኵሎሙ ፡ እለ ፡ ቆሙ ፡ ላዕሌየ ፡ በመትሕቴየ ።

44 ወመጠውከኒ ፡ ዘባኖሙ ፡ ለፀርየ ፤ ወሠረውኮሙ ፡ ለጸላእትየ ።

45 ዐውየዉ ፡ ወኀጥኡ ፡ ዘይረድኦሙ ፤ ኀበ ፡ እግዚአብሔር ፡ ወኢሰምዖሙ ።

46 አኀርጾሙ ፡ ከመ ፡ ጸበል ፡ ዘቅድመ ፡ ገጸ ፡ ነፋስ ፤ ወእኪይዶሙ ፡ ከመ ፡ ጽንጕነ ፡ መርሕብ ።

47 አድኅነኒ ፡ እምነቢበ ፡ አሕዛብ ። ወትሠይመኒ ፡ ውስተ ፡ ርእሰ ፡ ሕዝብ ፤

48 ሕዝብ ፡ ዘኢያአምር ፡ ተቀንየ ፡ ሊተ ። ውስተ ፡ ምስማዐ ፡ እዝን ፡ ተሠጥዉኒ ፤

49 ውሉደ ፡ ነኪር ፡ ሐሰዉኒ ። ውሉደ ፡ ነኪር ፡ በልዩ ፤ ወሐንከሱ ፡ በፍኖቶሙ ።

50 ሕያው ፡ እግዚአብሔር ፡ ወቡሩክ ፡ አምላኪየ ፤ ወተለዐለ ፡ አምላከ ፡ መድኀኒትየ ።

51 አምላኪየ ፡ ያገብእ ፡ በቀልየ ፤ ወአግረረ ፡ ሊተ ፡ አሕዛበ ፡ በመትሕቴየ ። ዘይባልሐኒ ፡ እምጸላእትየ ፡ ምንስዋን ፡

52 ወዘያሌዕለኒ ፡ እምእለ ፡ ቆሙ ፡ ላዕሌየ ፤ እምብእሲ ፡ ገፋዒ ፡ ባልሐኒ ።

53 በእንተዝ ፡ እገኒ ፡ ለከ ፡ በውስተ ፡ አሕዛብ ፡ እግዚኦ ፤ ወእዜምር ፡ ለስምከ ።

54 ዘያዐብያ ፡ ለመድኀኒተ ፡ ንጉሥ ። ወይገብር ፡ ምሕረቶ ፡ ለመሲሑ ፡ ለዳዊት ፡ ወለዘርዑ ፡ እስከ ፡ ለዓለም ።

18 ፍጽሜ ፡ መዝሙር ፡ ዘዳዊት ።

1 ሰማያት ፡ ይነግራ ፡ ስብሐተ ፡ እግዚአብሔር ፤ ወግብረ ፡ እደዊሁ ፡ ያየድዓ ፡ ሰማያት ።

2 ዕለት ፡ ለዕለት ፡ ትጐሥዕ ፡ ነቢበ ፤ ወሌሊት ፡ ለሌሊት ፡ ታየድዕ ፡ ጥበበ ።

3 አልቦ ፡ ነገረ ፡ ወአልቦ ፡ ነቢበ ፡ ዘኢተሰምዐ ፡ ቃሎሙ ።

4 ውስተ ፡ ኵሉ ፡ ምድር ፡ ወፅአ ፡ ነገሮሙ ፡ ወእስከ ፡ አጽናፈ ፡ ዓለም ፡ በጽሐ ፡ ነቢቦሙ ፤

5 ወውስተ ፡ ፀሓይ ፡ ሤመ ፡ ጽላሎቶ ። ወውእቱሰ ፡ ከመ ፡ መርዓዊ ፡ ዘይወፅእ ፡ እምጽርሑ ፤

6 ይትፌሣሕ ፡ ከመ ፡ ይርባሕ ፡ ዘይሜርድ ፡ ፍኖቶ ። እምአጽናፈ ፡ ሰማይ ፡ ሙፅኡ ፡

7 ወእስከ ፡ አጽናፈ ፡ ሰማይ ፡ ምእታዉ ፤ ወአልቦ ፡ ዘይትኀባእ ፡ እምላህቡ ።

8 ሕጉ ፡ ለእግዚአብሔር ፡ ንጹሕ ፡ ወይመይጣ ፡ ለነፍስ ፤ ስምዑ ፡ ለእግዚአብሔር ፡ እሙን ፡ ዘያጠብብ ፡ ሕፃናተ ።

9 ኵነኔሁ ፡ ለእግዚአብሔር ፡ ርቱዕ ፡ ወይስተፌሥሕ ፡ ልበ ፤ ትእዛዙ ፡ ለእግዚአብሔር ፡ ብሩህ ፡ ወይበርህ ፡ አዕይንተ ።

10 ፈሪሀ ፡ እግዚአብሔር ፡ ንጹሕ ፡ ወየሐዩ ፡ ለዓለም ፤ ፍትሑ ፡ ለእግዚአብሔር ፡ ጽድቅ ፤ ወርትዕ ፡ ኅቡረ ።

11 ወይትፈተው ፡ እምወርቅ ፡ ወእምዕንቍ ፡ ክቡር ፤ ወይጥዕም ፡ እመዓር ፡ ወሶከር ።

12 ወገብርከሰ ፡ የዐቅቦ ፤ ወበዐቂቦቱ ፡ ይትዐሰይ ፡ ብዙኀ ።

13 ለስሒት ፡ መኑ ፡ ይሌብዋ ፤ እምኅቡኣትየ ፡ አንጽሐኒ ። ወእምነኪር ፡ መሐኮ ፡ ለገብርከ ።

14 እመሰ ፡ ኢቀነዩኒ ፡ ውእተ ፡ ጊዜ ፡ ንጹሐ ፡ እከውን ፤ ወእነጽሕ ፡ እምዐባይ ፡ ኀጢአትየ ።

15 ወይከውን ፡ ሥሙረ ፡ ቃለ ፡ አፉየ ፡ ወሕሊና ፡ ልብየኒ ፡ ቅድሜየ ፡ ውእቱ ፡ በኵሉ ፡ ጊዜ ።

16 እግዚእየ ፡ ረዳኢየ ፡ ወመድኀንየ ።

19 ፍጻሜ ፡ መዝሙር ፡ ዘዳዊት ።

1 ይስማዕከ ፡ እግዚአብሔር ፡ በዕለተ ፡ ምንዳቤከ ፤ ወይቁም ፡ ለከ ፡ ስሙ ፡ ለአምላከ ፡ ያዕቆብ ።

2 ወይፈኑ ፡ ለከ ፡ ረድኤተ ፡ እምቅደሱ ፤ ወእምጽዮን ፡ ይትወከፍከ ።

3 ወይዝክር ፡ ለከ ፡ ኵሎ ፡ መሥዋዕተከ ፤ ወያጥልል ፡ ለከ ፡ ቍርባነከ ።

4 የሀብክ ፡ እግዚአብሔር ፡ ዘከመ ፡ ልብከ ፤ ወይፈጽም ፡ ለከ ፡ ኵሎ ፡ ሥምረተከ ።

5 ወንትፌሣሕ ፡ በአድኅኖትከ ፡ ወነዐቢ ፡ በስመ ፡ እግዚአብሔር ፡ አምላክነ ፤

6 ወይፈጽም ፡ ለከ ፡ እግዚአብሔር ፡ ኵሎ ፡ ስእለተከ ። ይእዜ ፡ ኣእመርኩ ፡ ከመ ፡ አድኀኖ ፡ እግዚአብሔር ፡ ለመሲሑ ።

7 ወይሠጠዎ ፡ እምሰማይ ፡ ወቅደሱ ፤ በኀይለ ፡ አድኅኖተ ፡ የማኑ ።

8 እሙንቱሰ ፡ በአፍራስ ፡ ወበሰረገላት ፤ ወንሕነሰ ፡ ነዐቢ ፡ በስመ ፡ እግዚአብሔር ፡ አምላክነ ።

9 እሙንቱሰ ፡ ተዐቅጹ ፡ ወወድቁ ፤ ወንሕነሰ ፡ ተንሣእነ ፡ ወረታዕነ ።

10 እግዚኦ ፡ አድኅኖ ፡ ለንጉሥ ፡ ወስምዐነ ፡ በዕለተ ፡ ንጼውዐከ ።

20 ፍጻሜ ፡ መዝሙር ፡ ዘዳዊት ።

1 እግዚኦ ፡ በኀይልከ ፡ ይትፌሣሕ ፡ ንጉሥ ፤ ወብዙኀ ፡ ይትሐሠይ ፡ በአድኅኖትከ ።

2 ፍትወተ ፡ ነፍሱ ፡ ወሀብኮ ፤ ወስእለተ ፡ ከናፍሪሁ ፡ ኢከላእኮ ።

3 እስመ ፡ በጻሕኮ ፡ በበረከት ፡ ሠናይ ፤ ወአንበርከ ፡ አክሊለ ፡ ዲበ ፡ ርእሱ ፡ ዘእምዕንቍ ፡ ክቡር ።

4 ሐይወ ፡ ሰአለከ ፡ ወወሀብኮ ፤ ለነዋኅ ፡ መዋዕል ፡ ለዓለመ ፡ ዓለም ።

5 ዐቢይ ፡ ክብሩ ፡ በአድኅኖትከ ፤ ክብረ ፡ ወስብሐተ ፡ ወሰኮ ።

6 እስመ ፡ ወሀብኮ ፡ በረከተ ፡ ለዓለመ ፡ ዓለም ፤ ወታስተፌሥሖ ፡ በሐሤተ ፡ ገጽከ ።

7 እስመ ፡ ተወከለ ፡ ንጉሥ ፡ በእግዚአብሔር ፤ ወኢይትሀወክ ፡ በምሕረቱ ፡ ለልዑል ።

8 ትርከቦሙ ፡ እዴከ ፡ ለኵሎሙ ፡ ፀርከ ፤ ወትትራከቦሙ ፡ እዴከ ፡ ለኵሎሙ ፡ ጸላእትከ ።

9 ወትረስዮሙ ፡ ከመ ፡ እቶነ ፡ እሳት ፡ ለጊዜ ፡ ገጽከ ። እግዚኦ ፡ በመዐትከ ፡ ሁኮሙ ፤ ወትብልዖሙ ፡ እሳት ።

10 ወፍሬሆሙኒ ፡ ሰዐር ፡ እምድር ፤ ወዘርዖሙኒ ፡ እምእጓለ ፡ እመሕያው ።

11 እስመ ፡ ሜጥዋ ፡ ለዐመፃ ፡ ላዕሌከ ፤ ወሐለዩ ፡ ምክረ ፡ እንተ ፡ ኢይክሉ ፡ አቅሞ ።

12 ወታገብኦሙ ፡ ድኅሬሆሙ ፤ ወታስተደሉ ፡ ገጾሙ ፡ ለጊዜ ፡ መዐትከ ።

13 ተለዐልከ ፡ እግዚኦ ፡ በኀይልከ ፤ ንሴብሕ ፡ ወንዜምር ፡ ለጽንዕከ ።

21 ፍጻሜ ፡ በእንተ ፡ ተወክፎ ፡ እንተ ፡ ጸብሐት ፤ መዝሙር ፡ ዘዳዊት ።

1 አምላኪየ ፡ አምላኪየ ፡ ነጽረኒ ፡ ወለምንት ፡ ኀደገኒ ፤ ርሑቅ ፡ እምአድኅኖትየ ፡ ቃለ ፡ ኃጢአትየ ።

2 አምላኪየ፡ ጸራኅኩ ፡ ኀቤከ ፡ ዕለትየ ፡ ወኢሰማዕከኒ ፤ ወሌሊትየኒ ፡ ቅድሜከ ፡ ወኢሐለይከኒ ።

3 ወአንተሰ ፡ ውስተ ፡ ቅዱሳኒከ ፡ ተኀድር ፡ ስቡሐ ፡ እስራኤል ።

4 ኪያከ ፡ ተወከሉ ፡ አበዊነ ፤ ተወከሉከኒ ፡ ወአድኀንኮሙ ።

5 ኀቤከ ፡ ጸርኁ ፡ ወድኅኑ ፤ ኪያከ ፡ ተወከሉ ፡ ወኢተኀፍሩ ።

6 አንሰ ፡ ዕፄ ፡ ወአኮ ፡ ሰብእ ፤ ምኑን ፡ በኀበ ፡ ሰብእ ፡ ወትሑት ፡ በውስተ ፡ ሕዝብ ።

7 ኵሎሙ ፡ እለ ፡ ይሬእዩኒ ፡ ይትቃጸቡኒ ፤ ይብሉ ፡ በከናፍሪሆሙ ፡ ወየሐውሱ ፡ ርእሶሙ ።

8 ተወከለ ፡ በእግዚአብሔር ፡ ለያድኅኖ ፤ ወያድኅኖ ፡ እመ ፡ ይፈቅዶ ።

9 እስመ ፡ እንተ ፡ አውፃእከኒ ፡ እምከርሥ ፤ ወተወከልኩከ ፡ እንዘ ፡ ሀለውኩ ፡ ውስተ ፡ አጥባተ ፡ እምየ ። ላዕሌከ ፡ ተገደፍኩ ፡ እማኅፀን ፤

10 እምከርሠ ፡ እምየ ፡ አንተ ፡ አምላኪየ ።

11 ኢትርሐቅ ፡ እምኔየ ፡ እስመ ፡ አልጸቁ ፡ እትመንድብ ፤ እስመ ፡ አልቦ ፡ ዘይረድአኒ ።

12 ዐገቱኒ ፡ አልህምት ፡ ብዙኃን ፤ ወአኀዙኒ ፡ አስዋር ፡ ሥቡሓን ፤

13 ወአብቀዉ ፡ አፉሆሙ ፡ ላዕሌየ ፤ ከመ ፡ አንበሳ ፡ ዘጽኑሕ ፡ ለመሲጥ ።

14 ተከዐውኩ ፡ ከመ ፡ ማይ ፡ ወተዘርወ ፡ ኵሉ ፡ አዕጽምትየ ።

15 ወኮነ ፡ ልብየ ፡ ከመ ፡ ሰምዕ ፡ ዘይትመሰው ፡ በማእከለ ፡ ከርሥየ ።

16 ወየብሰ ፡ ከመ ፡ ገልዕ ፡ ኀይልየ ፡ ወጠግዕ ፡ ልሳንየ ፡ በጕርዔየ ፤ ወአውረድከኒ ፡ ውስተ ፡ መሬተ ፡ ሞት ።

17 ዐገቱኒ ፡ ከለባት ፡ ብዙኃን ፤ ወአኀዙኒ ፡ ማኅበሮሙ ፡ ለእኩያን ። ቀነዉኒ ፡ እደውየ ፡ ወእገርየ ።

18 ወኈለቁ ፡ ኵሎ ፡ አዕጽምትየ ። እሙንተሰ ፡ ጠይቆሙ ፡ ተዐወሩኒ ።

19 ወተካፈሉ ፡ አልባስየ ፡ ለርእሶሙ ፤ ወተዓፀዉ ፡ ዲበ ፡ ዐራዝየ ።

20 አንተ ፡ እግዚኦ ፡ ኢትርሐቅ ፡ እምኔየ ፤ ወነጽር ፡ ውስተ ፡ ረዱኦትየ ።

21 አድኅና ፡ አምኲናት ፡ ለነፍስየ ። ወእምእደ ፡ ከለባት ፡ ለብሕቱትየ ።

22 አድኅነኒ ፡ እምአፈ ፡ አንበሳ ፤ ወእምአቅርንት ፡ ዘአሐዱ ፡ ቀርኑ ፡ ለብሕቱትየ ።

23 እነግሮሙ ፡ ስምከ ፡ ለአኀውየ ፤ ወበማእከለ ፡ ማኅበር ፡ እሴብሐከ ።

24 እለ ፡ ትፈርህዎ ፡ ልእግዚአብሔር ፡ ሰብሕዎ ፤ ኵልክሙ ፡ ዘርዐ ፡ ያዕቆብ ፡ አክብርዎ ፤

25 ወፍርህዎ ፡ ኵልክሙ ፡ ዘርዕ ፡ እስራኤል ። እስመ ፡ ኢመነነ ፡ ወኢተቈጥዐ ፡ ስእለተ ፡ ነዳይ ፤

26 ወኢሜጠ ፡ ገጾ ፡ እምኔየ ፤ ሶበ ፡ ጸራኅኩ ፡ ኀቤሁ ፡ ይሰምዐኒ ።

27 እምኀቤከ ፡ ክብርየ ፡ በማኅበር ፡ ዐቢይ ፤ ወእሁብ ፡ ብፅአትየ ፡ በቅድመ ፡ እለ ፡ ይፈርህዎ ።

28 ይብልዑ ፡ ነዳያን ፡ ወይጽገቡ ፡ ወይሴብሕዎ ፡ ለእግዚአብሔር ፡ ኵሎሙ ፡ እለ ፡ የኀሥዎ ፤ ወየሐዩ ፡ ልቦሙ ፡ ለዓለመ ፡ ዓለም ።

29 ወይዝክሩ ፡ ወይትመየጡ ፡ ኀበ ፡ እግዚአብሔር ፡ ኵሎሙ ፡ አጽናፈ ፡ ምድር ፤

30 ወይስግዱ ፡ ቅድሜሁ ፡ ኵሎሙ፡ በሐውርተ ፡ አሕዛብ ።

31 እስመ ፡ ለእግዚአብሔር ፡ መንግሥት ፤ ወውእቱ ፡ ይኴንኖሙ ፡ ለአሕዛብ ።

32 ብልዑ ፡ ወስግዱ ፡ ኵልክሙ ፡ ጥሉላነ ፡ ምድር ፡ ቅድሜሁ ፡ ይወድቁ ፡ ኵሎሙ ፡ እለ ፡ ይወርዱ ፡ ውስተ ፡ ምድር ፤

33 ወነፍስየኒ ፡ ሎቱ ፡ ተሐዩ ። ወዘርዕየኒ ፡ ሎቱ ፡ ይትቀነይ ፤

34 ትዜንዎ ፡ ለእግዚአብሔር ፡ ትውልድ ፡ እንተ ፡ ትመጽእ ። ወይዜንዉ ፡ ጽድቀ ፡ ዚአሁ ፤ ሕዝብ ፡ ዘይትወለድ ፡ ዘገብረ ፡ እግዚአብሔር ።

22 መዝሙር ፡ ዘዳዊት ።

1 እግዚአብሔር ፡ ይሬዕየኒ ፡ ወአልቦ ፡ ዘየኀጥአኒ ። ውስተ ፡ ብሔር ፡ ሥዑር ፡ ህየ ፡ ያኀድረኒ ፤

2 ወኀበ ፡ ማየ ፡ ዕረፍት ፡ ሐፀነኒ ።

3 ሜጣ ፡ ለነፍስየ ፤ ወመርሐኒ ፡ ፍኖተ ፡ ጽድቅ ፡ በእንተ ፡ ስመ ፡ ዚአሁ ።

4 እመኒ ፡ ሖርኩ ፡ ማእከለ ፡ ጽላሎተ ፡ ሞት ፡ ኢይፈርሆ ፡ ለእኩይ ፡ እስመ ፡ አንተ ፡ ምስሌየ ፤

5 በትርከ ፡ ወቀስታምከ ፡ እማንቱ ፡ ገሠጻኒ ።

6 ወሠራዕከ ፡ ማእደ ፡ በቅድሜየ ፡ በአንጻሪሆሙ ፡ ለእለ ፡ ይሣቅዩኒ ፤

7 ወአጽሐድከ ፡ በቅብእ ፡ ርእስየ ፡ ጽዋዕከኒ ፡ ጽኑዕ ፡ ያረዊ ።

8 ምሕረትከ ፡ ይትልወኒ ፡ በኵሉ ፡ መዋዕለ ፡ ሕይወትየ ፤

9 ከመ ፡ ታንብረኒ ፡ ቤቶ ፡ ለእግዚአብሔር ፡ ለነዋኅ ፡ መዋዕል ።

23 መዝሙር ፡ ዘዳዊት ፡ ዘቀዳሚተ ሰንበት ።

1 ለእግዚአብሔር ፡ ምድር ፡ በምልኣ ፤ ወዓለምኒ ፡ ወኵሎሙ ፡ እለ ፡ ይነብሩ ፡ ውስቴታ ።

2 ወውእቱ ፡ በባሕር ፡ ሳረራ ፤ ወበአፍላግኒ ፡ ውእቱ ፡ አጽንዓ ።

3 መኑ ፡ የዐርግ ፡ ውስተ ፡ ደብረ ፡ እግዚአብሔር ፤ ወመኑ ፡ ይቀውም ፡ ውስተ ፡ መካነ ፡ መቅደሱ ።

4 ዘንጹሕ ፡ ልቡ ፡ ወንጹሕ ፡ እደዊሁ ። ወዘኢነሥአ ፡ ከንቶ ፡ ላዕለ ፡ ነፍሱ ፤ ወዘኢመሐለ ፡ በጕሕሉት ፡ ለቢጹ ።

5 ውእቱ ፡ ይነሥእ ፡ በረከተ ፡ እምኀበ ፡ እግዚአብሔር ፤ ወሣህሉኒ ፡ እምኀበ ፡ እግዚአብሔር ፡ አምላኩ ።

6 ዛቲ ፡ ትውልድ ፡ ተኀሦ ፡ ሎቱ ፤ ወተኀሥሥ ፡ ገጾ ፡ ለአምላከ ፡ ያዕቆብ ።

7 አርኅው ፡ ኆኃተ ፡ መኳንንት ፡ ወይትረኀዋ ፡ ኆኃት ፡ እለ ፡ እምፍጥረት ፤ ወይባእ ፡ ንጉሠ ፡ ስብሐት ።

8 መኑ ፡ ውእቱ ፡ ዝንቱ ፡ ንጉሠ ፡ ስብሐት ። እግዚአብሔር ፡ ኀያል ፡ ወጽኑዕ ፤ እግዚአብሔር ፡ ኀያል ፡ በውስተ ፡ ፀብእ ።

9 አርኅው ፡ ኆኃተ ፡ መኳንንት ፡ ወይትረኀዋ ፡ ኆኃት ፡ እለ ፡ እምፍጥረት ፤ ወይባእ ፡ ንጉሠ ፡ ስብሐት ።

10 መኑ ፡ ውእቱ ፡ ዝንቱ ፡ ንጉሠ ፡ ስብሐት ፤ እግዚአብሔር ፡ አምላከ ፡ ኀያላን ፡ ውእቱ ፡ ዝንቱ ፡ ንጉሠ ፡ ስብሐት ።

24 መዝሙር ፡ ዘዳዊት ።

1 ኀቤከ ፡ እግዚኦ ፡ አንቃዕደውኩ ፡ ነፍስየ ፡ አምላኪየ ፡ ኪያከ ፡ ተወከልኩ ፡ ኢይትኀፈር ፡ ለዓለም ፤

2 ወኢይስሐቁኒ ፡ ጸላእትየ ። እስመ ፡ ኵሎሙ ፡ እለ ፡ ይሴፈዉከ ፡ ኢይትኀፈሩ ፤

3 ለይትኀፈሩ ፡ ኵሎሙ ፡ እለ ፡ ይኤብሱ ፡ ዘልፈ ።

4 ፍኖተከ ፡ እግዚኦ ፡ አምረኒ ፤ ወአሰረ ፡ ዚአከ ፡ ምህረኒ ።

5 ወምርሐኒ ፡ በጽድቅከ ፡ ወምህረኒ ፡ እስመ ፡ አንተ ፡ አምላኪየ ፡ ወመድኀኒየ ፤ ወኪየከ ፡ እሴፎ ፡ ኵሎ ፡ አሚረ ።

6 ተዘከር ፡ ሣህለከ ፡ እግዚኦ ፡ ወምሕረተከኒ ፤ እስመ ፡ ለዓለም ፡ ውእቱ ።

7 ኃጢአትየ ፡ ዘበንእስየ ፡ ወእበድየ ፡ ኢተዝክር ፡ ሊተ ።

8 ወበከመ ፡ ሣህልከ ፡ ተዘከረኒ ፤ በእንተ ፡ ምሕረትከ ፡ እግዚኦ ።

9 ኄርኒ ፡ ወጻድቅኒ ፡ እግዚአብሔር ፤ በእንተዝ ፡ ይመርሖሙ ፡ ፍኖተ ፡ ለእለ ፡ ይስሕቱ ።

10 ወይሜህሮሙ ፡ ፍትሐ ፡ ለየዋሃን ፤ ወይኤምሮሙ ፡ ፍኖቶ ፡ ለልቡባን ።

11 ኵሉ ፡ ፍኖቱ ፡ ለእግዚአብሔር ፡ ሣህል ፡ ወጽድቅ ፤ ለእለ ፡ የኀሡ ፡ ሕጎ ፡ ወስምዖ ።

12 በእንተ ፡ ስምከ ፡ እግዚኦ ፤ ወስረይ ፡ ሊተ ፡ ኵሎ ፡ ኃጢአትየ ፡ እስመ ፡ ብዙኅ ፡ ውእቱ ።

13 መኑ ፡ ውእቱ ፡ ብእሲ ፡ ዘይፈርሆ ፡ ለእግዚአብሔር ፤ ወይመርሖ ፡ ፍኖተ ፡ እንተ ፡ ኀርየ ።

14 ወነፍሱሂ ፡ ውስተ ፡ ሠናይ ፡ ተኀድር ፤ ወዘርዑሂ ፡ ይወርስዋ ፡ ለምድር ።

15 ኀይሎሙ ፡ ውእቱ ፡ እግዚአብሔር ፡ ለእለ ፡ ይፈርህዎ ፤ ወስሙሂ ፡ ለእግዚአብሔር ፡ ለእለ ፡ ይጼውዕዎ ። ወሕጎሂ ፡ ይሜህሮሙ ።

16 አዕይንትየሰ ፡ ዘልፈ ፡ ኀበ ፡ እግዚአብሔር ፤ እስመ ፡ ውእቱ ፡ ይባልሖን ፡ እመሥገርት ፡ ለእገርየ ።

17 ነጽር ፡ ላዕሌየ ፡ ወተሣሀለኒ ፤ እስመ ፡ ባሕታዊ ፡ ወነዳይ ፡ አነ ።

18 ወብዙኅ ፡ ሐዘኑ ፡ ለልብየ ፤ አድኅነኒ ፡ እምንዳቤየ ።

19 ርኢ ፡ ሕማምየ ፡ ወስራሕየ ፤ ወኅድግ ፡ ሊተ ፡ ኵሎ ፡ ኃጢአትየ ።

20 ወርኢ ፡ ከመ ፡ በዝኁ ፡ ጸላእትየ ፤ ጽልአ ፡ በዐመፃ ፡ ይጸልኡኒ ።

21 ዕቀባ ፡ ለነፍስየ ፡ ወአድኅና ፤ ወኢይትኀፈር ፡ እስመ ፡ ኪየከ ፡ ተወከልኩ ።

22 የዋሃን ፡ ወራትዓን ፡ ተለዉኒ ፤ እስመ ፡ ተሰፈውኩከ ፡ እግዚኦ ።

23 ያድኅኖ ፡ እግዚአብሔር ፡ ለእስራኤል ፡ እምኵሉ ፡ ምንዳቤሁ ።

25 መዝሙር ፡ ዘዳዊት ።

1 ፍታሕ ፡ ሊተ ፡ እግዚኦ ፡ እስመ ፡ አንሰ ፡ በየዋሃትየ ፡ አሐውር ፤ ወተወከልኩ ፡ በእግዚአብሔር ፡ ከመ ፡ ኢይድክም ።

2 ፍትነኒ ፡ እግዚኦ ፡ ወአመክረኒ ፤ ፍትን ፡ ልብየ ፡ ወኵልያትየ ።

3 ከመ ፡ ምሕረትከ ፡ ቅድመ ፡ አዕይንትየ ፡ ውእቱ ፤ ወተፈሣሕኩ ፡ በአድኅኖትከ ።

4 ወኢነበርኩ ፡ ውስተ ፡ ዐውደ ፡ ከንቱ ፤ ወኢቦእኩ ፡ ምስለ ፡ ዐማፂያን ።

5 ጸላእኩ ፡ ማኅበረ ፡ እኩያን ፤ ወኢይነብር ፡ ምስለ ፡ ጽልሕዋን ።

6 ወአሐጽብ ፡ በንጹሕ ፡ እደውየ ፤ ወአዐውድ ፡ ምሥዋዒከ ፡ እግዚኦ ።

7 ከመ ፡ እስማዕ ፡ ቃለ ፡ ስብሐቲከ ፤ ወከመ ፡ እንግር ፡ ኵሎ ፡ መንክረከ ።

8 እግዚኦ ፡ አፍቀርኩ ፡ ሥነ ፡ ቤትከ ፤ ወመካነ ፡ ማኅደረ ፡ ስብሐቲከ ።

9 ኢትግድፋ ፡ ምስለ ፡ ኃጥኣን ፡ ለነፍስየ ፤ ወኢምስለ ፡ ዕድወ ፡ ደም ፡ ለሕይወትየ ።

10 እለ ፡ ዐመፃ ፡ ውስተ ፡ እደዊሆሙ ፤ ወምልእት ፡ ሕልያነ ፡ የምኖሙ ።

11 ወአንሰ ፡ በየዋሃትየ ፡ አሐውር ፤ አድኅነኒ ፡ እግዚኦ ፡ ወተሣሀለኒ ።

12 እስመ ፡ በርቱዕ ፡ ቆማ ፡ እገሪየ ፤ በማኅበር ፡ እባርከከ ፡ እግዚኦ ።

26 መዝሙር ፡ ዘዳዊት ፡ ዘእንበለ ፡ ይትቀባእ ።

1 እግዚአብሔር ፡ ያበርህ ፡ ሊተ ፡ ወያድኅነኒ ፡ ምንትኑ ፡ ያፈርሀኒ ፤

2 እግዚአብሔር ፡ ምእመና ፡ ለሕይወትየ ፡ ምንትኑ ፡ ያደነግፀኒ ።

3 ሶበ ፡ ይቀርቡኒ ፡ እኩያን ፡ ይብልዑኒ ፡ ሥጋየ ፤

4 ጸላእትየሰ ፡ እለ ፡ ይሣቅዩኒ ፡ እሙንቱ ፡ ደክሙ ፡ ወወድቁ ።

5 እመኒ ፡ ፀብአኒ ፡ ተዓይን ፡ ኢይፈርሀኒ ፡ ልብየ ፤

6 ወእመኒ ፡ ሮዱኒ ፡ ፀባኢት ፡ አንሰ ፡ ቦቱ ፡ ተወከልኩ ።

7 አሐተ ፡ ሰአልክዎ ፡ ለእግዚአብሔር ፡ ወኪያሃ ፡ አኀሥሥ ፤ ከመ ፡ እኅድር ፡ ቤቶ ፡ ለእግዚአብሔር ፡ በኵሉ ፡ መዋዕለ ፡ ሕይወትየ ፤

8 ከመ ፡ ያርእየኒ ፡ ዘያሠምሮ ፡ ለእግዚአብሔር ፡ ወከመ ፡ እፀመድ ፡ ውስተ ፡ ቤተ ፡ መቅደሱ ።

9 እስመ ፡ ኀብአኒ ፡ ውስተ ፡ ጽላሎቱ ፡ በዕለተ ፡ ምንዳቤየ ። ወሰወረኒ ፡ በምኅባአ ፡ ጽላሎቱ ፤

10 ወዲበ ፡ ኰኵሕ ፡ አልዐለኒ ። ናሁ ፡ ይእዜ ፡ አልዐለ ፡ እግዚአብሔር ፡ ርእስየ ፡ ዲበ ፡ ጸላእትየ ።

11 ዖድኩ ፡ ወሦዕኩ ፡ ውስተ ፡ ደብተራሁ ፡ መሥዋዕተ ፤ ወየበብኩ ፡ ሎቱ ። እሴብሕ ፡ ወእዜምር ፡ ለእግዚአብሔር ።

12 ስምዐኒ ፡ እግዚኦ ፡ ቃልየ ፡ ዘሰአልኩ ፡ ኀቤከ ። ተሣሀለኒ ፡ ወስምዐኒ ፡

13 ለከ ፡ ይብለከ ፡ ልብየ ፡ ወኀሠሥኩ ፡ ገጸከ ፤ ገጸ ፡ ዚአከ ፡ አኀሥሥ ፡ እግዚኦ ።

14 ወኢትሚጥ ፡ ገጸከ ፡ እምኔየ ፡ ወኢትትገሐስ ፡ እምገብርከ ፡ ተምዒዐከ ።

15 ረዳኤ ፡ ኩነኒ ፡ ወኢትግድፈኒ ፡ ወኢትትሀየየኒ ፡ አምላኪየ ፡ ወመድኀኒየ ።

16 እስመ ፡ አቡየ ፡ ወእምየ ፡ ገደፉኒ ፤ ወእግዚአብሔር ፡ ተወክፈኒ ።

17 ምህረኒ ፡ እግዚኦ ፡ ፍኖትከ ፤ ወምርሐኒ ፡ ፍኖተ ፡ ርትዕከ ፡ በእንተ ፡ ጸላእትየ ።

18 ወኢትመጥወኒ ፡ ለነፍስ ፡ ለእለ ፡ ይሣቅዩኒ ፤ እስመ ፡ ቆሙ ፡ ላእሌየ ፡ ሰምዕተ ፡ ዐመፃ ፡ ወሐሰወት ፡ ርእሳ ፡ ዐመፃ ።

19 እትአመን ፡ ከመ ፡ እርአይ ፡ ሠናይቶ ፡ ለእግዚአብሔር ፡ በብሔረ ፡ ሕያዋን ።

20 ወተሰፈዎ ፡ ለእግዚአብሔር ። ተዐገሥ ፡ ወአጽንዕ ፡ ልበከ ፡ ወተሰፈዎ ፡ ለእግዚአብሔር ።

27 መዝሙር ፡ ዘዳዊት ።

1 ኀቤከ ፡ እግዚኦ ፡ ጸራኅኩ ፡ አምላኪየ ፡ ወኢተጸመመኒ ፤ ወእመሰ ፡ ተጸመመከኒ ፡ እከውን ፡ ከመ ፡ እለ ፡ የወርዱ ፡ ውስተ ፡ ግብ ።

2 ስምዐኒ ፡ እግዚኦ ፡ ቃለ ፡ ስእለትየ ፡ ዘጸራኅኩ ፡ ኀቤከ ፡ ሶበ ፡ ኣንሥእ ፡ እደውየ ፡ በጽርሐ ፡ መቅደስከ ።

3 ኢትስሐባ ፡ ምስለ ፡ ኃጥኣን ፡ ለነፍስየ ፡ ወኢትግድፈኒ ፡ ምስለ ፡ ገበርተ ፡ ዐመፃ ።

4 እለ ፡ ይትናገሩ ፡ ሰላመ ፡ ምስለ ፡ ቢጾሙ ፤ ወእኩይ ፡ ውስተ ፡ ልቦሙ ።

5 ሀቦሙ ፡ በከመ ፡ ምግባሮሙ ፡ ወበከመ ፡ እከየ ፡ ሕሊናሆሙ ።

6 ፍድዮሙ ፡ በከመ ፡ ግብረ ፡ እደዊሆሙ ፤ ፍድዮሙ ፡ ፍዳሆሙ ፡ ላዕለ ፡ ርእሶሙ ።

7 እስመ ፡ ኢሐለዩ ፡ ውስተ ፡ ግብረ ፡ እግዚአብሔር ፡ ወኢውስተ ፡ ግብረ ፡ እደዊሁ ፤ ንሥቶሙ ፡ ወኢትሕንጾሙ ።

8 ይትባረክ ፡ እግዚአብሔር ፡ እስመ ፡ ሰምዐኒ ፡ ቃለ ፡ ስእለትየ ።

9 እግዚአብሔር ፡ ረዳእየ ፡ ወምእመንየ ፡ ቦቱ ፡ ተወከለ ፡ ልብየ ፡ ወይረድአኒ ።

10 ወሠረጸ ፡ ሥጋየ ፤ ወእምፈቃድየ ፡ አአምኖ ።

11 እግዚአብሔር ፡ ኀይሎሙ ፡ ውእቱ ፡ ለሕዝቡ ፤ ወምእመነ ፡ መድኀኒተ ፡ መሲሑ ፡ ውእቱ ።

12 አድኅን ፡ ሕዝበከ ፡ ወባርክ ፡ ርስተከ ፤ ረዐዮሙ ፡ ወአልዕሎሙ ፡ እስከ ፡ ለዓለም ።

28 መዝሙር ፡ ዘዳዊት ፡ ዘበፀአት ፡ ትዕይንት ።

1 አምጽኡ ፡ ለእግዚአብሔር ፡ ውሉደ ፡ አማልክት ፤ አምጽኡ ፡ ለእግዚአብሔር ፡ እጓለ ፡ ሐራጊት ፤

2 አምጽኡ ፡ ለእግዚአብሔር ፡ ክብረ ፡ ወስብሐተ ። አምጽኡ ፡ ለእግዚአብሔር ፡ ስብሐተ ፡ ለስሙ ፤ ስግዱ ፡ ለእግዚአብሔር ፡ በዐጸደ ፡ መቅደሱ ።

3 ቃለ ፡ እግዚአብሔር ፡ ላዕለ ፡ መየት ። አምላከ ፡ ስብሐት ፡ አንጐድጐደ ፤ እግዚአብሔር ፡ ላዕለ ፡ ማያት ፡ ብዙኅ ።

4 ቃለ ፡ እግዚአብሔር ፡ በኀይል ፤ ቃለ ፡ እግዚአብሔር ፡ በዐቢይ ፡ ስብሐት ።

5 ቃለ ፡ እግዚአብሔር ፡ ይቀጠቅጥ ፡ አርዘ ፤ ወይቀጠቅጦ ፡ እግዚአብሔር ፡ ለአርዘ ፡ ሊባኖስ ።

6 ወያደገድጎ ፡ ከመ ፡ ላህመ ፡ ለሊባኖስ ፤ ወፍቁርሰ ፡ ከመ ፡ ወልድ ፡ ዘአሐዱ ፡ ቀርኑ ።

7 ቃለ ፡ እግዚአብሔር ፡ ይመትር ፡ ነደ ፡ እሳት ። ቃለ ፡ እግዚአብሔር ፡ ያድለቀልቆ ፡ ለገዳም ፤ ወያድለቀልቆ ፡ እግዚአብሔር ፡ ለሐቅለ ፡ ቃዴስ ።

8 ቃለ ፡ እግዚአብሔር ፡ ያጸንዖሙ ፡ ለኀየላት ፤ ወይከሥት ፡ አዕዋመ ፤ ወበጽርሑ ፡ ኵሉ ፡ ይብል ፡ ስብሐት ።

9 እግዚአብሔር ፡ ያስተጋብኦ ፡ ለማየ ፡ አይኅ ፤ ወይነብር ፡ እግዚአብሔር ፡ ወይነግሥ ፡ ለዓለም ።

10 ወይሁቦሙ ፡ እግዚአብሔር ፡ ኀይል ፡ ለሕዝቡ ፤ እግዚአብሔር ፡ ይባርኮሙ ፡ ለሕዝቡ ፡ በሰላም ።

29 ፍጻሜ ፡ መዝሙር ፡ ማኅሌት ፡ ለተሐድሶ ፡ ቤቱ ፡ ለዳዊት ።

1 ኣአኵተከ ፡ እግዚኦ ፡ እስመ ፡ ተወከፍክኒ ፤ ወስላተ ፡ ጸላኢየ ፡ ኢረሰይከኒ ።

2 እግዚኦ ፡ አምላኪየ ፡ ጸራኅኩ ፡ ኀቤከ ፡ ወተሣሀልከኒ ።

3 እግዚኦ ፡ አውፃእካ ፡ እምሲኦል ፡ ለነፍስየ ፤ ወአድኀንከኒ ፡ እምእለ ፡ ይወርዱ ፡ ውስተ ፡ ግብ ።

4 ዘምሩ ፡ ለእግዚአብሔር ፡ ጻድቃኑ ፤ ወግነዩ ፡ ለዝክረ ፡ ቅድሳቱ ።

5 እስመ ፡ መቅሠፍት ፡ እመዐቱ ፡ ወሐይው ፡ እምፈቅዱ ፤

6 በምሴት ፡ ይደምፅ ፡ ብካይ ፡ ወበጽባሕ ፡ ፍሥሓ ።

7 አንሰ ፡ እቤ ፡ በትድላየ ፤ ኢይትሀወክ ፡ ለዓለም ።

8 እግዚኦ ፡ በሥምረትከ ፡ ሀባ ፡ ኀይለ ፡ ለሕይወትየ ፤

9 ሜጥከሰ ፡ ገጸከ ፡ ወኮንኩ ፡ ድንጉፀ ።

10 ኀቤከ ፡ እግዚኦ ፡ ጸራኅኩ ፡ ኀበ ፡ አምላኪየ ፡ እስእል ።

11 ምንተ ፡ ያሰልጥ ፡ ደምየ ፡ ለእመ ፡ ወረድኩ ፡ ውስተ ፡ ሙስና ፤

12 መሬትኑ ፡ የአምነከ ፡ ወይነግር ፡ ጽድቀከ ።

13 ሰምዐ ፡ እግዚአብሔር ፡ ወተሠሀለኒ ፤ ወኮነኒ ፡ እግዚአብሔር ፡ ረዳኢየ ።

14 ሜትከ ፡ ላሕየ ፡ ወአስተፈሣሕከኒ ፤ ሰጠጥከ ፡ ሠቅየ ፡ ወሐሤተ ፡ አቅነትከኒ ።

15 ከመዝ ፡ እዜምር ፡ ለከ ፡ ክብርየ ፡ ወኢይደንግፅ ፤ እግዚኦ ፡ አምላኪየ ፡ እገኒ ፡ ለከ ፡ ለዓለም ።

30 መዝሙር ፡ ዘዳዊት ፡ ዘበተደሞ ፡ ከመዘ ፡ ውእቱ ፡ በካልእ ።

1 ኪየከ ፡ ተወከልኩ ፡ እግዚኦ ፡ ወኢይትኀፈር ፡ ለዓለም ፤ ወበጽድቅከ ፡ አንግፈኒ ፡ ወባልሐኒ ።

2 አፅምእ ፡ እዝነከ ፡ ኀቤየ ፡ ወፍጡነ ፡ አድኅነኒ ።

3 ኩነኒ ፡ አምላኪየ ፡ ወመድኀንየ ፤ ወቤተ ፡ ጸወንየ ፡ ከመ ፡ ታድኅነኒ ፡

4 እስመ ፡ ኀይልየ ፡ ወጸወንየ ፡ አንተ ፤ ወበእንተ ፡ ስምከ ፡ ምርሐኒ ፡ ወሴስየኒ ።

5 ወአውፅእኒ ፡ እምዛቲ ፡ መሥገርት ፡ እንተ ፡ ኀብኡ ፡ ሊተ ፤ እስመ ፡ አንተ ፡ ረዳእየ ፡ እግዚኦ ።

6 ውስተ ፡ እዴከ ፡ ኣምኀፅን ፡ ነፍስየ ፤ ቤዝወኒ ፡ እግዚአብሔር ፡ አምላከ ፡ ጽድቅ ።

7 ጸላእከ ፡ እግዚኦ ፡ ኵሎ ፡ ዘየዐቅብ ፡ ከንቶ ፡ ለዝሉፉ ፤

8 ወአንሰ ፡ በእግዚአብሔር ፡ እወከልኩ ። እትፌሣሕ ፡ ወእትሐሠይ ፡ በአድኅኖትከ ።

9 እስመ ፡ ርኢከኒ ፡ በሕማምየ ፤ ወአድኀንካ ፡ እምንዳቤሃ ፡ ለነፍስየ ።

10 ወኢዘጋሕከኒ ፡ ውስተ ፡ እደ ፡ ፀርየ ። ወአቀምኮን ፡ ውስተ ፡ መርሕብ ፡ ለእገርየ ።

11 ተሣሀለኒ ፡ እግዚኦ ፡ እስመ ፡ ሐመምኩ ፤ ወተሀውከት ፡ እመዐት ፡ ዐይንየ ፡ ነፍስየኒ ፡ ወከርሥየኒ ።

12 እስመ ፡ ኀልቀ ፡ በሕማም ፡ ሕይወትየ ፤ ወዐመትየኒ ፡ በገዐር ።

13 ደክመ ፡ በተጽናስ ፡ ኀይልየ ፤ ወአንቀልቀለ ፡ ኵሉ ፡ አዕጽምትየ ።

14 ተጸአልኩ ፡ በኀበ ፡ ኵሎሙ ፡ ጸላእትየ ፤ ወፈድፋደሰ ፡ በኀበ ፡ ጎርየ ፡ ግሩም ፡ ኮንክዎሙ ፡ ለአዝማድየ ።

15 ወእለኒ ፡ ይሬእዩኒ ፡ አፍአ ፡ ይጐዩ ፡ እምኔየ ። ቀብጹኒ ፡ እምልብ ፡ ከመ ፡ ዘሞተ ፤

16 ወኮንኩ ፡ ከመ ፡ ንዋይ ፡ ዘተሐጕለ ። እስመ ፡ ሰማዕኩ ፡ ድምፀ ፡ ብዙኃን ፡ እለ ፡ ዐገቱኒ ፡ ዐውድየ ።

17 ሶበ ፡ ተጋብኡ ፡ ኅቡረ ፡ ላዕሌየ ፤ ወተማከሩ ፡ ይምስጥዋ ፡ ለነፍስየ ።

18 ወአንሰ ፡ ብከ ፡ ተወከልኩ ፡ እግዚኦ ፤ ወእቤለከ ፡ አምላኪየ ፡ አንተ ። ውስተ ፡ እዴከ ፡ ርስትየ ፤

19 አድኅነኒ ፡ እንእደ ፡ ፀርየ ፡ ወእምእለ ፡ ሮዱኒ ።

20 አብርህ ፡ ገጸከ ፡ ላዕለ ፡ ገብርከ ፤ ወአድኅነኒ ፡ በእንተ ፡ ምሕረትከ ። ወኢይትኀፈር ፡ እግዚኦ ፡ እስመ ፡ ጸዋዕኩከ ፤

21 ለይትኀፈሩ ፡ ጽልሕዋን ፡ ወይረዱ ፡ ውስተ ፡ ሲኦል ። አሌሎን ፡ ለከናፍረ ፡ ጕሕሉት ፤

22 እለ ፡ ይነባ ፡ ዐመፃ ፡ ላዕለ ፡ ጻድቅ ፡ በትዕቢት ፡ ወበመንኖ ።

23 ወበከመ ፡ ብዝኀ ፡ ምሕረትከ ፡ እግዚኦ ፡ ሰወርኮሙ ፡ ለእለ ፡ ይፈርሁከ ።

24 ወአድኀንኮሙ ፡ ለእለ ፡ ይትዌከሉ ፡ ብከ ፤ በቅድመ ፡ ደቂቀ ፡ እጓለ ፡ እምሕያው ።

25 ወተኀብኦሙ ፡ በጽላሎትከ ፡ እምሀከከ ፡ ሰብእ ፤

26 ወትከድኖሙ ፡ በመንጦላዕትከ ፡ እምባህለ ፡ ልሳን ።

27 ይትባረክ ፡ እግዚአብሔር ፡ ዘሰብሐ ፡ ምሕረቶ ፡ ላዕሌየ ፡ በብዝኀ ፡ ምንዳቤየ ።

28 አንሰ ፡ እቤ ፡ ተገደፍኩኒ ፡ እንጋ ፡ እምቅድመ ፡ አዕይንቲከ ።

29 በእንተዝ ፡ ሰምዐኒ ፡ እግዚአብሔር ፡ ቃለ ፡ ስእለትየ ፡ ዘጸራኅኩ ፡ ኀቤሁ ።

30 አፍቅርዎ ፡ ለእግዚአብሔር ፡ ኵልክሙ ፡ ጻድቃኑ ። እስመ ፡ ጽድቀ ፡ የኀሥሥ ፡ እግዚአብሔር ፤ ወይትቤቀሎሙ ፡ ለእለ ፡ የኀሥሡ ፡ ትዕቢተ ፡ ፈድፋደ ።

31 ተዐገሡ ፡ ወአጽንዑ ፡ ልበክሙ ፤ ኵልክሙ ፡ እለ ፡ ተወከልክሙ ፡ በእግዚአብሔር ።

31 መዝሙር ፡ ዘዳዊት ፡ ዘበኣእምሮ ።

1 ብፁዓን ፡ እለ ፡ ተኀድገ ፡ ሎሙ ፡ ኀጢአቶሙ ፤ ወለእለ ፡ ኢሐሰበ ፡ ሎሙ ፡ ኵሎ ፡ ገጋዮሙ ።

2 ብፁዕ ፡ ብእሲ ፡ ዘኢኈለቈ ፡ ሎቱ ፡ እግዚአብሔር ፡ ኃጢአቶ ፤ ወዘአልቦ ፡ ጽልሑተ ፡ ውስተ ፡ ልቡ ።

3 እስመ ፡ አርመምኩ ፡ በልብየ ፡ አዕጽምትየ ፤ እምኀበ ፡ እጸርኅ ፡ ኵሎ ፡ አሚረ ።

4 እስመ ፡ መዐልተ ፡ ወሌሊተ ፡ ከብደት ፡ እዴከ ፡ ላዕሌየ ፤ ወተመየጥኩ ፡ ለሕርትምና ፡ ሶበ ፡ ወግዐኒ ፡ ሦክ ።

5 ኃጢአትየ ፡ ነገርኩ ፡ ወአበሳየ ፡ ኢኀባእኩ ፤

6 ወእቤ ፡ ኣስተዋዳ ፡ ርእስየ ፡ ኀበ ፡ እግዚአብሔር ፡ በእንተ ፡ ኀጢአትየ ፤ ወአንተ ፡ ኅድግ ፡ ጽልሑቶ ፡ ለልብየ ።

7 በእንተዝ ፡ ይጼሊ ፡ ኀቤከ ፡ ኵሉ ፡ ጻድቅ ፡ በጊዜ ፡ ርቱዕ ፤

8 ወባሕቱ ፡ ማየ ፡ አይኅ ፡ ብዙኅ ፡ ኢይቀርብ ፡ ኀቤከ ።

9 አንተ ፡ ምስካይየ ፡ እምዛቲ ፡ ምንዳቤየ ፡ እንተ ፡ ረከበትኒ ፤ ወትፍሥሕትየኒ ፡ ከመ ፡ ታድኅነኒ ፡ እምእለ ፡ ሮዱኒ ።

10 ኣሌብወከ ፡ ወኣጸንዐከ ፡ በዛቲ ፡ ፍኖት ፡ እንተ ፡ ሖርከ ፤ ወኣጸንዕ ፡ አዕይንትየ ፡ ላዕሌከ ።

11 ኢትኩኒ ፡ ከመ ፡ ፈረስ ፡ ወበቅል ፡ እለ ፡ አልቦሙ ፡ ልበ ፤

12 እለ ፡ በሕሳል ፡ ወበልጓም ፡ ይመይጥዎሙ ፡ መላትሒሆሙ ፡ ከመ ፡ ኢይቅረቡ ፡ ኀቤከ ።

13 ብዙኅ ፡ መቅሠፍቶሙ ፡ ለኃጥኣን ፤ ወእለሰ ፡ ይትዌከሉ ፡ በእግዚአብሔር ፡ ሣህል ፡ ይሜግቦሙ ።

14 ተፈሥሑ ፡ በእግዚአብሔር ፡ ወተሐሠዩ ፡ ጻድቃኑ ፤ ወተመክሑ ፡ ኵልክሙ ፡ ርቱዓነ ፡ ልብ ።

32 መዝሙር ፡ ዘዳዊት ።

1 ተፈሥሑ ፡ ጻድቃን ፡ በእግዚአብሔር ፤ ወለራትዓን ፡ ይደልዎሙ ፡ ክብር ።

2 ግነዩ ፡ ለእግዚአብሔር ፡ በመሰንቆ ፤ ወበመዝሙር ፡ ዘዐሠርቱ ፡ አውታሪሁ ፡ ዘምሩ ፡ ሎቱ ።

3 ወሰብሐዎ ፡ ስብሐተ ፡ ሐዲሰ ፤ ሠናየ ፡ ዘምሩ ፡ ወየብቡ ፡ ሎቱ ።

4 እስመ ፡ ጽድቅ ፡ ቃሉ ፡ ለእግዚአብሔር ፤ ውኵሉ ፡ ግብሩ ፡ በሀይማኖት ።

5 ያፈቅር ፡ እግዚአብሔር ፡ ጽድቀ ፡ ወምጽዋተ ፤ ሣህሉ ፡ ለእግዚአብሔር ፡ መልአ ፡ ምድረ ።

6 ወበቃለ ፡ እግዚአብሔር ፡ ጸንዓ ፡ ሰማያት ፤ ወበእስትንፋሰ ፡ አፉሁ ፡ ኵሉ ፡ ኀይሎሙ ።

7 ዘያስተጋብኦ ፡ ከመ ፡ ዝቅ ፡ ለማየ ፡ ባሕር ፤ ወይሠይሞሙ ፡ ውስተ ፡ መዛግብተ ፡ ቀላያት ።

8 ትፍርሆ ፡ ለእግዚአብሔር ፡ ኵላ ፡ ምድር ፤ ወእምኔሁ ፡ ይደንግፁ ፡ ኵሎሙ ፡ እለ ፡ ይነብሩ ፡ ውስተ ፡ ዓለም ።

9 እስመ ፡ ውእቱ ፡ ይቤ ፡ ወኮኑ ፤ ወውእቱ ፡ አዘዘ ፡ ወተፈጥሩ ።

10 እግዚአብሔር ፡ ይመይጥ ፡ ምክሮሙ ፡ ለአሕዛብ ፤ ወይመይጥ ፡ ሕሊናሆሙ ፡ ለሕዝብ ፤ ወያረስዖሙ ፡ ምክሮሙ ፡ ለመላእክት ።

11 ወምክሩሰ ፡ ለእግዚአብሔር ፡ ይሄሉ ፡ ለዓለም ፤ ወሕሊና ፡ ልቡኒ ፡ ለትውልደ ፡ ትውልድ ።

12 ብፁዕ ፡ ሕዝብ ፡ ዘእግዚአብሔር ፡ አምላኩ ፤ ሕዝብ ፡ ዘኀረየ ፡ ሎቱ ፡ ለርስቱ ።

13 እምሰማይ ፡ ሐወጸ ፡ እግዚአብሔር ፤ ወርእየ ፡ ኵሎ ፡ ደቂቀ ፡ እጓለ ፡ እምሕያው ።

14 ወእምድልው ፡ ጽርሐ ፡ መቅደሱ ፤ ወርእየ ፡ ላዕለ ፡ ኵሎሙ ፡ እለ ፡ ኅዱራን ፡ ዲበ ፡ ምድር ።

15 ዘውእቱ ፡ ባሕቲቱ ፡ ፈጠረ ፡ ልኮሙ ፤ ዘያአምር ፡ ኵሎ ፡ ምግባሮሙ ።

16 ኢይድኅን ፡ ንጉሥ ፡ በብዝኀ ፡ ሰራዊቱ ፤ ወያርብኅኒ ፡ ኢደኅነ ፡ በብዙኀ ፡ ኀይሉ ።

17 ወፈረስኒ ፡ ሐሳዊ ፡ ኢያድኅን ፤ ወኢያመስጥ ፡ በብዝኀ ፡ ጽንዑ ።

18 ናሁ ፡ አዕይንቲሁ ፡ ለእግዚአብሔር ፡ ኀበ ፡ እለ ፡ ይፈርህዎ ፤ ወእለሰ ፡ ይትዌከሉ ፡ በምሕረቱ ።

19 ያድኅና ፡ እሞት ፡ ለነፍሶሙ ፤ ወይሴስዮሙ ፡ አመ ፡ ረኃብ ።

20 ነፍስነሰ ፡ ትሴፈዎ ፡ ለእግዚአብሔር ፤ እስመ ፡ ረዳኢነ ፡ ወምስካይነ ፡ ውእቱ ።

21 እስመ ፡ ቦቱ ፡ ይትፌሣሕ ፡ ልብነ ፤ ወተወከልነ ፡ በስሙ ፡ ቅዱስ ።

22 ለትኩን ፡ እግዚኦ ፡ ምሕረትከ ፡ ላዕሌነ ፤ በከመ ፡ ላዕሌከ ፡ ተወከልነ ።

33 መዝሙር ፡ ዘዳዊት ፤ ዘአመ ፡ በዐደ ፡ ገጾ ፡ እምቅድሜሁ ፡ ለአቢሜሌክ ።

1 እባርኮ ፡ ለእግዚአብሔር ፡ በኵሉ ፡ ጊዜ ፤ ወዘልፈ ፡ ስብሓቲሁ ፡ ውስተ ፡ አፉየ ።

2 በእግዚአብሔር ፡ ትከብር ፡ ነፍስየ ፤

3 ይስምዑ ፡ የዋሃን ፡ ወይትፈሥሑ ።

4 አዕብይዎ ፡ ለእግዚአብሔር ፡ ምስሌየ ፤ ወናልዕል ፡ ስሞ ፡ ኅቡረ ።

5 ኀሠሥክዎ ፡ ለእግዚአብሔር ፡ ወተሠጥወኒ ፤ ወእምኵሉ ፡ ምንዳቤየ ፡ አድኀነኒ ።

6 ቅረቡ ፡ ኀቤሁ ፡ ወያበርህ ፡ ለክሙ ፤ ወኢይትኀፈር ፡ ገጽክሙ ።

7 ዝንቱ ፡ ነዳይ ፡ ጸርኀ ፡ ወእግዚአብሔር ፡ ሰምዖ ፤ ወእምኵሉ ፡ ምንዳቤሁ ፡ አድኀኖ ።

8 ይትዐየን ፡ መልአከ ፡ እግዚአብሔር ፡ ዐውዶሙ ፡ ለእለ ፡ ይፈርህዎ ፡ ወያድኅኖሙ ።

9 ጠዐሙ ፡ ወታእምሩ ፡ ከመ ፡ ኄር ፡ እግዚአብሔር ፤ ብፁዕ ፡ ብእሲ ፡ ዘተወከለ ፡ ቦቱ ።

10 ፍርህዎ ፡ ለእግዚአብሔር ፡ ኵልክሙ ፡ ቅዱሳኑ ፤ እስመ ፡ አልቦሙ ፡ ተፅናሰ ፡ ለእለ ፡ ይፈርህዎ ።

11 ብዑላንሰ ፡ ነድዩ ፡ ወርኅቡ ፤ ወእለሰ ፡ ይኀሥዎ ፡ ለእግዚአብሔር ፡ ኢተጸነሱ ፡ እምኵሎ ፡ ሠናይ ።

12 ንዑ ፡ ደቂቅየ ፡ ወስምዑኒ ፤ ፈሪሀ ፡ እግዚአብሔር ፡ እምህርክሙ ።

13 መኑ ፡ ውእቱ ፡ ብእሲ ፡ ዘይፈቅዱ ፡ ሐይወ ፤ ወያፍቅር ፡ ይርእይ ፡ መዋዕለ ፡ ሠናያተ ።

14 ክላእ ፡ ልሳነከ ፡ እምእኩይ ፤ ወከናፍሪከኒ ፡ ከመ ፡ ኢይንብባ ፡ ጕሕሉተ ።

15 ተገሐሥ ፡ እምእኩይ ፡ ወግበር ፡ ሠናየ ፤ ኅሥሣ ፡ ለሰላም ፡ ወዴግና ።

16 እስመ ፡ አዕይንቲሁ ፡ ለእግዚአብሔር ፡ ኀበ ፡ ጻድቃኑ ፤ ወእዝኑሂ ፡ ኀበ ፡ ስእለቶሙ ።

17 ገጹ ፡ ለእግዚአብሔር ፡ ኀበ ፡ እለ ፡ ይገብሩ ፡ እኩየ ፤ ከመ ፡ ይሠረው ፡ እምድር ፡ ዝክሮሙ ።

18 ጸርኁ ፡ ጻድቃን ፡ ወእግዚአብሔር ፡ ሰምዖሙ ፤ ወእምኵሉ ፡ ምንዳቤሆሙ ፡ አድኀኖሙ ።

19 ቅሩብ ፡ እግዚአብሔር ፡ ለየዋሃነ ፡ ልብ ፤ ወያድኅኖሙ ፡ ለትሑታነ ፡ መንፈስ ።

20 ብዙኅ ፡ ሕማሞሙ ፡ ለጻድቃን ፤ ወእምኵሉ ፡ ያድኅኖሙ ፡ እግዚአብሔር ።

21 እግዚአብሔር ፡ የዐቅብ ፡ ኵሎ ፡ አዕጽምቲሆሙ ፤ ወኢይትቀጠቀጥ ፡ አሐዱ ፡ እምውስቴቶሙ ።

22 ሞቱ ፡ ለኃጥእ ፡ ፀዋግ ፤ ወእለሰ ፡ ይጸልእዎ ፡ ለጻድቅ ፡ ይኔስሑ ።

23 ይቤዙ ፡ እግዚአብሔር ፡ ነፍሰ ፡ አግብርቲሁ ፤ ወኢይኔስሑ ፡ ኵሎሙ ፡ እለ ፡ ይትዌከሉ ፡ ቦቱ ።

34 መዝሙር ፡ ዘዳዊት ።

1 ግፍዖሙ ፡ እግዚኦ ፡ ለእለ ፡ ይገፍዑኒ ፤ ፅብኦሙ ፡ እግዚኦ ፡ ለእለ ፡ ይፀብኡኒ ።

2 ንሥእ ፡ ወልታ ፡ ወኲናተ ፤ ወተንሥእ ፡ ውስተ ፡ ረዲኦትየ ።

3 ምላኅ ፡ ሰይፈከ ፡ ወዕግቶሙ ፡ ለእለ ፡ ሮዱኒ ፤ በላ ፡ ለነፍስየ ፡ አነ ፡ ውእቱ ፡ ረዳኢኪ ።

4 ለይትኀፈሩ ፡ ወይኅሰሩ ፡ ኵሎሙ ፡ እለ ፡ የኀሥዋ ፡ ለነፍስየ ፤

5 ለይግብኡ ፡ ድኅሬሆሙ ፡ ወይትኀፈሩ ፡ እለ ፡ መከሩ ፡ እኩየ ፡ ላዕሌየ ።

6 ለይኩኑ ፡ ከመ ፡ ጸበል ፡ ዘቅድመ ፡ ገጸ ፡ ነፋስ ፤ ወመልአከ ፡ እግዚአብሔር ፡ ለይሣቅዮሙ ።

7 ለትኩን ፡ ፍኖቶሙ ፡ ዳኅፀ ፡ ወጽልመተ ፤ ወመልአከ ፡ እግዚአብሔር ፡ ለይስድዶሙ ።

8 እስመ ፡ በከንቱ ፡ ኀብኡ ፡ ሊተ ፡ መሥገርተ ፡ ያጥፍኡኒ ፤ ወበከንቱ ፡ አምንዘዝዋ ፡ ለነፍስየ ።

9 ለትምጽኦሙ ፡ መሥገርት ፡ እንተ ፡ ኢያእመሩ ። ወተአኅዞሙ ፡ መሥገርት ፡ እንተ ፡ ኀብኡ ፤ ወይደቁ ፡ ውስተ ፡ ይእቲ ፡ መሥገርት ።

10 ወነፍስየሰ ፡ ትትፌሣሕ ፡ በእግዚአብሔር ፤ ወትትሐሠይ ፡ በአድኅኖቱ ።

11 ኵሉ ፡ አዕጽምትየ ፡ ይብሉከ ፤ እግዚኦ ፡ መኑ ፡ ከማከ ፡

12 ታድኅኖ ፡ ለነዳይ ፡ እምእደ ፡ ዘይትዔገሎ ፤ ለነዳይ ፡ ወለምስኪን ፡ እምእደ ፡ ዘይመስጦ ።

13 ተንሥኡ ፡ ላዕሌየ ፡ ሰማዕተ ፡ ዐመፃ ፤ ወዘኢያአምር ፡ ነበቡ ፡ ላዕሌየ ።

14 ፈደዩኒ ፡ እኪተ ፡ ህየንተ ፡ ሠናይት ፤ ወአኅጥእዋ ፡ ውሉደ ፡ ለነፍስየ ።

15 ወአንሰ ፡ ሶበ ፡ አስርሑኒ ፡ ለበስኩ ፡ ሠቀ ፡

16 ወአሕመምክዋ ፡ በጾም ፡ ለነፍስየ፤ ወጸሎትየኒ ፡ ገብአ ፡ ውስተ ፡ ሕፅንየ ።

17 ከመ ፡ ዘለአኀውየ ፡ ወለቢጽየ ፡ ከማሁ ፡ አድሎኩ ፤ ከመ ፡ ዘይላሑ ፡ ወይቴክዝ ፡ ከማሁ ፡ አትሐትኩ ፡ ርእስየ ።

18 ተጋብኡ ፡ ላዕሌየ ፡ ወተፈሥሑ ፤ ተማከሩ ፡ ይቅሥፉኒ ፡ ወኢያእመርኩ ።

19 ተሰብሩሂ ፡ ወኢደንገፁ ። ፈተኑኒ ፡ ወተሳለቁ ፡ ላዕሌየ ፡ ወሠሐቁኒ ፤ ወሐቀዩ ፡ ስነኒሆሙ ፡ ላዕሌየ ።

20 እግዚኦ ፡ ማእዜኑ ፡ ትፈትሕ ፡ ሊተ ። አድኅና ፡ ለነፍስየ ፡ እምእከየ ፡ ምግባሮሙ ፤ ወእምአናብስት ፡ ለብሕቱትየ ።

21 እገኒ ፡ ለከ ፡ እግዚኦ ፡ በውስተ ፡ ማኅበር ፡ ዐቢይ ፤ ወእሴብሐከ ፡ በውስተ ፡ ሕዝብ ፡ ክቡድ ፡

22 ወኢይትፌሥሑ ፡ ላዕሌየ ፡ እለ ፡ ይጸልኡኒ ፡ በዐመፃ ፤ እለ ፡ ይፃረሩኒ ፡ በከንቱ ፡ ወይትቃጸቡኒ ፡ በአዕይንቲሆሙ ።

23 እስመ ፡ ሊተሰ ፡ ሰላመ ፡ ይትናገሩኒ ፤ ወይመክሩ ፡ በቍፅር ፡ ያመንስዉኒ ።

24 ወአብቀዉ ፡ አፉሆሙ ፡ ላዕሌየ ፤ ወይቤሉ ፡ እንቋዕ ፡ እንቋዕ ፤ ርኢናሁ ፡ በአዕይንቲነ ።

25 ርኢ ፡ እግዚኦ ፡ ወኢታርምም ፤ እግዚኦ ፡ ኢትርሐቅ ፡ እምኔየ ።

26 ተንሥእ ፡ እግዚኦ ፡ አፅምእ ፡ ፍትሕየ ፤ አምላኪየ ፡ ወእግዚእየ ፡ ውስተ ፡ ቅሥትየ ።

27 ፍታሕ ፡ ሊተ ፡ እግዚኦ ፡ አምላኪየ ፡ በከመ ፡ ጽድቅከ ፤ ወኢይትፌሥሑ ፡ ላእሌየ ።

28 ወኢይበሉ ፡ በልቦሙ ፡ እንቋዕ ፡ እንቋዕ ፡ ላዕለ ፡ ነፍስየ ፤ ወኢይበሉ ፡ ውኅጥናሁ ።

29 ለይትኀፈሩ ፡ ወይኅሰሩ ፡ እለ ፡ ይትፌሥሑ ፡ በሕማምየ ፤

30 ወይልበሱ ፡ ኀፍረተ ፡ ወኀሳረ ፡ እለ ፡ ያዐብዩ ፡ አፉሆሙ ፡ ላዕሌየ ።

31 ለይትፌሥሑ ፡ ወይትሐሠዩ ፡ እለ ፡ ይፈቅድዋ ፡ ለጽድቅየ ፤ ወይበሉ ፡ በኵሉ ፡ ጊዜ ፡ ዐቢይ ፡ እግዚአብሔር ፡ እለ ፡ ይፈቅዱ ፡ ሰላመ ፡ ገብርከ ።

32 ልሳንየ ፡ ያነብብ ፡ ጽድቀከ ፤ ወኵሎ ፡ አሚረ ፡ ስብሐቲከ ።

35 ፍጻሜ ፡ ዘገብረ ፡ እግዚአብሔር ፤ መዝሙር ፡ ዘዳዊት ።

1 ይነብብ ፡ ኃጥእ ፡ በዘ ፡ ያስሕት ፡ ርእሶ ፤ ወአልቦ ፡ ፍርሀተ ፡ እግዚአብሔር ፡ ቅድመ ፡ አዕይንቲሁ ።

2 እስመ ፡ ጸልሐወ ፡ በልሳኑ ፤ ሶበ ፡ ትረክቦ ፡ ኀጢአቱ ፡ ይጸልኦ ።

3 ቃለ ፡ አፉሁ ፡ ዐመፃ ፡ ወጕሕሉት ፤ ወኢፈቀደ ፡ ይለቡ ፡ ከመ ፡ ያሠኒ ።

4 ወሐለየ ፡ ዐመፃ ፡ በውስተ ፡ ምስካቡ ፤ ወቆመ ፡ በፍኖት ፡ እንተ ፡ በኵሉ ፡ ኢኮነት ፡ ሠናይተ ፡ ወኢተሀከያ ፡ ለእኪት ።

5 እግዚኦ ፡ በሰማይ ፡ ሣህልከ ፤ ወጽድቅከኒ ፡ እስከ ፡ ደመናት ።

6 ወርትዕከኒ ፡ ከመ ፡ አድባረ ፡ እግዚአብሔር ፤ ኵነኔከ ፡ ዕሙቅ ፡ ጥቀ ፤

7 ሰብአ ፡ ወእንስሳ ፡ ታድኅን ፡ እግዚኦ ። በከመ ፡ አብዛኅከ ፡ ምሕረተከ ፡ እግዚኦ ፤

8 ደቂቀ ፡ እጓለ ፡ እመሕያው ፡ ይትዌከሉ ፡ በታሕተ ፡ ክነፊከ ።

9 ወይረውዩ ፡ እምጠለ ፡ ቤትከ ፤ ወትሰቅዮሙ ፡ ፈለገ ፡ ትፍሥሕትከ ።

10 እስመ ፡ እምኀቤከ ፡ ነቅዐ ፡ ሕይወት ፤ በብርሃንከ ፡ ንሬኢ ፡ ብርሃነ ።

11 ስፋሕ ፡ ምሕረተከ ፡ እግዚኦ ፡ ላዕለ ፡ እለ ፡ ያአምሩከ ፤ ወጽድቀከኒ ፡ ለርቱዓነ ፡ ልብ ።

12 ኢይምጽአኒ ፡ እግረ ፡ ትዕቢት ፤ ወእደ ፡ ኃጥእ ፡ ኢይሁከኒ ።

13 ህየ ፡ ወድቁ ፡ ኵሎሙ ፡ ገበርተ ፡ ዐመፃ ፤ ይሰደዱ ፡ ወኢይክሉ ፡ ቀዊመ ።

36 መዝሙር ፡ ዘዳዊት ።

1 ኢትቅናእ ፡ ላዕለ ፡ እኩያን ፤ ወኢትቅናእ ፡ ላዕለ ፡ ገበርተ ፡ ዐመፃ ።

2 እስመ ፡ ከመ ፡ ሣዕር ፡ ፍጡነ ፡ ይየብሱ ፤ ወከመ ፡ ኀመልማል ፡ ኀምል ፡ ፍጡነ ፡ ይወድቁ ።

3 ተወከል ፡ በእግዚአብሔር ፡ ወግበር ፡ ሠናየ ፤ ወያኀድረከ ፡ ዲበ ፡ ምድር ፡ ወይሬዕየከ ፡ ዲበ ፡ ብዕላ ።

4 ተፈሣሕ ፡ በእግዚአብሔር ፡ ወይሁበከ ፡ ስእለተ ፡ ልብከ ።

5 ክሥት ፡ ለእግዚአብሔር ፡ ፍኖተከ ፤ ወተወከል ፡ ቦቱ ፡ ወውእቱ ፡ ይገብር ፡ ለከ ።

6 ወያመጽኣ ፡ ከመ ፡ ብርሃን ፡ ለጽድቅከ ፤ ወፍትሕከኒ ፡ ከመ ፡ መዐልት ። ግነይ ፡ ለእግዚአብሔር ፡ ወተፀመዶ ፤

7 ወኢትቅናእ ፡ ላዕለ ፡ ዘይዴሎ ፡ በሕይወቱ ፤ ላዕለ፡ ሰብእ ፡ ዘይገብር ፡ ዐመፃ ።

8 ኅድጋ ፡ ለመዐት ፡ ወግድፋ ፡ ለቍጥዓ ፤ ወኢትቅናእ ፡ ከመ ፡ ታሕሥም ።

9 እስመ ፡ እለ ፡ ያሕሥሙ ፡ ይሤረዉ ፤ ወእለሰ ፡ ይትዔገሥዎ ፡ ለእግዚአብሔር ፡ እሙንቱ ፡ ይወርስዋ ፡ ለምድር ፤

10 ወዓዲ ፡ ኅዳጠ ፡ ወኢይሄሉ ፡ እንከ ፡ ኃጥእ ፤ ተኀሥሥ ፡ ወኢትረክብ ፡ መካኖ ።

11 ወየዋሃንሰ ፡ ይወርስዋ ፡ ለምድር ፤ ወይትፌሥሑ ፡ በብዙኅ ፡ ሰላም ።

12 ያስትሐይጾ ፡ ኃጥእ ፡ ለጻድቅ ፡ ወየሐቂ ፡ ስነኒሁ ፡ ላዕሌሁ ።

13 ወእግዚአብሔርሰ ፡ ይስሕቆ ። እስመ፡ ያቀድም ፡ አእምሮ ፡ ከመ ፡ በጽሐ ፡ ዕለቱ ።

14 ሰይፎሙ ፡ መልኁ ፡ ኃጥኣን ፡ ወወሰቁ ፡ ቀስቶሙ ፤

15 ከመ ፡ ይቅትልዎ ፡ ለነዳይ ፡ ወለምስኪን ፡ ወከመ ፡ ይርግዝዎሙ ፡ ለርቱዓነ ፡ ልብ ።

16 ሰይፎሙ ፡ ይባእ ፡ ውስተ ፡ ልቦሙ ፤ ወይትቀጥቀጥ ፡ አቅስቲሆሙ ።

17 ይኄይስ ፡ ኅዳጥ ፡ ዘበጽድቅ ፤ እምብዙኅ ፡ ብዕለ ፡ ኃጥኣን ።

18 እስመ ፡ ይትቀጠቀጥ ፡ ኀይሎሙ ፡ ለኃጥኣን ፤ ያጸንዖሙ ፡ እግዚአብሔር ፡ ለጻድቃን ።

19 ወያአምር ፡ እግዚአብሔር ፡ ፍኖተ ፡ ንጹሓን ፤ ወለዓለም ፡ ውእቱ ፡ ርስቶሙ ።

20 ወኢይትኀፈሩ ፡ በመዋዕለ ፡ እኩያት ፤ ወይጸግቡ ፡ በመዋዕለ ፡ ረኃብ ። ወኃጥኣንሰ ፡ ይትሐጐሉ ፡

21 ወጸላእቱሰ ፡ ለእግዚአብሔር ፡ ሶበ ፡ ከብሩ ፡ ወተለዐሉ ፤ የኀልቁ ፡ ወይጠፍኡ ፡ ከመ ፡ ጢስ ።

22 ይትሌቃሕ ፡ ኃጥእ ፡ ወኢይፈዲ ፡ ወጻድቅሰ ፡ ይምሕር ፡ ወይሁብ ።

23 እስመ ፡ እለ ፡ ይባርክዎ ፡ ይወርስዋ ፡ ለምድር ፤ ወእለሰ ፡ ይረግምዎ ፡ ይሤረዉ ።

24 እምኀበ ፡ እግዚአብሔር ፡ ይጸንዕ ፡ ሑረቱ ፡ ለሰብእ ፤ ለዘይፈቅድ ፡ ፍኖቶ ፡ ፈድፋደ ።

25 እመኒ ፡ ወድቀ ፡ ኢይደነግፅ ፤ እስመ ፡ እግዚአብሔር ፡ ይሰውቆ ፡ እዴሁ ።

26 ወርዘውኩሂ ፡ ወረሳእኩ ፤ ወጻድቅሰ ፡ ዘይትገደፍ ፡ ኢርኢኩ ፤ ወዘርዑኒ ፡ ኢይጼነስ ፡ እክለ ።

27 ወኵሎ ፡ አሚረ ፡ ይምሕር ፡ ወይሌቅሕ ፤ ወዘርዑሂ ፡ ውስተ ፡ በረከት ፡ ይሄሉ ።

28 ተገሕስ ፡ እምእኩይ ፡ ወግበር ፡ ሠናየ ፤ ወትነብር ፡ ለዓለመ ፡ ዓለም ።

29 እስመ ፡ ጽድቀ ፡ ያፈቅር ፡ እግዚአብሔር ፡ ወኢይገድፎሙ ፡ ለጻድቃን ፤ ወለዓለም ፡ የዐቅቦሙ ፤

30 ወይትቤቀሎሙ ፡ ለንጹሓን ፤ ወይሤሩ ፡ ዘርዖሙ ፡ ለኃጥኣን ።

31 ወጻድቃንሰ ፡ ይወርስዋ ፡ ለምድር ፤ ወይነብሩ ፡ ውስቴታ ፡ ለዓለመ ፡ ዓለም ።

32 አፉሁ ፡ ለጻድቅ ፡ ይትሜሀር ፡ ጥበበ ፤ ወልሳኑ ፡ ይነብብ ፡ ጽድቀ ።

33 ሕገ ፡ አምላኩ ፡ ውስተ ፡ ልቡ ፤ ወኢይድኅፅ ፡ ሰኰናሁ ።

34 ያስተሓይጾ ፡ ኃጥእ ፡ ለጻድቅ ፤ ወይፈቅድ ፡ ይቅትሎ ።

35 ወኢየኀድጎ ፡ እግዚአብሔር ፡ ውስተ ፡ እዴሁ ፤ ወኢይመውኦ ፡ ሶበ ፡ ይትዋቀሡ ።

36 ተዐገሶ ፡ ለእግዚአብሔር ፡ ወዕቀብ ፡ ፍኖቶ ፡ ወያዐብየከ ፡ ከመ ፡ ትረሳ ፡ ለምድር ፤ ወትሬኢ ፡ ከመ ፡ ይሠረዉ ፡ ኃጥኣን ።

37 ርኢክዎ ፡ ለኃጥእ ፡ ዐቢየ ፤ ወተለዐለ ፡ ከመ ፡ አርዘ ፡ ሊባኖስ ።

38 ወሶበ ፡ እገብእ ፡ ኀጣእክዎ ፤ ኀሠሥኩ ፡ ወኢረከብኩ ፡ መካኖ ።

39 ዕቀብ ፡ የውሀተ ፡ ወትሬኢ ፡ ጽድቀ ፤ እስመ ፡ ቦቱ ፡ ተረፈ ፡ ብእሴ ፡ ሰላም ።

40 ወዐማፂያንሰ ፡ ይሤረዉ ፤ ወይሤረዉ ፡ ትራፋቲሆሙ ፡ ለኃጥኣን ።

41 መድኀኒቶሙ ፡ ለጻድቃን ፡ እምኀበ ፡ እግዚአብሔር ፤ ወቀዋሚሆሙ ፡ ውእቱ ፡ በጊዜ ፡ መንዳቤሆሙ ።

42 ይረድኦሙ ፡ እግዚአብሔር ፡ ወያድኅኖሙ ፤ ወያነግፎሙ ፡ እምእደ ፡ ኃጥኣን ፡ ወያድኅኖሙ ፤ እስመ ፡ ተወከሉ ፡ ቦቱ ።

37 መዝሙር ፡ ዘዳዊት ፡ ለተዝካረ ሰንበት ።

1 እግዚኦ ፡ በመዐትከ ፡ ኢትቅሥፈኒ ፤ ወበመቅሠፍትከ ፡ ኢትገሥጸኒ ።

2 እስመ ፡ አሕጻከ ፡ ደጐጻኒ ፤ ወአጽናዕከ ፡ እዴከ ፡ ላዕሌየ ።

3 ወአልቦ ፡ ፈውሰ ፡ ለሥጋየ ፡ እምገጸ ፡ መዐትከ ፤ ወአልቦ ፡ ሰላመ ፡ ለአዕጽምትየ ፡ እምገጸ ፡ ኀጢአትየ ።

4 እስመ ፡ ኖኀ ፡ እምሥዕርትየ ፡ ጌጋይየ ፤ ከመ ፡ ጾር ፡ ክብድ ፡ ከብደ ፡ ላዕሌየ ።

5 ጼአ ፡ ወባኍብኈ ፡ አዕጽምትየ ፡ እምገጸ ፡ እበድየ ።

6 ሐርተምኩ ፡ ወተቀጻዕኩ ፡ ለዝሉፉ ፤ ወኵሎ ፡ አሚረ ፡ ትኩዝየ ፡ ኣንሶሱ ።

7 እስመ ፡ ጸግበት ፡ ጽእለተ ፡ ነፍስየ ፤ ወኀጣእኩ ፡ ፈውሰ ፡ ለሥጋየ ።

8 ደወይኩ ፡ ወሐመምኩ ፡ ፈድፋደ ፤ ወእጐሥዕ ፡ እምሐዘነ ፡ ልብየ ።

9 በቅድሜከ ፡ ኵሉ ፡ ፍትወትየ ፤ ወገዓርየኒ ፡ ኢይትኀባእ ፡ እምኔከ ።

10 ልብየኒ ፡ ደንገፀኒ ፡ ወኀይልየኒ ፡ ኀደገኒ ፤ ወብርሃነ ፡ አዕይንትየኒ ፡ ለከወኒ ።

11 አዕርክትየኒ ፡ ወቢጽየኒ ፡ ዕድወ ፡ ኮኑኒ ፡ ሮዱኒ ፡ ወደበዩኒ ፤

12 ወአዝማድየኒ ፡ ቀብፁኒ ፡ ወተናከሩኒ ። ወተኀየሉኒ ፡ እለ ፡ የኀሥሥዋ ፡ ለነፍስየ ፤

13 ወእለኒ ፡ ይፈቅዱ ፡ ሕማምየ ፡ ነበቡ ፡ ከንቶ ፤ ወኵሎ ፡ አሚረ ፡ ይመክሩ ፡ በቍፅር ፡ ያመነስዉኒ ።

14 ወአንሰ ፡ ከመ ፡ ጽሙም ፡ ዘኢይሰምዕ ፤ ወከመ ፡ በሃም ፡ ዘኢይከሥት ፡ አፉሁ ።

15 ወኮንኩ ፡ ከመ ፡ ብእሲ ፡ ዘኢይሰምዕ ፤ ወከመ ፡ ዘኢይክል ፡ ተናግሮ ፡ በአፉሁ ።

16 እስመ ፡ ኪያከ ፡ ተወከልኩ ፡ እግዚኦ ፤ አንተ ፡ ስምዐኒ ፡ እግዚኦ ፡ አምላኪየ ።

17 እስመ ፡ እቤ ፡ ኢትረስየኒ ፡ ስላተ ፡ ጸላእየ ፤ ወእመኒ ፡ ድኅፀ ፡ ሰኰናየ ፡ ያዐብዩ ፡ አፉሆሙ ፡ ላዕሌየ ።

18 እስመ ፡ ሊተሰ ፡ አጽንሑኒ ፡ ይቅሥፉኒ ፤ ወቍስልየኒ ፡ ቅድሜየ ፡ ውእቱ ፡ በኵሉ ፡ ጊዜ ።

19 ወእነግር ፡ ጌጋይየ ፤ ወእቴክዝ ፡ በእንተ ፡ ኀጢአትየ ።

20 ጸላእትየሰ ፡ ሕያዋን ፡ ወይኄይሉኒ ፤ ወበዝኁ ፡ እለ ፡ በዐመፃ ፡ ይጸልኡኒ ።

21 እለ ፡ ይፈድዩኒ ፡ እኪተ ፡ ህየንተ ፡ ሠናይት ፡ ወያስተዋድዩኒ ፡ በተሊወ ፡ ጽድቅ ። ወገደፉ ፡ እኅዋሆሙ ፡ ከመ ፡ በድን ፡ ርኩስ ።

22 አንተ ፡ ኢትግድፈኒ ፡ እግዚኦ ፡ አምላኪየ ፡ ወኢትርሕቅ ፡ እምኔየ ። ወነጽር ፡ ውስተ ፡ ረዱኦትየ ፤ እግዚኦ ፡ አምላከ ፡ መድኀኒትየ ።

38 ፍጻሜ ፡ ዘኢዶቱም ፡ ማኅሌት ፡ ዘዳዊት ።

1 እቤ ፡ አዐቅብ ፡ አፉየ ፡ ከመ ፡ ኢይስሐት ፡ በልሳንየ ፤

2 ወአንበርኩ ፡ ዐቃቤ ፡ ለአፉየ ፤ ሶበ ፡ ይትቃወሙኒ ፡ ኃጥኣን ፡ ቅድሜየ ።

3 ተጸመምኩ ፡ ወአትሐትኩ ፡ ርእስየ ፡ ወአርመምኩ ፡ ለሠናይ ፤ ወተሕደሰኒ ፡ ቍስልየ ።

4 ወሞቀኒ ፡ ልብየ ፡ በውስጤየ ፡ ወነደ ፡ እሳት ፡ እምአንብቦትየ ፤ ወእቤ ፡ በልሳንየ ።

5 ንግረኒ ፡ እግዚኦ ፡ ደኃሪትየ ፡

6 ምንት ፡ እማንቱ ፡ ኈልቆን ፡ ለመዋዕልየ ፡ ከመ ፡ ኣእምር ፡ ለምንት ፡ እዴኀር ፡ አነ ።

7 ናሁ ፡ ብሉያተ ፡ረሰይኮነ ፡ ለመዋዕልየ ፡ ወአካልየኒ ፡ ወኢከመ ፡ ምንት ፡ በቅድሜከ ፤

8 ወባሕቱ ፡ ከንቱ ፡ ኵሉ ፡ ደቂቀ ፡ እጓለ ፡ እመሕያው ።

9 ወከመ ፡ ጽላሎት ፡ ያንሶሱ ፡ ኵሉ ፡ ሰብእ ፡ ወባሕቱ ፡ ከንቶ ፡ ይትሀወኩ ፤

10 ይዘግቡ ፡ ወኢያአምሩ ፡ ለዘ ፡ ያስተጋብኡ ።

11 ወይእዜኒ ፡ መኑ ፡ ተስፋየ ፡ አኮኑ ፡ እግዚአብሔር ፤ ወትዕግስትየኒ ፡ እምኅቤከ ፡ ውእቱ ።

12 ወእምኵሉ ፡ ኀጢአትየ ፡ አድኅነኒ ፤ ወረሰይከኒ ፡ ጽእለተ ፡ ለአብዳን ።

13 ተጸመምኩ ፡ ወኢከሠትኩ ፡ አፉየ ፤ እስመ ፡ አንተ ፡ ፈጠርከኒ ። አርሕቅ ፡ እምኔከ ፡ መቅሠፍተከ ፤

14 እስመ ፡ እምጽንዐ ፡ እዴከ ፡ ኀለቁ ፡ አነ ። በተግሣጽከ ፡ በእንተ ፡ ኀጢአቱ ፡ ተዛለፍኮ ፡ ለሰብእ ፡

15 ወመሰውካ ፡ ከመ ፡ ሳሬት ፡ ለነፍሱ ፤ ወባሕቱ ፡ ከንቶ ፡ ይትሀወኩ ፡ ኵሉ ፡ ሰብእ ።

16 ስምዐኒ ፡ እግዚኦ ፡ ጸሎትየ ፡ ወስእለትየ ፡ ወአፅምአኒ ፡ አንብዕየ ፡ ወኢትጸመመኒ ፤ እስመ ፡ ፈላሲ ፡ አነ ፡ ውስተ ፡ ምድር ፤ ወነግድ ፡ ከመ ፡ ኵሉ ፡ አበውየ ።

17 ሥኅተኒ ፡ ከመ ፡ ኣዕርፍ ፤ ዘእንበለ ፡ እሖር ፡ ኀበ ፡ ኢይገብእ ።

39 ፍጻሜ ፡ መዝሙር ፡ ዘዳዊት ።

1 ጸኒሐ ፡ ጸናሕክዎ ፡ ለእግዚአብሔር ፤ ሰምዐኒ ፡ ወተመይጠኒ ፡

2 ወሰምዐኒ ፡ ቃለ ፡ ስእለትየ ። ወአውፅአኒ ፡ እምዐዘቅተ ፡ ሕርትምና ፡ ወእምጽብረ ፡ ዐምዓም ፤

3 ወአቀሞኒ ፡ ውስተ ፡ ኰኵሕ ፡ ለእገርየ ፡ ወአጽንዖኒ ፡ ለመካይድየ ።

4 ወወደየ ፡ ውስተ ፡ አፉየ ፡ ስብሓተ ፡ ሐዲሰ ፡ ስብሓቲሁ ፡ ለአምላክነ ፤

5 ይርአዩ ፡ ብዙኃን ፡ ወይፍርሁ ፤ ወይትወከሉ ፡ በእግዚአብሔር ።

6 ብፁዕ ፡ ብእሲ ፡ ዘስመ ፡ እግዚአብሔር ፡ ትውክልቱ ፤ ወዘኢነጸረ ፡ ውስተ ፡ ከንቱ ፡ ውስተ ፡ መዐት ፡ ወሐሰት ።

7 ብዙኀ ፡ ገበርከ ፡ እግዚኦ ፡ አምላኪየ ፡ መንክረከ ፡ ወአልቦ ፡ ዘይመስሎ ፡ ለሕሊናከ ፤

8 አይደዕኩ ፡ ወነገርኩ ፡ ወበዝኃ ፡ እምኈልቍ ።

9 መሥዋዕተ ፡ ወቍርባነ ፡ ኢፈቀድከ ፡ ሥጋሰ ፡ አንጽሕ ፡ ሊተ ፤

10 መሥዋዕተ ፡ ዘበእንተ ፡ ኃጢአት ፡ ኢሠመርከ ። ውእቱ ፡ ጊዜ ፡ እቤ ፡ ነየ ፡ መጻእኩ ፤

11 ውስተ ፡ ርእሰ ፡ መጽሐፍ ፡ ተጽሕፈ ፡ በእንቲአየ ። ከመ ፡ እንግር ፡ ፈቃደከ ፡ መከርኩ ፡ አምላኪየ ፤ ወሕግከኒ ፡ በማእከለ ፡ ከርሥየ ።

12 ዜነውኩ ፡ ጽድቀ ፡ በማኅበር ፡ ዐቢይ ፡ ናሁ ፡ ኢከላእኩ ፡ ከናፍርየ ፤ እግዚኦ ፡ ለሊከ ፡ ታአምር ፡ ጽድቅየ ።

13 ኢኀባእኩ ፡ ውስተ ፡ ልብየ ፡ ርትዐከ ፤ ወነገርኩ ፡ አድኅኖተከ ፤

14 ወኢሰወርኩ ፡ ሣህለከ ፡ ወምሕረትከ ፡ እማኅበር ፡ ዐቢይ ።

15 አንተ ፡ እግዚኦ ፡ ኢታርሕቅ ፡ ሣህለከ ፡ እምኔየ ፤ ምሕረትከ ፡ ወጽድቅከ ፡ ዘልፈ ፡ ይርከባኒ ።

16 እስመ ፡ ረከበተኒ ፡ እኪት ፡ እንተ ፡ አልባቲ ፡ ኈልቈ ፡ ወተራከባኒ ፡ ኃጣውእየ ፡ ወስእንኩ ፡ ነጽሮ ፤

17 ወበዝኃ ፡ እምሥዕርተ ፡ ርእስየ ፤ ልብየኒ ፡ ኀደገኒ ።

18 ሥመር ፡ እግዚኦ ፡ ከመ ፡ ታድኅነኒ ፤ እግዚኦ ፡ ነጽር ፡ ውስተ ፡ ረዲኦትየ ።

19 ይትኀፈሩ ፡ ወይኅሰሩ ፡ ኅቡረ ፡ እለ ፡ ይፈቅዱ ፡ ያእትትዋ ፡ ለነፍስየ ፡

20 ለይግብኡ ፡ ድኅሬሆሙ ፡ ወይትኀፈሩ ፡ እለ ፡ ይፈቅዱ ፡ ሊተ ፡ እኩየ ።

21 ወይትፈደዩ ፡ በጊዜሃ ፡ ኀሳሮሙ ፤ እለ ፡ ይብሉኒ ፡ እንቋዕ ፡ እንቋዕ ።

22 ለይትፈሥሑ ፡ ወይትሐሰዩ ፡ ብከ ፡ ኵሎሙ ፡ እለ ፡ የኀሡከ ፡ እግዚኦ ። ወይበሉ ፡ ዘልፈ ፡ ዐቢይ ፡ እግዚአብሔር ፤ እለ ፡ ይፈቅዱ ፡ አድኀኖተከ ፡ በኵሉ ፡ ጊዜ ።

23 አንሰ ፡ ነዳይ ፡ ወምስኪን ፡ እነ ፡ ወእግዚአብሔር ፡ ይሔሊ ፡ ሊተ ፤

24 ረዳእየ ፡ ወመድኀንየ ፡ አንተ ፡ አምላኪየ ፡ ወኢትጐንዲ ።

40 ፍጻሜ ፡ መዝሙር ፡ ዘዳዊት ።

1 ብፁዕ ፡ ዘይሌቡ ፡ ላዕለ ፡ ነዳይ ፡ ወምስኪን ፤ እምዕለት ፡ እኪተ ፡ ያድኅኖ ፡ እግዚአብሔር ።

2 እግዚአብሔር ፡ ያዐቅቦ ፡ ወያሐይዎ ፡ ወያበጽዖ ፡ ዲበ ፡ ምድር ፤ ወኢያገብኦ ፡ ውስተ ፡ እደ ፡ ጸላኢሁ ።

3 እግዚአብሔር ፡ ይረድኦ ፡ ውስተ ፡ ዐራተ ፡ ሕማሙ ፤ ወይመይጥ ፡ ሎቱ ፡ ኵሎ ፡ ምስካቤሁ ፡ እምደዌሁ ።

4 አንሰ ፡ እቤ ፡ እግዚኦ ፡ ተሣሀለኒ ፤ ወስረይ ፡ ላቲ ፡ ለነፍስየ ፡ እስመ ፡ አበስኩ ፡ ለከ ።

5 ጸላእትየሰ ፡ እኩየ ፡ ይቤሉ ፡ ላዕሌየ ፤ ማእዜ ፡ ይመውት ፡ ወይሰዐር ፡ ስሙ ።

6 ወይባእ ፡ ወይርአይ ፡ ዘከንቶ ፡ ይነብብ ፡ ልቡ ፡ አስተጋብአ ፡ ኃጢአተ ፡ ላዕሌሁ ፤

7 ይወፅእ ፡ አፍአ ፡ ወይትናገር ።

8 ወየኀብር ፡ ላዕሌየ ፡ ወይትቃጸቡኒ ፡ ኵሎሙ ፡ ጸላእትየ ፤ ወይመክሩ ፡ እኩየ ፡ ላዕሌየ ፤

9 ነገረ ፡ ጌጋየ ፡ አውፅኡ ፡ ላዕሌየ ፤ ዘኖመሰ ፡ ኢይነቅህኑ ፡ እንከ ።

10 ብእሴ ፡ ሰላምየ ፡ ዘኪያሁ ፡ እትአመን ፡ ዘይሴስይ ፡ እክልየ ፤ አንሥአ ፡ ሰኰናሁ ፡ ላዕሌየ ።

11 እንተ ፡ እግዚኦ ፡ ተሣሀለኒ ፡ ወአንሥአኒ ፡ እፍድዮሙ ።

12 ወበእንተዝ ፡ አእመርኩ ፡ ከመ ፡ ሠመርከኒ ፤ ወኢተፈሥሑ ፡ ጸላእትየ ፡ ላዕሌየ ።

13 ወሊተሰ ፡ በእንተ ፡ የዋሀትየ ፡ ተወከፍከኒ ፤ ወአጽናዕከኒ ፡ ቅድሜከ ፡ ለዓለም ።

14 ይትባረክ ፡ እግዚአብሔር ፡ አምላከ ፡ እስራኤል ፡ እምይእዜ ፡ ወእስከ ፡ ለዓለም ፤ ለይኩን ፡ ለይኩን ።

41 መዝሙር ፡ ዘበአእምሮ ፡ ዘደቂቀ ፡ ቆሬ ።

1 ከመ ፡ ያፈቅር ፡ ኀየል ፡ ኀበ ፡ አንቅዕተ ፡ ማያት ፤ ከማሁ ፡ ታፈቅር ፡ ነፍስየ ፡ ኀበ ፡ እግዚአብሔር ።

2 ጸምአት ፡ ነፍስይ ፡ ኀበ ፡ አምላኪየ ፡ ሕያው ፤ ማእዜ ፡ እበጽሕ ፡ ወእሬኢ ፡ ገጾ ፡ ለአምላኪየ ።

3 ሲሳየ ፡ ኮነኒ ፡ አንብዕየ ፡ መዐልተ ፡ ወሌሊተ ፤ እስመ ፡ ይብሉኒ ፡ ኵሎ ፡ አሚረ ፡ አይቴ ፡ ውእቱ ፡ አምላክከ ።

4 ዘንተ ፡ ተዘኪርየ ፡ ተክዕወት ፡ ነፍስየ ፡ በላዕሌየ ፡ እስመ ፡ እበውእ ፡ ውስተ ፡ መካነ ፡ ማኅደረ ፡ ስብሐት ፡ ቤተ ፡ እግዚአብሔር ፤

5 በቃለ ፡ አሚን ፡ ወትፍሥሕት ፡ ደምፁ ፡ እለ ፡ ይገብሩ ፡ በዓለ ።

6 ለምንት ፡ ትቴክዚ ፡ ነፍስየ ፡ ወለምንት ፡ ተሀውክኒ ፤

7 እመኒ ፡ በእግዚአብሔር ፡ ከመ ፡ እገኒ ፡ ሎቱ ፤ መድኀኔ ፡ ገጽየ ፡ አምላኪየ ።

8 ተሀውከት ፡ ነፍስየ ፡ በላዕሌየ ፤ በእንተዝ ፡ እዜከረከ ፡ እግዚኦ ፡ በምድረ ፡ ዮርዳኖስ ፡ በአርሞንኤም ፡ በደብር ፡ ንኡስ ።

9 ቀላይ ፡ ለቀላይ ፡ ትጼውዓ ፡ በቃለ ፡ አስራቢከ ፤

10 ኵሉ ፡ ማዕበልከ ፡ ወሞገድከ ፡ እንተ ፡ ላዕሌየ ፡ ኀለፈ ።

11 መዐልተ ፡ ይኤዝዝ ፡ እግዚአብሔር ፡ ሣህሎ ፡ ወሌሊተ ፡ ይነብር ፤

12 እምኀቤየ ፡ ብፅአተ ፡ ሕይወትየ ፡ ለእግዚአብሔር ። እብሎ ፡ ለእግዚአብሔር ፡ አምላኪየ ፡ አንተ ፡ ለምንት ፡ ትረስዐኒ ፤

13 ለምንት ፡ ተኀድገኒ ፡ ወለምንት ፡ ትኩዝየ ፡ አንሶሱ ፡ ሶበ ፡ ያመነድቡኒ ፡ ፀርየ ።

14 ወያጸንጵዉኒ ፡ አዕጽምትየ ፡ ወይጼእሉኒ ፡ ኵሎሙ ፡ ጸላእትየ ፤

15 እስመ ፡ ይብሉኒ ፡ ኵሎ ፡ አሚረ ፡ አይቴ ፡ ውእቱ ፡ አምላክከ ። ለምንት ፡ ትቴክዚ ፡ ነፍስየ ፡ ወለምንት ፡ ተሀውክኒ ፤

16 እመኒ ፡ በእግዚአብሔር ፡ ከመ ፡ እገኒ ፡ ሎቱ ፤ መድኀኔ ፡ ገጽየ ፡ አምላኪየ ።

42 መዝሙር ፡ ዘዳዊት ።

1 ፍታሕ ፡ ሊተ ፡ እግዚኦ ፡ ወተበቀል ፡ በቀልየ ፡ እምሕዝብ ፡ ውፁኣን ፡ እምጽድቅ ፤ እምብእሲ ፡ ዐማፂ ፡ ወጽልሕው ፡ ባልሐኒ ፡

2 እስመ ፡ አንተ ፡ አምላኪየ ፡ ወኀይልየ ፡ ለምንት ፡ ተኀድገኒ ፤ ወለምንት ፡ ትኩዝየ ፡ ኣንሶሱ ፡ ሶበ ፡ ያመነድቡኒ ፡ ፀርየ ።

3 ፈኑ ፡ ብርሃነከ ፡ ወጽድቀከ ፡ እማንቱ ፡ ይምርሓኒ ፤ ወይስዳኒ ፡ ደብረ ፡ መቅደስከ ፡ ወውስተ ፡ አብያቲከ ፡ እግዚኦ ።

4 ወእበውእ ፡ ኀበ ፡ ምሥዋዒሁ ፡ ለእግዚአብሔር ፡ ኀበ ፡ አምላኪየ ፡ ዘአስተፈሥሓ ፡ ለውርዙትየ ፤

5 እገኒ ፡ ለከ ፡ አምላኪየ ፡ በመሰንቆ ። ለምንት ፡ ትቴክዚ ፡ ነፍስየ ፡ ወለምንት ፡ ተሀውክኒ ፤

6 እመኒ ፡ በእግዚአብሔር ፡ ከመ ፡ እገኒ ፡ ሎቱ ፡ ወድኀኔ ፡ ገጽየ ፡ አምላኪየ ።

43 ፍጻሜ ፡ ዘደቂቀ ፡ ቆሬ ፡ ዘበኣእምሮ ፡ መዝሙር ።

1 እግዚኦ ፡ ሰማዕነ ፡ በእዘኒነ ፡ ወአበዊነሂ ፡ ዜነዉነ ።

2 ግብረ ፡ ዘገበርከ ፡ በመዋዕሊሆሙ ፡ በመዋዕለ ፡ ትካት ።

3 እዴከ ፡ ሠረወቶሙ ፡ ለፀር ፡ ወተከልከ ፡ ኪያሆሙ ፤ ሣቀይኮሙ ፡ ለአሕዛብ ፡ ወሰደድኮሙ ።

4 ዘአኮ ፡ በኲናቶሙ ፡ ወረስዋ ፡ ለምድር ፡ ወመዝራዕቶሙ ፡ ኢያድኀኖሙ ፤

5 ዘእንበለ ፡ የማንከ ፡ ወመዝራዕትከ ፡ ወብርሃነ ፡ ገጽከ ፡ እስመ ፡ ተሣሀልኮሙ ።

6 አንተ ፡ ውእቱ ፡ ንጉሥየ ፡ ወአምላኪየ ፤ ዘአዘዝከ ፡ መድኀኒቶ ፡ ለያዕቆብ ።

7 ብከ ፡ ንወግኦሙ ፡ ለኵሎሙ ፡ ፀርነ ፤ ወበስምከ ፡ ናኀስሮሙ ፡ ለእለ ፡ ቆሙ ፡ ላዕሌነ ።

8 ዘአኮ ፡ በቀስትየ ፡ እትአመን ፤ ወኲናትየኒ ፡ ኢይድኀነኒ ።

9 ወአድኀንከነ ፡ እምእለ ፡ ሮዱነ ፤ ወአስተኀፈርኮሙ ፡ ለኵሎሙ ፡ ጸላእትነ ።

10 በእግዚአብሔር ፡ ንከብር ፡ ኵሎ ፡ አሚረ ፤ ወለስምከ ፡ ንገኒ ፡ ለዓለም ።

11 ይእዜሰ ፡ ገደፍከነ ፡ ወአስተኀፈርከነ ፤ ወኢትወፅእ ፡ አምላክነ ፡ ምስለ ፡ ኀይልነ ፡

12 ወአግባእከነ ፡ ድኅሬነ ፡ ኀበ ፡ ፀርነ ፤ ወተማሰጡነ ፡ ጸላእትነ ።

13 ወወሀብከነ ፡ ይብልዑነ ፡ ከመ ፡ አባግዕ ፤ ወዘረውከነ ፡ ውስተ ፡ አሕዛብ ።

14 መጦከ ፡ ሕዝበከ ፡ ዘእንበለ ፡ ሤጥ ፤ ወአልቦ ፡ ብዝኀ ፡ ለይባቤነ ።

15 ረሰይከነ ፡ ጽእለተ ፡ ለጎርነ ፤ ሠሓቀ ፡ ወሥላቀ ፡ ለአድያሚነ ።

16 ወረሰይከነ ፡ አምሳለ ፡ ለአሕዛብ ፤ ወሑስተ ፡ ርእስ ፡ ለሕዝብ ።

17 ኵሎ ፡ አሚረ ፡ ቅድሜየ ፡ ውእቱ ፡ ኀፍረትየ ፤ ወከደነኒ ፡ ኀፍረተ ፡ ገጽየ ።

18 እምቃለ ፡ ዘይጽእል ፡ ወይዘረኪ ፤ እምገጸ ፡ ፀራዊ ፡ ዘይረውድ ።

19 ዝንቱ ፡ ኵሉ ፡ በጽሐ ፡ ላዕሌነ ፡ ወኢረሳዕናከ ፡ ወኢዐመፅነ ፡ ኪዳነከ ።

20 ወኢገብአ ፡ ድኀሬሁ ፡ ልብነ ፤ ወኢተግሕሠ ፡ አሰርነ ፡ እምፍኖትከ ።

21 እስመ ፡ አሕመምከነ ፡ በብሔር ፡ እኩይ ፤ ወደፈነነ ፡ ጽላሎተ ፡ ሞት ።

22 ሶበሁ ፡ ረሳዕነ ፡ ስሞ ፡ ለአምላክነ ፤ ወሶበሁ ፡ አንሣእነ ፡ እደዊነ ፡ ኀበ ፡ አምላክ ፡ ነኪር ።

23 አኮኑ ፡ እግዚአብሔር ፡ እምተኃሠሦ ፡ ለዝንቱ ፤ እስመ ፡ ውእቱ ፡ ያአምር ፡ ኀቡኣተ ፡ ልብ ።

24 እስመ ፡ በእንቲአከ ፡ ይቀትሉነ ፡ ኵሎ ፡ አሚረ ፡ ወኮነ ፡ ከመ ፡ አባግዕ ፡ ዘይጠብሑ ።

25 ንቃህ ፡ እግዚኦ ፡ ለምንት ፡ ትነውም ፡ ተንሥእ ፡ ወኢትግድፈነ ፡ ለዝሉፉ ።

26 ወለምንት ፡ ትመይጥ ፡ ገጸከ ፡ እምኔነ ፤ ወትረስዐነ ፡ ሕማመነ ፡ ወተጽናሰነ ።

27 እስመ ፡ ኀስረት ፡ ውስተ ፡ ምድር ፡ ነፍስነ ፤ ወጠግዐት ፡ በምድር ፡ ከርሥነ ።

28 ተንሥእ ፡ እግዚኦ ፡ ርድአነ ፤ ወአድኅነነ ፡ በእንተ ፡ ስምከ ።

44 ፍጻሜ ፡ በእንተ ፡ እለ ፡ ተበዐዱ ፡ ዘውሉደ ፡ ቆሬ ፤ መዝሙር ፡ ዘዳዊት ፡ ዘበኣእምሮ ።

1 ጐሥዐ ፡ ልብየ ፡ ቃለ ፡ ሠናየ ፡ አነ ፡ ኣየድዕ ፡ ግብርየ ፡ ለንጉሥ ፤

2 ከመ ፡ ቀለመ ፡ ጸሓፊ ፡ ዘጠበጠበ ፡ ይጽሕፍ ፡ ልሳንየ ።

3 ይሤኒ ፡ ላሕዩ ፡ እምውሉደ ፡ እጓለ ፡ እመሕያው ፡ ተክዕወ ፡ ሞገስ ፡ እምከናፍሪከ ፤ በእንተዝ ፡ ባረከከ ፡ እግዚአብሔር ፡ ለዓለም ።

4 ቅንት ፡ ሰይፈከ ፡ ኀይል ፡ ውስተ ፡ ሐቌከ ፤

5 በሥንከ ፡ ወበላሕይከ ። አርትዕ ፡ ተሠራሕ ፡ ወንገሥ ፡

6 በእንተ ፡ ጽድቅ ፡ ወርትዕ ፡ ወየዋሃት ፤ ወይመርሐከ ፡ ስብሐተ ፡ የማንከ ።

7 አሕጻከ ፡ ስሑል ፡ ኀያል ፡ አሕዛብ ፡ ይወድቁ ፡ ታሕቴከ ፤ ውስተ ፡ ልቦሙ ፡ ለጸላእተ ፡ ንጉሥ ።

8 ወንበርከ ፡ እግዚኦ ፡ ለዓለመ ፡ ዓለም ፤ በትረ ፡ ጽድቅ ፡ በትረ ፡ መንግሥትከ ።

9 አፍቀርከ ፡ ጽድቀ ፡ ወዐመፃ ፡ ጸላእከ ፡ በእንተዝ ፡ ቀብአከ ፡ እግዚአብሔር ፡ አምላክከ ፤ ቅብአ ፡ ትፍሥሕት ፡ እምእለ ፡ ከማከ ።

10 ከርቤ ፡ ወቀንአተ ፡ ወሰሊኆት ፡ እምነ ፡ አልባሲከ ፤ እምክቡዳነ ፡ አቅርንት ፡ ዘእምኔሆሙ ፡ አስተፈሥሓከ ፡ አዋልደ ፡ ነገሥት ፡ ለክብርከ ፤

11 ወትቀውም ፡ ንግሥት ፡ በየማንከ ፡ በአልባሰ ፡ ወርቅ ፡ ዑጽፍት ፡ ወሑብርት ።

12 ስምዒ ፡ ወለትየ ፡ ወርእዪ ፡ ወአፅምዒ ፡ እዝነኪ ፤ ወርስዒ ፡ ሕዝበኪ ፡ ወቤተ ፡ አቡኪ ።

13 እስመ ፡ ፈተወ ፡ ንጉሥ ፡ ሥነኪ ፤ እስመ ፡ ውእቱ ፡ እግዚእኪ ።

14 ወይሰግዳ ፡ ሎቱ ፡ አዋልደ ፡ ጠሮስ ፡ በአምኃ ፡ ወለገጽኪ ፡ ይትመሀለሉ ፡ ኵሎሙ ፡ አሕዛብ ፡ ብዑላነ ፡ ምድር ።

15 ኵሉ ፡ ክብራ ፡ ለወለተ ፡ ንጉሥ ፡ ሐሴቦን ፤ በዘአዝፋረ ፡ ወርቅ ፡ ዑጽፍት ፡ ወሑብርት ።

16 ወይወስዱ ፡ ለንጉሥ ፡ ደናግለ ፡ ድኅሬሃ ፤ ወቢጻሂ ፡ ይወስዱ ፡ ለከ ።

17 ወይወስድዎን ፡ በትፍሥሕት ፡ ወበሐሤት ፤ ወያበውእዎን ፡ ውስተ ፡ ጽርሕ ፡ ንጉሥ ።

18 ህየንተ ፡ አበዊኪ ፡ ተወልዱ ፡ ለኪ ፡ ደቂቅ ፤ ወትሠይምዮሙ ፡ መላእክተ ፡ ለኵሉ ፡ ምድር ።

19 ወይዘከሩ ፡ ስመኪ ፡ በኵሉ ፡ ትውልደ ፡ ትውልድ ፤

20 በእንተዝ ፡ ይገንዩ ፡ ለከ ፡ አሕዛብ ፡ እግዚኦ ፡ ለዓለም ፡ ወለዓለመ ፡ ዓለም ።

45 ፍጻሜ ፡ ዘደቂቀ ፡ ቆሬ ፡ በእንተ ፡ ኅቡኣት ፡ መዝሙር ፡ ዘዳዊት ።

1 አምላክነሰ ፡ ኀይልነ ፡ ወጸወንነ ፤ ወረዳኢነ ፡ ውእቱ ፡ በምንዳቤነ ፡ ዘረከበነ ፡ ፈድፋደ ።

2 በእንተዝ ፡ ኢንፈርህ ፡ ለእመ ፡ አድለቅለቀት ፡ ምድር ፤ ወእመኒ ፡ ፈለሱ ፡ አድባር ፡ ውስተ ፡ ልብ ፡ ባሕር ።

3 ደምፁ ፡ ወተሐመጉ ፡ ማያቲሆሙ ፤ ወአድለቅለቁ ፡ አድባር ፡ እምኀይሉ ።

4 ፈለግ ፡ ዘይውሕዝ ፡ ያስተፌሥሕ ፡ ሀገረ ፡ እግዚአብሔር ፤ ቀደሰ ፡ ማኅድሮ ፡ ልዑል ።

5 እግዚአብሔር ፡ ውስተ ፡ ማእከላ ፡ ኢትትሀወክ ፤ ወይረድኣ ፡ እግዚአብሔር ፡ ፍጹመ ።

6 ደንገፁ ፡ አሕዛብ ፡ ወተመይጡ ፡ ነገሥት ፤ ወሀበ ፡ ቃሎ ፡ ልዑል ፡ ወአድለቅለቀት ፡ ምድር ።

7 እግዚኦ ፡ ኀያላን ፡ ምስሌነ ፤ ወምስካይነ ፡ አምላኩ ፡ ለያዕቆብ ።

8 ንዑ ፡ ወትርአዩ ፡ ገብሮ ፡ ለእግዚአብሔር ፤ ዘገብረ ፡ መንክረ ፡ በዲበ ፡ ምድር ። ይስዕር ፡ ፀብአ ፡ እስከ ፡ አጽናፈ ፡ ምድር ፤

9 ይሰብር ፡ ቀስተ ፡ ወይቀጠቅጥ ፡ ወልታ ፡ ወያውዒ ፡ በእሳት ፡ ንዋየ ፡ ሐቅል ።

10 አስተርክቡ ፡ ወአእምሩ ፡ ከመ ፡ አነ ፡ ውእቱ ፡ እግዚአብሔር ፤ ተለዐልኩ ፡ እምአሕዛብ ፡ ወተለዐልኩ ፡ እምድር ።

11 እግዚአ ፡ ኀያላን ፡ ምስሌነ ፤ ወምስካይነ ፡ አምላኩ ፡ ለያዕቆብ ።

46 ፍጻሜ ፡ ዘበእንተ ፡ ውሉደ ፡ ቆሬ ፡ መዝሙር ።

1 ኵልክሙ ፡ አሕዛብ ፡ ጥፍሑ ፡ እደዊክሙ ፤ ወየብቡ ፡ ለእግዚአብሔር ፡ በቃለ ፡ ትፍሥሕት ።

2 እስመ ፡ ልዑል ፡ ወግሩም ፡ እግዚአብሔር ፤ ወንጉሥ ፡ ዐቢይ ፡ ውእቱ ፡ ዲበ ፡ ኵሉ ፡ ምድር ።

3 አግረረ ፡ ለነ ፡ አሕዛብ ፡ ወሕዘበ ፡ ታሕተ ፡ እገሪነ ፡

4 ወኀረየነ ፡ ሎቱ ፡ ለርስቱ ፤ ሥኖ ፡ ለያዕቆብ ፡ ዘአፍቀረ ።

5 ዐርገ ፡ እግዚአብሔር ፡ በይባቤ ፤ ወእግዚእነ ፡ በቃለ ፡ ቀርን ።

6 ዘምሩ ፡ ለአምላክነ ፡ ዘምሩ ፤ ዘምሩ ፡ ለንጉሥነ ፡ ዘምሩ ።

7 እስመ ፡ ንጉሥ ፡ እግዚአብሔር ፡ ለኵሉ ፡ ምድር ፡ ዘምሩ ፡ ልብወ ።

8 ነግሠ ፡ እግዚአብሔር ፡ ላዕለ ፡ ኵሉ ፡ አሕዛብ ፤ እግዚአብሔርሰ ፡ ይነብር ፡ ዲበ ፡ መንበሩ ፡ ቅዱስ ።

9 መላእክተ ፡ አሕዛብ ፡ ተጋብኡ ፡ ምስለ ፡ አምላከ ፡ አብርሃም ፤ እስመ ፡ ለእግዚአብሔር ፡ ጽኑዓነ ፡ ምድር ፡ ፈድፋደ ፡ ተለዐሉ ።

47 ማኅሌት ፡ መዝሙር ፡ ዘደቂቀ ፡ ቆሬ ፡ በሳኒታ ፡ ሰንበት ።

1 ዐቢይ ፡ እግዚአብሔር ፡ ወብዙኅ ፡ አኰቴቱ ፤ በሀገረ ፡ አምላክነ ፡ በደብረ ፡ መቅደሱ ።

2 ዘይዔዝዝ ፡ ትፍሥሕተ ፡ ለኰሉ ፡ ምድር ፤ አድባረ ፡ ጽዮን ፡ በገቦ ፡ መስዕ ፡ ሀገሩ ፡ ለንጉሥ ፡ ዐቢይ ።

3 እግዚአብሔር ፡ ያአምር ፡ ክበዲሃ ፡ ሶበ ፡ ተመጠውዋ ።

4 እስመ ፡ ናሁ ፡ ነገሥተ ፡ ምድር ፡ ተጋብኡ ፤ ወመጽኡ ፡ ኅቡረ ።

5 እሙንቱሰ ፡ ዝንተ ፡ ርእዮሙ ፡ አንከሩ ፤ ደንገፁ ፡ ወፈርሁ ።

6 ወአኀዞሙ ፡ ረዐድ ፡ ወሐሙ ፡ በህየ ፡ ከመ ፡ እንተ ፡ ትወልድ ። በነፋስ ፡ ኀያል ፡ ትቀጠቅጦን ፡ ለአሕማረ ፡ ተርሴስ ።

7 በከመ ፡ ሰማዕነ ፡ ከማሁ ፡ ርኢነ ፡ በሀገረ ፡ እግዚአ ፡ ኀያላን ፡ በሀገረ ፡ አምላክነ ፤ እግዚአብሔር ፡ ሳረራ ፡ ለዓለም ።

8 ተወከፍነ ፡ እግዚኦ ፡ ሣህለከ ፡ በማእከለ ፡ ሕዝብከ ።

9 ወበከመ ፡ ስምከ ፡ ከማሁ ፡ ስብሐቲከ ፡ በኵሉ ፡ አጽናፈ ፡ ምድር ፤ ጽድቅ ፡ ምሉእ ፡ የማንከ ።

10 ይትፌሥሓ ፡ አድባረ ፡ ጽዮን ፡ ወይትሐሠያ ፡ አዋልደ ፡ ይሁዳ ፤ በእንተ ፡ ፍትሕከ ፡ እግዚኦ ።

11 ዕግትዋ ፡ ለጽዮን ፡ ወሕቀፍዋ ፤ ወተናገሩ ፡ በውስተ ፡ መኃፍዲሃ ።

12 ደዩ ፡ ልበክሙ ፡ ውስተ ፡ ኀይላ ፤ ወትትካፈልዎ ፡ ለክበዲሃ ፤ ከመ ፡ ትንግሩ ፡ ለካልእ ፡ ትውልድ ።

13 ከመ ፡ ዝንቱ ፡ ውእቱ ፡ አምላክነ ፡ ለዓለም ፡ ወለዓለመ ፡ ዓለም ፤

14 ወውእቱ ፡ ይሬዕየነ ፡ እስከ ፡ ለዓለም ።

48 ፍጻሜ ፡ ዘደቂቀ ፡ ቆሬ ፡ መዝሙር ፡ ዘዳዊት ።

1 ስምዑ ፡ ዝንተ ፡ ኵልክሙ ፡ አሕዛብ ፤ ወአፅምኡ ፡ ኵልክሙ ፡ እለ ፡ ትነብሩ ፡ ውስተ ፡ ዓለም ።

2 በበ ፡ በሐውርቲክሙ ፡ ደቂቀ ፡ እጓለ ፡ እመሕያው ፤ አብዕልትኒ ፡ ወነዳይኒ ።

3 አፉየ ፡ ይነግር ፡ ጥበበ ፤ ወሕሊና ፡ ልብየ ፡ ምክረ ።

4 ኣፀምእ ፡ ምሳሌ ፡ በእዘንየ ፤ ወእከሥት ፡ በመዝሙር ፡ ነገርየ ።

5 ለምንት ፡ እፈርህ ፡ እምዕለት ፡ እኪት ፤ ኃጢአተ ፡ ሰኰናየ ፡ ዐገተኒ ።

6 እለ ፡ ይትአመኑ ፡ በኀይሎሙ ፤ ወይዜሀሩ ፡ በብዝኀ ፡ ብዕሎሙ ።

7 እኍኒ ፡ ኢያድኅን ፡ እኅዋሁ ፡ ወኢያድኅን ፡ ሰብእ ፤ ወኢይሁብ ፡ ለእግዚአብሔር ፡ ቤዛሁ ።

8 ወኢተውላጠ ፡ ሤጠ ፡ ነፍሱ ፡ ዘጻመወ ፡ ለዓለም ፡

9 የሐዩ ፡ ለዝሉፉ ፤ እስመ ፡ ኢይሬኢ ፡ መስና ። ሶበ ፡ ትሬእዮሙ ፡ ለጠቢባን ፡ ይመውቱ ፡

10 መከማሁ ፡ ይትሐጐሉ ፡ አብዳን ፡ እለ ፡ አልቦሙ ፡ ልበ ፤ ወየኀድጉ ፡ ለባዕድ ፡ ብዕሎሙ ።

11 ወመቃብሪሆሙ ፡ አብያቲሆሙ ፡ ለዓለም ፡ ወማኅደሪሆሙ ፡ ለትውልደ ፡ ትውልድ ፤ ወይሰምዩ ፡ አስማቲሆሙ ፡ በበ ፡ በሐውርቲሆሙ ።

12 ወሰብእሰ ፡ እንዘ ፡ ክቡር ፡ ውእቱ ፡ ኢያእመረ ፤ ወኮነ ፡ ከመ ፡ እንስሳ ፡ ዘአልቦ ፡ ልበ ፡ ወተመሰሎሙ ።

13 ለሊሃ ፡ ፍኖቶሙ ፡ ዕቅፍቶሙ ፡ ወእንዘ ፡ ይሠምሩ ፡ በአፉሆሙ ።TABULAA

14 ከመ ፡ አባግዕ ፡ ሞት ፡ ይሬዕዮሙ ፡ በሲኦል ፤

15 ወይቀንይዎሙ ፡ ራትዓን ፡ በጽባሕ ፡ ወትበሊ ፡ ረድኤቶሙ ፡ በሲኦል ፡ እምክብሮሙ ።

16 ወባሕቱ ፡ እግዚአብሔር ፡ ያድኅና ፡ ለነፍስየ ፡ እምእደ ፡ ሲኦል ፤ ሶበ ይነሥኡኒ ።

17 ኢትፍርሆ ፡ ለሰብእ ፡ ሶበ ፡ ይብዕል ፤ ወሶበ ፡ ይበዝኅ ፡ ክብረ ፡ ቤቱ ።

18 እስመ ፡ ኢይነሥእ ፡ መስሌሁ ፡ ኵሎ ፡ እመ ፡ ይመውት ፤ ወኢይወርድ ፡ መስሌሁ ፡ ክብረ ፡ ቤቱ ።

19 እስመ ፡ ፈግዐት ፡ ነፍሱ ፡ በሕይወቱ ፤ የአምነከ ፡ ሰብእ ፡ ሶበ ፡ ታሤኒ ፡ ሎቱ ።

20 ወይወርድ ፡ ውስተ ፡ ዓለመ ፡ አበዊሁ ፤ ወኢይሬኢ ፡ እንከ ፡ ብርሃነ ፡ እስከ ፡ ለዓለም ።

21 ወእጓለ ፡ እመሕያውሰ ፡ እንዘ ፡ ክቡር ፡ ውእቱ ፡ ኢያእምረ ፤ ወኮነ ፡ ከመ ፡ እንስሳ ፡ ዘአልቦ ፡ ልበ ፡ ወተመሰሎሙ ።

49 ፍጻሜ ፡ ዘደቂቀ ፡ ቆሬ ፡ መዝሙር ፡ ዘአሳፍ ።

1 አምላከ ፡ አማልክት ፡ እግዚአብሔር ፡ ነበበ ፡ ወጸውዓ ፡ ለምድር ፤

2 እምሥራቀ ፡ ፀሓይ ፡ እስከነ ፡ ዐረብ ። ወእምጽዮን ፡ ሥነ ፡ ስብሐቲሁ ፡

3 እግዚአብሔርሰ ፡ ገሀደ ፡ ይመጽእ ፡ ወአምላክነሂ ፡ ኢያረምም ፤

4 እሳት ፡ ይነድድ ፡ ቅድሜሁ ፡ ወዐውድዶሂ ፡ ዐውሎ ፡ ብዙኅ ።

5 ይጼውዓ ፡ ለሰማይ ፡ በላዕሉ ፤ ወለምድርኒ ፡ ከመ ፡ ይኰንን ፡ ሕዝቦ ።

6 አስተጋብኡ ፡ ሎቱ ፡ ጻድቃኑ ፤ እለ ፡ ይገብሩ ፡ መሥዋዕተ ፡ ዘበሕጉ ።

7 ይነግራ ፡ ሰማያት ፡ ጽድቀ ፡ ዚአሁ ፤ እስመ ፡ እግዚአብሔር ፡ መኰንን ፡ ውእቱ ።

8 ስምዐኒ ፡ ሕዝብየ ፡ ወእንግርከ ፡ እስራኤል ፡ ወኣሰምዕ ፡ ለከ ፤ አምላክከሰ ፡ አምላክ ፡ አነ ፡ ውእቱ ።

9 አኮ ፡ በእንተ ፡ መሥዋዕትከ ፡ ዘእዛለፈከ ፤ ወቍርባንከኒ ፡ ቅድሜየ ፡ ውእቱ ፡ በኵሉ ፡ ጊዜ ።

10 ኢይነሥእ ፡ አልህምተ ፡ እምቤትከ ፤ ወኢሐራጊት ፡ እመርዔትከ ።

11 እስመ ፡ ዚአየ ፡ ውእቱ ፡ ኵሉ ፡ አራዊት ፡ ዘገዳም ፤ እንስሳ ፡ ገዳምኒ ፡ ወአልህምት ።

12 ወኣአምር ፡ ኵሎ ፡ አዕዋፈ ፡ ሰማይ ፤ ወሥነ ፡ ገዳምኒ ፡ ኀቤየ ፡ ሀሎ ።

13 እመኒ ፡ ርኀብኩ ፡ ኢይስእለከ ፤ እስመ ፡ ዚአየ ፡ ውእቱ ፡ ኵሉ ፡ ዓለም ፡ በምልኡ ።

14 ኢይበልዕ ፡ ሥጋ ፡ ላህም ፤ ወኢይሰቲ ፡ ደመ ፡ ጠሊ ።

15 ሡዕ ፡ ለእግዚአብሔር ፡ መሥዋዕተ ፡ ስብሐት ፤ ወሀቦ ፡ ለልዑል ፡ ጸሎተከ ።

16 ትጼውዐኒ ፡ በዕለተ ፡ መንዳቤከ ፡ ኣድኅነከ ፡ ወታአኵተኒ ።

17 ወለኃጥእሰ ፡ ይቤሎ ፡ እግዚአብሔር ፡ ለምንት ፡ ለከ ፡ ትነግር ፡ ሕግየ ፤ ወትነሥእ ፡ በአፉከ ፡ ሥርዕትየ ።

18 ወአንተሰ ፡ ጸላእከ ፡ ተግሣጽየ ፤ ወአግባእከ ፡ ድኅሬከ ፡ ቃልየ ።

19 እመኒ ፡ ርኢከ ፡ ሰራቄ ፡ ትረውጽ ፡ ምስሌሁ ፤ ወረሰይከ ፡ መክፈልተከ ፡ ምስለ ፡ ዘማውያን ።

20 አፉከ ፡ አብዝኃ ፡ ለእኪት ፤ ወልሳንከ ፡ ፀፈራ ፡ ለሕብል ።

21 ትነብር ፡ ወተሐምዮ ፡ ለእኁከ ፤ ወአንበርከ ፡ ዕቅፍተ ፡ ለወልደ ፡ እምከ ። ዝንተ ፡ ገቢረክ ፡ አርመምኩ ፡ ለከ ፡

22 አደመተከኒ ፡ ኀጢአት ፡ ሐዘብከኑ ፡ እኩን ፡ ከማከ ፤ እዛለፍከኑ ፡ ወእቁም ፡ ቅድመ ፡ ገጽከ ።

23 ለብዉ ፡ ዘንተ ፤ ኵልክሙ ፡ እለ ፡ ትረስዕዎ ፡ ለእግዚአብሔር ፤ ወእመአኮሰ ፡ ይመስጥ ፡ ወአልቦ ፡ ዘያድኅን ።

24 መሥዋዕት ፡ ክብርት ፡ ትሴብሐኒ ፤ ህየ ፡ ፍኖት ፡ እንተ ፡ ባቲ ፡ አርአየ ፡ እግዚአብሔር ፡ አድኅኖቶ ።

50 ፍጻሜ ፡ መዝሙር ፡ ዘዳዊት ። አመ ፡ መጽአ ፡ ኀቤሁ ፡ ናታን ፡ ነቢይ ፤ ዘአመ ፡ ቦአ ፡ ኀቤሃ ፡ ለአበሳቢ ።

1 ተሣሀለኒ ፡ እግዚኦ ፡ በከመ ፡ ዕበየ ፡ ሣህልከ ፤

2 ወበከመ ፡ ብዙኀ ፡ መሕረትከ ፡ ደምስስ ፡ ኃጢአትየ ።

3 ኅፅበኒ ፡ ወአንጽሐኒ ፡ እምኀጢአትየ ፤ ወእምአበሳየኒ ፡ አንጽሐኒ ።

4 እስመ ፡ ለልየ ፡ ኣአምር ፡ ጌጋይየ ፤ ወኀጢአትየኒ ፡ ቅድሜከ ፡ ውእቱ ፡ በኵሉ ፡ ጊዜ ።

5 ለከ ፡ ለባሕቲትከ ፡ አበስኩ ፡ ወእኩየኒ ፡ በቅድሜከ ፡ ገበርኩ ፤ ከመ ፡ ትጽደቅ ፡ በነቢብከ ፡ ወትማእ ፡ በኵነኔከ ።

6 እስመ ፡ ናሁ ፡ በኀጢአት ፡ ተፀነስኩ ፤ ወበዐመፃ ፡ ወለደተኒ ፡ እምየ ።

7 እስመ ፡ ናሁ ፡ ጽድቀ ፡ አፍቀርከ ፤ ዘኢይትነበብ ፡ ኅቡአ ፡ ጥበብከ ፡ አይዳዕከኒ ።

8 ትነዝኀኒ ፡ በአዛብ ፡ ወእነጽሕ ፤ ተኀፅበኒ ፡ እምበረድ ፡ እጸዐዱ ።

9 ታሰምዐኒ ፡ ትፍሥሕተ ፡ ወሐሤተ ፤ ወይትፌሥሑ ፡ አዕጽምተ ፡ ጻድቃን ።

10 ሚጥ ፡ ገጸከ ፡ እምኀጢአትየ ፤ ወደምስስ ፡ ሊተ ፡ ኵሎ ፡ አበሳየ ።

11 ልበ ፡ ንጹሐ ፡ ፍጥር ፡ ሊተ ፡ እግዚኦ ፤ ወመንፈሰ ፡ ርቱዐ ፡ ሐድስ ፡ ውስተ ፡ ከርሥየ ።

12 ኢትግድፈኒ ፡ እምቅድመ ፡ ገጽከ ፤ ወመንፈሰከ ፡ ቅዱሰ ፡ ኢታውፅእ ፡ እምላዕሌየ ።

13 ዕስየኒ ፡ ፍሥሓ ፡ በአድኅኖትከ ፤ ወበመንፈስ ፡ ዐዚዝ ፡ አጽንዐኒ ።

14 ከመ ፡ እምሀሮሙ ፡ ለኃጥኣን ፡ ፈኖተከ ፤ ወረሲዓን ፡ ይትመየጡ ፡ ኀቤከ ።

15 አድኅነኒ ፡ እምደም ፡ እግዚአብሔር ፡ አምላከ ፡ መድኀኒትየ ፤ ይትፌሣሕ ፡ ልሳንየ ፡ በጽድቀ ፡ ዚአከ ።

16 እግዚኦ ፡ ትከሥት ፡ ከናፍርየ ፤ ወአፉየ ፡ ያየድዕ ፡ ስብሐቲከ ።

17 ሶበሰ ፡ ፈቀድከ ፡ መሥዋዕተኒ ፡ እምወሀብኩ ፤ ወጽንሓሕኒ ፡ ኢትሠምር ።

18 መሥዋዕቱ ፡ ለእግዚአብሔር ፡ መንፈስ ፡ የዋህ ፤ ልበ ፡ ትሑተ ፡ ወየዋሀ ፡ ኢይሜንን ፡ እግዚአብሔር ።

19 አሠንያ ፡ እግዚኦ ፡ በሥምረትከ ፡ ለጽዮን ፤ ወይትሐንጻ ፡ አረፋቲሃ ፡ ለኢየሩሳሌም ።

20 አመ ፡ ትሠምር ፡ መሥዋዕተ ፡ ጽድቅ ፡ መባአኒ ፡ ወቍርባነኒ ፤ አሜሃ ፡ ያዐርጉ ፡ ውስተ ፡ ምሥዋዒከ ፡ አልህምተ ።

51 ፍጻሜ ፡ ዘበአእምሮ ፡ ዘዳዊት ። ዘአመ ፡ መጽአ ፡ ዶይቅ ፡ ኤዶማዊ ፡ ወነገሮ ፡ ለሳኦል ፤ ወይቤሎ ፡ መጽአ ፡ ዳዊት ፡ ቤቶ ፡ ለአቤሜሌክ ።

1 ለምንት ፡ ይዜሀር ፡ ኀያል ፡ በእከዩ ፤ ወይዔምፅ ፡ ኵሎ ፡ አሚረ ።

2 ኀጢአተ ፡ ሐለየ ፡ ልብከ ፤ ከመ ፡ መላፄ ፡ በሊኅ ፡ ገበርከ ፡ ሕብለ ።

3 አብደርከ ፡ እኪተ ፡ እምሠናይት ፤ ወትዔምፅ ፡ እምትንብብ ፡ ጽድቀ ።

4 ወአፍቀርከ ፡ ኵሎ ፡ ነገረ ፡ ልሳን ፡ መስጥም ።

5 በእንተዝ ፡ ይነሥተከ ፡ እግዚአብሔር ፡ ለዝሉፉ ፤ ይመልሐከ ፡ ወያፈልሰከ ፡ እምቤትከ ፡ ወሥርወከኒ ፡ እምድረ ፡ ሕያዋን ።

6 ይርአዩ ፡ ጻድቃን ፡ ወይፍርሁ ፡ ወይስሐቁ ፡ ላዕሌሁ ፡ ወይበሉ ። ነዋ ፡ ብእሲ ፡ ዘኢረሰዮ ፡ ለእግዚአብሔር ፡ ረዳኢሁ ፤

7 ወተአመነ ፡ በብዝኀ ፡ ብዑሉ ፤ ወተኀየለ ፡ በከንቱ ።

8 ወአንሰ ፡ ከመ ፡ ዕፀ ፡ ዘይት ፡ ስሙር ፡ ውስተ ፡ ቤተ ፡ እግዚአብሔር ፤ ወተወከልኩ ፡ በምሕረቱ ፡ ለእግዚአብሔር ፡ ለዓለም ፡ ወለዓለመ ፡ ዓለም ።

9 እገኒ ፡ ለከ ፡ ለዓለም ፡ እስመ ፡ ገበርከ ፡ ሊተ ፤ ወእሴፈዋ ፡ ለምሕረትከ ፡ እስመ ፡ ሠናያቲከ ፡ ኀበ ፡ ጻድቃኒከ ።

52 ፍጻሜ ፡ ዘአመ ፡ መጽአ ፡ ዘበኣእምሮ ፡ ዘዳዊት ።

1 ይብል ፡ አብድ ፡ በልቡ ፡ አልቦ ፡ እግዚአብሔር ፤

2 ኀስሩ ፡ ወረኵሱ ፡ በጌጋዮሙ አልቦ ፡ ዘይገብራ ፡ ለሠናይት ።

3 እግዚአብሔር ፡ ሐወጸ ፡ እምሰማይ ፡ ዲበ ፡ እጓለ ፡ እምሕያው ፤ ከመ ፡ ይርአይ ፡ እመቦ ፡ ጠቢበ ፤ ዘየኀሦ ፡ ለእግዚአብሔር ።

4 ኵሉ ፡ ዐረየ ፡ ወኅቡረ ፡ ዐለወ ፤ አልቦ ፡ ዘይገብራ ፡ ለሠናይት ፤ አልቦ ፡ ወኢአሐዱ ።

5 ወኢያአምሩ ፡ ኵሎሙ ፡ ገበርተ ፡ ዐመፃ ፤ እለ ፡ ይውኅጥዎሙ ፡ ለሕዝብየ ፡ ከመ ፡ በሊዐ ፡ እክል ፤

6 ወለእግዚአብሔር ፡ ኢጸውዕዎ ። ወበህየ ፡ ፈርሁ ፡ ወገረሞሙ ፡ ዘኢኮነ ፡ ግሩመ ፤

7 እስመ ፡ እግዚአብሔር ፡ ዘረወ ፡ አዕጽምቲሆሙ ፡ ለመዳልዋን ፡ ወተኀፍሩ ፡ እስመ ፡ እግዚአብሔር ፡ አኅሰሮሙ ።

8 መኑ ፡ ይሁብ ፡ እምጽዮን ፡ መድኀኒተ ፡ ልእስራኤል ፤ አመ ፡ ሜጠ ፡ እግዚአብሔር ፡ ፄዋ ፡ ሕዝቡ ፡

9 ይትፌሣሕ ፡ ያዕቆብ ፡ ወይትሐሠይ ፡ እስራኤል ።

53 ፍጻሜ ፡ ስብሐት ፡ ዘበኣእምሮ ፡ ዘዳዊት ፡ ዘአመ ፡ መጽኡ ፡ ዜፌዊያን ፡ ወይቤልዎ ፡ ለሳኦል ፤ ናሁ ፡ ዳዊት ፡ ይትኀባእ ፡ ኀቤነ ።

1 እግዚኦ ፡ በስምከ ፡ አድኅነኒ ፤ ወበኀይልከ ፡ ፍታሕ ፡ ሊተ ።

2 እግዚኦ ፡ ስምዐኒ ፡ ጸሎትየ ፤ ወአፅምእ ፡ ቃለ ፡ አፉየ ።

3 እስመ ፡ ነኪራን ፡ ቆሙ ፡ ላዕሌየ ፡ ወኀያላን ፡ ኀሠሥዋ ፡ ለነፍስየ ፤ ወኢረሰይዎ ፡ ለእግዚአብሔር ፡ ቅድሜሆሙ ።

4 ናሁ ፡ እግዚአብሔር ፡ ይረድአኒ ፤ ወእግዚእየ ፡ ያድኅና ፡ ለነፍስየ ።

5 ወይመይጣ ፡ ለእኪት ፡ ዲበ ፡ ጸላእትየ ፤ ወበጽድቅከ ፡ ሠርዎሙ ።

6 ዘእምፈቃድየ ፡ እሠውዕ ፡ ለከ ፤ እገኒ ፡ ለስምከ ፡ እግዚኦ ፡ እስመ ፡ ሠናይ ።

7 እስመ ፡ እምኵሎ ፡ ምንዳቤየ ፡ አድኀንከኒ ፤ ወርእየት ፡ ዐይንየ ፡ በጸላእትየ ።

54 ፍጻሜ ፡ ስብሐት ፡ ዘበኣእምሮ ፡ ዘዳዊት ።

1 አፅምአኒ ፡ እግዚኦ ፡ ጸሎትየ ፤ ወኢትትሀየየኒ ፡ ስእለትየ ። ነጽረኒ ፡ ወስምዐኒ ፤

2 ተከዝኩ ፡ ወደንገፅኩ ፡ ወተዛዋዕኩ ። እምቃለ ፡ ጸላኢ ፡ ወእምሥቃየ ፡ ኃጥእ ፤

3 እስመ ፡ ሜጥዋ ፡ ለዐመፃ ፡ ላዕሌየ ፡ ወቆሙ ፡ ላዕሌየ ፡ ያመንስዉኒ ።

4 ወደንገፀኒ ፡ ልብየ ፡ በላዕሌየ ፤ ወመጽአኒ ፡ ድንጋፄ ፡ ሞት ።

5 ፍርሀት ፡ ወረዐድ ፡ አኀዘኒ ፤ ወደፈነኒ ፡ ጽልመት ።

6 ወእቤ ፡ መኑ ፡ ይሁበኒ ፡ ክንፈ ፡ ከመ ፡ ርጌብ ፤ እሥርር ፡ ወኣዕርፍ ።

7 ናሁ ፡ አርሐቁ ፡ ተኀጥኦ ፤ ወቤትኩ ፡ ውስተ ፡ በድው ።

8 እሴፈዎ ፡ ለዘ ፡ ያድኅነኒ ፤ እምዕንባዜ ፡ ነፍስየ ፡ ከመ ፡ ዐውሎ ።

9 አስጥሞሙ ፡ እግዚኦ ፡ ወምትር ፡ ልሳናቲሆሙ ፤ እስመ ፡ ርኢኩ ፡ ዐመፃ ፡ ወቅሥተ ፡ ውስተ ፡ ሀገር ።

10 እስመ ፡ መዐልተ ፡ ወሌሊተ ፡ ዕጉት ፡ ውስተ ፡ አረፋቲሃ ፤ ዐመፃ ፡ ወስራሕ ፡ ወኀጢአት ፡ ማእከላ ።

11 ወኢይርሕቅ ፡ እመርሕባ ፡ ጕሕሉት ።

12 ሶበሰ ፡ ጸላኢ ፡ ጸአለኒ ፡ እምተዐገሥኩ ፤

13 ውሶበሂ ፡ ጸላኢ ፡ አዕበየ ፡ አፉሁ ፡ ላዕሌየ ፡ እምተኀባእክዎ ።

14 ወአንተሰ ፡ ብእሲ ፡ ዘከመ ፡ ነፍስየ ፤ ማእምርየ ፡ ወዐውቅየ ።

15 ዘኅቡረ ፡ አስተጠዐምከ ፡ ሊተ ፡ መባልዕተ ፤ ወነሐውር ፡ ቤተ ፡ እግዚአብሔር ፡ በአሐዱ ፡ ልብ ።

16 ይምጽኦሙ ፡ ሞት ፡ ወይረዱ ፡ ውስተ ፡ ሲኦል ፡ ሕያዋኒሆሙ ፤

17 እስመ ፡ እኩይ ፡ ማእከሎሙ ፡ ውስተ ፡ አብያቲሆሙ ።

18 ወአንሰ ፡ ጸራኅኩ ፡ ኀበ ፡ እግዚአብሔር ፤ ወአምላኪየ ፡ ሰምዐኒ ።

19 ሰርከ ፡ ወነግሀ ፡ ወመዐልተ ፡ እነግር ፡ ወኣየድዕ ፤ ወይሰምዐኒ ፡ ቃልየ ።

20 አድኅና ፡ በሰላም ፡ ለነፍስየ ፡ እምእለ ፡ ይትቃረቡኒ ፤ እስመ ፡ ይበዝኁ ፡ እምእለ ፡ ምስሌየ ።

21 ይስማዕ ፡ እግዚአብሔር ፡ ወያኅስሮሙ ፤ ዘሀሎ ፡ እምቅድመ ፡ ይትፈጠር ፡ ዓለም ።

22 እስመ ፡ አልቦሙ ፡ ቤዛ ፡ ወኢፈርህዎ ፡ ለእግዚአብሔር ። ወሰፍሐ ፡ እዴሁ ፡ ለፍድይ ።

23 ወአርኰሱ ፡ ሥርዐቶ ። ወተናፈቁ ፡ እምዐተ ፡ ገጹ ፡ ወቀርበ ፡ ልቡ ።

24 ወጽሕደ ፡ እምቅብእ ፡ ነገሩ ፡ እሙንቱሰ ፡ ማዕበል ፡ ያስጥሙ ።

25 ግድፍ ፡ ላዕለ ፡ እግዚአብሔር ፡ ሕሊናከ ፡ ወውእቱ ፡ ይሴስየከ ፤ ወኢይሁቦ ፡ ሁከተ ፡ ለጻድቅ ፡ ለዓለም ።

26 አንተ ፡ እግዚኦ ፡ አጽድፎሙ ፡ ውስተ ፡ ዐዘቅተ ፡ ሞት ፡

27 ዕድው ፡ ደም ፡ ወጽልሕዋን ፡ ኢይነፍቁ ፡ መዋዕሊሆሙ ፤ ወአንሰ ፡ ተወከልኩከ ፡ እግዚኦ ።

55 ፍጻሜ ፡ ዘበእንተ ፡ ሕዝብ ፡ እለ ፡ እምቅዱሳን ፡ ርሕቁ ፡ ዘዳዊት ፡ አርአያ ፡ መጽሐፍ ፤ ዘአመ ፡ አኀዝዎ ፡ ኢሎፍሊ ፡ በጌት ።

1 ተሣሀለኒ ፡ እግዚኦ ፡ እስመ ፡ ኬደኒ ፡ ሰብእ ፤ ወኵሎ ፡ አሚረ ፡ አስርሐኒ ፡ ቀትል ።

2 ወኬዱኒ ፡ ፀርየ ፡ ኵሎ ፡ አሚረ ፡ በኑኀ ፡ ዕለት ፤ እስመ ፡ ብዙኃን ፡ እለ ፡ ፀብኡኒ ፡ ወፈራህኩ ።

3 ወአንሰ ፡ ኪያከ ፡ ተወከልኩ ፡ እግዚኦ ።

4 በእግዚአብሔር ፡ እሴብሕ ፡ ቃልየ ፤ ወበእግዚአብሔር ፡ ተወከልኩ ፡ ኢይፈርህ ፤ ምንተ ፡ ይሬስየኒ ፡ ዘሥጋ ።

5 ወኵሎ ፡ አሚረ ፡ ያስቆርሩኒ ፡ ዘነበብኩ ። ወላዕሌየ ፡ ይመክሩ ፡ ኵሎ ፡ እኩየ ።

6 ይጸንሑኒ ፡ ወይትኀብኡኒ ። ወእሙንቱሰ ፡ ሰኰናየ ፡ ያስተሓይጹኒ ፤

7 ወዘልፈ ፡ ይጸንሕዋ ፡ ለነፍስየ ። ወኢታድኅኖሙ ፡ ወኢበምንትኒ ፤ ወታጸድፎሙ ፡ ለአሕዛብ ፡ በመዐትከ ።

8 አምላኪየ ፡ እነግረከ ፡ ሕይወትየ ፤ ወአንበርኩ ፡ አንብዕየ ፡ ቅድሜከ ፡ በከመ ፡ አዘዝከ ።

9 ለይግብኡ ፡ ፀርየ ፡ ድኅሬሆሙ ፡

10 አመ ፡ ዕለተ ፡ እጼውዐከ ፤ ናሁ ፡ ኣእመርኩ ፡ ከመ ፡ አምላኪየ ፡ አንተ ።

11 በእግዚአብሔር ፡ እሴብሕ ፡ ቃልየ ፤ በእግዚአብሔር ፡ ይከብር ፡ ዘነበብኩ ። ወበእግዚአብሔር ፡ ተወከልኩ ፡ ኢይፈርህ ፤ ምንተ ፡ ይሬስየኒ ፡ ሰብእ ።

12 እምኀቤይ ፡ እሁብ ፡ ብፅአትየ ፡ ለስብሓቲከ ።

13 እስመ ፡ አድኀንካ ፡ እሞት ፡ ለነፍስየ ፡ ወለአዕይንትየኒ ፡ እምአንብዕ ፤ ወለእገርየኒ ፡ እምዳኅፅ ። ከመ ፡ ኣሥምሮ ፡ ለእግዚአብሔር ፡ በብሔረ ፡ ሕያዋን ።

56 ፍጻሜ ፡ ኢታማስን ፡ ዘዳዊት ፡ አርአያ ፡ መጽሐፍ ፤ ዘአመ ፡ ጐየ ፡ እምቅድመ ፡ ገጸ ፡ ሳኦል ፡ ውስተ ፡ በአት ።

1 ተሣሀለኒ ፡ እግዚኦ ፡ ተሣሀለኒ ። እስመ ፡ ኪያከ ፡ ተወከለት ፡ ነፍስየ ፤

2 ወተወከልኩ ፡ በጽላሎተ ፡ ክንፊከ ፤ እስከ ፡ ተኀልፍ ፡ ኀጢአት ።

3 እጸርኅ ፡ ኀበ ፡ እግዚአብሔር ፡ ልዑል ፤ ኀበ ፡ እግዚአብሔር ፡ ዘረድአኒ ።

4 ፈነወ ፡ እምሰማይ ፡ ወአድኀነኒ ፡ ወወሀቦሙ ፡ ኀሳረ ፡ ለእለ ፡ ኬዱኒ ፤

5 ገነወ ፡ እግዚአብሔር ፡ ሣህሎ ፡ ወጽድቆ ። ወአድኀና ፡ ለነፍስየ ፡ እምእከለ ፡ አናብስት ፡ ወኖምኩ ፡ ድንጉፅየ ፤

6 ደቂቀ ፡ እጓለ ፡ እምሕያው ፡ ስነኒሆሙ ፡ ሐጽ ፡ ወኲናት ፡ ወልሳኖሙኒ ፡ በሊኅ ፡ መጥባሕት ።

7 ተለዐለ ፡ እግዚአብሔር ፡ መልዕልተ ፡ ሰማያት ፤ ወበኵሉ ፡ ምድር ፡ ስብሐቲሁ ።

8 መሥገርተ ፡ አስተዳለዉ ፡ ለእገርየ ፡ ወቀጽዕዋ ፡ ለነፍስየ ፤

9 ከሩዩ ፡ ግበ ፡ ቅድሜየ ፡ ወወድቁ ፡ ውስቴቱ ።

10 ጥቡዕ ፡ ልብየ ፡ እግዚኦ ፡ ጥቡዕ ፡ ልብየ ፤ እሴብሕ ፡ ወእዜምር ።

11 ወይትንሣእ ፡ ክብርየ ፤ ወይትንሣእ ፡ በመዝሙር ፡ ወበመሰንቆ ፤ ወእትንሣእ ፡ በጽባሕ ።

12 እገኒ ፡ ለከ ፡ በውስተ ፡ አሕዛብ ፡ እግዚኦ ፤ ወእዜምር ፡ ለከ ፡ በውስተ ፡ ሕዝብ ።

13 እስመ ፡ ዐብየት ፡ እስከ ፡ ሰማያት ፡ ምሕረትከ ፤ ወእስከ ፡ ደመናት ፡ ጽድቅከ ።

14 ተለዐለ ፡ እግዚአብሔር ፡ መልዕልተ ፡ ሰማያት ፤ ወበኵሉ ፡ ምድር ፡ ስብሓቲሁ ።

57 ፍጻሜ ፡ ኢታማስን ፡ ዘዳዊት ፡ አርአያ ፡ መጽሐፍ ።

1 እመሰ ፡ አማን ፡ ጽድቀ ፡ ትነቡ ፤ ወርትዐ ፡ ትኴንኑ ፡ ደቂቀ ፡ እጓለ ፡ እምሕያው ።

2 እስመ ፡ በልብክሙ ፡ ኃጢአተ ፡ ትገብሩ ፡ በዲበ ፡ ምድር ፤ ወጽልሑተ ፡ ይፀፍራ ፡ እደዊክሙ ።

3 ተነክሩ ፡ ኃጥኣን ፡ እማሕፀን ፤ እምከርሥ ፡ ስሕቱ ፡ ወነበቡ ፡ ሐሰተ ።

4 ወመዐቶሙኒ ፡ ከመ ፡ ሕምዘ ፡ አርዌ ፡ ምድር ፤ ከመ ፡ አርዌ ፡ ምድር ፡ ጽምምት ፡ እዘኒሃ ።

5 እንት ፡ ኢትሰምዕ ፡ ቃለ ፡ ዘይሬቅያ ፤ እንዘ ፡ ይሠርያ ፡ መሠርይ ፡ ጠቢብ ።

6 እግዚአብሔር ፡ ይሰብር ፡ ስነኒሆሙ ፡ በውስተ ፡ አፉሆሙ ፤ ወይሰብር ፡ እግዚአብሔር ፡ ጥረሲሆሙ ፡ ለአናብስት ።

7 ወየኀስሩ ፡ ከመ ፡ ማይ ፡ ዘይትከዐው ፤ ወይዌስቅ ፡ ቀስቶ ፡ እስከ ፡ ያደክዎሙ ።

8 ወየኀልቁ ፡ ከመ ፡ ሰምዕ ፡ ዘይትመሰው ፤ ወድቀት ፡ እሳት ፡ ወኢርኢክዋ ፡ ለፀሐይ ።

9 ዘእንበለ ፡ ይትዐወቅ ፡ ሦክክሙ ፡ ሕለተ ፡ ኮነ ፡ ከመ ፡ ሕያዋን ፡ በመዐቱ ፡ ይውኅጠክሙ ።

10 ይትፌሣሕ ፡ ጻድቅ ፡ ሶበ ፡ ይሬኢ ፡ በቀለ ፤ ወይትኀፀብ ፡ እዴሁ ፡ በደመ ፡ ኃጥእ ።

11 ወይብል ፡ ሰብእ ፡ ቦኑ ፡ እንጋ ፡ ፍሬ ፡ ለጻድቅ ፤ ወቦኑ ፡ እንጋ ፡ እግዚአብሔር ፡ ይፈትሕ ፡ ሎሙ ፡ በዲበ ፡ ምድር ።

58 ፍጻሜ ፡ ኢታማስን ፡ ዘዳዊት ፡ አርአየ ፡ ምስሐፍ ፤ አመ ፡ ፈነወ ፡ ሳኦል ፡ ይዕቀቡ ፡ ቤቶ ፡ ከመ ፡ ይቅትሎ ።

1 አድኅነኒ ፡ እግዚኦ ፡ እምፀርየ ፤ ወአንግፈኒ ፡ እምእለ ፡ ቆሙ ፡ ላዕሌየ ።

2 ወባልሐኒ ፡ እምገበርተ ፡ ዐመፃ ፤ ወአድኅነኒ ፡ እምዕድወ ፡ ደም ።

3 እስመ ፡ ናሁ ፡ ናዐውዋ ፡ ለነፍስየ ፤ ወቆሙ ፡ ላዕሌየ ፡ ኀያላን ፤

4 አኮ ፡ በአበሳየ ፡ ወአኮ ፡ በጌጋይየ ፡ እግዚኦ ። ዘእንበለ ፡ ዐመፃ ፡ ሮጽኩ ፡ ወአርታዕኩ ፤

5 ተንሥእ ፡ ተቀበለኒ ፡ ወርኢ ። አንተ ፡ እግዚኦ ፡ አምላከ ፡ ኀያላን ፡ ንጉሠ ፡ እስራኤል ፡

6 ሐውጾሙ ፡ ለኵሎሙ ፡ አሕዛብ ፡ ወተሣሀሎሙ ፤ ወኢትሣሀሎሙ ፡ ለኵሎሙ ፡ ገበርተ ፡ ዐመፃ ።

7 ይትመየጡ ፡ ሰርከ ፡ ወይርኀቡ ፡ ከመ ፡ ከልብ ፤ ወይዑዱ ፡ ሀገር ።

8 ናሁ ፡ ይነቡ ፡ በአፉሆሙ ፡ ወሰይፍ ፡ ውስተ ፡ ከናፍሪሆሙ ፤ ወዘሂ ፡ ይሰምዖሙ ።

9 ወአንተ ፡ እግዚኦ ፡ ትስሕቆሙ ፤ ወነንኮሙ ፡ ለኵሎሙ ፡ አሕዛብ ።

10 ኣምኀፅን ፡ ኀቤከ ፡ ኀይልየ ፤ እስመ ፡ አምላኪየ ፡ ወምስካይየ ፡ አንተ ። ይብጽሐኒ ፡ ሣህሉ ፡ ለአምላኪየ ፤

11 አምላኪየ ፡ አርእየኒ ፡ በጸላእትየ ። ኢትቅትሎሙ ፡ ከመ ፡ ኢይርስዑ ፡ ሕገከ ፡

12 ዘርዎሙ ፡ በኀይልከ ፡ ወአጽድፎሙ ፡ አምላኪየ ፡ ወረዳእየ ።

13 ኀጢአተ ፡ አፉሆሙ ፡ ቃለ ፡ ከናፍሪሆሙ ፤ ወይሠገሩ ፡ በትዕቢቶሙ ።

14 ወበመርገሞሙ ፡ ወእምሐሰቶሙ ፡ ይትዐወቅ ፡ ደኃሪቶሙ ። ወየኀልቁ ፡ በደኃሪ ፡ መቅሠፍት ፤

15 ወያእምሩ ፡ ከመ ፡ አምላከ ፡ ያዕቆብ ፡ ይኴንን ፡ እስከ ፡ አጽናፈ ፡ ምድር ።

16 ይትመየጡ ፡ ሰርከ ፡ ወይርኀቡ ፡ ከመ ፡ ከልብ ፡ ወይዑዱ ፡ ሀገረ ።

17 እሙንቱሰ ፡ ይዘረዉ ፡ ለበሊዕ ፤ ወእስመ ፡ ኢጸግቡ ፡ ወአንጐርጐሩ ።

18 ወአንሰ ፡ እሴብሕ ፡ ለኀይልከ ፡ ወእትፌሣሕ ፡ በጽባሕ ፡ በምሕረትከ ፤

19 እስመ ፡ ኮንከኒ ፡ ምስካይየ ፡ ወጸወንየ ፡ በዕለተ ፡ ምንዳቤየ ።

20 ረዳእየ ፡ አንተ ፡ ወለከ ፡ እዜምር ፡ አምላኪየ ፤ እስመ ፡ አምላኪየ ፡ ወምስካይየ ፡ አንተ ፡ አምላኪየ ፡ ውእቱ ፡ ሣህልየ ።

59 ፍጻሜ ፡ ዘእለ ፡ ተበዐዱ ፡ ዓዲ ፤ አርአየ ፡ መጽሐፍ ፡ ዘዳዊት ፡ ለትምህርት ። ዘአመ ፡ አውዐየ ፡ መስጴጦምየ ፡ ዘሶርያ ፡ ወሶርያ ፡ ዘሶበል ፡ ወተመይጠ ፡ ዮአብ ፡ ወቀተለ ፡ በቈላቲሆም ፡ ካልኣን ፡ ዐሠርተ ፡ ወ ፪ ፻ ።

1 እግዚኦ ፡ ገደፍከነ ፡ ወነሠትከነ ፤ ቀሠፍከነሂ ፡ ወተሣሀልከነ ።

2 አድለቅለቃ ፡ ለምድር ፡ ወሆካ ፤ ወፈወስከ ፡ ቍስላ ፡ እስመ ፡ ምንቀልቀለት ።

3 ወአርአይኮሙ ፡ ዕፁባተ ፡ ለሕዝብከ ፤ ወአስተይከነ ፡ ወይነ ፡ መደንግፀ ።

4 ወወሀብኮሙ ፡ ትእምርተ ፡ ለእለ ፡ ይፈርሁከ ፤ ከመ ፡ ያምስጡ ፡ እምገጸ ፡ ቀስት ።

5 ወይድኀኑ ፡ ፍቁራኒከ ፤ አድኅን ፡ በየማንከ ፡ ወስምዐኒ ።

6 እግዚአብሔር ፡ ነበበ ፡ በመቅደሱ ፡ እትፌሣሕ ፡ ወእትካፈል ፡ ምህርካ ፤ ወእሳፈር ፡ አዕጻደተ ፡ ቈላት ።

7 ዚአየ ፡ ውእቱ ፡ ገላዐድ ፡ ወዚአየ ፡ ምናሴ ፤ ወኤፍሬም ፡ ምስማከ ፡ ርእስየ ፤

8 ወይሁዳ ፡ ንጉሥየ ። ወሞአብ ፡ ካህን ፡ ተስፋየ ፡

9 ዲበ ፡ አደምያስ ፡ እሰፍሕ ፡ መካይድየ ፤ ሊተ ፡ ይገንዩ ፡ ኢሎፍሊ ።

10 መኑ ፡ ይወስደኒ ፡ ሀገረ ፡ ጥቅም ፤ ወመኑ ፡ ይመርሐኒ ፡ እስከ ፡ ኢዶምያስ ።

11 አኮኑ ፡ አንተ ፡ እግዚኦ ፡ ዘገደፍከነ ፤ ወኢትወፅእ ፡ አምላክነ ፡ ምስለ ፡ ኀይልን ።

12 ሀበነ ፡ ረድኤተ ፡ በምንዳቤነ ፤ ወከንቱ ፡ ተአምኖ ፡ በሰብእ ።

13 በእግዚአብሔር ፡ ንገብር ፡ ኀይለ ፤ ወውእቱ ፡ ያኀስሮሙ ፡ ለእለ ፡ ይሣቅዩነ ።

60 ፍጻሜ ፡ ማኅሌት ፡ ዘዳዊት ።

1 ስምዐኒ ፡ አምላኪየ ፡ ስእለትየ ፤ ወአፅምአኒ ፡ ጸሎትየ ።

2 እምአጽናፈ ፡ ምድር ፡ ጸራኅኩ ፡ ኀቤከ ፡ ሶበ ፡ ቀብጸኒ ፡ ልብየ ፤ ወእምእብን ፡ አልዐልከኒ ፡ ወመራሕከኒ ።

3 እስመ ፡ ተስፋየ ፡ ኮንከኒ ፤ ማኅፈድ ፡ ጽኑዕ ፡ ቅድመ ፡ ገጸ ፡ ጸላኢ ።

4 እነብር ፡ ቤተከ ፡ ለዓለም ፤ ወእትከደን ፡ በጽላሎተ ፡ ክነፊከ ።

5 እስመ ፡ አንተ ፡ አምላኪየ ፡ ሰማዕከኒ ፡ ጸሎትየ ፤ ወወሀብኮሙ ፡ ርስተ ፡ ለእለ ፡ ይፈርሁከ ።

6 እምዕለት ፡ ዕለተ ፡ ይዌስክ ፡ ንጉሥ ፤ ዐመቲሁ ፡ እስከ ፡ መዋዕለ ፡ ትውለደ ፡ ትውለድ ።

7 ወይነብር ፡ ለዓለም ፡ ቅድመ ፡ እግዚአብሔር ፤ መኑ ፡ የኀሥሥ ፡ ሣህሎ ፡ ወጽድቆ ።

8 ከመዝ ፡ እዜምር ፡ ለስምከ ፡ ለዓለም ፤ ከመ ፡ ተሀበኒ ፡ ተምኔትየ ፡ ኵሎ ፡ አሚረ ።

61 ፍጻሜ ፡ ዝበእንተ ፡ ኢዶቱም ፡ መዝሙር ፡ ዘዳዊት ።

1 አኮኑ ፡ ለእግዚአብሔር ፡ ትገኒ ፡ ነፍስየ ፤ እስመ ፡ ኀቤሁ ፡ መድኀነትየ ።

2 እስመ ፡ ውእቱ ፡ አምላኪየ ፡ ወመድኀኒየ ፤ ወውእቱ ፡ ርዳእየ ፡ ወኢይትሀወክ ፡ ለዝሉፉ ።

3 እስከ ፡ ማእዜኑ ፡ ትቀውሙ ፡ ላዕለ ፡ ብእሲ ፡ ወትቀትልዎ ፡ ኵልክሙ ፤ ከመ ፡ አረፍት ፡ ጽንንት ፡ ወከመ ፡ ጥቅም ፡ ንሑል ።

4 ወባሕቱ ፡ መከሩ ፡ ይስዐሩ ፡ ክብርየ ፡ ወሮጽኩ ፡ በጽምእየ ፤ በአፉሆሙ ፡ ይድሕሩ ፡ ወበልቦሙ ፡ ይረግሙ ።

5 ወባሕቱ ፡ ለእግዚአብሔር ፡ ትገኒ ፡ ነፍስየ ፤ እስመ ፡ ኀቤሁ ፡ ተስፋየ ።

6 እስመ ፡ ውእቱ ፡ አምላኪየ ፡ ወመድኀኒየ ፤ ወርዳእየ ፡ ውእቱ ፡ ኢይትሀወክ ።

7 በእግዚአብሔር ፡ መድኀነትየ ፡ ወበእግዚአብሔር ፡ ክብርየ ፤ አምላከ ፡ ረድኤትየ ፡ ወተስፋየ ፡ እግዚአብሔር ።

8 ተወከሉ ፡ ቦቱ ፡ ኵልክሙ ፡ ማኅበሩ ፡ አሕዛብ ፡ ወከዐዉ ፡ ልበክሙ ፡ ቅድሜሁ ፤ ወእግዚአብሔር ፡ ውእቱ ፡ ርዳኢነ ።

9 ወባሕቱ ፡ ከንቱ ፡ ኵሉ ፡ ደቂቀ ፡ እጓለ ፡ እመሕያው፡ ሐሳውያን ፡ ደቂቀ ፡እጓለ ፡ እመሕያው፡ ወይዔምፁ ፡ መዳልወ ፤ እሙንቱሰ ፡ እምከንቱ ፡ ውስተ ፡ ከንቱ ፡ ክመ ። ከመ ፡ ኢትሰፈዉዋ ፡ ለዓመፃ ።

10 ወኢትትአመንዎ ፡ ለሀይድ ፤ ብዕል ፡ ለእመ ፡ በዝኀ ፡ ኢታዕብዮ ፡ ልበክሙ ።

11 ምዕረ ፡ ነበበ ፡ እግዚአብሔር ፡ ወዘንተ ፡ ከመ ፡ ሰማዕኩ ፤ እስመ ፡ ዘእግዚአብሔር ፡ ሣህል ። ወዚአከ ፡ እግዚኦ ፡ ኀይል ፤ እስመ ፡ አንተ ፡ ትፈድዮ ፡ ለኵሉ ፡ በከመ ፡ ምግባሩ ።

62 መዝሙር ፡ ዘዳዊት ፤ አመ ፡ ሀሎ ፡ ውስተ ፡ ገዳመ ፡ ኢዶምያስ ።

1 አምላኪየ ፡ አምላኪየ ፡ እገይስ ፡ ኀቤከ ፤

2 ጸምአት ፡ ነፍስየ ፡ ለከ ፤ እፎ ፡ እስፋሕ ፡ ለከ ፡ ሥጋየ ፡

3 በምደረ ፡ በድው ፡ ኀበ ፡ አልቦ ፡ ዕፀ ፡ ወማየ ። ከመዝ ፡ በመቅደስከ ፡ አስተርአይኩከ ፤ ከመ ፡ ኣእምር ፡ ኀይለከ ፡ ወስብሐቲከ ።

4 እስመ ፡ ይኄይስ ፡ እምሐይው ፡ ሣህልከ ፤ ከናፍሪየ ፡ ይሴብሓከ ።

5 ከመዝ ፡ እባርከከ ፡ በሕይወትየ ፤ ወበስመ ፡ ዚአከ ፡ ኣነሥእ ፡ እደውየ ።

6 ከመ ፡ ዘእምሥቡሕ ፡ ወእምአንጕዕ ፡ ጸግበት ፡ ነፍስይ ፤ ከናፍርየ ፡ ፍሡሓት ፡ ይሴብሓ ፡ ለስምከ ።

7 ወበምስካብየኒ ፡ እዜክረከ ፤ ወጽባሕ ፡ ኣነብብ ፡ ለከ ። እስመ ፡ ኮንከኒ ፡ ረዳእየ ፤

8 ወእትዌከል ፡ በጽላሎተ ፡ ክነፊከ ። ተለወት ፡ ነፍስየ ፡ ድኅሬከ ፤ ሊተሰ ፡ ተወክፈተኒ ፡ የማንከ ።

9 እሙንቱሰ ፡ ለከንተ ፡ ኀሠሥዌ ፡ ለነፍስየ ፤ ለይባኡ ፡ ውስተ ፡ መዓምቅቲሃ ፡ ለምድር ። ወይግብኡ ፡ ውስተ ፡ እደ ፡ ሰይፍ ፤ ክፍለ ፡ ቈናጽል ፡ ለይኩኑ ።

10 ወንጉሥሰ ፡ ይትፌሣሕ ፡ በእግዚአብሔር ፤ ወይከብር ፡ ኵሉ ዘይምሕል ፡ ኪያሁ ። እስመ ፡ ይትፈፀም ፡ አፍ ፡ ዘይነብብ ፡ ዐመፃ ።

63 ፍጻሜ ፡ መዝሙር ፡ ዘዳዊት ።

1 ስምዐኒ ፡ እግዚኦ ፡ ጸሎትየ ፡ ዘሰአልኩ ፡ ኀቤከ ፤ እምትሕዝብተ ፡ ጽላኢ ፡ አድኅና ፡ ለነፍስይ ።

2 ወሰውረኒ ፡ እምዕሌቶሙ ፡ ለእኩያን ፤ ወእምብዝኆሙ ፡ ለገበርተ ፡ ዐመፃ ።

3 እለ ፡ አብልኁ ፡ ልሳኖሙ ፡ ከመ ፡ አርዌ ፡ ምድር ፤ ወወሰቁ ፡ ቀስቶሙ ፡ ለገቢረ ፡ መሪር ። ከመ ፡ ይቅትልዎ ፡ ለንጹሕ ፡ በጽሚት ፤

4 ግብተ ፡ ይነድፍዎሙ ፡ ወኢይፈርሁ ። ወአጽንዑ ፡ ሎሙ ፡ ነገረ ፡ እኩየ ፡

5 ወተማከሩ ፡ ይኅብኡ ፡ ሎሙ ፡ መሥገርተ ፤ ወይቤሉ ፡ አልቦ ፡ ዘይሬእየነ ።

6 ወኀሠሥዋ ፡ ለዐመፃ ፡ ወኀልቁ ፡ እዝነ ፡ ይፈትኑ ፡ ወይወጥኑ ፤

7 ወይበውእ ፡ ሰብእ ፡ በልብ ፡ ዕሙቅ ፤ ወይትሌዐል ፡ እግዚአብሔር ።

8 ከመ ፡ ሐጸ ፡ ደቂቅ ፡ ኮነ ፡ መቅሠፍቶሙ ። ወደክመ ፡ ለሳኖሙ ፡ በላዕሌሆሙ ፡

9 ወደንገፁ ፡ ኵሎሙ ፡ እለ ፡ ርእይዎሙ ። ወፈርሁ ፡ ኵሉ ፡ ሰብእ ፡

10 ወነገሩ ፡ ግብረ ፡ እግዚአብሔር ፤ ወአእመሩ ፡ ምግባሮ ።

11 ይትፌሣሕ ፡ ጻድቅ ፡ በእግዚአብሔር ፡ ወይትዌከል ፡ ቦቱ ፤ ወይከብሩ ፡ ኵሎሙ ፡ ርቱዓነ ፡ ልብ ።

64 ፍጻሜ ፡ ማኅሌት ፡ መዝሙር ፡ ዘዳዊት ።

1 ለከ ፡ ይደሉ ፡ እግዚኦ ፡ ስብሐት ፡ በጽዮን ፤ ወለከ ፡ ይትፌነው ፡ ጸሎት ፡ በኢየሩሳሌም ።

2 ስማዕ ፡ ጸሎተ ፡ ኵሉ ፡ ዘሥጋ ፡ ዘመጽአ ፡ ኀቤከ ።

3 ነገረ ፡ ዐማፂያን ፡ ኀየለነ ፡ ወኀጢአትነሰ ፡ አንተ ፡ ትሰሪ ፡ ለነ ።

4 ብፁዕ ፡ ዘኀረይኮ ፡ ወዘተወከፍኮ ፡ ወዘኣኅደርኮ ፡ ውስተ ፡ አዕጻዲከ ።

5 ጸገብነ ፡ እምበረከተ ፡ ቤትከ ፡ ቅዱስ ፡ ጽርሕከ ፡ ወመንክር ፡ በጽዱቅ ።

6 ስምዐነ ፡ አምላክነ ፡ ወመድኀኒነ ፤ ተስፋሆሙ ፡ ለኵሎሙ ፡ አጽናፈ ፡ ምድር ፡ ወለእለሂ ፡ ውስተ ፡ ባሕር ፡ ርሑቅ ።

7 አጽናዕኮሙ ፡ ለአድባር ፡ በኀይልከ ፤ ወቅኑታን ፡ እሙንቱ ፡ በኀይል ። ዘየሀውኮ ፡ ለዐንበረ ፡ ባሕር ፤ ወመኑ ፡ ይትቃወሞ ፡ ለድምፀ ፡ ማዕበላ ።

8 ይደነግፁ ፡ አሕዛብ ፡ ወይፈርሁ ፡ እለ ፡ ይነብሩ ፡ ውስተ ፡ አጽናፍ ፡ እምተአምሪከ ፤ ይወፅኡ ፡ በጽባሕ ፡ ወሰርከ ፡ ይትፌሥሑ ።

9 ሐወጽካ ፡ ለምድር ፡ ወአርወይካ ፡ ወአብዛኅኮ ፡ ለብዕላ ፡

10 ፈለገ ፡ እግዚአብሔር ፡ ምሉእ ፡ ማያት ፤ አስተዳሎከ ፡ ሲሳዮሙ ፡ እስመ ፡ ከማሁ ፡ ታስተዴሉ ።

11 አርውዮ ፡ ለትሌሚሃ ፡ ወአስምር ፡ ለማእረራ ፤ ወበነጠብጣብከ ፡ ትበቍል ፡ ትፈሢሓ ።

12 ወትባርክ ፡ አክሊለ ፡ ዓመተ ፡ ምሕረትከ ፤ ወይጸግቡ ፡ ጠላተ ፡ ገዳማት ።

13 ወይረውዩ ፡ አድባረ ፡ በድው ፤ ወይትሐሠዩ ፡ አውግር ፡ ወይቀንቱ ።

14 ወይለብሱ ፡ አብሐኰ ፡ አባግዕ ፡ ወቈላትኒ ፡ ይመልኡ ፡ ስርናየ ፤ ይጸርኁ ፡ እንዘ ፡ ይሴብሑ ።

65 ፍጻሜ ፡ ማኅሌት ፡ መዝሙር ፡ ዘትንሣኤ ።

1 የብቡ ፡ ለእግዚአብሔር ፡ በኵሉ ፡ ምድር ። ወዘምሩ ፡ ለስሙ ፤ ሀቡ ፡ አኰቴተ ፡ ለስብሐቲሁ ።

2 በልዎ ፡ ለእግዚአብሔር ፡ ግሩም ፡ ግብርከ ፡ እንዘ ፡ ብዙኅ ፡ ኀይልከ ፡ ሐሰዉክ ፡ ጸላእቲከ ።

3 ኵላ ፡ ምድር ፡ ትሰግድ ፡ ወትገኒ ፡ ለከ ፡ ወትዜምር ፡ ለስምከ ፡ ልዑል ።

4 ንዑ ፡ ወትርአዩ ፡ ግብሮ ፡ ለእግዚአብሔር ፤ ግሩም ፡ ምክሩ ፡ እምእጓለ ፡ እመሕያው ።

5 ዘይሬስያ ፡ ለባሕር ፡ የብሰ ፡ ወበተከዚ ፡ የኀልፉ ፡ በእግር ፤ ወበህየ ፡ ንትፌሣሕ ፡ ኅቡረ ።

6 ዘይኴንን ፡ በኀይሉ ፡ ዘለዓለም ፡ ወአዕይንቲሁኒ ፡ ኀበ ፡ አሕዛብ ፡ ይኔጽራ ፤ እለ ፡ ታአምሩ ፡ ኢታዕብዩ ፡ ርእሰክሙ ።

7 ባርክዎ ፡ አሕዛብ ፡ ለአምላክነ ፤ ወአፅምኡ ፡ ቃለ ፡ ስብሐቲሁ ።

8 ዘአንበራ ፡ ለነፍስየ ፡ ውስተ ፡ ሕይወት ፤ ወኢይሁቦን ፡ ሁከተ ፡ ለእግርየ ።

9 እስመ ፡ አምከርከነ ፡ እግዚኦ ፤ ወፈተንከነ ፡ ከመ ፡ ይፈትንዎ ፡ ለብሩር ።

10 ወአባእከነ ፡ ውስተ ፡ መሥገርት ፤ ወአምጻእከ ፡ ሕማመ ፡ ቅድሜነ ። ወአጽአንከ ፡ ስብአ ፡ ዲበ ፡ አርእስቲነ ፤

11 አኅለፍከነ ፡ ማእከለ ፡ እሳት ፡ ወማይ ፡ ወአውፃእከነ ፡ ውስተ ፡ ዕረፍት ።

12 እበውእ ፡ ቤተከ ፡ ምስለ ፡ መባእየ ፤ ወእሁብ ፡ ብፅአትየ ።

13 ዘነበብኩ ፡ በአፉየ ፤ ዘእቤ ፡ በከናፍርየ ፡ አመ ፡ ምንዳቤየ ።

14 መሥዋዕተ ፡ ንጹሐ ፡ ዘአልቦ ፡ ነውረ ፡ ኣበውእ ፡ ለከ ፡ ዕጣነ ፡ ምስለ ፡ ሕራጊት ፤ እሠውዕ ፡ ለከ ፡ አልህምተ ፡ ወአጣሌ ።

15 ንዑ ፡ ስምዑኒ ፡ ወእንግርክሙ ፡ ኵልክሙ ፡ እለ ፡ ትፈርህዎ ፡ ለእግዚአብሔር ፤ መጠነ ፡ ገብረ ፡ ላቲ ፡ ለነፍስየ ።

16 ዘጸራኅኩ ፡ ኀቤሁ ፡ በአፉየ ፤ ወከላሕኩ ፡ በልሳንየ ።

17 እስመ ፡ ዐመፃ ፡ ይሬኢ ፡ ውስተ ፡ ልብየ ፤ ኢይሰምዐኒ ፡ እግዚአብሔር ።

18 ወበእንተዝ ፡ ሰምዐኒ ፡ እግዚአብሔር ፤ ወአፅምአኒ ፡ ቃለ ፡ ስእለትየ ።

19 ይትባረክ ፡ እግዚአብሔር ፡ ዘኢከልአኒ ፡ ጸሎትየ ፡ ወኢያርሐቀ ፡ ሣህሎ ፡ እምኔየ ።

66 ፍጻሜ ፡ ስብሐት ፡ መዝሙር ፡ ማኅሌት ፡ዘዳዊት ።

1 እግዚአብሔር ፡ ይባርከነ ፡ ወይሣሀለነ ፤ ወያርኡ ፡ ገጾ ፡ ላዕሌነ ፡ ወንሕዩ ።

2 ከመ ፡ ናእምር ፡ በምድር ፡ ፍኖተከ ፤ ወበኵሉ ፡ አሕዛብ ፡ አድኅኖተከ ።

3 ይገንዩ ፡ ለከ ፡ አሕዛብ ፡ እግዚኦ ፤ ይገንዩ ፡ ለከ ፡ አሕዛብ ፡ ኵሎሙ ።

4 ይትፌሥሑ ፡ ወይትሐሠዩ ፡ አሕዛብ ፤ እስመ ፡ ትኴንኖሙ ፡ ለአሕዛብ ፡ በርትዕ ፡ ወትመርሖሙ ፡ ለአሕዛብ ፡ በምድር ።

5 ይገንዩ ፡ ለከ ፡ አሕዛብ ፡ እግዚኦ ፤ ይገንዩ ፡ ለከ ፡ አሕዛብ ፡ ኵሎሙ ። ምድርኒ ፡ ወሀበት ፡ ፍሬሃ ፤

6 ወይባርከነ ፡ እግዚአብሔር ፡ አምላክነ ። ወይባርከነ ፡ እግዚአብሔር ፤ ወይፍርህዎ ፡ ኵሎሙ ፡ አጽናፈ ፡ ምድር ።

67 ፍጻሜ ፡ ዘዳዊት ፡ መዝሙር ፡ ማኅሌት ።

1 ይትነሣእ ፡ እግዚአብሔር ፡ ወይዘረዉ ፡ ፀሩ ፤ ወይጕየዩ ፡ ጸላእቱ ፡ እምቅድመ ፡ ገጹ ።

2 ከመ ፡ የኀልቅ ፡ ጢስ ፡ ከማሁ ፡ የኀልቁ ፤ ወከመ ፡ ይትመሰው ፡ ሰምዕ ፡ እምቅድመ ፡ ገጸ ፡ እሳት ፡ ከማሁ ፡ ይትሐጐሉ ፡ ኃጥኣን ፡ እምቅድመ ፡ ገጹ ፡ ለእግዚአብሔር ።

3 ወጻድቃንሰ ፡ ይትፌሥሑ ፡ ወይትሐሠዩ ፡ በቅድመ ፡ እግዚአብሔር ፤ ወይትፌሥሑ ፡ በሐሤት ።

4 ሰብሕዎ ፡ ለእግዚአብሔር ፡ ወዘምሩ ፡ ለስሙ ፤ ፍኖተ ፡ ግብሩ ፡ ለዘ ፡ ዐርገ ፡ እንተ ፡ ዐረብ ፤ እግዚአብሔር ፡ ስሙ ፡ ወተፈሥሑ ፡ በቅድሜሁ ።

5 ወይደነግፁ ፡ እምቅድመ ፡ ገጹ ። አብ ፡ ለእጓለ ፡ ማውታ ፡ ወመኰንኖን ፡ ለአቤራት ፤

6 እግዚአብሔር ፡ ውስተ ፡ ቤተ ፡ መቅደሱ ። እግዚአብሔር ፡ ያኀድሮሙ ፡ ለባሕታዊያን ፡ ውስተ ፡ ቤቱ ፡

7 ወያወፅኦሙ ፡ ለሙቁሓን ፡ በኀይሉ ፤ ከማሁ ፡ ለምሩራን ፡ እለ ፡ ይነብሩ ፡ ውስተ ፡ መቃብር ።

8 እግዚኦ ፡ አመሰ ፡ ወፃእከ ፡ ቅድመ ፡ ሕዝብከ ፤ ወአመኒ ፡ እንተ ፡ ገዳም ፡ ኀለፍከ ።

9 ምድርኒ ፡ አድለቅለቀት ፡ ወሰማይኒ ፡ አንጠብጠበ ፡ እምቅድመ ፡ ገጹ ፡ ለአምላከ ፡ ሲና ፤ እምቅድመ ፡ ገጹ ፡ ለአምላከ ፡ እስራኤል ።

10 ዝናመ ፡ ፈቃዱ ፡ ዘፈለጠ ፡ እግዚአብሔር ፡ ለርስትከ ፤ እመኒ ፡ ደክመ ፡ አንተ ፡ ታጸንዖ ።

11 እንስሳከ ፡ የኀድር ፡ ውስቴቱ ፤ አስተዳሎከ ፡ ለነዳያን ፡ በኂሩትከ ፡ እግዚኦ ።

12 እግዚአብሔር ፡ ይሁቦሙ ፡ ቃለ ፡ ለእለ ፡ ይዜንዉ ፡ ኀይለ ፡ ብዙኀ ።

13 ንጉሠ ፡ ኀያለን ፡ ለፍቁሩ ፡ ለፍቁሩ ፡ ወለሥነ ፡ ቤትከ ፡ ተካፈልነ ፡ ምህርካ ።

14 እመኒ ፡ ቤትክሙ ፡ ማእከለ ፡ መዋርስት ፤ ክነፈ ፡ ርግብ ፡ በብሩር ፡ ዘግቡር ፡ ወገበዋቲሃኒ ፡ በኀመልማለ ፡ ወርቅ ።

15 አመ ፡ አዘዘ ፡ ሰማያዊ ፡ ንጉሥ ፡ ላዕሌሃ ፤ በረድ ፡ ይዘንም ፡ ላዕለ ፡ ሰልሞን ። ደብረ ፡ እግዚአብሔር ፡ ደብር ፡ ጥሉል ፤

16 ደብር ፡ ርጉዕ ፡ ወደብረ ፡ ጥሉል ። ለምንት ፡ ይትነሥኡ ፡ አድባር ፡ ርጉዓን ፤

17 ደብረ ፡ ዘሠምሮ ፡ እግዚአብሔር ፡ ይኀድር ፡ ውስቴቱ ፡ እስመ ፡ ይኀድሮ ፡ እግዚአብሔር ፡ ለዝሉፉ ።

18 ሰረገላቲሁ ፡ ለእግዚአብሔር ፡ ምእልፊተ ፡ አእላፍ ፡ ፍሡሓን ፤ እግዚአብሔር ፡ ውስቴቶሙ ፡ በሲና ፡ መቅደሱ ።

19 ዐረገ ፡ ውስተ ፡ አርያም ፡ ፄዊወከ ፡ ፄዋ ፡ ወወሀብከ ፡ ጸጋከ ፡ ለእጓለ ፡ እምሕያው፤

20 እስመ ፡ ይክሕዱ ፡ ከመ ፡ ይኅድሩ ። እግዚአብሔር ፡ አምላክ ፡ ቡሩክ ።

21 ይትባረክ ፡ እግዚአብሔር ፡ በኵሉ ፡ መዋዕል ፤ ይረድአነ ፡ አምላክነ ፡ ወመድኀኒነ ።

22 አምላክነሰ ፡ አምላከ ፡ አድኅኖ ፤ ወፍናዊሁኒ ፡ ለሞት ፡ ዘእግዚአብሔር ፡ ውእቱ ።

23 ወባሕቱ ፡ እግዚአብሔር ፡ ይሰብር ፡ አርእስተ ፡ ጸላእቱ ፤ ወበከተማ ፡ ሥዕርቶሙ ፡ የሐውር ፡ ጌጋዮሙ ።

24 ይቤ ፡ እግዚአብሔር ፡ ወፂእየ ፡ እገብእ ፤ ወእትመየጥ ፡ እንተ ፡ ቀላየ ፡ ባሕር ።

25 ከመ ፡ ይሠረያ ፡ እገሪከ ፡ በደም ፡ ልሳነ ፡ ከለባቲከ ፡ ላዕለ ፡ ጸላእቱ ።

26 አስተርአየ ፡ ፍናዊከ ፡ እግዚኦ ፤ ፍናዊሁ ፡ ለአምላኪየ ፡ ለንጉሥ ፡ ዘውስተ ፡ መቅደስ ።

27 በጽሑ ፡ መላእክት ፡ ወቦሙ ፡ መዘምራነ ፤ ማእከለ ፡ ደናግል ፡ ዘባጥያተ ፡ ከበሮ ።

28 በማኅበር ፡ ባርክዎ ፡ ለእግዚአብሔር ፤ ወለአማላክነ ፡ በአንቅዕተ ፡ እስራኤል ።

29 ህየ ፡ ብንያም ፡ ወሬዛ ፡ በኀይሉ ፡

30 መላእክተ ፡ ይሁዳ ፡ ወመሳፍንቲሆሙ ፤ መላእክተ ፡ ዛብሉን ፡ መላእክተ ፡ ንፍታሌም ።

31 አዝዝ ፡ እግዚኦ ፡ በኀይልከ ፤ ወአጽንዖ ፡ እግዚኦ ፡ ለዝንቱ ፡ ዘሠራዕከ ፡ ለነ ።

32 ውስተ ፡ ጽርሕከ ፡ ዘኢየሩሳሌም ፤ ለከ ፡ ያምጽኡ ፡ ነገሥት ፡ አምኃ ።

33 ገሥጾሙ ፡ ለአራዊተ ፡ ሕለት ፡ ማኅበረ ፡ አልህምት ፡ ውስተ ፡ እጓላተ ፡ ሕዝብ ፡ ከመ ፡ ኢይትዐጸዉ ፡ እለ ፡ ፍቱናን ፡ ከመ ፡ ብሩር ፤

34 ዝርዎሙ ፡ ለአሕዛብ ፡ እለ ፡ ይፈቅዱ ፡ ቀትለ ። ይመጽኡ ፡ ተናብልት ፡ እምግብጽ ፤ ኢትዮጵያ ፡ ታበጽሕ ፡ እደዊሃ ፡ ኀበ ፡ እግዚአብሔር ።

35 ነገሥተ ፡ ምድር ፡ ሰብሕዎ ፡ ለእግዚአብሔር ፤ ወዘምሩ ፡ ለአምላክነ ።

36 ዘምሩ ፡ ለእግዚአብሔር ፡ ዘዐርገ ፡ ውስተ ፡ ሰማይ ፤ ሰማይ ፡ ዘመንገለ ፡ ጽባሕ ፤

37 ናሁ ፡ ይሁብ ፡ ቃሎ ፡ ቃለ ፡ ኀይል ። ሀቡ ፡ አኰቴተ ፡ ለእግዚአብሔር ፡

38 ላዕለ ፡ እስራኤል ፡ ዐቢይ ፡ ስብሐቲሁ ፤ ወኀይሉሂ ፡ እስከ ፡ ደመናት ።

39 መንክር ፡ እግዚአብሔር ፡ በላዕለ ፡ ቅዱሳኒሁ ። አምላከ ፡ እስራኤል ፡ ውእቱ ፡ ይሁብ ፡ ኀይለ ፡ ወጽንዐ ፡ ለሕዝቡ ፤ ወይትባረክ ፡ እግዚአብሔር ።

68 ፍጻሜ ፡ በእንተ ፡ እለ ፡ ተበዐዱ ፡ ዘዳዊት ።

1 አድኅነኒ ፡ እግዚኦ ፤ እስመ ፡ በጽሐኒ ፡ ማይ ፡ እስከ ፡ ነፍስየ ።

2 ወጠጋዕኩ ፡ ውስተ ፡ ዕሙቅ ፡ ቀላይ ፡ ወኀይል ፡ አልብየ ፤

3 በጻሕኩ ፡ ውስተ ፡ ማዕምቀ ፡ ባሕር ፡ ወዐውሎ ፡ አስጠመኒ ።

4 ሰራሕኩ ፡ በከልሖ ፡ ወስሕከኒ ፡ ጕርዔየ ፤ ደክማ ፡ አዕይንትየ ፡ እንዘ ፡ እሴፈዎ ፡ ለአምላኪየ ።

5 በዝኁ ፡ እምስዕርተ ፡ ርእስየ ፡ እለ ፡ ይጸልኡኒ ፡ በከንቱ ፤

6 ጸንዑ ፡ ፀርየ ፡ እለ ፡ ይረውዱኒ ፡ በዐመፃ ፡ ወዘኢነሣእኩ ፡ ይትፈደዩኒ ።

7 ለሊከ ፡ እግዚኦ ፡ ታአምር ፡ እበድየ ፤ ወኢይትኀባእ ፡ እምኔከ ፡ ኃጢአትየ ።

8 ወኢይትኀፈሩ ፡ ብየ ፡ እለ ፡ የኀሡከ ፡ እግዚኦ ፡ እግዚአ ፡ ኀያላን ፤

9 ወኢይኀሰሩ ፡ ብየ ፡ እለ ፡ ይሴፈዉከ ፤ አምላከ ፡ እስራኤል ።

10 እስመ ፡ በእንቲአከ ፡ ተዐገሥኩ ፡ ፅእለተ ፤ ወከደነኒ ፡ ኀፍረት ፡ ገጽየ ።

11 ከመ ፡ ነኪር ፡ ኮንክዎሙ ፡ ለአኀውየ ፤ ወነግድ ፡ ለደቂቀ ፡ አቡየ ፡ ወእምየ ።

12 እስመ ፡ ቅንአተ ፡ ኬትከ ፡ በልዐኒ ፤ ተዕይርቶሙ ፡ ለእለ ፡ ይትዔየሩከ ፡ ወድቀ ፡ ላዕሌየ ።

13 ወቀጻእክዋ ፡ በጾም ፡ ለነፍስየ ። ወኮነኒ ፡ ፅእለተ ።

14 ወለበስኩ ፡ ሠቀ ፡ ወኮንክዎሙ ፡ ነገረ ።

15 ላዕሌየ ፡ ይዛውዑ ፡ እለ ፡ ይነብሩ ፡ ውስተ ፡ አናቅጽ ፤ ወኪያየ ፡ የኀልዩ ፡ እለ ፡ ይሰትዩ ፡ ወይነ ።

16 ወአንሰ ፡ በጸሎትየ ፡ ኀበ ፡ እግዚአብሔር ፡ ሣህሉ ፡ ለእግዚአብሔር ፡ በጊዜሁ ፤

17 እንዘ ፡ ብዙኅ ፡ ሣህልከ ፡ ስምዐኒ ፡ ዘበአማን ፡ መድኀንየ ።

18 ወአድኅነኒ ፡ እምዐምዓም ፡ ከመ ፡ ኢየኀጠኒ ፤ ወአንግፈኒ ፡ እምጸላእትየ ፡ ወእምቀላየ ፡ ማይ ። ወኢያስጥመኒ ፡ ዐውሎ ፡ ማይ ፡

19 ወኢየኀጠኒ ፡ ቀላይ ፤ ወኢያብቁ ፡ አፉሁ ፡ ዐዘቅት ፡ ላዕሌየ ።

20 ስምዐኒ ፡ እግዚኦ ፡ እስመ ፡ ሠናይ ፡ ምሕረትከ ፤ ወበከመ ፡ ብዝኀ ፡ ሣህልከ ፡ ነጽር ፡ ላዕሌየ ።

21 ወኢትሚጥ ፡ ገጸከ ፡ እምገብርከ ፤ እስመ ፡ ተመንደብኩ ፡ ፍጡነ ፡ ስምዐኒ ።

22 ነጽራ ፡ ለነፍስየ ፡ ወአድኅና ፤ ወአድኅነኒ ፡ በእንተ ፡ ጽእለትየ ።

23 ለሊከ ፡ ታአምር ፡ ጸላእትየ ፤ ኀፍረትየ ፡ ወኀሳርየ ፤

24 በቅድመ ፡ ኵሎሙ ፡ እለ ፡ ይሣቅዩኒ ። ተዐገሠት ፡ ነፍስየ ፡ ጽእለተ ፡ ወኀሳረ ፤

25 ወነበርኩ ፡ ትኩዝየ ፡ ወኀጣእኩ ፡ ዘይናዝዘኒ ።

26 ወወደዩ ፡ ሐሞተ ፡ ውስተ ፡ መብልዕየ ፤ ወአስተዩኒ ፡ ብሒአ ፡ ለጽምእየ ።

27 ለትኩኖሙ ፡ ማእዶሙ ፡ መሥገርተ ፡ በቅድሜሆሙ ፤ ወማዕገተ ፡ ዕቅፍት ፡ ለፍዳሆሙ ።

28 ይጽለማ ፡ አዕይንቲሆሙ ፡ ወኢይርአያ ፤ ወይትቀጻዕ ፡ ዘባናቲሆሙ ፡ በኵሉ ፡ ጊዜ ።

29 ከዐው ፡ መዐተከ ፡ ላዕሌሆሙ ፤ ወይርከቦሙ ፡ መቅሠፍተ ፡ መዐትከ ።

30 ለትኩን ፡ ሀገሮሙ ፡ በድወ ፤ ወአልቦ ፡ ዘይንበር ፡ ውስተ ፡ አብያቲሆሙ ።

31 እስመ ፡ ዘአንተ ፡ ቀሠፍከ ፡ እሙንቱ ፡ ተለዉ ፤ ወወሰኩኒ ፡ ዲበ ፡ ጸልዕየ ፡ ቍስለ ።

32 ወስኮሙ ፡ ጌጋየ ፡ በዲበ ፡ ጌጋዮሙ ፤ ወኢይባኡ ፡ በጽድቅከ ።

33 ወይደምሰሱ ፡ እመጽሐፈ ፡ ሕያዋን ፤ ወኢይጸሐፉ ፡ ምስለ ፡ ጻድቃን ።

34 ነዳይ ፡ ወቍሱል ፡ አነ ፤ መድኀኔ ፡ ገጽየ ፡ እግዚአብሔር ፡ ተወክፈኒ ።

35 እሴብሕ ፡ ለስመ ፡ አምላኪየ ፡ በማኅሌት ፤ ወኣዐብዮ ፡ በስብሓት ።

36 ወአሠምሮ ፡ ለእግዚአብሔር ፡ እምላህም ፡ ጣዕዋ ፤ ዘአብቈለ ፡ ቀርነ ፡ ወጽፍረ ።

37 ይርአዩ ፡ ነዳያን ፡ ወይትፌሥሑ ፤ ኅሥዎ ፡ ለእግዚአብሔር ፡ ወተሐዩ ፡ ነፍስክሙ ።

38 እስመ ፡ ሰምዖሙ ፡ እግዚአብሔር ፡ ለነዳያን ፤ ወኢመነኖሙ ፡ ለሙቁሓን ።

39 ይሴብሕዎ ፡ ሰማያት ፡ ወምድር ፤ ወባሕርኒ ፡ ወኵሉ ፡ ዘይትሐወሥ ፡ ውስቴታ ።

40 እስመ ፡ አድኀና ፡ እግዚአብሔር ፡ ለጽዮን ፡ ወይትሐነጻ ፡ አህጉረ ፡ ይሁዳ ፤

41 ወይነብሩ ፡ ህየ ፡ ወይወርስዋ ።

42 ወዘርዐ ፡ አግብርቲከ ፡ ይነብርዋ ፤ ወእለ ፡ ያፍቅሩ ፡ ስመከ ፡ የኀድሩ ፡ ውስቴታ ።

69 ፍጻሜ ፡ ዘዳዊት ፡ በእንተ ፡ ተዝካረ ፡ አድኅነኒ ፡ እግዚኦ ።

1 እግዚኦ ፡ ነጽር ፡ ውስተ ፡ ረዲኦትየ ፤ እግዚኦ፡ አፍጥን ፡ ረዳኦትየ ።

2 ይትኀፈሩ ፡ ወይኅሰሩ ፡ እለ ፡ የኀሥዎ ፡ ለነፍስየ ፤

3 ወይግብኡ ፡ ድኅሬሆሙ ፡ ወይትኀፈሩ ፡ እለ ፡ መከሩ ፡ እኩየ ፡ ላዕሌየ ።

4 ለይግብኡ ፡ ድኅሬሆሙ ፡ በጊዜሃ ፡ ተኀፊሮሙ ፡ እለ ፡ ይብሉኒ ፡ አንቋዕ ፡ አንቋዕ ።

5 ለይትፌሥሑ ፡ ወይትሐሠዩ ፡ ኵሎሙ ፡ እለ ፡ የኀሡከ ፡ እግዚኦ ፤ ወይበሉ ፡ ዘልፈ ፡ ዐቢይ ፡ እግዚአብሔር ፡ እለ ፡ ይፈቅዱ ፡ አድኅኖተከ ፡ በኵሉ ፡ ጊዜ ።

6 አንሰ ፡ ነዳይ ፡ ወምስኪን ፡ አነ ፡ ወእግዚአብሔር ፡ ይረድአኒ ። ረዳእየ ፡ ወምስካይየ ፡ አንተ ፡ እግዚኦ ፡ አምላኪየ ፡ ወኢትጐንዲ ።

70 ዘዳዊት ፡ ዘወልደ ፡ አሚናዳብ ፡ ለእለ ፡ አቅደሙ ፡ ተፄውዎ ።

1 ኪያከ ፡ ተወከልኩ ፡ እግዚኦ ፡ ወኢይትኀፈር ፡ ለዓለም ። ወበጽድቅከ ፡ አንግፈኒ ፡ ወባልሐኒ ፤

2 አፅምእ ፡ እዝነከ ፡ ኀቤየ ፡ ወፍጡነ ፡ አድኅነኒ ።

3 ኩነኒ ፡ አምላኪየ ፡ ወመድኀንየ ፡ ውስተ ፡ ብሔር ፡ ጽኑዕ ፡ ከመ ፡ ታድኅነኒ ፤

4 እስመ ፡ ኀይልየ ፡ ወጸወንየ ፡ አንተ ።

5 አምላኪየ ፡ አድኅነኒ ፡ እምእደ ፡ ኃጥኣን ፤ ወእምእደ ፡ ዐመፂ ፡ ወገፋዒ ።

6 እስመ ፡ አንተ ፡ ተስፋየ ፡ እግዚኦ ፤ እግዚእየ ፡ ተሰፈውኩከ ፡ እምንእስየ ።

7 ወብከ ፡ ጸናዕኩ ፡ በውስተ ፡ ከርሠ ፡ እምየ ። ወበውስተ ፡ ማኅፀን ፡ እንተ ፡ ከደንከኒ ።

8 ወአንተ ፡ ዝክርየ ፡ በኵሉ ፡ ጊዜ ። ከመ ፡ ኳሄላ ፡ ኮንክዎሙ ፡ ለብዙኃን ። ወአንተ ፡ ረዳእየ ፡ ወኀይልየ ።

9 ምላእ ፡ አፉየ ፡ ስብሐቲከ ፤ ከመ ፡ እሴብሕ ፡ አኰቴተከ ፡ ወኵሎ ፡ አሚረ ፡ ዕበየ ፡ ስብሐቲከ ።

10 ኢትግድገኒ ፡ በመዋዕለ ፡ ርሥእየ ፤ ወአመሂ ፡ ኀልቀ ፡ ኀይልየ ፡ ኢትኅድገኒ ፡ አምላኪየ ።

11 እስመ ፡ ነበቡ ፡ ላዕሌየ ፡ ጸላእትየ ፤ ወእለሂ ፡ የኀሥዋ ፡ ለነፍስየ ፡ ተማከሩ ፡ ኅቡረ ፡

12 ወይቤሉ ፡ ኀደጎ ፡ እግዚአብሔር ፤ ዴግንዎ ፡ ወትእኅዝዎ ፤ እስመ ፡ አልቦ ፡ ዘያድኅኖ ።

13 አምላኪየ ፡ ኢትርሐቅ ፡ እምኔየ ፤ አምላኪየ ፡ ነጽር ፡ ውስተ ፡ ረዲኦትየ ።

14 ይትኀፈሩ ፡ ወይኅሰሩ ፡ እለ ፡ ያስተዋድይዋ ፡ ለነፍስየ ፤ ወይልበሱ ፡ ኀፍረተ ፡ ወኀሳረ ፡ እለ ፡ ይፈቅዱ ፡ ሊተ ፡ ሕማመ ።

15 ወአንሰ ፡ ዘልፈ ፡ እሴፈወከ ፡ እግዚኦ ፤ ወእዌስክ ፡ ዲበ ፡ ኵሉ ፡ ስብሐቲከ ።

16 አፉየ ፡ ይነግር ፡ ጽድቀከ ፡ ወኵሎ ፡ አሚረ ፡ አድኅኖተከ ፤

17 እስመ ፡ ኢያአምር ፡ ተግባረ ። እበውእ ፡ በኀይለ ፡ እግዚአብሔር ፤ እግዚኦ ፡ እዜከር ፡ ጽድቀከ ፡ ባሕቲቶ ።

18 ወመሀርከኒ ፡ አምላኪየ ፡ እምንእስየ ፤ እስከ ፡ ይእዜ ፡ እነግር ፡ ስብሐቲከ ።

19 ወእስከ ፡ እልህቅ ፡ ወእረሥእ ፡ ኢትኅድገኒ ፡ አምላኪየ ፤

20 እስከ ፡ እነግረ ፡ መዝራዕተከ ፡ ለትውልድ ፡ ዘይመጽእ ።

21 ኀይለከኒ ፡ ወጽድቀከኒ ። እግዚኦ ፡ እስከ ፡ አርያም ፡ ገበርከ ፡ ዐቢያተ ። እግዚኦ ፡ መኑ ፡ ከማከ ።

22 እስመ ፡ አርአይከኒ ፡ ሕማመ ፡ ወምንዳቤ ፡ ብዙኀ ፤ ወተመየጥከኒ ፡ ወአሕየውከኒ ፤ ወእምቀላየ ፡ ምድር ፡ ካዕበ ፡ አውፃእከኒ ።

23 ወአብዛኅኮ ፡ ለጽድቅከ ፡ ወገባእከ ፡ ታስተፌሥሐኒ ፤ ወእምቀላየ ፡ ምድር ፡ ካዕበ ፡ አውፃእከኒ ።

24 ወአነሂ ፡ እገኒ ፡ ለከ ፡ በንዋየ ፡ መዝሙር ፡ ለጽድቅከ ፤ እዜምር ፡ ለከ ፡ አምላኪየ ፡ በመሰንቆ ፡ ቅዱሰ ፡ እስራኤል ።

25 ይትፌሥሓኒ ፡ ከናፍርየ ፡ ሶበ ፡ እዜምር ፡ ለከ ፤ ወለነፍስየኒ ፡ አንተ ፡ አድኀንካ ።

26 ወዓዲ ፡ ልሳንየ ፡ ያነብብ ፡ ጽድቀከ ፡ ኵሎ ፡ አሚረ ፤ ሶበ ፡ ተኀፍሩ ፡ ወኀስሩ ፡ እለ ፡ የኀሡ ፡ ሊተ ፡ እኩየ ።

71 በአንተ ፡ ሰሎሞን ።

1 እግዚኦ ፡ ኵነኔከ ፡ ሀቦ ፡ ለንጉሥ ፤ ወጽድቅከኒ ፡ ለወልደ ፡ ንጉሥ ።

2 ከመ ፡ ይኰንኖሙ ፡ ለሕዝብከ ፡ በጽድቅ ፤ ወለነዳያኒከ ፡ በፍትሕ ።

3 ይትወከፉ ፡ አድባር ፡ ወአውግር ፡ ሰላመ ፡ ሕዝብከ ።

4 ኰንን ፡ በጽድቅ ፡ ነዳያነ ፡ ሕዝብከ ፡ ወአድኅኖሙ ፡ ለደቂቀ ፡ ምስኪናኒከ ፤ ወአኅስሮ ፡ ለዕቡይ ።

5 ወይጽናሕ ፡ ምስለ ፡ ፀሐይ ፤ እምቅድመ ፡ ወርኅ ፡ ለትውልደ ፡ ትውልድ ።

6 ወይወርድ ፡ ከመ ፡ ጠል ፡ ውስተ ፡ ፀምር ፤ ወከመ ፡ ነጠብጣብ ፡ ዘያንጠበጥብ ፡ ዲበ ፡ ምድር ።

7 ወይሠርጽ ፡ ጽድቅ ፡ በመዋዕሊሁ ፤ ወብዙኅ ፡ ሰላመ ፡ እስከ ፡ ይኀልፍ ፡ ወርኅ ።

8 ወይኴንን ፡ እምባሕር ፡ እስከ ፡ ባሕር ፤ ወእምአፍላግ ፡ እስከ ፡ አጽናፈ ፡ ዓለም ።

9 ይገንዩ ፡ ቅድሜሁ ፡ ኢትዮጵያ ፤ ወጸላእቲሁ ፡ ሐመደ ፡ ይቀምሑ ።

10 ነገሥተ ፡ ተርሴስ ፡ ወደሰያት ፡ አምኃ ፡ ያበውኡ ፤ ነገሥተ ፡ ሳባ ፡ ወዐረብ ፡ ጋዳ ፡ ያመጽኡ ።

11 ወይሰግዱ ፡ ሎቱ ፡ ኵሎሙ ፡ ነገሥተ ፡ ምድር ፤ ወይትቀነዩ ፡ ሎቱ ፡ ኵሎሙ ፡ አሕዛብ ።

12 እስመ ፡ አድኀኖ ፡ ለነዳይ ፡ እምእደ ፡ ዘይትዔገሎ ፤ ለምስኪን ፡ ዘአልቦ ፡ ረዳኤ ።

13 ወይምሕክ ፡ ነዳየ ፡ ወምስኪነ ፤ ወያድኅን ፡ ነፍሰ ፡ ነዳያን ።

14 እምርዴ ፡ ወእምትዕግልት ፡ ያድኅና ፡ ለነፍሶሙ ፤ ወክቡር ፡ ስሙ ፡ በቅድሜሆሙ ።

15 ወየሐዩ ፡ ወይሁብዎ ፡ እምወርቀ ፡ ዐረብ ፤ ወዘልፈ ፡ ይጼልዩ ፡ በእንቲአሁ ፡ ወኵሎ ፡ አሚረ ፡ ይድሕርዎ ።

16 ወይከውን ፡ ምስማከ ፡ ለኵሉ ፡ ምድር ፡ ውስተ ፡ አርእስተ ፡ አድባር ፤ ወኡነውኅ ፡ እምአርህ ፡ ፍሬሁ ፡ ወይበቍል ፡ ውስተ ፡ ሀገር ፡ ከመ ፡ ሣዕረ ፡ ምድር ።

17 ወይከውን ፡ ቡሩከ ፡ ስሙ ፡ ለዓለም ፡ እምቅድመ ፡ ፀሐይ ፡ ሀሎ ፡ ስሙ ፤

18 ወይትባረኩ ፡ ቦቱ ፡ ኵሎሙ ፡ አሕዛበ ፡ ምድር ፡ ወያስተበፅእዎ ፡ ኵሎሙ ፡ ሕዝብ ።

19 ይትባረክ ፡ እግዚአብሔር ፡ አምላከ ፡ እስራኤል ፤ ዘገብረ ፡ መንክረ ፡ ባሕቲቱ ።

20 ወይትባረክ ፡ ስመ ፡ ስብሓቲሁ ፡ ልዓለም ፡ ወለዓለመ ፡ ዓለም ፤ ወይምላእ ፡ ስብሐቲሁ ፡ ኵሎ ፡ ምድር ፤ ለይኩን ፡ ለይኩን ። ኀልቀ ፡ መኅልይ ፡ ዘዳዊት ፡ ዘወልደ ፡ ኤሳይ ።

72 መዝሙር ፡ ዘአሳፍ ።

1 ጥቀ ፡ ኄር ፡ እግዚአብሔር ፡ ለእስራኤል ፡ ለርቱዓነ ፡ ልብ ።

2 ሊተሰ ፡ ሕቀ ፡ ክመ ፡ ዘእምተንተና ፡ እገርየ ፤ ወሕቀ ፡ ክመ ፡ ዘእምድኅፀ ፡ ሰኰናየ ።

3 እስመ ፡ ቀናእኩ ፡ ላዕለ ፡ ኃጥኣን ፤ ሰላሞሙ ፡ ርእይየ ፡ ለዐማፅያን ።

4 እስመ ፡ አልቦሙ ፡ ሣኅተ ፡ ለሞቶሙ ፤ ወኢኀይለ ፡ ለመቅሠፍቶሙ ።

5 ወበጻማሂ ፡ ኢኮኑ ፡ ከመ ፡ ሰብእ ፤ ወኢተቀሥፉ ፡ ምስለ ፡ ሰብእ ።

6 ወበእንተዝ ፡ አኀዞሙ ፡ ትዕቢት ፤ ወተዐጸፍዋ ፡ ለኀጢአቶሙ ፡ ወለዐመፃሆሙ ።

7 ወይወፅእ ፡ ከመ ፡ እምአንጕዕ ፡ ኀጢአቶሙ ፤ ወኀለፈ ፡ እምትዕቢተ ፡ ልቦሙ ።

8 ወሐለዩ ፡ ወነበቡ ፡ ከንቶ ፤ ወነበቡ ፡ ዐመፃ ፡ ውስተ ፡ አርያም ።

9 ወአንበሩ ፡ ውስተ ፡ ሰማይ ፡ አፉሆሙ ፤ ወአንሶሰው ፡ ውስተ ፡ ምድር ፡ ልሳኖሙ ።

10 ወበእንተዝ ፡ ይትመየጡ ፡ ሕዝብየ ፡ እምዝየ ፤ ወይትረከብ ፡ ፍጹም ፡ መዋዕል ፡ በላዕሌሆሙ ።

11 ወይብሉ ፡ እፎ ፡ ያአምር ፡ እግዚአብሔር ፤ ወቦኑ ፡ ዘያአምር ፡ በአርያም ።

12 ናሁ ፡ እሉ ፡ ኃጥኣን ፡ ይትፈግዑ ፡ ወለዓለም ፡ ያጸንዕዋ ፡ ለብዕሎሙ ።

13 ወእቤ ፡ ከንቶሁ ፡ እንጋ ፡ አጽደቅዋ ፡ ለልብየ ፤ ወኀፀብኩ ፡ በንጹሕ ፡ እደውየ ።

14 ወኮንኩ ፡ ቅሡፈ ፡ ኵሎ ፡ አሚረ ፤ ወዘለፋየኒ ፡ በጽባሕ ።

15 ሶበ ፡ እቤሁ ፡ ነበብኩ ፡ ከመዝ ፤ ናሁ ፡ ሠራዕኩ ፡ ለትውልደ ፡ ደቂቅከ ።

16 ወተወከፍኩ ፡ ከመ ፡ ኣእምር ፤ ወዝንቱሰ ፡ ጻማ ፡ ውእቱ ፡ በቅድሜየ ።

17 እስከ ፡ እበውእ ፡ ውስተ ፡ መቅደሱ ፡ ለእግዚአብሔር ፤ ከመ ፡ ኣእምር ፡ ደኃሪቶሙ ።

18 ወባሕቱ ፡ በእንተ ፡ ጽልሑቶሙ ፡ አጽናሕኮሙ ፤ ወነፃኅኮሙ ፡ በተንሥኦቶሙ ።

19 እፎ ፡ ኮኑ ፡ ለሙስና ፡ ግብተ ፡ ኀልቁ ፡ ወተሐጕሉ ፡ በእንተ ፡ ኀጢአቶሙ ።

20 ከመ ፡ ዘንቃህ ፡ እምንዋም ፡ እግዚኦ ፡ በሀገርከ ፡ አኅስር ፡ ራእዮሙ ።

21 እስመ ፡ ውዕየ ፡ ልብየ ፡ ወተመስወ ፡ ኵልያትየ ። ወአንሰ ፡ ምኑን ፡ ወኢያእምርኩ ፤

22 ወኮንኩ ፡ ከመ ፡ እንስሳ ፡ በኀቤከ ። ወአንሰ ፡ ዘልፈ ፡ ምስሌከ ፤

23 አኀዝከኒ ፡ እዴየ ፡ ዘየማን ። ወበምክረ ፡ ዚአከ ፡ መራሕከኒ ፤ ወምስለ ፡ ስብሐት ፡ ተወከፍከኒ ፤

24 ምንተ ፡ ብየ ፡ ተሀሉ ፡ ውስተ ፡ ሰማይ ፤ ወምንተ ፡ እፈቅድ ፡ ኀቤከ ፡ ውስተ ፡ ምድር ።

25 ኀልቀ ፡ ልብየ ፡ ወሥጋየ ፡ በአምላከ ፡ መድኀኒትየ ፡ እግዚአብሔር ፡ መክፈልትየ ፡ ለዓለም ።

26 እስመ ፡ ናሁ ፡ እለ ፡ ይርሕቁ ፡ እምኔከ ፡ ይትሐጐሉ ፤ ወሠረውኮሙ ፡ ለኵሎሙ ፡ እለ ፡ ይዜምዉ ፡ እምኔከ ።

27 ሊተሰ ፡ ተሊወ ፡ እግዚአብሔር ፡ ይኄይሰኒ ፤ ወትውክልትየኒ ፡ ላዕለ ፡ እግዚአብሔር ፤

28 ከመ ፡ እንግር ፡ ኵሎ ፡ ስብሐቲሁ ። በአናቅጺሃ ፡ ለወለተ ፡ ጽዮን ።

73 ዘበኣእምሮ ፡ ዘአሳፍ ።

1 ለምንት ፡ ገደፍከኒ ፡ እግዚኦ ፡ ለዝሉፉ ፤ ወተመዓዕከ ፡ መዐተከ ፡ ላዕለ ፡ አባግዐ ፡ መርዔትከ ።

2 ተዘከር ፡ ማኅበረከ ፡ ዘአቅደምከ ፡ ፈጢረ ፡

3 ወአድኀንከ ፡ በትረ ፡ ርስትከ ፤ ደብረ ፡ ጽዮን ፡ ዘኀደርከ ፡ ውስቴታ ።

4 አንሥእ ፡ እዴከ ፡ ዲበ ፡ ትዕቢቶሙ ፡ ለዝሉፉ ፤ መጠነከ ፡ አሕሠመ ፡ ፀራዊ ፡ ዲበ ፡ ቅዱሳኒከ ።

5 ወተዘሀሩ ፡ ጸላእትከ ፡ በማእከለ ፡ በዓልከ ፤

6 ወረሰዩ ፡ ትእምርቶሙ ፡ ትእምርተ ፡ ዘኢያአምሩ ። ከመ ፡ ዘውስተ ፡ ላዕላይ ፡ ፍኖት ፤

7 ወከመ ፡ ዕፀወ ፡ ገዳም ፡ በጕድብ ፡ ሰበሩ ፡ ኆኃቲሃ ። ከማሁ ፡ በማሕፄ ፡ ወበመፍጽሕ ፡ ሰበርዋ ።

8 ወአውዐዩ ፡ በእሳት ፡ መቅደሰከ ፤ ወአርኰሱ ፡ ማኅደረ ፡ ስምከ ፡ ውስተ ፡ ምድር ።

9 ወይቤሉ ፡ በልቦሙ ፡ ኀቢሮሙ ፡ በበሕዘቢሆሙ ፤ ንዑ ፡ ንስዐር ፡ ኵሎ ፡ በዓላቲሁ ፡ ለእግዚአብሔር ፡ እምድር ።

10 ወትእምርቶሂ ፡ ኢናአምር ፤ ወአልቦ ፡ እንከ ፡ ነቢየ ፤ ወንሕነሂ ፡ ኢናአምር ፡ እንከ ።

11 እስከ ፡ ማእዜኑ ፡ እንከ ፡ እግዚኦ ፡ ይጼእል ፡ ፀራዊ ፤ ወዘልፈ ፡ ያምዕዖ ፡ ለስምከ ፡ ጸላኢ ።

12 ለምንት ፡ እግዚኦ ፡ ትመይጥ ፡ እዴከ ፤ ወየማንከ ፡ ማእከለ ፡ ሕፅንከ ፡ ለግሙራ ።

13 ወእግዚአብሔር ፡ ንጉሥ ፡ ውእቱ ፡ እምቅድመ ፡ ዓለም ፤ ወገብረ ፡ መድኀኒተ ፡ በማእከለ ፡ ምድር ።

14 አንተ ፡ አጽናዕካ ፡ ለባሕር ፡ በኀይልከ ፤ አንተ ፡ ሰበርከ ፡ ርእሰ ፡ ከይሲ ፡ በውስተ ፡ ማይ ።

15 ወአንተ ፡ ቀጥቀጥከ ፡ አርእስቲሁ ፡ ለከይሲ ፤ ወወሀብኮሙ ፡ ሲሳዮሙ ፡ ለሕዝበ ፡ ኢትዮጵያ ።

16 አንተ ፡ ሰጠቀ ፡ አፍላገ ፡ ወአንቅዕት ፤ [አንተ ፡ ኢይበስኮሙ ፡ ለአፍላገ ፡ ኤታም ።]

17 ለከ ፡ ውእቱ ፡ መዐልት ፡ ወዚአከ ፡ ይእቲ ፡ ሌሊት ፤ አንተ ፡ ፈጠርከ ፡ ፀሐየ ፡ ወወርኀ ።

18 ወአንተ ፡ ገበርከ ፡ አድባረ ፡ ወምድረ ፡ ኵሎ ፤ ክረምተ ፡ ወሐጋየ ፡ አንተ ፡ ፈጠርከ ።

19 ወተዘከር ፡ ዘንተ ፡ ተግባረከ ፤ ፀራዊ ፡ ተዐየሮ ፡ ለእግዚአብሔር ፤ ወሕዝብ ፡ አብድ ፡ አምዕዖ ፡ ለስሙ ።

20 ኢትመጥዋ ፡ ለአራዊት ፡ ነፍሰ ፡ እንተ ፡ ትገኒ ፡ ለከ ፤ ወኢትርሳዕ ፡ ነፍሰ ፡ ነዳያኒከ ፡ ለዝሉፉ ።

21 ወነጽር ፡ ውስተ ፡ ሥርዐትከ ፤ እስመ ፡ በዝኁ ፡ ጽሉማነ ፡ ምድር ፡ አብያተ ፡ ኃጥኣን ።

22 ወኢይግባእ ፡ ነዳይ ፡ ተኀፊሮ ፤ ንዳይ ፡ ወምስኪን ፡ ይሴብሑ ፡ ለስምከ ።

23 ተንሥእ ፡ እግዚኦ ፡ ወተበቀል ፡ በቀልየ ፤ ወተዘከር ፡ ዘተዐየሩከ ፡ አብዳን ፡ ኵሎ ፡ አሚረ ።

24 ወኢትርሳዕ ፡ ቃለ ፡ አግብርቲከ ፤ ትዝህርቶሙ ፡ ለጸላእትከ ፡ ይዕረግ ፡ ኀቤከ ፡ በኵሉ ፡ ጊዜ ።

74 ፍጹሜ ፡ ኢታማስን ፡ መዝሙር ፡ ዘአሳፍ ፡ ማኅሌት ።

1 እገኒ ፡ ለከ ፡ እግዚኦ እገኒ ፡ ለከ ፡ ወእጼውዕ ፡ ስመከ ፤

2 ወእነግር ፡ ኵሎ ፡ ስብሐቲከ ። ሶበ ፡ ረከብኩ ፡ ጊዜሁ ፤ ወአንሰ ፡ ጽድቀ ፡ እኴንን ።

3 ተመስወት ፡ ምድር ፡ ወኵሎሙ ፡ እለ ፡ ይነብሩ ፡ ውስቴታ ፤ ወአነ ፡ አጽናዕኩ ፡ አዕማዲሃ ።

4 ወእቤሎሙ ፡ ላኃጥኣን ፡ ኢየአብሱ ፤ ወእለሂ ፡ ይኤብሱ ፡ ኢያንሥኡ ፡ ቀርኖሙ ።

5 ወኢያንሥኡ ፤ ቀርኖሙ ፡ ውስተ ፡ አርያም ፤ ወኢይንብቡ ፡ ዐመፃ ፡ ላዕለ ፡ እግዚአብሔር ።

6 እስመ ፡ ኢእምጽባሕ ፡ ወኢእምዐረብ ፡ ወኢእምአድባረ ፡ ገዳም ፡ እስመ ፡ እግዚአብሔር ፡ መኰንን ፡ ውእቱ ፤

7 ዘንተ ፡ ያኀስር ፡ ወዘንተ ፡ ያከብር ። እስመ ፡ ጽዋዕ ፡ ውስተ ፡ እደ ፡ እግዚአብሔር ፡ ወይን ፡ ዘኢኮነ ፡ ቱሱሐ ፡ ዘምሉእ ፡ ቅድሐቱ ፤

8 ወሶጦ ፡ እምዝንቱ ፡ ውስተ ፡ ዝንቱ ፤ ወባሕቱ ፡ ጣሕሉኒ ፡ ኢይትከዐው ፡ ወይሰትይዎ ፡ ኵሎሙ ፡ ኃጥኣነ ፡ ምድር ።

9 ወአንሰ ፡ እትፌሣሕ ፡ ለዓለም ፤ ወእዜምር ፡ ለአምላከ ፡ ያዕቆብ ።

10 ወእሰብር ፡ አቅርንተ ፡ ኃጥኣን ፤ ወይትሌዐል ፡ አቅርንተ ፡ ጻድቃን ።

75 ፍጻሜ ፡ ዘስብሐት ፡ መዝሙር ፡ ዘአሳፍ ፡ ማኅሌት ፡ ዘበእንተ ፡ አሶርዮን ።

1 ተዐውቀ ፡ እግዚአብሔር ፡ በይሁዳ ፤ ወዐቢይ ፡ ስሙ ፡ በእስራኤል ።

2 ወነበረ ፡ በሰላም ፡ ብሔሩ ፤ ወማኅደሩሂ ፡ ውስተ ፡ ጽዮን ።

3 ወበህየ ፡ ሰበረ ፡ ኀይለ ፡ ቀስት ፤ ወልታ ፡ ወኲናተ ፡ ወፀባኢተ ። [ወብህየ ፡ ሰበረ ፡ አቅርንተ ።]

4 አንተ ፡ ታበርህ ፡ ምንክረ ፤ እምአድባር ፡ ዘለዓለም ። ደንገፁ ፡ ኵሎሙ ፡ አብዳነ ፡ ልብ ፡

5 ሐለሙ ፡ ሕልመ ፡ ወአልቦ ፡ ዘረከቡ ፡ ኵሉ ፡ ሰብእ ፡ ለብዕለ ፡ እደዊሁ ።

6 እምተግሣጽከ ፡ አምላከ ፡ ያዕቆብ ፤ ደቀሱ ፡ ኵሎሙ ፡ እለ ፡ ይጼአኑ ፡ አፍራሰ ።

7 ወአንተሰ ፡ ግሩም ፡ አንተ ፤ ወመኑ ፡ ይትቃወሞ ፡ ለመዐትከ ።

8 እምሰማይ ፡ ታፀምእ ፡ ፍትሐ ፡ ምድርኒ ፡ ፈርሀት ፡ ወአርመመት ።

9 ሶበ ፡ ተንሥአ ፡ እግዚአብሔር ፡ ለኰንኖ ፤ ከመ ፡ ያድኅኖሙ ፡ ለኵሎሙ ፡ የዋሀነ ፡ ልብ ።

10 እስመ ፡ እምፈቃዱ ፡ የአምነከ ፡ ሰብእ ፤ ወእምተረፈ ፡ ሕሊናሁ ፡ ይገብር ፡ በዓለከ ።

11 ብፅኡ ፡ ወሀቡ ፡ ለእግዚአብሔር ፡ አምላክነ ፡ ወኵሎሙ ፡ እለ ፡ ፀውዱ ፡ ያበውኡ ፡ አምኃ ፡ ለግሩም ።

12 ዘያወፅእ ፡ ነፍሶሙ ፡ ለመላእክት ፤ ወይገርም ፡ እምነገሥተ ፡ ምድር ።

76 ፍጻሜ ፡ በእንተ ፡ ኢዶቱም ፡ መዝሙር ፡ ዘአሳፍ ።

1 ቃልየ ፡ ኀበ ፡ እግዚአብሔር ፡ ጸራኅኩ ፤ ቃልየ ፡ ኀበ ፡ እግዚአብሔር ፡ ወአፅምአኒ ።

2 በዕለተ ፡ ምንደቤየ ፡ ኀሠሥክዎ ፡ ለእግዚአብሔር ፤ እደውየ ፡ ሌሊተ ፡ ቅድሜሁ ፡ ወኢኬዱኒ ፤

3 ቀብጸት ፡ ነፍስየ ፡ ትፍሥሕተ ። ተዘከርክዎ ፡ ለእግዚአብሔር ፡ ወተፈሣሕኩ ፤ ተዛዋዕኩሂ ፡ ወዐንበዘት ፡ ነፍስየ ።

4 ተራከብክዎን ፡ ለሰዓታተ ፡ ኵሎሙ ፡ ጸላእትየ ፤ ደንገፅኩሂ ፡ ወኢነበብኩ ።

5 ወሐለይኩ ፡ መዋዕለ ፡ ትካት ፤ ወተዘከርኩ ፡ ዐመተ ፡ ዓለም ፡ ወአንበብኩ ።

6 ሌሊተ ፡ ተዛዋዕኩ ፡ ምስለ ፡ ልብየ ፡ ወአንቃክህዋ ፡ ለነፍስየ ።

7 ቦኑ ፡ ለዓለም ፡ ይገድፍ ፡ እግዚአብሔር ፤ ወኢይደግምኑ ፡ እንከ ፡ ተሣህሎ ።

8 ቦኑ ፡ ለግሙራ ፡ ይመትር ፡ ምሕረቶ ፡ ለትውልደ ፡ ትውልድ ።

9 ወይረስዕኑ ፡ እግዚአብሔር ፡ ተሣህሎ ፤ ወይደፍንኑ ፡ ምሕረቶ ፡ በመዐቱ ።

10 ወእቤ ፡ እምይእዜ ፡ ወጠንኩ ፤ ከመዝ ፡ ያስተባሪ ፡ የማኖ ፡ ልዑል ።

11 ወተዘከርኩ ፡ ግብሮ ፡ ለእግዚአብሔር ፤ እስመ ፡ እዜከር ፡ ዘትካት ፡ ምሕረትከ ።

12 ወኣነብብ ፡ በኵሉ ፡ ምግባሪከ ፤ ወእዛዋዕ ፡ በግብርከ ።

13 እግዚኦ ፡ ውስተ ፡ መቅደስ ፡ ፍኖትከ ፤ መኑ ፡ አምላክ ፡ ዐቢይ ፡ ከመ ፡ አምላክነ ። አንተ ፡ እግዚአብሔር ፡ ባሕቲትከ ፡ ዘትገብር ፡ መንክረ ፤

14 አርአይኮሙ ፡ ለሕዝብከ ፡ ኀያለከ ። ወአድኀንኮሙ ፡ ለሕዝብከ ፡ በመዝራዕትከ ፤ ለደቂቀ ፡ ያዕቆብ ፡ ወዮሴፍ ።

15 ርእዩከ ፡ ማያት ፡ እግዚኦ ፤ ርእዩከ ፡ ማያት ፡ ወፈርሁ ።

16 ደንገፁ ፡ ቀላያት ፡ ማያት ፡ ወደምፁ ፡ ማያቲሆሙ ። ቃለ ፡ ወሀቡ ፡ ደመናት ፡ ወአሕፃከ ፡ ያወፅኡ ።

17 ቃለ ፡ ነጐድጓድከ ፡ በሰረገላት ፤

18 አስተርአየ ፡ መባርቅቲሁ ፡ ለዓለም ፤ ርዕደት ፡ ወአድለቅለቀት ፡ ምድር ።

19 ውስተ ፡ ባሕር ፡ ፍኖትከ ፡ ወአሰርከኒ ፡ ውስተ ፡ ማይ ፡ ብዙኅ ፤ ወኢይትዐወቅ ፡ አሰርከ ።

20 ወመራሕኮሙ ፡ ከመ ፡ አባግዕ ፡ ለሕዝብከ ፤ በእደ ፡ ሙሴ ፡ ወአሮን ።

77 ዘበኣእምሮ ፡ ዘአሳፍ ።

1 አፅምኡ ፡ ሕዝብየ ፡ ሕግየ ፤ ወጽልዉ ፡ እዝነክሙ ፡ ኀበ ፡ ቃለ ፡ አፉየ ።

2 እከሥት ፡ በምሳሌ ፡ አፉየ ፤ ወእነግር ፡ አምሳለ ፡ ዘእምትካት ።

3 ኵሎ ፡ ዘሰማዕነ ፡ ወዘርኢነ ፤ ወዘነገሩነ ፡ አበዊነ ።

4 ወኢኀብኡ ፡ እምደቂቆሙ ፡ ለካልእ ፡ ትውልድ ፡

5 ወነገሩ ፡ ስብሐቲሁ ፡ ለእግዚአብሔር ፤ ኀይሎሂ ፡ ወመንክሮሂ ፡ ዘገብረ ።

6 ዘአቀመ ፡ ስምዐ ፡ ለያዕቆብ ፡ ወሠርዐ ፡ ሕገ ፡ ለእስራኤል ፤

7 ዘአዘዞሙ ፡ ለአበዊነ ፡ ከመ ፡ ይንግሩ ፡ ለደቂቆሙ ። ከመ ፡ ያእምር ፡ ካልእ ፡ ትውልድ ፤

8 ደቂቅ ፡ እለ ፡ ይትወለዱ ፡ ወይትነሥኡ ፡ ወይዜንዉ ፡ ለደቂቆሙ ።

9 ከመ ፡ ይረስዩ ፡ ትውክልቶሙ ፡ ላዕለ ፡ እግዚአብሔር ፤ ወከመ ፡ ኢይርስዑ ፡ ግብረ ፡ እግዚአብሔር ፡ ወይኅሥሡ ፡ ትእዛዞ ።

10 ከመ ፡ ኢይኩኑ ፡ ከመ ፡ አበዊሆሙ ፤ ትውልድ ፡ ዕሉት ፡ ወመራር ።

11 ትውልድ ፡ እንተ ፡ ኢያርትዐት ፡ ልባ ፤ ወኢተአምነት ፡ መንፈሳ ፡ በእግዚአብሔር ።

12 ደቂቀ ፡ ኤፍሬም ፡ ይወስቁ ፡ ወይነድፉ ፤ ወተገፍትኡ ፡ አመ ፡ ዕለተ ፡ ቀትል ።

13 እስመ ፡ ኢዐቀቡ ፡ ኪዳኖ ፡ ለእግዚአብሔር ፤ ወአበዩ ፡ ሐዊረ ፡ በሕጉ ።

14 ወረስዑ ፡ ረድኤቶ ። ወመንክሮሂ ፡ ዘአርአዮሙ ።

15 ዘገብረ ፡ መንክረ ፡ በቅድመ ፡ አባዊሆሙ ፤ በምድረ ፡ ግብጽ ፡ ወበሐቀለ ፡ ጣኔዎስ ።

16 ሰጠቀ ፡ ባሕረ ፡ ወአኅለፎሙ ፤ ወአቀመ ፡ ማየ ፡ ከመ ፡ ዝቅ ።

17 ወመርሖሙ ፡ መዐልተ ፡ በደመና ፤ ወኵሎ ፡ ሌሊተ ፡ በብርሃነ ፡ እሳት ።

18 ወአንቅዐ ፡ ኰኵሐ ፡ በበድው ፤ ወአስተዮሙ ፡ ከመ ፡ ዘእምቀላይ ፡ ብዙኅ ።

19 ወአውፅአ ፡ ማየ ፡ እምእብን ፤ ወአውሐዘ ፡ ማየ ፡ ከመ ፡ ዘአፍላግ ።

20 ወደገሙ ፡ ዓዲ ፡ ወአበሱ ፡ ሎቱ ፤ ወአምረርዎ ፡ ለልዑል ፡ በበድው ።

21 ወአመከርዎ ፡ ለእግዚአብሔር ፡ በልቦሙ ፤ ከመ ፡ ይስአሉ ፡ መብልዐ ፡ ለነፍሶሙ ።

22 ሐመይዎ ፡ ለእግዚአብሔር ፡ ወይቤሉ ፤ ይክልኑ ፡ እግዚአብሔር ፡ ሠሪዐ ፡ ማእድ ፡ በገዳም ።

23 ይዝብጥ ፡ ኰኵሐ ፡ ወያውሕዝ ፡ ማየ ፤

24 ወይክልኑ ፡ ውሂበ ፡ ኅብስት ፡ ወይሥራዕ ፡ ማዕደ ፡ ለሕዝቡ ።

25 ወሰምዐ ፡ ዘንተ ፡ እግዚአብሔር ፡ ወአናሕሰየ ፤ ወነደ ፡ እሳት ፡ ላዕለ ፡ ያዕቆብ ፡ ወመጽአ ፡ መቅሠፍት ፡ ላዕለ ፡ እስራኤል ።

26 እስመ ፡ ኢተአመንዎ ፡ ለእግዚአብሔር ፤ ወኢተወከሉ ፡ በአድኅኖቱ ።

27 ወአዘዘ ፡ ደመና ፡ በላዕሉ ፤ ወአርኀወ ፡ ኆኃተ ፡ ሰማይ ።

28 ወአዝነመ ፡ ሎሙ ፡ መና ፡ ይብልዑ ፤ ወወሀቦሙ ፡ ኅብስተ ፡ ሰማይ ።

29 ወኅብስተ ፡ መላእክቲሁ ፡ በልዑ ፡ እጓለ ፡ እመሕያው ፤ ወፈነወ ፡ ሎሙ ፡ ሥንቆሙ ፡ ዘየአክሎሙ ።

30 ወአንሥአ ፡ አዜበ ፡ እምሰማይ ፤ ወአምጽአ ፡ መስዐ ፡ በኀይሉ ።

31 ወአዝነመ ፡ ላዕሌሆሙ ፡ ሥጋ ፡ ከመ ፡ መሬት ፤ ወከመ ፡ ኆጻ ፡ ባሕር ፡ አዕዋፈ ፡ ዘይሠርር ።

32 ወወድቀ ፡ ማእከለ ፡ ተዓይኒሆሙ ፤ ወዐውደ ፡ ደባትሪሆሙ ።

33 በልዑ ፡ ወጸግቡ ፡ ጥቀ ፤ ወወሀቦሙ ፡ ለፍትወቶሙ ። ወኢያኅጥኦሙ ፡ እምዘ ፡ ፈቀዱ ።

34 ወእንዘ ፡ ዓዲ ፡ መብልዖሙ ፡ ውስተ ፡ አፉሆሙ ፤ ወመጽአ ፡ መቅሠፍተ ፡ እግዚአብሔር ፡ ላዕሌሆሙ ፡

35 ወቀተሎሙ ፡ መብዝኅቶሙ ፤ ወአዕቀጾሙ ፡ ለኅሩያነ ፡ እስራኤል ።

36 ወምስለ ፡ ዝኒ ፡ ዓዲ ፡ አበሱ ፡ ሎቱ ፤ ወኢተአመንዎ ፡ በተአምሪሁ ።

37 ወኀልቀ ፡ በከንቱ ፡ መዋዕሊሆሙ ፤ ወኀለፈ ፡ በጕጕኣ ፡ ዐመቲሆሙ ።

38 ወአመ ፡ ይቀትሎሙ ፡ ውእተ ፡ አሚረ ፡ ይኀሥዎ ፤ ወይትመየጡ ፡ ወይገይሱ ፡ ኀበ ፡ እግዚአብሔር ።

39 ወተዘከሩ ፡ ከመ ፡ እግዚአብሔር ፡ ውእቱ ፡ ረዳኢሆሙ ፤ ወእግዚአብሔር ፡ ልዑል ፡ መድኀኒሆሙ ።

40 ወአፍቀረዎ ፡ በአፉሆሙ ፤ ወሐሰውዎ ፡ በልሳኖሙ ።

41 ወኢኮነ ፡ ርቱዐ ፡ ልቦሙ ፡ በላዕሌሆሙ ፤ ወኢተአመንዎ ፡ በኪዳኑ ።

42 ወውእቱሰ ፡ መሓሪ ፡ ውእቱ ፡ ወይሰሪ ፡ ሎሙ ፡ ኵሎ ፡ ኃጢአቶሙ ፡ ወኢያጠፍኦሙ ።

43 ወያበዝኅ ፡ መዪጠ ፡ መዐቱ ፡ ወኢያነድድ ፡ በኵሉ ፡ መቅሠፍቱ ።

44 ወተዘከረ ፡ ከመ ፡ ሥጋ ፡ እሙንቱ ፤ መንፈስ ፡ እምከመ ፡ ወፅአ ፡ ኢይገብእ ።

45 ሚመጠነ ፡ አምዕዕዎ ፡ በገዳም ፡ ወወሐክዎ ፡ በበድው ።

46 ወተመይጡ ፡ ወአመከርዎ ፡ ለእግዚአብሔር ፤ ወወሐክዎ ፡ ለቅዱሰ ፡ እስራኤል ።

47 ወኢተዘከሩ ፡ እዴሁ ፤ ዘአድኀኖሙ ፡ እምእደ ፡ ፀሮሙ ።

48 ዘገብረ ፡ ተአምረ ፡ በግብጽ ፤ ወመንክረ ፡ በሐቅለ ፡ ጣኔዎስ ።

49 ወረሰየ ፡ ደመ ፡ ለአፍላጊሆሙ ፤ ወለአንቅዕቲሆሙኒ ፡ ከመ ፡ ኢይስተዩ ።

50 ፈነወ ፡ ላዕሌሆሙ ፡ አኮተ ፡ ወበልዖሙ ፤ ወቈርነነዓተ ፡ ወአርኰሶሙ ።

51 ወወሀበ ፡ ለአናኵዕ ፡ ፍሬሆሙ ፤ ወተግባሮሙኒ ፡ ለአንበጣ ።

52 ወቀተለ ፡ ወይኖሙ ፡ በበረድ ፤ ወበለሶሙኒ ፡ በአስሐትያ ።

53 ወወሀበ ፡ ለበረድ ፡ እንስሳሆሙ ፤ ወንዋዮሙኒ ፡ ለእሳት ።

54 ፈነወ ፡ ላዕሌሆሙ ፡ መቅሠፍተ ፡ መዐቱ ፤ መቅሠፍተ ፡ ወመንሱተ ፡ ወሕማመ ፤ ወፈነወ ፡ ምስለ ፡ መላእክት ፡ እኩያን ።

55 ወጼሐ ፡ ፍኖተ ፡ ለመዐቱ ፤ ወኢመሐካ ፡ እሞት ፡ ለነፍሶሙ ፤ ወዐጸወ ፡ ውስተ ፡ ሞት ፡ እንስሳሆሙ ።

56 ወቀተለ ፡ ኵሎ ፡ በኵሮሙ ፡ በምድረ ፡ ግብጽ ፤ ወቀዳሜ ፡ ኵሎ ፡ ጻማሆሙ ፡ በውስተ ፡ አብያቲሆሙ ።

57 ወአውፈሮሙ ፡ ከመ ፡ አባግዕ ፡ ለሕዝቡ ፤ ወአውፅኦሙ ፡ ገዳመ ፡ ከመ ፡ መርዔት ።

58 ወመርሖሙ ፡ በተስፋሁ ፡ ወኢፈርሁ ፤ ወደፈኖሙ ፡ ባሕር ፡ ለፀሮሙ ።

59 ወወሰዶሙ ፡ ደብረ ፡ መቅደሱ ፤ ደብረ ፡ ዘፈጠረት ፡ የማኑ ።

60 ወሰደደ ፡ አሕዛበ ፡ እምቅድመ ፡ ገጾሙ ፡ ወአውረሶሙ ፡ በሐብለ ፡ ርስቱ ፤

61 ወአንበረ ፡ ውስተ ፡ አብያቲሆሙ ፡ ሕዝበ ፡ እስራኤል ።

62 ወአመከርዎ ፡ ወአምዕዕዎ ፡ ለእግዚአብሔር ፡ ልዑል ፤ ወኢዐቀቡ ፡ ስምዖ ።

63 ወተመይጡ ፡ ወዐለዉ ፡ ከመ ፡ አበዊሆሙ ፤ ወኮኑ ፡ ከመ ፡ ቀስት ፡ ጠዋይ ።

64 ወአምዕዕዎ ፡ በአውገሪሆሙ ፤ ወኣቅንእዎ ፡ በግልፎሆሙ ።

65 ወሰምዐ ፡ እግዚአብሔር ፡ ወአናሕሰየ ፤ ወመነኖሙ ፡ ለእስራኤል ፡ ፈድፋደ ።

66 ወኀደጋ ፡ ለደብተራ ፡ ሴሎም ፤ ደብተራሁ ፡ እንተ ፡ ባቲ ፡ ኀደረ ፡ ምስለ ፡ ሰብእ ።

67 ወወሀበ ፡ ኀይሎሙ ፡ ለተፄውዎ ፤ ወሥኖሙኒ ፡ ውስተ ፡ እደ ፡ ፀሮሙ ።

68 ወዐጸዎሙ ፡ ውስተ ፡ ኲናት ፡ ለሕዝቡ ፤ ወተሀየዮሙ ፡ ለርስቱ ።

69 ወበልዐቶሙ ፡ እሳት ፡ ለወራዙቶሙ ፤ ወኢላሐዋ ፡ ደናግሊሆሙ ።

70 ወካህናቲሆሙኒ ፡ ወድቁ ፡ በኲናት ፤ ወኢበከያ ፡ አቤራቲሆሙ ።

71 ወተንሥአ ፡ እግዚአብሔር ፡ ከመ ፡ ዘንቃህ ፡ እምንዋም ፤ ወከመ ፡ ኀያል ፡ ወኅዳገ ፡ ወይን ።

72 ወቀተለ ፡ ፀሮሙ ፡ በዳኅሬሆሙ ፤ ወወሀቦሙ ፡ ኀሳረ ፡ ዘለዓለም ።

73 ወኀደጋ ፡ ለደብተራ ፡ ዮሴፍ ፤ ወኢኀረዮሙ ፡ ለሕዝበ ፡ ኤፍሬም ።

74 ወኀረየ ፡ ለሕዝበ ፡ ይሁዳ ፤ ደብረ ፡ ጽዮን ፡ ዘአፍቀረ ።

75 ሐነጸ ፡ መቅደሶ ፡ በአርያም ፤ ወሳረራ ፡ ውስተ ፡ ምድር ፡ ለዓለም ።

76 ወኀረዮ ፡ ለዳዊት ፡ ገብሩ ፤ ወነሥኦ ፡ እመርዔተ ፡ አባግዒሁ ። ወተመጠዎ ፡ እምድኅረ ፡ ሐራሣት ፤

77 ከመ ፡ ይርዐዮ ፡ ለያዕቆብ ፡ ገብሩ ፤ ወለእስራኤል ፡ ርስቱ ።

78 ወርዕዮሙ ፡ በየዋሃተ ፡ ልቡ ፤ ወመርሖሙ ፡ በጥበበ ፡ እደዊሁ ።

78 መዝሙር ፡ ዘአሳፍ ።

1 እግዚኦ ፡ ቦኡ ፡ አሕዛብ ፡ ውስተ ፡ ርስትከ ፡ ወአርኰሱ ፡ ጽርሐ ፡ መቅደስከ ፤ ወረሰይዋ ፡ ለኢየሩሳሌም ፡ ከመ ፡ ልገተ ፡ ዐቃቤ ፡ ቀምሕ ።

2 ወረሰዩ ፡ አብድንቲሆሙ ፡ ለአግብርቲከ ፡ መብልዖሙ ፡ ለአዕዋፈ ፡ ሰማይ ፤ ወሥጋሆሙኒ ፡ ለጻድቃኒከ ፡ ለአረዊተ ፡ ገዳም ።

3 ከዐዉ ፡ ደሞሙ ፡ ከመ ፡ ማይ ፡ ዐውዳ ፡ ለኢየሩሳሌም ፤ ወኀጥኡ ፡ ዘይቀብሮሙ ።

4 ወኮነ ፡ ጽእለተ ፡ ለጎርነ ፤ ሣሕቀ ፡ ወስላቀ ፡ ለአድያሚነ ።

5 እስከ ፡ ማእዜኑ ፡ እግዚኦ ፡ ትትመዓዕ ፡ ለዝሉፉ ፤ ወይነድድ ፡ ከመ ፡ እሳት ፡ ቅንአትከ ።

6 ከዐው ፡ መዐተከ ፡ ላዕለ ፡ አሕዛብ ፡ እለ ፡ ኢያአምሩከ ፤ ወላዕለ ፡ መንግሥት ፡ እንተ ፡ ኢጸውዐት ፡ ስመከ ።

7 እስመ ፡ በልዕዎ ፡ ለያዕቆብ ፤ ወአማሰኑ ፡ ብሔሮ ።

8 ኢትዝክር ፡ ለነ ፡ አበሳነ ፡ ዘትካት ፤ ፍጡነ ፡ ይርከበነ ፡ ሣህልከ ፡ እግዚኦ ፤ እስመ ፡ ተመንደብነ ፡ ፈድፋደ ።

9 ርድአነ ፡ አምላክነ ፡ ወመድኀኒነ ፡ በእንተ ፡ ስብሐተ ፡ ስምከ ፤ እግዚኦ ፡ ባልሐነ ፡ ወስረይ ፡ ኀጢአተነ ፡ በእንተ ፡ ስምከ ።

10 ከመ ፡ ኢይበሉነ ፡ አሕዛብ ፡ አይቴ ፡ ውእቱ ፡ አምላኮሙ ። ወይርአዩ ፡ አሕዛብ ፡ በቅድመ ፡ አዕይንቲነ ፡

11 በቀለ ፡ ደሞሙ ፡ ለአግብርቲከ ፡ ዘተክዕወ ። ይባእ ፡ ቅድሜከ ፡ ገዐሮሙ ፡ ለሙቁሓን ፤

12 ወበከመ ፡ ዕበየ ፡ መዝራዕትከ ፡ ተሣሀሎሙ ፡ ለደቂቀ ፡ ቅቱላን ።

13 ፍድዮሙ ፡ ለጎርነ ፡ ምስብዒተ ፡ ውስተ ፡ ሕፅኖሙ ፤ ትዕይርቶሙ ፡ ዘተዐየሩከ ፡ እግዚኦ ።

14 ወንሕነሰ ፡ ሕዝብከ ፡ ወአባግዐ ፡ መርዔትከ ፡ ንገኒ ፡ ለከ ፡ ለዓለም ።

15 ወንነግር ፡ ስብሐቲከ ፡ ለትውልደ ፡ ትውልድ ።

79 ፍጻሜ ፡ ዘበእንተ ፡ እለ ፡ ተበዐዱ ፤ ስምዕ ፡ ዘአሳፍ ፡ መዝሙር ፡ ዘበእንተ ፡ አሶርዮን ።

1 ኖላዊሆሙ ፡ ለእስራኤል ፡ አፅምእ ፤ ዘይርዕዮሙ ፡ ከመ ፡ አባግዕ ፡ ለዮሴፍ ።

2 ዘይነብር ፡ ላዕለ ፡ ኪሩቤል ፡ አስተርአየ ። በቅድመ ፡ ኤፍሬም ፡ ወብንያም ፡ ወምናሴ ፡

3 አንሥእ ፡ ኀይለከ ፤ ወነዐ ፡ አድኅነነ ።

4 አምላከ ፡ ኀያላን ፡ ሚጠነ ፤ አብርህ ፡ ገጸከ ፡ ላዕሌነ ፡ ወንድኀን ።

5 እግዚኦ ፡ አምላከ ፡ ኀያላን ፡ እስከ ፡ ማእዜኑ ፡ ትትመዓዕ ፡ ላዕለ ፡ ጸሎተ ፡ ገብርከ ።

6 ወትሴስየነ ፡ እክለ ፡ እንብዕነ ፤ ወታሰትየነ ፡ አንብዐነ ፡ በመስፈርት ።

7 ወረሰይከነ ፡ ነገሩ ፡ ለጎርነ ፤ ወተሳለቁ ፡ ላዕሌነ ፡ ጸላእትነ ።

8 እግዚኦ ፡ አምላከ ፡ ኀያላን ፡ ሚጠነ ፤ አብርህ ፡ ገጸከ ፡ ላዕሌነ ፡ ወንድኀን ።

9 ዐጸደ ፡ ወይን ፡ አፍለስከ ፡ እምግብጽ ፤ ሰደድከ ፡ አሕዛብ ፡ ወተከልከ ፡ ኪያሃ ።

10 ወጼሕከ ፡ ግኖተ ፡ ቅድሜሃ ፤ ወተከልከ፡ ሥረዊሃ ፡ ወመልአት ፡ ምድረ ።

11 ወከደነ ፡ አድባረ ፡ ጽላሎታ ፤ ወአዕጹቂሃኒ ፡ ከመ ፡ አርዘ ፡ እግዚአብሔር ።

12 ወሰፍሐ ፡ አዕጹቂሃ ፡ እስከ ፡ ባሕር ፤ ወእስከ ፡ አፍላግ ፡ ሠርፃ ።

13 ለምንት ፡ ትነሥት ፡ ፀቈና ፤ ወይበልዓ ፡ ኵሉ ፡ ኀላፌ ፡ ፍኖት ።

14 ወአርኰሳ ፡ ሐራውያ ፡ ሐቅል ፤ ወተርዕያ ፡ እንስሳ ፡ ገዳም ።

15 አምላከ ፡ ኀያላን ፡ ተመየጥሶ ፤ ሐውጽ ፡ እምሰማይ ፡ ወርኢ ፡ ወተሣሀላ ፡ ለዛ ፡ ዐጸደ ፡ ወይን ።

16 ወአስተናሥኣ ፡ ወአጽንዓ ፡ ዘተከለት ፡ የማንከ ፤ በወልደ ፡ እጓለ ፡ እመሕያው ፡ ዘአጽናዕከ ፡ ለከ ።

17 ለውዒት ፡ በእሳት ፡ ወምልኅት ፤ ወእምተግሣጸ ፡ ገጽከ ፡ ይትሐጐሉ ።

18 ለይኩን ፡ እዴከ ፡ ላዕለ ፡ ብእሴ ፡ የማንከ ፤ በወልደ ፡ እጓለ ፡ እመሕያው ፡ ዘአጽናዕከ ፡ ለከ ።

19 ወኢንርሐቅ ፡ እምኔከ ፤ ኣሕይወነ ፡ ወንጼውዕ ፡ ስመከ ።

20 እግዚኦ ፡ አምላከ ፡ ኀያላን ፡ ሚጠነ ፤ አብርህ ፡ ገጸከ ፡ ላዕሌነ ፡ ወንድኀን ።

80 ፍጻሜ ፡ ዘበእንተ ፡ ማኅበብት ፡ ዘአሳፍ ፡ መዝሙር ፡ ዘኃምስቱ ፡ ሰንበት ።

1 ተፈሥሑ ፡ ለእግዚአብሔር ፡ ዘረድአነ ፤ ወየብቡ ፡ ለአምላከ ፡ ያዕቆብ ።

2 ንሥኡ ፡ መዝሙር ፡ ወሀቡ ፡ ከበሮ ፤ መዝሙር፡ ሐዋዝ ፡ ምስለ ፡ መሰንቆ ።

3 ንፍኁ ፡ ቀርነ ፡ በዕለተ ፡ ሠርቅ ፤ በእምርት ፡ ዕለት ፡ በዓልነ ።

4 እስመ ፡ ሥርዐቱ ፡ ለእስራኤል ፡ ውእቱ ፤ ወፍትሑ ፡ ለአምላከ ፡ ያዕቆብ ።

5 ወአቀመ ፡ ስምዐ ፡ ለዮሴፍ ፡ አመ ፡ የሐውር ፡ ብሔረ ፡ ግብጽ ፤ ወሰምዐ ፡ ልሳነ ፡ ዘኢያአምር ።

6 ወሜጠ ፡ ዘባኖ ፡ እምሕራማቲሆሙ ፤ ወተቀንያ ፡ እደዊሁ ፡ ውስተ ፡ አክፋር ።

7 ወምንዳቤከ ፡ ጸዋዕከኒ ፡ ወአድኀንኩከ ፤ ወተሰጠውኩከ ፡ በዐውሎ ፡ ኅቡእ ፡ ወአመከርኩከ ፡ በኀበ ፡ ማየ ፡ ቅሥት ።

8 ስምዐኒ ፡ ሕዝብየ ፡ ወእንግርከ ፤ እስራኤል ፡ ወኣስምዕ ፡ ለከ ። እመሰ ፡ ሰማዕከኒ ፡ ኢይከውነከ ፡ አምላከ ፡ ግብት ፤ ወኢትስግድ ፡ ለአምላክ ፡ ነኪር ።

9 እስመ ፡ አነ ፡ ውእቱ ፡ እግዚአብሔር ፡ አምላክከ ፡ ዘአውፃእኩከ ፡ እምድረ ፡ ግብጽ ፤ አርሕብ ፡ አፉከ ፡ ወእነልኦ ፡ ለከ ።

10 ወኢሰምዑኒ ፡ ሕዝብየ ፡ ቃልየ ፤ ወእስራኤልኒ ፡ ኢያፅምኡኒ ።

11 ወፈነውኩ ፡ ሎሙ ፡ በከመ ፡ ምግባሮሙ ፤ ወሖሩ ፡ በሕሊና ፡ ልቦመ ።

12 ሶበሰ ፡ ሰምዑኒ ፡ ሕዝብየ ፡ ቃልየ ፤ ወእስራኤልኒ ፡ ሶበ ፡ ሖሩ ፡ በፍኖትየ ።

13 እምአኅሰርክዎሙ ፡ በኵሉ ፡ ለጸላእቶሙ ፤ ወእምወደይኩ ፡ እዴየ ፡ ዲበ ፡ እለ ፡ ይሣቅይዎሙ ።

14 ጸላእቱሰ ፡ ለእግዚአብሔር ፡ ሐሰውዎ ፤ ወይከውን ፡ ጊዜሆሙ ፡ እስከ ፡ ለዓለም ።

15 ወሴሰዮሙ ፡ ሥብሐ ፡ ስርናይ ፤ ወአጽገቦሙ ፡ መዓረ ፡ እምኰኵሕ ።

81 መዝሙር ፡ ዘአሳፍ ።

1 እግዚአብሔር ፡ ቆመ ፡ ውስተ ፡ ማኅበረ ፡ አማልክት ፤ ወይኴንን ፡ በማእከለ ፡ አማልክት ።

2 እስከ ፡ ማእዜኑ ፡ ትኴንኑ ፡ ዐመፃ ፤ ወታደልዉ ፡ ለገጸ ፡ ኃጥአን ።

3 ፍትሑ ፡ ለነዳይ ፡ ወለእጓለ ፡ ማውታ ፤ ወአጽድቁ ፡ ግፉዐ ፡ ወምስኪነ ።

4 ወአድኅኑ ፡ ባሕታዌ ፡ ወጽኑሰ ፤ ወአንግፍዎሙ ፡ እምእደ ፡ ኃጥአን ።

5 ኢያእመሩ ፡ ወኢለበዉ ፡ ውስተ ፡ ጽልመት ፡ የሐውሩ ፤ ወያድለቀልቁ ፡ ኵሉ ፡ መሰረታተ ፡ አድባር ።

6 አንሰ ፡ እቤ ፡ አማልክት ፡ አንትሙ ፤ ወደቂቀ ፡ ልዑል ፡ ኵልክሙ ፡

7 አንትሙሰ ፡ ከመ ፡ ሰብእ ፡ ትመውቱ ፤ ወከመ ፡ አሐዱ ፡ እመላእክት ፡ ትወድቁ ።

8 ተንሥእ ፡ እግዚኦ ፡ ወኰንና ፡ ለምድር ፤ እስመ ፡ እንተ ፡ ትወርስ ፡ በኵሉ ፡ አሕዛብ ።

82 ማኅሌት ፡ መዝሙር ፡ ዘአሳፍ ።

1 እግዚኦ ፡ መኑ ፡ ከማከ ፤ ኢታርምም ፡ ወኢትጸመም ፡ እግዚኦ ።

2 እስመ ፡ ናሁ ፡ ወውዑ ፡ ፀርከ ፤ ወአንሥኡ ፡ ርእሶሙ ፡ ጸላእትከ ።

3 ወተጓሕለውዎሙ ፡ ምክረ ፡ ለሕዝብከ ፤ ወተማከሩ ፡ ዲበ ፡ ቅዱሳኒከ ።

4 ወይቤሉ ፡ ንዑ ፡ ንሥርዎሙ ፡ እምአሕዛብ ፤ ወኢይዝክሩ ፡ እንከ ፡ ስመ ፡ እስራኤል ።

5 እስመ ፡ ተማከሩ ፡ ኅቡረ ፡ ወዐረዩ ፤ ላዕሌከ ፡ ተሰካተዩ ፡ ወተካየዱ ። ተዓይኒሆሙ ፡ ለኢዶምያስ ፡ ወለእስማኤላውያን ፤

6 ሞአብ ፡ ወአጋራውያን ። ጌባል ፡ ወአሞን ፡ ወአማሌቅ ፤ ወአሎፍሊ ፡ ምስለ ፡ ሰብአ ፡ ጢሮስ ።

7 ወአሶርሂ ፡ ኀበረ ፡ ምስሌሆሙ ፤ ወኮንዎሙ ፡ ረድኤተ ፡ ለደቂቀ ፡ ሎጥ ።

8 ረስዮሙ ፡ ከመ ፡ ምድያም ፡ ወሲሳራ ፤ ወከመ ፡ ኢያቤስ ፡ በፈለገ ፡ ቂሶን ።

9 ወይሠረዉ ፡ ከመ ፡ እለ ፡ እንዶር ፤ ወይኩኑ ፡ ከመ ፡ መሬተ ፡ ምድር ።

10 ረስዮሙ ፡ ለመላእክቲሆሙ ፡ ከመ ፡ ሆሬብ ፡ ወዜብ ፤

11 ወዜብሄል ፡ ወሰልማና ፡ ወኵሎሙ ፡ መላእክቲሆሙ ። እለ ፡ ይብሉ ፡ ንወርስ ፡ ምስዋዒሁ ፡ ለእግዚአብሔር ።

12 አምላኪየ ፡ ረስዮሙ ፡ ከመ ፡ መንኰራኵር ፤ ወከመ ፡ ሣዕር ፡ ዘቅድመ ፡ ገጸ ፡ እሳት ።

13 ወከመ ፡ እሳት ፡ ዘያውዒ ፡ ገዳመ ፤ ወከመ ፡ ነበልባል ፡ ዘያነድድ ፡ አድባረ ።

14 ከማሁ ፡ ስድዶሙ ፡ በዐውሎከ ፤ ወሁኮሙ ፡ በመቅሠፍትከ ።

15 ምላእ ፡ ውስተ ፡ ገጾሙ ፡ ኀሳረ ፤ ወያእምሩ ፡ ስመከ ፡ እግዚኦ ።

16 ይትኀፈሩ ፡ ወይትሀወኩ ፡ ለዓለመ ፡ ዓለም ፤ ወይኅሰሩ ፡ ወይትሐጐሉ ።

17 ወያእምሩ ፡ ስመከ ፡ እግዚኦ ፤ ከመ ፡ አንተ ፡ ባሕቲትከ ፡ ልዑል ፡ ዲበ ፡ ኵሉ ፡ ምድር ።

83 ፍጻሜ ፡ ዘበእንተ ፡ ማኅበብት ፤ ዘደቂቀ ፡ ቆሬ ፡ መዝሙር ።

1 ጥቅ ፡ ፍቁር ፡ አብያቲከ ፡ እግዚአ ፡ ኀያላን ። ተፈሥሐት ፡ ነፍስየ ፡ በአፍቅሮ ፡ አዕጻዲከ ፡ እግዚኦ ።

2 ልብየኒ ፡ ወሥጋየኒ ፡ ተፈሥሐ ፡ በእግዚአብሔር ፡ ሕያው ።

3 ዖፍኒ ፡ ረከበት ፡ ላቲ ፡ ቤተ ፡ ወማዕነቅኒ ፡ ኀበ ፡ ታነብር ፡ እጐሊሃ ፤

4 ምሥዋዒከ ፡ እግዚአ ፡ ኀያላን ፡ ንጉሥየኒ ፡ ወአምላኪየኒ ።

5 ብፁዓን ፡ ኵሎሙ ፡ እለ ፡ ይነብሩ ፡ ውስተ ፡ ቤትከ ፤ ወለዓለመ ፡ ዓለም ፡ ይሴብሑከ ።

6 ብፁዕ ፡ ብእሲ ፡ ዘእምኀቤከ ፡ ረድኤቱ ፡ እግዚኦ ፤ ወዘይሔሊ ፡ በልቡ ፡ ዘበላዕሉ ። ውስተ ፡ ቈላተ ፡ ብካይ ፡ ብሔር ፡ ኀበ ፡ ሠራዕኮሙ ፤

7 እስመ ፡ መምህረ ፡ ሕግ ፡ ይሁብ ፡ በረከተ ። ወይሐውር ፡ እምኀይል ፡ ውስተ ፡ ኀይል ፤ ወያስተርኢ ፡ አምላከ ፡ አማልክት ፡ በጽዮን ።

8 እግዚኦ ፡ አምላከ ፡ ኀያላን ፡ ስምዐኒ ፡ ጸሎትየ ፤ ወአፅምአኒ ፡ አምላኩ ፡ ለያዕቆብ ።

9 ወርእየኒ ፡ እግዚኦ ፡ ተአምኖትየ ፤ ወነጽር ፡ ኀበ ፡ ገጸ ፡ መሲሕከ ።

10 እስመ ፡ ትኄይስ ፡ አሐቲ ፡ ዕለት ፡ ውስተ ፡ አዕጻዲከ ፡ እምአእላፍ ፤

11 አብደርኩ ፡ እትገደፍ ፡ ውስተ ፡ በተ ፡ እግዚአብሔር ፡ እምእንበር ፡ ውስተ ፡ ቤተ ፡ ኃጥኣን ።

12 እስመ ፡ ጽድቀ ፡ ወምጽዋተ ፡ ያበድር ፡ እግዚአብሔር ፤ እግዚአብሔር ፡ ይሁብ ፡ ክብረ ፡ ወሞገሰ ፤

13 እግዚአብሔር ፡ ኢያስተጼንሶሙ ፡ እምበረከቱ ፡ ለእለ ፡ ይሐውሩ ፡ በየዋሃት ። እግዚኦ ፡ አምላከ ፡ ኀያለን ፤ ብፁዕ ፡ ብእሲ ፡ ዘተወከለ ፡ ኪያከ ።

84 ፍጻሜ ፡ ዘደቂቀ ፡ ቆሬ ፡ መዝሙር ፡ ጸሎት ፡ ዘዳዊት ።

1 ተሣሀልከ ፡ እግዚኦ ፡ ምድረከ ፤ ወሜጥከ ፡ ፄዋሁ ፡ ለያዕቆብ ።

2 ወኀደገ ፡ ኃጢአቶሙ ፡ ለሕዝብከ ፤ ወከደንከ ፡ ኵሎ ፡ አበሳሆሙ ።

3 ወኀደገ ፡ ኵሎ ፡ መዐትከ ። ወሜጥከ ፡ መቅሠፍተ ፡ መዐተከ ።

4 ሚጠነ ፡ አምላክነ ፡ ወመድኀኒነ ፤ ወሚጥ ፡ መዐተከ ፡ እምኔነ ።

5 ወለዓለምሰ ፡ ኢትትመዐዐነ ። ወኢታኑኅ ፡ መዐተከ ፡ ላዕለ ፡ ትውልደ ፡ ትውልድ ።

6 አንተ ፡ አምላክነ ፡ ተመየጠነ ፡ ወኣሕይወነ ፤ ወሕዝብከኒ ፡ ይትፌሥሑ ፡ ብከ ።

7 አርእየነ ፡ እግዚኦ ፡ ሣህለከ ፤ ወሀበነ ፡ አምላክነ ፡ አድኅኖተከ ።

8 ኣፀምእ ፡ ዘይነበኒ ፡ እግዚአብሔር ፡ አምላኪየ ፤ እስመ ፡ ይነብብ ፡ ሰላመ ፡ ላዕለ ፡ ሕዝቡ ፡

9 ላዕለ ፡ ጻድቃኑ ፡ ወላዕለ ፡ እለ ፡ ይመይጡ ፡ ልቦሙ ፡ ኀቤሁ ።

10 ወባሕቱ ፡ ቅሩብ ፡ አድኅኖቱ ፡ ለእለ ፡ ይፈርህዎ ፤ ከመ ፡ ይኅድር ፡ ስብሐቲሁ ፡ ውስተ ፡ ምድርነ ።

11 ሣህል ፡ ወርትዕ ፡ ተራከባ ፤ ጽድቅ ፡ ወሰላም ፡ ተሳዐማ ።

12 ርትዕሰ ፡ እምድር ፡ ሠረጸት ፤ ወጽድቅኒ ፡ እምሰማይ ፡ ሐወጸ ።

13 ወእግዚአብሔርኒ ፡ ይሁብ ፡ ምሕረቶ ፤ ወምድርኒ ፡ ትሁብ ፡ ፍሬሃ ።

14 ጽድቅ ፡ የሐውር ፡ ቅድሜሁ ፤ ወየኀድግ ፡ ውስተ ፡ ፍኖት ፡ አሰሮ ።

85 ጸሎት ፡ ዘዳዊት ።

1 አፅምእ ፡ እግዚኦ ፡ እዝነከ ፡ ኀቤየ ፡ ወስምዐኒ ፤ እስመ ፡ ነዳይ ፡ ወምስኪን ፡ አነ ።

2 ዕቀባ ፡ ለነፍስየ ፡ እስመ ፡ የዋህ ፡ አን ፤ አድኅኖ ፡ ለገብርከ ፡ አምላኪየ ፡ ዘተወከለ ፡ ኪያከ ።

3 ተሣሀለኒ ፡ እግዚኦ ፡ እስመ ፡ ኀቤከ ፡ እጸርኅ ፡ ኵሎ ፡ አሚረ ። ወአስተፈሥሓ ፡ ለነፍሰ ፡ ገብርከ ፤ እስመ ፡ ኀቤከ ፡ አንቃዕደውኩ ፡ ነፍስየ ።

4 እስመ ፡ መሓሪ ፡ አንተ ፡ እግዚኦ ፡ ወመስተሣህል ፤ ወብዙኅ ፡ ሣህልከ ፡ ለኵሎሙ ፡ እለ ፡ ይጼውዑከ ።

5 አፅምእ ፡ እግዚኦ ፡ ጸሎትየ ፤ ወነጽር ፡ ቃለ ፡ ስእለትየ ።

6 በዕለተ ፡ ምንዳቤየ ፡ ጸራኅኩ ፡ እስመ ፡ ሰማዕከኒ ።

7 አልቦ ፡ ዘይመስለከ ፡ እምነ ፡ አማልክት ፡ እግዚኦ ፤ ወአልቦ ፡ ዘከመ ፡ ምግባሪከ ።

8 ኵሎሙ ፡ አሕዛብ ፡ እለ ፡ ገበርከ ፡ ይምጽኡ ፡ ወይስግዱ ፡ ቅድሜከ ፡ እግዚኦ ፤ ወይሰብሑ ፡ ለስምከ ።

9 እስመ ፡ ዐቢይ ፡ አንተ ፡ እግዚኦ ፡ ወትገብር ፡ መንክረ ፤ አንተ ፡ እግዚአብሔር ፡ ባሕቲትከ ፡ ዐቢይ ።

10 ምርሐኒ ፡ እግዚኦ ፡ ፍኖተከ ፡ ወእሖር ፡ በጽድቅከ ፤ ይትፌሣሕኒ ፡ ልብየ ፡ ለፈሪሀ ፡ ስምከ ።

11 እገኒ ፡ ለከ ፡ እግዚኦ ፡ በኵሉ ፡ ልብየ ፡ አምላኪየ ፤ ወእሴብሕ ፡ ለስምከ ፡ ለዓለም ።

12 እስመ ፡ ዐብየት ፡ ምሕረትከ ፡ ላዕሌየ ፤ ወአድኀንካ ፡ ለነፍስየ ፡ እምሲኦል ፡ ታሕቲት ።

13 አምላኪየ ፡ ዐማፅያን ፡ ቆሙ ፡ ላዕሌየ ፡ ወማኅበረ ፡ እኩያን ፡ ኀሠሥዋ ፡ ለነፍስየ ፤ ወኢረሰዩከ ፡ ቅድሜሆሙ ።

14 ወአንተሰ ፡ እግዚኦ ፡ መሓሪ ፡ ወመስተሣህል ፤ ርሑቀ ፡ መዐት ፡ ወብዙኀ ፡ ምሕረት ፡ ወጻድቅ ።

15 ነጽር ፡ ላዕሌየ ፡ ወተሣሀለኒ ፤ ሀቦ ፡ ኀይለ ፡ ለገብርከ ፡ ወአድኅኖ ፡ ለወልደ ፡ አመትከ ።

16 ግበር ፡ ምስሌነ ፡ ትእምርተ ፡ ለሠናይ ፤ ወይርአዩ ፡ ጸላእትነ ፡ ወይትኀፈሩ ፡ ከመ ፡ አንተ ፡ እግዚኦ ፡ ረዳእከነ ፡ ወአስተፈሣሕከነ ።

86 ዘደቂቀ ፡ ቆሬ ፡ መዝሙር ፡ ማኅሌት ።

1 መሰረታቲሃ ፡ ውስተ ፡ አድባር ፡ ቅዱሳን ። ያበድሮን ፡ እግዚአብሔር ፡ ለአንቅጸ ፡ ጽዮን ፤ እምኵሉ ፡ ተዓይኒሁ ፡ ለያዕቆብ ።

2 ነኪር ፡ ነገሩ ፡ በእንቲአኪ ፡ ሀገረ ፡ እግዚአብሔር ።

3 እዜክሮን ፡ ለራአብ ፡ ወለባቢሎን ፡ እለ ፡ ያአምራኒ ፤

4 ወናሁ ፡ አሎፍሊ ፡ ወጢሮስ ፡ ወሕዝበ ፡ ኢትዮጵያ ፤ እለ ፡ ተወልዱ ፡ በህየ ።

5 እምነ ፡ ጽዮን ፡ ይብል ፡ ሰብእ ፡ ወብእሲ ፡ ተወልደ ፡ በውስቴታ ፤ ወወእቱ ፡ ልዑል ፡ ሳረራ ።

6 እግዚአብሔር ፡ ይነግሮሙ ፡ ለሕዝቡ ፡ በመጽሐፍ ፤ ወለመላእክቲሁኒ ፡ እለ ፡ ተወልዱ ፡ በውስቴታ ።

7 ከመ ፡ ፍሡሓን ፡ ኵሎሙ ፡ እለ ፡ ይነብሩ ፡ ውስቴትኪ ።

87 ምኅሌት ፡ መዝሙር ፡ ዘደቂቀ ፡ ቆሬ ፡ ፍጻሜ ፡ ዘአመ ፡ መጽአ ፡ ዘበኣእምሮ ፡ ኤማን ፡ እስራኤላዊ ።

1 እግዚአብሔር ፡ አምላከ ፡ መድኀኒትየ ፤ ዕለትየ ፡ ጸራኅኩ ፡ ኀቤከ ፡ ወሌሊትየኒ ፡ ቅድሜከ ።

2 ለትባእ ፡ ጸሎትየ ፡ ቅድሜከ ፤ አፅምእ ፡ እዝነከ ፡ ኀበ ፡ ስእለትየ ።

3 እስመ ፡ ጸግበት ፡ ነፍስየ ፡ ሕማመ ፤ ወአልጸቀት ፡ ለሞት ፡ ሕይወትየ ።

4 ወተኈለቁ ፡ ምስለ ፡ እለ ፡ ይወርዱ ፡ ውስተ ፡ ዐዘቅት ፤ ወኮንኩ ፡ ከመ ፡ ብእሲ ፡ ዘአልቦ ፡ ረዳኤ ። ግዑዘ ፡ ውስተ ፡ ምዉታን ፤

5 ከመ ፡ ቅቱላን ፡ ወግዱፋን ፡ እለ ፡ ይሰክቡ ፡ ውስተ ፡ መቃብር ፡ እለ ፡ ኢዘከርኮሙ ፡ ለግሙራ ፤ እስመ ፡ እሙንቱሂ ፡ ርሕቁ ፡ እምእዴከ ።

6 ወአንበሩኒ ፡ ውስተ ፡ ዐዘቅት ፡ ታሕተ ፤ ውስተ ፡ ጽልመት ፡ ወጽላሎተ ፡ ሞት ።

7 ላዕሌየ ፡ ጸንዐ ፡ መዐትከ ፤ ወኵሎ ፡ መቅሠፍተከ ፡ አምጻእከ ፡ ላዕሌየ ።

8 አርሐቀ ፡ እምኔየ ፡ እለ ፡ ያአምሩኒ ፤ ወረሰይከኒ ፡ ርኩሰ ፡ በኀቤሆሙ ፡

9 አኀዙኒ ፡ ወአልብየ ፡ ሙፃአ ። አዕይንትየኒ ፡ ደክማ ፡ በተጽናስ ፤

10 ወጸራኅኩ ፡ ኀቤከ ፡ እግዚኦ ፡ ኵሎ ፡ አሚረ ፤ ኣንሥእ ፡ እደውየ ፡ ኀቤከ ።

11 ቦኑ ፡ ለምዉታን ፡ ትገብር ፡ መንክረከ ፤ ወዐቀብተ ፡ ሥራይኑ ፡ ያነሥኡ ።

12 ወይነግሩኒ ፡ እለ ፡ ውስተ ፡ መቃብር ፡ ሣህለከ ፤ ወጽድቀከኒ ፡ ውስተ ፡ ሞትኑ ።

13 ወይትዐወቅኑ ፡ ውስተ ፡ ጽልመት ፡ መንክርከ ፤ ወርትዕከኒ ፡ በምድርኑ ፡ ተረስዐ ።

14 ወአነሂ ፡ እግዚኦ ፡ ኀቤከ ፡ ጸራኅኩ ፤ በጽባሕ ፡ ትብጻሕ ፡ ጸሎትየ ፡ ቅድሜከ ።

15 ለምንት ፡ እግዚኦ ፡ ትገድፍ ፡ ጸሎትየ ፤ ወትመይጥ ፡ ገጸከ ፡ እምኔየ ።

16 ነዳይ ፡ አነ ፡ ወሰራሕኩ ፡ እምንእስየ ፤ ተልዒልየ ፡ ተተሐትኩ ፡ ወተመነንኩ ።

17 ላዕሌየ ፡ ኀለፈ ፡ መቅሠፍትከ ፤ ወግርማከ ፡ አደንገፀኒ ።

18 ዐገቱኒ ፡ ኵሎ ፡ አሚረ ፡ ከመ ፡ ማይ ፤ ወአኀዙኒ ፡ ኅቡረ ።

19 አርሐቀ ፡ እምኔየ ፡ አዕርክትየ ፡ ወቢጽየ ፤ ወአዝማድየ ፡ እምተጽናስየ ።

88 ዘበኣእምሮ ፡ ኤታን ፡ እስራኤላዊ ።

1 ምሕረተከ ፡ እሴብሕ ፡ እግዚኦ ፡ ለዓለም ፤

2 ወእዜኑ ፡ ጽድቀከ ፡ በአፉየ ፡ ለትውልደ ፡ ትውልድ ።

3 እስመ ፡ ትቤ ፡ ለዓለም ፡ አሐንጽ ፡ ምሕረተ ፤ በሰማይ ፡ ጸንዐ ፡ ጽድቅከ ።

4 ኪዳነ ፡ ተካየድኩ ፡ ምስለ ፡ ኅሩያንየ ፤ ወመሐልኩ ፡ ለዳዊት ፡ ገብርየ ። ለዓለም ፡ አስተዴሉ ፡ ዘርዐከ ፤

5 ወአሐንጽ ፡ ለትውልደ ፡ ትውልድ ፡ መንበረከ ።

6 ይገንያ ፡ ሰማያት ፡ ለስብሐቲከ ፡ እግዚኦ ፤ ወጽድቅከኒ ፡ በማኅበረ ፡ ቅዱሳን ።

7 መኑ ፡ ይትዔረዮ ፡ ለእግዚአብሔር ፡ በደመናት ፤ ወመኑ ፡ ይመስሎ ፡ ለእግዚአብሔር ፡ እምደቂቀ ፡ አማልክት ።

8 እግዚአብሔር ፡ ስቡሕ ፡ በምክረ ፡ ቅዱሳን ፤ ዐቢይ ፡ ወግሩም ፡ ዲበ ፡ ኵሎሙ ፡ እለ ፡ ዐውዱ ።

9 እግዚኦ ፡ አምላከ ፡ ኀያለን ፡ መኑ ፡ ከማከ ፤ ኀያል ፡ እንተ ፡ እግዚኦ ፡ ወጽድቅ ፡ የዐውደከ ።

10 አንተ ፡ ትኴንን ፡ ኀይለ ፡ ባሕር ፤ ወአንተ ፡ ታረሞ ፡ ለድምፀ ፡ ማዕበላ ።

11 አንተ ፡ አኅሰርኮ ፡ ለዕቡይ ፡ ከመ ፡ ቅቱል ፤ ወበመዝራዕተ ፡ ኀይልከ ፡ ዘረውኮሙ ፡ ለፀርከ ።

12 ዚአከ ፡ ውእቱ ፡ ሰማያት ፡ ወእንቲአከ ፡ ይእቲ ፡ ምድር ፤ ወዓለመኒ ፡ በምልኡ ፡ አንተ ፡ ሳረርከ ። ባሕረ ፡ ወመስዐ ፡ አንተ ፡ ፈጠርከ ።

13 ታቦር ፡ ወአርሞንኤም ፡ በስመ ፡ ዚአከ ፡ ይትፌሥሑ ፡ ወይሴብሑ ፡ ለስምከ ። መዝራዕትከ ፡ ምስለ ፡ ኀይል ፤

14 ጸንዐት ፡ እዴከ ፡ ወተለዐለት ፡ የማንከ ። ፍትሕ ፡ ወርትዕ ፡ ተድላ ፡ መንበርከ ፤

15 ሣህል ፡ ወጽድቅ ፡ የሐውር ፡ ቅድመ ፡ ገጽከ ። ብፁዕ ፡ ሕዝብ ፡ ዘያአምር ፡ የብቦ ።

16 እግዚኦ ፡ በብርሃበ ፡ ገጽከ ፡ የሐውሩ ፤ ወበስምከ ፡ ይትፌሥሑ ፡ ኵሎ ፡ አሚረ ፤ ወበጽድቅከ ፡ ይትሌዐሉ ።

17 እስመ ፡ ምክሐ ፡ ኀይሎሙ ፡ እንተ ፤ ወበሣህልከ ፡ ይትሌዐል ፡ ቀርንነ ።

18 እስመ ፡ ዘእግዚአብሔር ፡ ረድኤትነ ፤ ወቅዱሰ ፡ እስራኤል ፡ ንጉሥነ ።

19 ውእቱ ፡ አሚረ ፡ ተናገርኮሙ ፡ በራእይ ፡ ለደቂቅከ ፤ ወትቤ ፡ እሬሲ ፡ ረድኤተ ፡ በላዕለ ፡ ኀይል ፡ ወአልዐልኩ ፡ ኅሩየ ፡ እምሕዝብየ ።

20 ወረከብክዎ ፡ ለዳዊት ፡ ገብርየ ፤ ወቀባእክዎ ፡ ቅብአ ፡ ቅዱሰ ።

21 እስመ ፡ እዴየ ፡ ትረድኦ ፤ ወመዝራዕትየ ፡ ታጸንዖ ።

22 ኢይብቍዕ ፡ ጸላኢ ፡ በላዕሌሁ ፤ ወውሉድ ፡ ዐመፃ ፡ ኢይደግም ፡ አሕምሞቶ ።

23 ወእምትሮሙ ፡ ለፀሩ ፡ እምቅድመ ፡ ገጹ ፤ ወኣኅስሮሙ ፡ ለጸላእቱ ።

24 ወሣህልየሰ ፡ ወጽድቅየ ፡ ምስሌሁ ፤ ወበስምየ ፡ ይትሌዐል ፡ ቀርኑ ።

25 ወእሠይም ፡ ውስተ ፡ ባሕር ፡ እዴሁ ፤ ወውስተ ፡ አፍላግ ፡ የማኖ ።

26 ውእቱ ፡ ይብለኒ ፡ አቡየ ፡ አንተ ፤ አምላኪየ ፡ ወረዳእየ ፡ ወመድኀንየ ።

27 ወአነሂ ፡ በኵርየ ፡ እሬስዮ ፤ ወልዑል ፡ እምነገሥተ ፡ ምድር ።

28 ወለዓለም ፡ አዐቅብ ፡ ሎቱ ፡ ሣህልየ ፤ ወምእመን ፡ ውእቱ ፡ ለኪዳንየ ።

29 ወእሬሲ ፡ ዘርዖ ፡ ለዓለመ ፡ ዓለም ፤ ወመንበሮሂ ፡ ከመ ፡ መዋዕለ ፡ ሰማይ ።

30 ወእመሰ ፡ ኀደጉ ፡ ደቂቁ ፡ ሕግየ ፤ ወኢሖሩ ፡ በኵነኔየ ።

31 ወእመሂ ፡ አርኰሱ ፡ ሥርዐትየ ፤ ወኢዐቀቡ ፡ ትእዛዝየ ።

32 እዋሕያ ፡ በበትር ፡ ለኀጢአቶሙ ፤ ወበመቅሠፍት ፡ ለአበሳሆሙ ።

33 ወሣህልየሰ ፡ ኢይበልእ ፡ እምኔሆሙ ፤ ወኢይዔምፅ ፡ በጸድቅየ ።

34 ወኢያረኵስ ፡ ኪዳንየ ፤ ወኢይሔሱ ፡ ዘወፅአ ፡ እምአፉየ ።

35 ምዕረ ፡ መሐልኩ ፡ በቅዱስየ ፤ ከመ ፡ ለዳዊት ፡ ኢይሔስዎ ። ወዘርዑሂ ፡ ለዓለም ፡ ይሄሉ ፤

36 ወመንበሩሂ ፡ ከመ ፡ ፀሐይ ፡ በቅድሜየ ። ወሥሩዕ ፡ ከመ ፡ ወርኅ ፡ ለዓለም ፤ ወስምዑሂ ፡ ምእመን ፡ በሰማይ ።

37 ወአንተሰ ፡ መነንኮ ፡ ወገደፍኮ ፤ ወአናሕሰይኮ ፡ ለመሲሕከ ።

38 ወሜጥከ ፡ ሥርዐቶ ፡ ለገብርከ ፤ ወአርኰስከ ፡ ውስተ ፡ ምድር ፡ መቅደሶ ።

39 ወነሠትከ ፡ ኵሎ ፡ ጥቅሞ ፤ ወረሰይከ ፡ አጽዋኒሁ ፡ መፍርሀ ።

40 ወተማሰጦ ፡ ኵሉ ፡ ኀላፌ ፡ ፍኖት ፤ ወኮነ ፡ ጽእለተ ፡ ለጎሩ ።

41 ወአልዐልከ ፡ የማነ ፡ ፀሩ ፤ ወአስተፈሣሕከ ፡ ኵሎ ፡ ጸላእቱ ።

42 ወሜጥከ ፡ ረድኤተ ፡ ኲናቱ ፤ ወኢተወከፍኮ ፡ በውስተ ፡ ፀብእ ።

43 ወሰዐርኮ ፡ እምንጽሑ ፤ ወነፃሕከ ፡ ውስተ ፡ ምድር ፡ መንበሮ ።

44 ወአውኀድከ ፡ መዋዕለ ፡ መንበሩ ፤ ወሶጥከ ፡ ላዕሌሁ ፡ ኀፍረተ ።

45 እስከ ፡ ማእዜኑ ፡ እግዚኦ ፡ ትትመየጥ ፡ ለግሙራ ፤ ወይነድድ ፡ ከመ ፡ እሳት ፡ መዐትከ ።

46 ተዘከር ፡ ምንት ፡ ውእቱ ፡ ኀይልየ ፤ ቦኑ ፡ ለከንቱ ፡ ፈጠርኮ ፡ ለኵሉ ፡ እጓለ ፡ እመሕያው ።

47 መኑ ፡ ሰብእ ፡ ዘየሐዩ ፡ ወኢይሬእዮ ፡ ለሞት ፤ ወመኑ ፡ ዘያድኅና ፡ ለነፍሱ ፡ እምእደ ፡ ሲኦል ።

48 አይቴ ፡ ውእቱ ፡ ዘትካት ፡ ሣህልከ ፡ እግዚኦ ፤ ዘመሐልከ ፡ ለዳዊት ፡ ገብርከ ፡ በጽድቅ ።

49 ተዘከር ፡ እግዚኦ ፡ ዘጸአልዎሙ ፡ ለአግብርቲከ ፤ ዘተወከፍኩ ፡ በሕፅንየ ፡ ብዙኀ ፡ አሕዛብ ።

50 ዘጸአሉ ፡ ጸላእትከ ፡ እግዚኦ ፤ ወጸአሉ ፡ እብሬተ ፡ መሲሕከ ።

51 ይትባረክ ፡ እግዚአብሔር ፡ ለዓለም ፤ ለይኩን ፡ ለይኩን ።

89 ጸሎት ፡ ዘሙሴ ፡ ዘብእሴ ፡ እግዚአብሔር ።

1 እግዚኦ ፡ ጸወነ ፡ ኮንከነ ፡ ለትውልደ ፡ ትውልድ ።

2 ዘእንበለ ፡ ይቁም ፡ አድባር ፡ ወይትፈጠር ፡ ዓለም ፡ ወምድር ፤ እምቅድመ ፡ ዓለም ፡ ወእስከ ፡ ለዓለም ፡ አንተ ፡ ክመ ።

3 ኢትሚጦ ፡ ለሰብእ ፡ ለኀሳር ፤ ወትቤ ፡ ተመየጡ ፡ ደቂቀ ፡ እጓለ ፡ እመሕያው ።

4 እስመ ፡ ዐሠርቱ ፡ ምእት ፡ ዐመት ፡ በቅድሜከ ፡ ከመ ፡ ዕለት ፡ እንተ ፡ ትማልም ፡ ኀለፈት ፤

5 ወሰዓተ ፡ ሌሊት ። ምኑን ፡ ዐመታት ፡ በቅድሜሆሙ ፤

6 በጽባሕ ፡ ከመ ፡ ሣዕር ፡ የኀልፍ ። በጽባሕ ፡ ይሠርጽ ፡ ወየኀልፍ ፤ ወሰርከሰ ፡ ይወድቅ ፡ የቢሶ ፡ ወአንፂዎ ።

7 እስመ ፡ ኀለቅነ ፡ በመዐትከ ፤ ወደንገፅነ ፡ በመቅሠፍትከ ።

8 ወሤምከ ፡ ኀጢአተነ ፡ ቅድሜከ ፤ ወዓለምነሂ ፡ ውስተ ፡ ብርሃነ ፡ ገጽከ ።

9 እስመ ፡ ኀልቃ ፡ ኵሎን ፡ መዋዕሊነ ፡ ወኀለቅነ ፡ በመቅሠፍትከ ።

10 ወዐመቲነኒ ፡ ከመ ፡ ሳሬት ፡ ይከውና ። ወመዋዕለ ፡ ዐመቲነ ፡ ሰብዓ ፡ ክራማት ፡

11 ወእመሰ ፡ በዝኃ ፡ ሰማንያ ፡ ዓም ፤ ወፈድፋድንሰ ፡ እምእላ ፡ ጻማ ፡ ወሕማም ።

12 እስመ ፡ ኀለፈት ፡ የዋሃት ፡ እምኔነ ፡ ወተገሠጽነ ።

13 መኑ ፡ ያአምር ፡ ኀይለ ፡ መቅሠፍትከ ፤ ወእምግርማ ፡ መዐትከ ፡ ኀልቁ ።

14 ከመዝ ፡ አርኢ ፡ የማነከ ፤ ለምሁራን ፡ ልብ ፡ በጥበብ ።

15 ተመየጥ ፡ እግዚኦ ፡ እስከ ፡ ማእዜኑ ፤ ወተናበብ ፡ በእንተ ፡ አግብርቲከ ።

16 እስመ ፡ ጸገብነ ፡ በጽባሕ ፡ ምሕረተከ ፤ ወተፈሣሕነ ፡ ወተሐሠይነ ፡ በኵሉ ፡ መዋዕሊነ ፤

17 ወተፈሣሕነ ፡ ህየንተ ፡ መዋዕል ፡ ዘኣሕመምከነ ፤ ወህየንተ ፡ ዐመት ፡ እንተ ፡ ርኢናሃ ፡ ለእኪት ።

18 ርኢ ፡ ላዕለ ፡ አግብርቲከ ፡ ወላዕለ ፡ ተግባርከ ፡ እግዚኦ ፤ ወምርሖሙ ፡ ለደቂቆሙ ።

19 ለይኩን ፡ ብርሃኑ ፡ ለእግዚአብሔር ፡ አምላክነ ፡ ላዕሌነ ፤ [ወይሠርሕ ፡ ለነ ፡ ተግባረ ፡ እደዊነ ፡] ወይሠርሕ ፡ ተግባረ ፡ እደዊነ ።

90 ስብሐት ፡ ማኅሌት ፡ ዘዳዊት ።

1 ዘየኀድር ፡ በረድኤተ ፡ ልዑል ፤ ወይነብር ፡ ውስተ ፡ ጽላሎቱ ፡ ለአምላከ ፡ ሰማይ ።

2 ይብሎ ፡ ለእግዚአብሔር ፡ ምስካይየ ፡ ወጸወንየ ፡ አንተ ፤ አምላኪየ ፡ ወረዳእየ ፡ ወእትዌከል ፡ ቦቱ ።

3 እስመ ፡ ውእቱ ፡ ይባልሐኒ ፡ እመሥገርት ፡ ነዓዊት ፤ ወእምነገር ፡ መደንግፅ ።

4 ይጼልለከ ፡ በገበዋቲሁ ፡ ወትትዌከል ፡ በታሕተ ፡ ክነፊሁ ፤

5 ጽድቅ ፡ በወልታ ፡ የዐውደከ ። ወኢትፈርህ ፡ እምግርማ ፡ ሌሊት ፤

6 እምሐጽ ፡ ዘይሠርር ፡ በመዐልት ። እምግብር ፡ ዘየሐውር ፡ በጽልመት ፤ እምጽድቅ ፡ ወእምጋኔነ ፡ ቀትር ።

7 ይወድቁ ፡ በገቦከ ፡ ዐሠርቱ ፡ ምእት ፡ ወኣእላፍ ፡ በየማንከ ፤ ወኀቤከሰ ፡ ኢይቀርቡ ።

8 ወባሕቱ ፡ ትሬኢ ፡ በኣዕይንቲከ ፤ ወትሬኢ ፡ ፍዳሆሙ ፡ ለኃጥኣን ።

9 እስመ ፡ አንተ ፡ እግዚኦ ፡ ተስፋየ ፤ ልዑል ፡ ረሰይከ ፡ ጸወነከ ።

10 ኢይቀርብ ፡ እኩይ ፡ ኀቤከ ፤ ወኢይበውእ ፡ መቅሠፍት ፡ ቤተከ ።

11 እስመ ፡ ለመላእክቲሁ ፡ ይኤዝዞሙ ፡ በእንቲአከ ፤ ከመ ፡ ይዕቀቡከ ፡ በኵሉ ፡ ፍናዊከ ።

12 ወበእደው ፡ ያነሥኡከ ፤ ከመ ፡ ኢትትዐቀፍ ፡ በእብን ፡ እግረከ ።

13 ላዕለ ፡ ተኵላ ፡ ወከይሲ ፡ ትጼዐን ፤ ወትከይድ ፡ አንበሳ ፡ ወከይሴ ።

14 እስመ ፡ ብየ ፡ ተወከለ ፡ ወኣድኅኖ ፤ ወእከድኖ ፡ እስመ ፡ ኣእመረ ፡ ስምየ ።

15 ይጼውዐኒ ፡ ወእሰጠዎ ፡ ሀሎኩ ፡ ምስሌሁ ፡ አመ ፡ ምንዳቤሁ ፤ ኣድኅኖ ፡ ወእሰብሖ ።

16 ለነዋኅ ፡ መዋዕል ፡ ኣጸግቦ ፤ ወኣርእዮ ፡ አድኅኖትየ ።

91 መዝሙር ፡ ማኅሌት ፡ በዓለተ ፡ ሰንበት ።

1 ይኄይስ ፡ ተአምኖ ፡ በእግዚአብሔር ፤ ወዘምሮ ፡ ለስምከ ፡ ልዑል ።

2 ወነጊረ ፡ በጽባሕ ፡ ምሕረትከ ፤ ወጽድቅከኒ ፡ በሌሊት ።

3 በዘዐሠርቱ ፡ አውታሪሁ ፡ መዝሙረ ፡ ማኅሌት ፡ ወመሰንቆ ።

4 እስመ ፡ አስተፈሣሕከኒ ፡ እግዚኦ ፡ በምግባሪከ ፤ ወእትሐሠይ ፡ በግብረ ፡ እደዊከ ።

5 ጥቀ ፡ ዐቢይ ፡ ግብርከ ፡ እግዚኦ ፤ ወፈድፋደ ፡ ዕሙቅ ፡ ሕሊናከ ።

6 ብእሲ ፡ አብድ ፡ ኢያአምር ፤ ወዘአልቦ ፡ ልበ ፡ ኢይሌብዎ ፡ ለዝንቱ ፡፡

7 ሶበ ፡ ይበቍሉ ፡ ኃጥኣን ፡ ከመ ፡ ሣዕር ፡ ወይሠርጹ ፡ ኵሎሙ ፡ ገበርተ ፡ ዐመፃ ፤

8 ከመ ፡ ይሠረዉ ፡ ለዓለመ ፡ ዓለም ፤ ወአንተሰ ፡ ልዑል ፡ ለዓለም ፡ እግዚኦ ።

9 እስመ ፡ ናሁ ፡ ጸላእትከ ፡ ይትሐጐሉ ፤ ወይዘረዉ ፡ ኵሎሙ ፡ ገበርተ ፡ ዐመፃ ።

10 ወይትሌዐል ፡ ቀርንየ ፡ ከመ ፡ ዘአሐዱ ፡ ቀርኑ ፤ ወይጠልል ፡ በቅብእ ፡ ሲበትየ ።

11 ወርእየት ፡ ዐይንየ ፡ በጸላእትየ ፡ ወሰምዐት ፡ እዝንየ ፡ ዲቤሆሙ ፡ ለእኩያን ፡ እለ ፡ ቆሙ ፡ ላዕሌየ ።

12 ጻድቅከ ፡ ከመ ፡ በቀልት ፡ ይፈሪ ፤ ወይበዝኅ ፡ ከመ ፡ ዘግባ ፡ ዘሊባኖስ ።

13 ትኩላን ፡ እሙንቱ ፡ ውስተ ፡ ቤተ ፡ እግዚአብሔር ፤ ወይበቍሉ ፡ ውስተ ፡ ዐጸዱ ፡ ለአምላክነ ።

14 ውእቱ ፡ አሚረ ፡ ይበዝኁ ፡ በርሥኣን ፡ ጥሉል ፤ ወይከውኑ ፡ ዕሩፋነ ።

15 ወይነግሩ ፡ ከመ ፡ ጽድቅ ፡ እግዚአብሔር ፡ አምላክነ ፤ ወአልቦ ፡ ዐመፃ ፡ በኀቤሁ ።

92 በዕለተ ፡ ሰንበት ፡ አመ ፡ ኅድረተ ፡ ምድር ፤ ሰብሐተ ፡ ማኅሌት ፡ ዘዳዊት ።

1 እግዚአብሔር ፡ ነግሠ ፡ ስብሐቲሁ ፡ ለብሰ ፤ ለብሰ፡ እግዚአብሔር ፡ ኀይሎ ፡ ወቀነተ ፤

2 ወአጽንዓ ፡ ለዓለም ፡ ከመ ፡ ኢታንቀልቅል ።

3 ድልው ፡ መንበርከ ፡ እግዚኦ ፡ እምትካት ፤ ወእስከ ፡ ለዓለም ፡ አንተ ፡ ክመ ።

4 አልዐሉ ፡ አፍላግ ፡ እግዚኦ ፤ አልዐሉ ፡ አፍላግ ፡ ቃላቲሆሙ ።

5 ያሌዕሉ ፡ አፍላግ ፡ ድምፆሙ ።]

6 እምቃለ ፡ ማያት ፡ ብዙኅ ፡ መንክር ፡ ተላህያ ፡ ለባሕር ፤ መንክርሰ ፡ እግዚአብሔር ፡ በአርያሙ ።

7 ስምዐ ፡ ዚአከ ፡ እሙን ፡ ፈድፋደ ፤ ለቤትከ ፡ ይደሉ ፡ ስብሐት ፤ እግዚኦ ፡ ለነዋኅ ፡ መዋዕል ።

93 መዝሙር ፡ ዘዳዊት ፡ ዘበረቡዕ ሰንበት ።

1 እግዚአብሔር ፡ እግዚእ ፡ መስተበቅል ፤ እግዚአብሔር ፡ መስተበቅል ፡ ገሀደ ።

2 ተለዐለ ፡ ዘይኴንና ፡ ለምድር ፤ ፍድዮሙ ፡ ፍዳሆሙ ፡ ለዕቡያን ።

3 እስከ ፡ ማእዜኑ ፡ ኃጥኣን ፡ እግዚኦ ፤ እስከ ፡ ማእዜኑ ፡ ይዜሀሩ ፡ ኃጥኣን ።

4 ይትዋሥኡ ፡ ወይነቡ ፡ ዐመፃ ፤ ወይነቡ ፡ ኵሎሙ ፡ ገበርተ ፡ ዐመፃ ።

5 ወአኅሰሩ ፡ ሕዝበከ ፡ እግዚኦ ፤ ወሣቀዩ ፡ ርስተከ ።

6 ወቀተሉ ፡ እቤረ ፡ ወእጓለ ፡ ማውታ ፤ ወቀተሉ ፡ ፈላሴ ።

7 ወይቤሉ ፡ ኢይሬኢ ፡ እግዚአብሔር ፤ ወኢያአምር ፡ አምላከ ፡ ያዕቆብ ።

8 ለብዉ ፡ አብዳነ ፡ ሕዝብ ፤ አብዳንኬ ፡ ማእዜኑ ፡ ይጠቡ ።

9 ወተከላሁ ፡ ለእዝን ፡ ኢይሰምዕኑ ፤ ወዘፈጠራሁ ፡ ለዐይን ፡ ኢይሬኢኑ ።

10 ዘይጌሥጾሙ ፡ ለአሕዛብ ፡ ኢይዛለፍኑ ፤ ዘይሜህሮሙ ፡ ለሰብእ ፡ ጥበበ ።

11 እግዚአብሔር ፡ ያአምር ፡ ሕሊናሆሙ ፡ ለጠቢባን ፡ ከመ ፡ ከንቱ ፡ ውእቱ ።

12 ብፁዕ ፡ ብእሲ ፡ ዘአንተ ፡ ገሠጽኮ ፡ እግዚኦ ፤ ወዘመሀርኮ ፡ ሕገከ ።

13 ከመ ፡ ይትገሐስ ፡ እምዋዕል ፡ እኩያት ፤ እስከ ፡ ይትከረይ ፡ ግብ ፡ ለኃጥኣን ።

14 እስመ ፡ ኢይገድፎሙ ፡ እግዚአብሔር ፡ ለሕዝቡ ፤ ወኢየኀድጎሙ ፡ ለርስቱ ።

15 እስከ ፡ ይገብእ ፡ ፍትሕ ፡ ለዘ ፡ ይጸድቅ ፤ ወኵሎሙ ፡ ርቱዓነ ፡ ልብ ፡ እለ ፡ ኪያሃ ፡ ቦሙ ።

16 መኑ ፡ ይትናሥአኒ ፡ በእንተ ፡ እኩያን ፤ ወመኑ ፡ ይትቃወመኒ ፡ በእንተ ፡ ገበርተ ፡ ዐመፃ ።

17 ሶበ ፡ አኮ ፡ እግዚአብሔር ፡ ዘረድአኒ ፤ ሕቀ ፡ ከመ ፡ ዘእምኀደረት ፡ ነፍስየ ፡ ውስተ ፡ ሲኦል ።

18 ወሶበ ፡ እቤ ፡ ድኅፃ ፡ እገርየ ፤ ምሕረትከ ፡ እግዚኦ ፡ ረድአኒ ።

19 እግዚኦ ፡ በከመ ፡ ብዙኀ ፡ ሕማማ ፡ ለልብየ ፤ ናዝዞትከ ፡ አስተፈሥሓ ፡ ለነፍስየ ።

20 ወኢይትቃወመከ ፡ መንበረ ፡ ዐመፃ ፤ ዘይፈጥር ፡ ጻማ ፡ ዲበ ፡ ትእዛዝ ።

21 ወይንዕውዋ ፡ ለነፍሰ ፡ ጻድቅ ፤ ወይኴንኑ ፡ ደመ ፡ ንጹሕ ።

22 ወኮነኒ ፡ እግዚአብሔር ፡ ጸወንየ ፤ አምላኪየ ፡ ወረድኤተ ፡ ተስፋየ ።

23 ወይፈድዮሙ ፡ እግዚአብሔር ፡ በከመ ፡ እከዮሙ ፤ ወያጠፍኦሙ ፡ እግዚአብሔር ፡ አምላክነ ።

94 ስብሐተ ፡ ማኅሌት ፡ ዘዳዊት ።

1 ንዑ ፡ ንትፈሣሕ ፡ በእግዚአብሔር ፤ ወንየብብ ፡ ለአምላክነ ፡ ወመድኀኒነ ።

2 ወንብጻሕ ፡ ቅድመ ፡ ገጹ ፡ በአሚን ፤ ወበመዝሙር ፡ ንየብብ ፡ ሎቱ ።

3 እስመ ፡ ዐቢይ ፡ ውእቱ ፡ እግዚአብሔር ፡ አምላክነ ፤ ወንጉሥ ፡ ዐቢይ ፡ ውእቱ ፡ ላዕለ ፡ ኵሉ ፡ አማልክት ። እስመ ፡ ኢይገድፎሙ ፡ እግዚአብሔር ፡ ለሕዝቡ ።

4 እስመ ፡ ውስተ ፡ እዴሁ ፡ አጽናፈ ፡ ምድር ፤ ወአድባር ፡ ነዋኃት ፡ ዚአሁ ፡ ውእቱ ።

5 እስመ ፡ እንቲአሁ ፡ ይእቲ ፡ ባሕር ፡ ወውእቱ ፡ ፈጠራ ፤ ወለየብሰኒ ፡ እደዊሁ ፡ ገብራ ። ንዑ ፡ ንስግድ ፡ ወንግነይ ፡ ሎቱ ፤

6 ወንብኪ ፡ ቅድመ ፡ እግዚአብሔር ፡ ዘውእቱ ፡ ፈጠረነ ። እስመ ፡ ውእቱ ፡ አምላክነ ፤

7 ወንሕነሰ ፡ ሕዝቡ ፡ አባግዐ ፡ መርዔቱ ፤ ዮም ፡ ለእመ ፡ ሰማዕክሙ ፡ ቃሎ ። ኢታጽንዑ ፡ ልበክሙ ፡

8 ከመ ፡ አመ ፡ አምረርዎ ፡ በገዳም ፡ ወአመ ፡ አመከርዎ ።

9 ዘአመከሩኒ ፡ አበዊክሙ ፤ ፈተኑኒ ፡ ወርእዩ ፡ መግባርየ ።

10 ወአርብዓ ፡ ዓመተ ፡ ተቈጣዕክዋ ፡ ለይእቲ ፡ ትውልድ ፡ ወእቤ ፡ ዘልፈ ፡ ይስሕት ፡ ልቦሙ ፤

11 ወእሙንቱሰ ፡ ኢያእመሩ ፡ ፍናውየ ። በከመ ፡ መሐልኩ ፡ በመዐትየ ፤ ከመ ፡ ኢይበውኡ ፡ ውስተ ፡ ዕረፍትየ ።

95 ዘአመ ፡ ተሐንጸ ፡ ቤት ፡ ዘእምድኅረ ፡ ፂዋዌ ፤ ማኅሌት ፡ ዘዳዊት ።

1 ሰብሕዎ ፡ ለእግዚአብሔር ፡ ስብሐተ ፡ ሐዲሰ ፤ ሰብሕዎ ፡ ለእግዚአብሔር ፡ ኵላ ፡ ምድር ።

2 ሰብሕዎ ፡ ለእግዚአብሔር ፡ ወባርኩ ፡ ለስሙ ፤ ወተዘያነዉ ፡ እምዕለት ፡ ዕለተ ፡ አድኅኖቶ ።

3 ወንግርዎሙ ፡ ለአሕዛብ ፡ ስብሐቲሁ ፤ ወለኵሎሙ ፡ አሕዛብ ፡ ተኣምሪሁ ።

4 እስመ ፡ ዐቢይ ፡ እግዚአብሔር ፡ ወብዙኅ ፡ አኰቴቱ ፤ ወግሩም ፡ ውእቱ ፡ ላዕለ ፡ ኵሉ ፡ አማልክት ።

5 እስመ ፡ አማልክተ ፡ አሕዛብ ፡ አጋንንት ፤ ወእግዚአብሔርሰ ፡ ሰማያተ ፡ ገብረ ።

6 አሚን ፡ ወሠናይት ፡ ቅድሜሁ ፤ ቅድሳት ፡ ወዕበየ ፡ ስብሐት ፡ ውስተ ፡ መቅደሱ ።

7 አምጽኡ ፡ ለእግዚአብሔር ፡ በሓውርተ ፡ አሕዛብ ፤ አምጽኡ ፡ ለእግዚአብሔር ፡ ክብረ ፡ ወስብሓተ ። አምጽኡ ፡ ለእግዚአብሔር ፡ ስብሐተ ፡ ለስሙ ፤

8 ንሥኡ ፡ መሥዋዕተ ፡ ወባኡ ፡ ውስተ ፡ አዕጻዲሁ ። ስግዱ ፡ ለእግዚአብሔር ፡ በዐጸደ ፡ መቅደሱ ፤

9 ታድለቀልቅ ፡ እምቅድመ ፡ ገጹ ፡ ኵላ ፡ ምድር ። በልዎሙ ፡ ለኣሕዛብ ፡ ከመ ፡ እግዚአብሔር ፡ ነግሠ ፡

10 ወአጽንዓ ፡ ለዓለም ፡ ከመ ፡ ኢታንቀልቅል ፤ ወይኴንኖሙ ፡ ለአሕዛብ ፡ በርትዕ ።

11 ይትፌሥሓ ፡ ሰማያት ፡ ወትትሐሠይ ፡ ምድር ፤ ወትትከወስ ፡ ባሕር ፡ በምልኣ ። ትትሐሠይ ፡ ገዳም ፡ ወኵሉ ፡ ዘውስቴታ ፤

12 ውእቱ ፡ አሚረ ፡ ይትፌሥሑ ፡ ኵሉ ፡ ዕፀወ ፡ ገዳም ። እምቅድመ ፡ ገጹ ፡ ለእግዚአብሔር ፡ እስመ ፡ ይመጽእ ፡ ወይመጽእ ፡ ወይኴንና ፡ ለምድር ፤

13 ወይኴንና ፡ ለዓለም ፡ በጽድቅ ፡ ወለአሕዛብኒ ፡ በርትዕ ።

96 ዘዳዊት ፡ ዘአመ ፡ ገብአ ፡ ምድሩ ።

1 እግዚአብሔር ፡ ነግሠ ፡ ትትሐሠር ፡ ምድር ፤ ወይትሐሥያ ፡ ደሰያት ፡ ብዙኃት ።

2 ደመና ፡ ወቆባር ፡ ዐውዶ ፤ ፍትሕ ፡ ወርትዕ ፡ ተድላ ፡ መንበሩ ።

3 እሳት ፡ ይሐውር ፡ ቅድሜሁ ፤ ወነድ ፡ የዐግቶሙ ፡ ለጸላእቱ ።

4 አስተርአየ ፡ መባርቅቲሁ ፡ ለዓለም ፤ ርእየት ፡ ወአድለቅለቀት ፡ ምድር ።

5 ወአድባርኒ ፡ ተመሰዉ ፡ ከመ ፡ ስምዕ ፡ እምቅድመ ፡ ገጹ ፡ ለእግዚአብሔር ፤ እምቅድመ ፡ ገጹ ፡ ለእግዚአብሔር ፡ ኵላ ፡ ምድር ።

6 ይነግራ ፡ ሰማያት ፡ ጽድቀ ፡ ዚአሁ ፤ ወኵሎሙ ፡ አሕዛብ ፡ ርእዩ ፡ ስብሐቲሁ ።

7 ይትኀፈሩ ፡ ኵሎሙ ፡ እለ ፡ ይሰግዱ ፡ ለግልፎ ፤ እለ ፡ ይትሜክሑ ፡ በአማልክቲሆሙ ፤

8 ወይስግዱ ፡ ሎቱ ፡ ኵሎሙ ፡ መላእክቲሁ ። ሰምዐት ፡ ወተፈሥሐት ፡ ጽዮን ፡

9 ወተሐሥያ ፡ አዋልደ ፡ ይሁዳ ፤ በእንተ ፡ ፍትሕከ ፡ እግዚኦ ።

10 እስመ ፡ አንተ ፡ እግዚአብሔር ፡ ልዑል ፡ በኵሉ ፡ ምድር ፤ ፈድፋደ ፡ ተለዐልከ ፡ እምኵሉ ፡ አማልክት ።

11 እለ ፡ ታፈቅርዎ ፡ ለእግዚአብሔር ፡ ጽልእዋ ፡ ለእኪት ፤ የዐቅብ ፡ እግዚአብሔር ፡ ነፍሰ ፡ ጻድቃኑ ፡ ወያድኅኖሙ ፡ እምእደ ፡ ኃጥኣን ።

12 በርህ ፡ ሠረቀ ፡ ለጻድቃን ፤ ወለርቱዓነ ፡ ልብ ፡ ትፍሥሕት ።

13 ይትፌሥሑ ፡ ጻድቃን ፡ በእግዚአብሔር ፤ ወይገንዩ ፡ ለዝክረ ፡ ቅድሳቱ ።

97 መዝሙር ፡ ዘዳዊት ።

1 ሰብሕዎ ፡ ለእግዚአብሔር ፡ ስብሐተ ፡ ሐዲሰ ፤ እስመ ፡ መንክረ ፡ ገብረ ፡ እግዚአብሔር ፡

2 ወአድኅኖተ ፡ የማኑ ፡ ወመዝራዕቲሂ ፡ ቅዱስ ።

3 አርአየ ፡ እግዚአብሔር ፡ አድኅኖቶ ፤ ወበቅድመ ፡ አሕዛብ ፡ ከሠተ ፡ ኪዳኖ ።

4 ወተዘከረ ፡ ሣህሎ ፡ ለያዕቆብ ፡ ወጽድቀሂ ፡ ለቤተ ፡ እስራኤል ፤

5 ርእዩ ፡ ኵልክሙ ፡ አጽናፈ ፡ ምድር ፡ አድኅኖቶ ፡ ለአምላክነ ።

6 የብቡ ፡ ለእግዚአብሔር ፡ በኵሉ ፡ ምድር ፤ ሰብሑ ፡ ተፈሥሑ ፡ ወዘምሩ ።

7 ዘምሩ ፡ ለእግዚአብሔር ፡ በመሰንቆ ፤ በመሰንቆ፡ ወበቃለ ፡ መዝሙር ። በቀርነ ፡ ዝብጦ ፡ ወበቃለ ፡ ቀርን ፤

8 የብቡ ፡ በቅድመ ፡ እግዚአብሔር ፡ ንጉሥ ። ወትትከወስ ፡ ባሕር ፡ በምልኣ ፤ ዓለምኒ ፡ ወኵሎሙ ፡ እለ ፡ ይነብሩ ፡ ውስቴታ ።

9 ወአፍላግኒ ፡ ይጠፍሑ ፡ እደ ፡ ኅቡረ ፤ አድባርኒ ፡ ይትሐሠዩ ።

10 እስመ ፡ በህየ ፡ ይኴንና ፡ ለምድር ፤ ወይኴንና ፡ ለዓለም ፡ በጽድቅ ፡ ወለአሕዛብኒ ፡ በርትዕ ።

98 መዝሙር ፡ ዘዳዊት ።

1 እግዚአብሔር ፡ ነግሠ ፡ ደንገፁ ፡ አሕዛብ ፤ ዘይነብር ፡ ዲበ ፡ ኪሩቤል ፡ አድለቅለቃ ፡ ለምድር ።

2 እግዚአብሔር ፡ ዐቢይ ፡ በጽዮን ፤ ወልዑል ፡ ውእቱ ፡ ላዕለ ፡ ኵሉ ፡ አሕዛብ ።

3 ኵሉ ፡ ይገኒ ፡ ለስምከ ፡ ዐቢይ ፤ እስመ ፡ ግሩም ፡ ወቅዱስ ፡ ውእቱ ። ክቡር ፡ ንጉሥ ፡ ፍትሐ ፡ ያፈቅር ፤

4 አንተ ፡ አጽናዕካ ፡ ለጽድቅ ፡ ፍትሐ ፡ ወጽድቀ ፡ ለያዕቆብ ፡ አንተ ፡ ገበርከ ።

5 ተለዐለ ፡ እግዚአብሔር ፡ ፈጣሪነ ፡ ወይሰግዱ ፡ ሎቱ ፡ ታሕተ ፡ መከየደ ፡ እገሪሁ ፤

6 እስመ ፡ ቅዱሳን ፡ እሙንቱ ። ሙሴ ፡ ወአሮን ፡ በክህነቶሙ ፡ ወሳሙኤልኒ ፡ ምስለ ፡ እለ ፡ ይጼውዑ ፡ ስሞ ፤

7 ይጼውዕዎ ፡ ለእግዚአብሔር ፡ ወውእቱኒ ፡ ይሰጠዎሙ ። ወይትናገሮሙ ፡ በዐምደ ፡ ደመና ፤

8 ወየዐቅቡ ፡ ስምዖ ፡ ወትእዛዞሂ ፡ ዘወሀቦሙ ።

9 እግዚኦ ፡ አምላክነ ፡ አንተ ፡ ሰማዕኮሙ ፤ እግዚኦ ፡ አንተ ፡ ተሣህልኮሙ ፡ ወትትቤቀል ፡ በኵሉ ፡ ምግባሮሙ ።

10 ተለዐለ ፡ እግዚአብሔር ፡ አምላክነ ፡ ወይሰግዱ ፡ ሎቱ ፡ ውስተ ፡ ደብረ ፡ መቅደሱ ፤ እስመ ፡ ቅዱስ ፡ ውእቱ ፡ እግዚአብሔር ፡ አምላክነ ።

99 መዝሙር ፡ ዘተጋንዮ ።

1 የብቡ ፡ ለእግዚአብሔር ፡ በኵሉ ፡ ምድር ። ተቀንዩ ፡ ለእግዚአብሔር ፡ በትፍሥሕት ፤

2 ወባኡ ፡ ቅድሜሁ ፡ በሐሤት ።

3 ኣእምሩ ፡ ከመ ፡ እግዚአብሔር ፡ ውእቱ ፡ አምላክነ ፤ ወውእቱ ፡ ፈጠረነ ፡ ወአኮ ፡ ንሕነ ፡

4 ወንሕነሰ ፡ ሕዝቡ ፡ ወአባግዐ ፡ መርዔቱ ። ባኡ ፡ ውስተ ፡ አናቅጺሁ ፡ በተጋንዮ ፡ ወውስተ ፡ አዕጻዲሁ ፡ በስብሐት ፤

5 እመንዎ ፡ ወሰብሑ ፡ ለስሙ ። እስመ ፡ ኄር ፡ እግዚአብሔር ፡

6 እስመ ፡ ለዓለም ፡ ምሕረቱ ፤ ወለትውልደ ፡ ትውልድ ፡ ጽድቁ ።

100 መዝሙር ፡ ዘዳዊት ።

1 ምሕረተ ፡ ወፍትሕ ፡ አኀሊ ፡ ለከ ።

2 እዜምር ፡ ወእሌቡ ፡ ፍኖተ ፡ ንጹሕ ፤ ማእዜ ፡ ትመጽእ ፡ ኀቤየ ።

3 ወአሐውር ፡ በየዋሃተ ፡ ልብየ ፡ በማእከለ ፡ ቤትየ ።

4 ወኢረሰይኩ ፡ ቅድመ ፡ አዕይንትየ ፡ ግብረ ፡ እኩየ ፤ ጸላእኩ ፡ ገበርተ ፡ ዐመፃ ፡

5 ወኢተለወኒ ፡ ልብ ፡ ጠዋይ ። ሶበ ፡ ተግሕሠ ፡ እኩይ ፡ እምኔየ ፡ ኢያእመርኩ ።

6 ዘየሐሚ ፡ ቢጾ ፡ በጽሚት ፡ ኪያሁ ፡ ሰደድኩ ፤

7 ዕቡየ ፡ ዐይን ፡ ወሥሡዐ ፡ ልብ ፡ ኢይትሀወል ፡ ምስሌየ ።

8 አዕይንትየሰ ፡ ኀበ ፡ መሀይምናነ ፡ ምድር ፡ ከመ ፡ ኣንብሮሙ ፡ ምስሌየ ፤ ዘየሐውር ፡ በፍኖት ፡ ንጹሕ ፡ ውእቱ ፡ ይትለአከኒ ።

9 ወኢይነብር ፡ ማእከለ ፡ ቤትየ ፡ ዘይገብር ፡ ትዕቢተ ፤ ወኢያረትዕ ፡ ቅድሜየ ፡ ዘይነብብ ፡ ዐመፃ ።

10 በጽባሕ ፡ እቀትሎሙ ፡ ለኵሎሙ ፡ ኃጥኣነ ፡ ምድር ፤ ከመ ፡ እሠርዎሙ ፡ እምሀገረ ፡ እግዚአብሔር ፡ ለኵሎሙ ፡ ገበርተ ፡ ዐመፃ ።

101 ጸሎት ፡ ባሕታዊ ፡ ሶበ ፡ ይቴክዝ ፤ ወይክዑ ፡ ቅድመ ፡ እግዚአብሔር ፡ ኵሎ ፡ ስእለቶ ።

1 ስምዐኒ ፡ እግዚኦ ፡ ጸሎትየ ፤ ወይብጻሕ ፡ ቅድሜከ ፡ ገዐርየ ።

2 ወኢትሚጥ ፡ ገጸከ ፡ እምኔየ ፡ በዕለተ ፡ መንዳቤየ ፤

3 አፅምእ ፡ እዝነከ ፡ ኀቤየ ፡ አመ ፡ ዕለተ ፡ እጼውዐከ ፡ ፍጡነ ፡ ስምዐኒ ።

4 እስመ ፡ ኀልቀ ፡ ከመ ፡ ጢስ ፡ መዋዕልየ ፤ ወነቅጸ ፡ ከመ ፡ ሣዕር ፡ አዕጽምትየ ።

5 ተቀሠፍኩ ፡ ወየብሰ ፡ ከመ ፡ ሣዕር ፡ ልብየ ፤ እስመ ፡ ተረስዐኒ ፡ በሊዐ ፡ እክል ።

6 እምቃለ ፡ ገዐርየ ፡ ጠግዐ ፡ ሥጋየ ፡ ዲበ ፡ አዕጽምትየ ።

7 ወኮንኩ ፡ ከመ ፡ አዱገ ፡ መረብ ፡ ዘገዳም ፤ ወኮንኩ ፡ ከመ ፡ ጉጓ ፡ ውስተ ፡ ቤት ፡ ሌሊተ ።

8 ተጋህኩ ፡ ወኮንኩ ፡ ከመ ፡ ዖፍ ፡ ባሕታዊ ፡ ውስተ ፡ ናሕስ ።

9 ኵሎ ፡ አሚረ ፡ ይጼእሉኒ ፡ ጸላእትየ ፤ ወእለኒ ፡ ይሰዱኒ ፡ ይሰካትዩ ፡ ላዕሌየ ።

10 እስመ ፡ ሐመደ ፡ ከመ ፡ እክል ፡ ቀማሕኩ ፤ ወስቴየኒ ፡ ምስለ ፡ አንብዕየ ፡ ሰተይኩ ።

11 እምገጸ ፡ መቅሠፍተ ፡ መዐትከ ፤ እስመ ፡ አንሣእከኒ ፡ ወነፃኅከኒ ።

12 ወመዋዕልየኒ ፡ ከመ ፡ ጽላሎት ፡ ኀለፈ ፤ ወአነሂ ፡ ከመ ፡ ሣዕር ፡ የበስኩ ።

13 ወአንተሰ ፡ እግዚኦ ፡ ለዓለም ፡ ትነብር ፤ ወዝክርከኒ ፡ ለትውልደ ፡ ትውልድ ።

14 ተንሥእ ፡ እግዚኦ ፡ ወተሣሀለ ፡ ለጽዮን ፤ እስመ ፡ ጊዜሃ ፡ ውእቱ ፡ ከመ ፡ ተሣሀላ ፡ ወበጽሐ ፡ ዕድሜሃ ።

15 እስመ ፡ ሠምሩ ፡ አግብርቲከ ፡ እበኒሃ ፤ ወአክበርዎ ፡ ለመሬታ ።

16 ወይፍርሁ ፡ አሕዛብ ፡ ስመከ ፡ እግዚኦ ፤ ወኵሎሙ ፡ ነገሥት ፡ ለስብሐቲከ ።

17 እስመ ፡ የሐንጻ ፡ እግዚአብሔር ፡ ለጽዮን ፤ ወያስተርኢ ፡ በስብሐቲሁ ።

18 ወነጸረ ፡ ላዕለ ፡ ጸሎተ ፡ ነዳይ ፤ ወኢተቈጥዐ ፡ ስእለቶሙ ።

19 ወተጽሕፈት ፡ ዛቲ ፡ ለካልእ ፡ ትውልድ ፤ ወሕዝብ ፡ ዘይትፈጠር ፡ ይሴብሖ ፡ ለእግዚአብሔር ።

20 እስመ ፡ ሐወጸ ፡ እምሰማየ ፡ መቅደሱ ፤ እግዚአብሔር ፡ ሐወጸ ፡ እምሰማይ ፡ ዲበ ፡ ምድር ።

21 ከመ ፡ ይስማዕ ፡ ገዐሮሙ ፡ ለሙቁሓን ፤ ወከመ ፡ ያሕይዎሙ ፡ ለደቂቀ ፡ ቅቱላን ።

22 ከመ ፡ ይንግሩ ፡ በጽዮን ፡ ስመ ፡ እግዚአብሔር ፤ ወስብሐቲሁኒ ፡ በኢየሩሳሌም ።

23 ሶበ ፡ ተጋብኡ ፡ አሕዛብ ፡ ኅቡረ ፤ ወነገሥትኒ ፡ ከመ ፡ ይትቀነዩ ፡ ለእግዚአብሔር ።

24 ወተሠጥዎሙ ፡ በፍኖተ ፡ ኀይሉ ፤ ንግረኒ ፡ ውሕዶን ፡ ለመዋዕልየ ።

25 ወኢትሰደኒ ፡ በመንፈቀ ፡ ዐመትየ ። ለትውልደ ፡ ትውልድ ፡ ዐመቲከ ።

26 አንተ ፡ እግዚኦ ፡ አቅደምከ ፡ ሳርሮታ ፡ ለምድር ፤ ወግብረ ፡ እደዊከ ፡ እማንቱ ፡ ሰማያት ።

27 እማንቱሰ ፡ ይትሐጐላ ፡ ወአንተሰ ፡ ትሄሉ ፤ ወኵሉ ፡ ከመ ፡ ልብስ ፡ ይበሊ ፤

28 ወከመ ፡ ሞጣሕት ፡ ትዌልጦሙ ፡ ወይትዌለጡ ። ወአንተሰ ፡ አንተ ፡ ክመ ፤ ወዐመቲከኒ ፡ ዘኢየኀልቅ ።

29 ወደቂቀ ፡ አግብርቲከ ፡ ይነብርዋ ፤ ወዘርዖሙኒ ፡ ለዓለም ፡ ይጸንዕ ።

102 ዘዳዊት ።

1 ተባርኮ ፡ ነፍስየ ፡ ለእግዚአብሔር ፤ ወኵሉ ፡ አዕጽምትየ ፡ ለስሙ ፡ ቅዱስ ።

2 ተባርኮ ፡ ነፍስየ ፡ ለእግዚአብሔር ፤ ወኢትርሳዕ ፡ ኵሎ ፡ ሰብሐቲሁ ።

3 ዘይሰሪ ፡ ለከ ፡ ኵሎ ፡ ኃጢአትከ ፤ ዘይፌውሰከ ፡ እምኵሉ ፡ ደዌከ ።

4 ዘያድኅና ፡ እሙስና ፡ ለሕይወትከ ፤ ዘይኬልለከ ፡ በሣህሉ ፡ ወበምሕረቱ ።

5 ዘያጸግባ ፡ እምበረከቱ ፡ ለፍትወትከ ፤ ዘይሔድሳ ፡ ከመ ፡ ንስር ፡ ለውርዙትከ ።

6 ገባሬ ፡ ሣህል ፡ እግዚአብሔር ፤ ወይፈትሕ ፡ ለኵሉ ፡ ግፉዓን ።

7 አርአየ ፡ ፍናዊሁ ፡ ለሙሴ ፤ ወለደቂቀ ፡ እስራኤል ፡ ሥምረቶ ።

8 መሓሪ ፡ ወመስተሣህል ፡ እግዚአብሔር ፤ ርሑቀ ፡ መዐት ፡ ወብዙኀ ፡ ምሕረት ፡ ወጻድቅ ።

9 ኢይቀሥፍ ፡ ወትረ ፡ ወኢይትመዓዕ ፡ ዘልፈ ።

10 አኮ ፡ በከመ ፡ ኀጢአትነ ፡ ዘገብረ ፡ ለነ ፤ ወኢፈደየነ ፡ በከመ ፡ አበሳነ ።

11 ወበከመ ፡ ልዑል ፡ ሰማይ ፡ እምድር ፤ አጽንዐ ፡ ምሕረቶ ፡ እግዚአብሔር ፡ ላዕለ ፡ እለ ፡ ይፈርህዎ ።

12 ወበከመ ፡ ይርሕቅ ፡ ሠርቅ ፡ እምዐረብ ፤ አርሐቀ ፡ እምኔነ ፡ ኀጢአተነ ።

13 ወበከመ ፡ ይምሕር ፡ አብ ፡ ውሉደ ፤ ከማሁ ፡ ይምሕሮሙ ፡ እግዚአብሔር ፡ ለእለ ፡ ይፈርህዎ ። እስመ ፡ ውእቱ ፡ ያአመር ፡ ፍጥረተነ ፤

14 ተዘከር ፡ እግዚኦ ፡ ከመ ፡ መሬት ፡ ንሕነ ። ወሰብእሰ ፡ ከመ ፡ ሣዕር ፡ መዋዕሊሁ ፤ ወከመ ፡ ጽጌ ፡ ገዳም ፡ ከማሁ ፡ ይፈሪ ።

15 እስመ ፡ መንፈስ ፡ ይወፅእ ፡ እምኔሁ ፡ ወኢይሄሉ ፡ እንከ ፤ ወኢያአምር ፡ እንከ ፡ መካኖ ።

16 ወሣህሉሰ ፡ ለእግዚአብሔር ፡ እምዓለም ፡ ወእስከ ፡ ለዓለም ፡ ዲበ ፡ እለ ፡ ይፈርህዎ ፤

17 ወጽድቁኒ ፡ ዲበ ፡ ትውልደ ፡ ትውልድ ። ለእለ ፡ የዐቅቡ ፡ ሕጎ ፤

18 ወይዜከሩ ፡ ትእዛዞ ፡ ከመ ፡ ይግበሩ ።

19 እግዚአብሔር ፡ አስተዳለወ ፡ መንበሮ ፡ በሰማያት ፤ ወኵሎ ፡ ይኴንን ፡ በመንግሥቱ ።

20 ባርክዎ ፡ ለእግዚአብሔር ፡ ኵልክሙ ፡ መላእክቲሁ ፤ ጽኑዓን ፡ ወኀያላን ፡ እለ ፡ ትገብሩ ፡ ቃሎ ፡ ወእለ ፡ ትሰምዑ ፡ ቃለ ፡ ነገሩ ።

21 ባርክዎ ፡ ለእግዚአብሔር ፡ ኵሉ ፡ ኀይሉ ፤ ላእካኑ ፡ እለ ፡ ይገብሩ ፡ ፈቃዶ ።

22 ባርክዎ ፡ ለእግዚአብሔር ፡ ኵሉ ፡ ተግባሩ ፤ ውስተ ፡ ኵሉ ፡ በሐውርተ ፡ መለኮቱ ፤ ትባርኮ ፡ ነፍስየ ፡ ለእግዚአብሔር ።

103 ዘዳዊት ።

1 ትባርኮ ፡ ነፍስየ ፡ ለእግዚአብሔር ። እግዚኦ ፡ አምላኪየ ፡ ጥቀ ፡ ዐበይከ ፡ ፈድፋደ ፤

2 አሚነ ፡ ወዕበየ ፡ ስብሐት ፡ ለበስከ ። ወለበስከ ፡ ብርሃነ ፡ ከመ ፡ ልብስ ፤

3 ወረበብኮ ፡ ለሰማይ ፡ ከመ ፡ ሠቅ ።

4 ዘይጠፍር ፡ በማይ ፡ ጽርሖ ፡ ወረሰየ ፡ ደመና ፡ መከየዶ ፤ ዘየሐውር ፡ በክነፈ ፡ ነፋስ ።

5 ዘይሬስዮሙ ፡ ለመላእክቲሁ ፡ መንፈሰ ፤ ወለእለ ፡ ይትለአክዎ ፡ ነደ ፡ እሳት ።

6 ሳረራ ፡ ለምድር ፡ ወአጽንዓ ፤ ከመ ፡ ኢታንቀልቅል ፡ ለዓለመ ፡ ዓለም ።

7 ወቀላይኒ ፡ ከመ ፡ ልብስ ፡ ዐጽፋ ፤ ውስተ ፡ አድባር ፡ ይቀውሙ ፡ ማያት ።

8 ወእምተግሣጽከ ፡ ይጐዩ ፤ ወእምድምፀ ፡ ነጐድጓድከ ፡ ይደነግፁ ።

9 የዐርጉ ፡ አድባረ ፡ ወይወርዱ ፡ ገዳመ ፤ ውስተ ፡ ብሔር ፡ ኀበ ፡ ሳረርኮሙ ።

10 ወሠራዕኮሙ ፡ ወሰኖሙ ፡ እምኀበ ፡ ኢየኀልፉ ፤ ከመ ፡ ኢይትመየጡ ፡ ወኢይክድንዋ ፡ ለምድር ።

11 ዘይፌኑ ፡ አንቅዕተ ፡ ውስተ ፡ ቈላት ፤ ማእከለ ፡ አድባር ፡ የኀልፉ ፡ ማየት ።

12 ወያሰትዩ ፡ ለኵሉ ፡ አርዌ ፡ ገዳም ፤ ወይትወክፉ ፡ ሐለስትዮታት ፡ ለጽምኦሙ ።

13 ወያጸሉ ፡ ህየ ፡ አዕዋፈ ፡ ሰማይ ፤ ወይነቅዉ ፡ በማእከለ ፡ ጾላዓት ።

14 ዘይሰቅዮሙ ፡ ለአድባር ፡ እምውሳጥያቲሆሙ ፤ እምፍሬ ፡ ተግባርከ ፡ ትጸግብ ፡ ምድር ።

15 ዘያበቍል ፡ ሣዕረ ፡ ለእንስሳ ፡ ወኀመልማለ ፡ ለቅኔ ፡ እጓለ ፡ እመሕያው ፤

16 ከመ ፡ ያውፅእ ፡ እክለ ፡ እምድር ። ወወይን ፡ ያስተፌሥሕ ፡ ልበ ፡ ሰብእ ፡

17 ወቅብእ ፡ ለአብርሆ ፡ ገጽ ፤ ወእክል ፡ ያጸንዕ ፡ ኀይለ ፡ ሰብእ ።

18 ወይጸግቡ ፡ ዕፀወ ፡ ገዳም ፤ አርዘ ፡ ሊባኖስ ፡ ዘተከልከ ። ወበህየ ፡ ይትዋለዳ ፡ አዕዋፍ ፤

19 ወይትጋወሮን ፡ ቤተ ፡ ሄርድያኖስ ። አድባር ፡ ነዋኃት ፡ ለሀየላት ። ወጾላዓት ፡ ምጕያዮን ፡ ለግሔያት ።

20 ወገበርከ ፡ ወርኀ ፡ በዕድሜሁ ፤ ፀሐይኒ ፡ አእመረ ፡ ምዕራቢሁ ።

21 ታመጽእ ፡ ጽልመተ ፡ ወይከውን ፡ ሌሊተ ፤ ወይወፅኡ ፡ ቦቱ ፡ ኵሉ ፡ አርዌ ፡ ገዳም ።

22 እጕለ ፡ አናብስት ፡ ይጥሕሩ ፡ ወይመስጡ ፤ ወይስእሉ ፡ ኀበ ፡ እግዚአብሔር ፡ ሲሳዮሙ ።

23 ወእምከመ ፡ ሠረቀ ፡ ፀሐይ ፡ የአትዉ ፤ ወይውዕሉ ፡ ውስተ ፡ ግበቢሆሙ ።

24 ወይወፍር ፡ ሰብእ ፡ ውስተ ፡ ተግባሩ ፤ ወይውዕል ፡ ወይትቀነይ ፡ እስከ ፡ ይመሲ ።

25 ጥቀ ፡ ዐቢይ ፡ ግብርከ ፡ እግዚኦ ፡ ወኵሎ ፡ በጥበብ ፡ ገበርከ ፤ መልአ ፡ ምድር ፡ ዘፈጠርከ ።

26 ዛቲ ፡ ባሕር ፡ ዐባይ ፡ ወረሓብ ፤ ህየ ፡ ዘይትሐወስ ፡ ዘአልቦ ፡ ኈልቁ ፡

27 እንስሳ ፡ ዐበይተ ፡ ምስለ ፡ ደቃቅ ። ህየ ፡ ይሐውራ ፡ አሕማር ፤

28 ከይሲ ፡ ዘፈጠርከ ፡ ይሳለቅ ፡ ላዕሌሆሙ ። ወኵሉ ፡ ይሴፎ ፡ ኀቤከ ፤ አንተ ፡ ትሁቦሙ ፡ ሲሳዮሙ ፡ በበጊዜሁ ።

29 ወእምከመ ፡ ወሀብኮሙ ፡ ያስተጋብኡ ፤ ወፈቲሕከ ፡ እዴከ ፡ ታጸግብ ፡ ለኵሉ ፡ እምሕረትከ ።

30 ወእመሰ ፡ ሜጥከ ፡ ገጸከ ፡ ይደነግፁ ፤ ታወፅእ ፡ መንፈሶሙ ፡ ወየኀልቁ ፡ ወይገብኡ ፡ ውስተ ፡ መሬቶሙ ።

31 ወትፌኑ ፡ መንፈሰከ ፡ ወይትፈጠሩ ፤ ወትሔድስ ፡ ገጻ ፡ ለምድር ።

32 ለይኩን ፡ ስብሐቲሁ ፡ ለእግዚአብሔር ፡ ለዓለም ፤ ይትፌሣሕ ፡ እግዚአብሔር ፡ በተግባሩ ።

33 ዘይኔጽራ ፡ ለምድር ፡ ወይሬስያ ፡ ከመ ፡ ትርዐድ ፤ ዘይገሶሙ ፡ ለአድባር ፡ ወይጠይሱ ።

34 እሴብሖ ፡ ለእግዚአብሔር ፡ በሕይወትየ ፤ ወእዜምር ፡ ለአምላኪየ ፡ በአምጣነ ፡ ሀሎኩ ።

35 ወኣሠምሮ ፡ በቃልየ ፤ ወአንሰ ፡ እትፌሣሕ ፡ በእግዚአብሔር ።

36 ወየኀልቁ ፡ ኃጥኣን ፡ እምድር ፡ ወአማፅያንሂ ፡ ኢይሄልዉ ፡ እንከ ፤ ትባርኮ ፡ ነፍስየ ፡ ለእግዚአብሔር ።

104 ሀሌሉያ ።

1 ግነዩ ፡ ለእግዚአብሔር ፡ ወጸውዑ ፡ ስሞ ፤ ወንግርዎሙ ፡ ለአሕዛብ ፡ ምግባሮ ።

2 ሰብሕዎ ፡ ወዘምሩ ፡ ሎቱ ፤ ወንግሩ ፡ ኵሎ ፡ መንክሮ ። ወትከብሩ ፡ በስሙ ፡ ቅዱስ ፤

3 ለይትፌሣሕ ፡ ልብ ፡ ዘየኀሦ ፡ ለእግዚአብሔር ። ኅሥዎ ፡ ለእግዚአብሔር ፡ ወትጸንዑ ፤ ወኅሡ ፡ ገጾ ፡ በኵሉ ፡ ጊዜ ።

4 ወተዘከሩ ፡ መንክሮ ፡ ዘገብረ ፤ ተኣምሪሁ ፡ ወኵነኔ ፡ አፉሁ ።

5 ዘርዐ ፡ አብርሃም ፡ አግብርቲሁ ፤ ወደቂቀ ፡ ያዕቆብ ፡ ኅሩያኒሁ ።

6 ውእቱ ፡ እግዚአብሔር ፡ አምላክነ ፤ ውስተ ፡ ኵሉ ፡ ምድር ፡ ኵነኔሁ ።

7 ወተዘከረ ፡ ሥርዐቶ ፡ ዘለዓለም ፤ ቃሎ ፡ ዘአዘዘ ፡ ለዐሠርቱ ፡ ምእት ፡ ትውልድ ።

8 ዘሠርዐ ፡ ለአብርሃም ፤ ወመሐለ ፡ ለይስሐቅ ።

9 ወአቀመ ፡ ስምዐ ፡ ለያዕቆብ ፤ ወለእስራኤል ፡ ኪዳኖ ፡ ዘለዓለም ።

10 ወይቤሎ ፤ ለከ ፡ እሁበከ ፡ ምድረ ፡ ከናዐን ፤ ትኩንክሙ ፡ ሐብለ ፡ ርስትክሙ ።

11 እንዘ ፡ ውኁዳን ፡ ጥቀ ፡ እሙንቱ ፤ ወፈላስያን ፡ ውስቴታ ።

12 ወኀለፉ ፡ እምሕዝብ ፡ ውስተ ፡ ሕዝብ ፤ ወእምነገሥት ፡ ውስተ ፡ ካልእ ፡ ሕዝብ ።

13 ወኢኀደገ ፡ ይስሐጦሙ ፡ ሰብእ ፤ ወገሠጸ ፡ ነገሥተ ፡ በእንቲአሆሙ ።

14 ኢትግስሱ ፡ መሲሓንየ ፤ ወኢታሕሥሙ ፡ ዲበ ፡ ነቢያትየ ።

15 ወአምጽአ ፡ ረኃበ ፡ ለብሔር ፤ ወአጥፍአ ፡ ኵሎ ፡ ኀይለ ፡ እክል ።

16 ፈነወ ፡ ብእሴ ፡ ቅድሜሆሙ ፤ ወተሰይጠ ፡ ዮሴፍ ፡ ወኮነ ፡ ገብረ ።

17 ወሐማ ፡ እገሪሁ ፡ በመዋቅሕት ፤ ወአምሰጠት ፡ ነፍሱ ፡ እምኀጺን ። ዘእንበለ ፡ ይብጻሕ ፡ ቃሉ ፤

18 ቃለ ፡ እግዚአብሔር ፡ እመከሮ ። ወፈነወ ፡ ንጉሥ ፡ ወፈትሖ ፤ ወሤሞ ፡ መልአከ ፡ አሕዛብ ።

19 ወረሰዮ ፡ እግዚአ ፡ ለቤቱ ፤ ወአኰነኖ ፡ ላዕለ ፡ ኵሉ ፡ ጥሪቱ ።

20 ከመ ፡ ይገሥጾሙ ፡ ለመላእክቲሁ ፡ ከማሁ ፤ ወከመ ፡ ያጥብቦሙ ፡ ለሊቃውንቲሁ ፡ ከማሁ ።

21 ወቦአ ፡ እስራኤል ፡ ብሔረ ፡ ግብጽ ፤ ወያዕቆብኒ ፡ ኀደረ ፡ ምድረ ፡ ካም ።

22 ወአብዝኆሙ ፡ ለሕዝቡ ፡ ፈድፋደ ፤ ወአጽንዖሙ ፡ እምፀሮሙ ።

23 ወሜጠ ፡ ልቦሙ ፡ ከመ ፡ ይጽልኡ ፡ ሕዝቦ ፤ ወከመ ፡ ይሐብልይዎሙ ፡ ለአግብርቲሁ ።

24 ወፈነወ ፡ ሙሴሃ ፡ ገብሮ ፤ ወአሮንሃ ፡ ኅሩዮ ።

25 ወሤመ ፡ ቃለ ፡ ትእምርት ፡ ላዕሌሆሙ ፤ ወመንክሮሂ ፡ በምድረ ፡ ካም ።

26 ወፈነወ ፡ ጽልመተ ፡ ወአጽለሞሙ ፤ ወአምረርዎ ፡ ለቃሉ ።

27 ወረሰየ ፡ ማዮሙ ፡ ደመ ፤ ወቀተለ ፡ ዐሣቲሆሙ ።

28 ወአውፅአት ፡ ምድሮሙ ፡ ቈርነነዓተ ፤ ውስተ ፡ አብያተ ፡ ነገሥቶሙ ።

29 ይቤ ፡ ወመጽአ ፡ አኮት ፤ ወትንንያ ፡ ውስተ ፡ ኵሉ ፡ ምድሮሙ ።

30 ወረሰየ ፡ ዝናሞሙ ፡ በረደ ፤ ወነደ ፡ እሳት ፡ ውስተ ፡ ምድሮሙ ።

31 ወቀተለ ፡ ወይኖሙ ፡ ወበለሶሙ ፤ ወቀጥቀጠ ፡ ኵሎ ፡ ዕፀወ ፡ ብሔሮሙ ።

32 ይቤ ፡ ወመጽአ ፡ አንበጣ ፤ ወደጎብያ ፡ ዘአልቦ ፡ ኈልቈ ።

33 [ወበልዐ ፡ ኵሎ ፡ ሣዕረ ፡ ብሔሮሙ ፤] ወበልዐ ፡ ኵሎ ፡ ፍሬ ፡ ምድሮሙ ።

34 ወቀተለ ፡ ኵሎ ፡ በኵረ ፡ ብሔሮሙ ፤ ወቀዳሜ ፡ ኵሉ ፡ ተግባሮሙ ።

35 ወአውፅኦሙ ፡ በወርቅ ፡ ወበብሩር ፤ ወአልቦ ፡ ደዌ ፡ ውስተ ፡ ሕዝቦሙ ።

36 ወተፈሥሑ ፡ ግብጽ ፡ በፀአቶሙ ፤ እስመ ፡ ፈርሀዎሙ ።

37 ወአንጦልዐ ፡ ደመና ፡ ወሰወሮሙ ፤ ወእሳትኒ ፡ ከመ ፡ ያብርህ ፡ ሎሙ ፡ በሌሊት ።

38 ወሰአሉ ፡ ወመጽአ ፡ ፍርፍርት ፤ ወአጽገቦሙ ፡ ኅብስተ ፡ ሰማይ ።

39 ወአንቅዐ ፡ ኰኵሐ ፡ ወአውሐዘ ፡ ማየ ፤ ወሖሩ ፡ አፍላግ ፡ ውስተ ፡ በድው ።

40 እስመ ፡ ተዘከረ ፡ ቃሎ ፡ ቅዱሰ ፤ ዘኀበ ፡ አብርሃም ፡ ገብሩ ።

41 ወአውፅኦሙ ፡ ለሕዝብ ፡ በትፍሥሕት ፤ ወለኅሩያኒሁ ፡ በሐሤት ።

42 ወወሀቦሙ ፡ በሐውርተ ፡ አሕዛብ ፤ ወወረሱ ፡ ጻማ ፡ ባዕድ ።

43 ከመ ፡ ይዕቀቡ ፡ ሕጎ ፤ ወይኅሥሡ ፡ ሥርዐቶ ።

105 ሀሌሉያ ።

1 ግኔዩ ፡ ለእግዚአብሔር ፡ እስመ ፡ ኄር ፤ እስመ ፡ ለዓለም ፡ ምሕረቱ ።

2 መኑ ፡ ይነግር ፡ ኀይለ ፡ እግዚአብሔር ፤ ወይገብር ፡ ከመ ፡ ይስማዕ ፡ ኵሎ ፡ ስብሐቲሁ ።

3 ብፁዓን ፡ እለ ፡ የዐቅቡ ፡ ፍትሐ ፤ ወይገብሩ ፡ ጽድቀ ፡ በኵሉ ፡ ጊዜ ።

4 ተዘከረነ ፡ እግዚኦ ፡ ብሣህልከ ፡ ሕዝበከ ፤ ወተሣሀለነ ፡ በአድኅኖትከ ።

5 ከመ ፡ ንርአይ ፡ ሠናይቶሙ ፡ ለኅሩያኒከ ፤ ወከመ ፡ ንትፈሣሕ ፡ በፍሥሓ ፡ ሕዝብከ ፤ ወከመ ፡ ንክበር ፡ ምስለ ፡ ርስትከ ።

6 አበስነ ፡ ምስለ ፡ አበዊነ ፤ ዐመፅነ ፡ ወጌገይነ ።

7 ወአበዊነሂ ፡ በብሔረ ፡ ግብጽ ፡ ኢያእመሩ ፡ መንክረከ ፤ ወኢተዘከሩ ፡ ብዝኀ ፡ ምሕረትከ ፤

8 ወአምረሩከ ፡ አመ ፡ የዐርጉ ፡ ባሕረ ፡ ኤርትራ ።

9 ወአድኀኖሙ ፡ በእንተ ፡ ስሙ ፤ ከመ ፡ ያርእዮሙ ፡ ኀይሎ ።

10 ወገሠጻ ፡ ለባሕረ ፡ ኤርትራ ፡ ወየብሰት ፤ ወመርሖሙ ፡ በቀላይ ፡ ከመ ፡ ዘበገዳም ።

11 ወአድኀኖሙ ፡ እምእደ ፡ ጸላእቶሙ ፤ ወአንገፎሙ ፡ እምእደ ፡ ፀሮሙ ።

12 ወደፈኖሙ ፡ ማይ ፡ ለእለ ፡ ሮድዎሙ ፤ ወኢተርፈ ፡ አሐዱ ፡ እምውስቴቶሙ ።

13 ወተአመኑ ፡ በቃሉ ፤ ወሰብሕዎ ፡ በስብሐቲሁ ።

14 ወአፍጠኑ ፡ ረሲዐ ፡ ምግባሩ ፤ ወኢተዐገሡ ፡ በምክሩ ።

15 ወፈተዉ ፡ ፍትወተ ፡ በገዳም ፤ ወአምረርዎ ፡ ለእግዚአብሔር ፡ በበድው ።

16 ወወሀቦሙ ፡ ዘሰአሉ ፤ ወገነወ ፡ ጽጋበ ፡ ለነፍሶሙ ።

17 ወአምዕዕዎ ፡ ለሙሴ ፡ በትዕይንት ፤ ወለአሮን ፡ ቅዱሰ ፡ እግዚአብሔር ።

18 ወአብቀወት ፡ ምድር ፡ ወውኅጠቶ ፡ ለዳታን ፤ ወደፈነቶሙ ፡ ለተዓይነ ፡ አቤሮን ።

19 ወነደ ፡ እሳት ፡ ውስተ ፡ ተዓይንቲሆሙ ፤ ወአውዐዮሙ ፡ ነበልባል ፡ ለኃጥኣን ።

20 ወገብሩ ፡ ላህመ ፡ በኮሬብ ፤ ወሰገዱ ፡ ለግልፎ ።

21 ወወለጡ ፡ ክብሮሙ ፤ በአምሳለ ፡ ላህም ፡ ዘይትረዐይ ፡ ሣዕረ ።

22 ወረስዕዎ ፡ ለእግዚአብሔር ፡ ዘአድኅኖሙ ፤ ዘገብረ ፡ ዐቢያተ ፡ በግብጽ ። ወመንክረ ፡ በምድረ ፡ ካም ፤ ወግሩመ ፡ በባሕረ ፡ ኤርትራ ።

23 ወይቤ ፡ ከመ ፡ ይሠርዎሙ ፤ ሶበ ፡ አኮ ፡ ሙሴ ፡ ኅሩዮ ፡ ቆመ ፡ ቅድሜሁ ፡ አመ ፡ ብድብድ ፡

24 ከመ ፡ ይሚጥ ፡ መቅሠፍተ ፡ መዐቱ ፡ ወከመ ፡ ኢይሠርዎሙ ። ወመነኑ ፡ ምድረ ፡ መፍትወ ፤

25 ወኢተአመኑ ፡ በቃሉ ። ወአንጐርጐሩ ፡ በውስተ ፡ ተዓይኒሆሙ ፤ ወኢሰምዑ ፡ ቃለ ፡ እግዚአብሔር ።

26 ወአንሥአ ፡ እዴሁ ፡ ላዕሌሆሙ ፤ ከመ ፡ ይንፅኆሙ ፡ በገዳም ።

27 ወከመ ፡ ይንፃኅ ፡ ዘርዖሙ ፡ ውስተ ፡ አሕዛብ ፤ ወከመ ፡ ይዝርዎሙ ፡ ውስተ ፡ በሓውርት ።

28 ወተፈጸሙ ፡ በብዔል ፡ ፌጎር ፤ ወበልዑ ፡ መሥዋዕተ ፡ ምዉተ ።

29 ወወሐክዎ ፡ በምግባሪሆሙ ፤ ወበዝኀ ፡ ብድብድ ፡ ላዕሌሆሙ ።

30 ወተንሥአ ፡ ፊንሐስ ፡ ወአድኀኖሙ ፤ ወኀደገ ፡ ብድብድ ።

31 ወተኈለቀ ፡ ጽድቅ ፤ ልትውልደ ፡ ትውልድ ፡ ወእስከ ፡ ለዓለም ።

32 ወአምዕዕዎ ፡ በኀበ ፡ ማየ ፡ ቅሥት ፤ ወሐመ ፡ ሙሴ ፡ በእንቲአሆሙ ። እስመ ፡ አምረርዋ ፡ ለነፍሱ ፤

33 ወአዘዘ ፡ በከናፍሪሁ ። ወኢሠረዉ ፡ አሕዛበ ፡ ዘይቤሎሙ ፡ እግዚአብሔር ።

34 ወተደመሩ ፡ ምስለ ፡ አሕዛብ ፤ ወተመሀሩ ፡ ምግባሮሙ ። ወተቀንዩ ፡ ለግልፎሆሙ ፤ ወኮኖሙ ፡ ጌጋየ ።

35 ወዘብሑ ፡ ደቂቆሙ ፡ ወአዋልዲሆሙ ፡ ለአጋንንት ።

36 ወከዐዉ ፡ ደመ ፡ ንጹሐ ፡ ደመ ፡ ደቂቆሙ ፡ ወአዋልዲሆሙ ፤ ወሦዑ ፡ ለግልፎ ፡ ከናዐን ፤

37 ወተቀትለት ፡ ምድር ፡ በደም ። ወረኵሰት ፡ ምድር ፡ በምግባሪሆሙ ፤ ወዘመዉ ፡ በጣዖቶሙ ።

38 ወተምዕዐ ፡ እግዚአብሔር ፡ መዐተ ፡ ላዕለ ፡ ሕዝቡ ፤ ወአስቆረሮሙ ፡ ለርስቱ ።

39 ወአግብኦሙ ፡ ውስተ ፡ እደ ፡ ፀሮሙ ፤ ወቀነይዎሙ ፡ ጸላእቶሙ ።

40 ወአሕመምዎሙ ፡ ፀሮሙ ፤ ወኀስሩ ፡ በታሕተ ፡ እደዊሆሙ ። ወዘልፈ ፡ ያድኅኖሙ ፤

41 ወእሙንቱሰ ፡ አምረርዎ ፡ በምክሮሙ ፡ ወሐሙ ፡ በኀጢአቶሙ ።

42 ወርእዮሙ ፡ ከመ ፡ ተመንደቡ ፤ ወሰምዖሙ ፡ ጸሎቶሙ ።

43 ወተዘከረ ፡ ኪዳኖ ፤ ወነስሐ ፡ በከመ ፡ ብዙኀ ፡ ምሕረቱ ።

44 ወወሀቦሙ ፡ ሣህሎ ፤ በቅድመ ፡ ኵሎሙ ፡ እለ ፡ ፀወውዎሙ ።

45 አድኅነነ ፡ እግዚኦ ፡ አምላክነ ፡ ወአስተጋብአነ ፡ እምአሕዛብ ፤

46 ከመ ፡ ንግበይ ፡ ለስምከ ፡ ቅዱስ ፡ ወከመ ፡ ንትመካሕ ፡ በስብሐቲከ ።

47 ይትባረክ ፡ እግዚአብሔር ፡ አምላከ ፡ እስራኤል ፤ እምቅድመ ፡ ዓለም ፡ ወእስከ ፡ ለዓለም ፤ ወይበል ፡ ኵሉ ፡ ሕዝብ ፡ ለይኩን ፡ ለይኩን ።

106 ሀሌሉያ ።

1 ግነዩ ፡ ለእግዚአብሔር ፡ እስመ ፡ ኄር ፤ እስመ ፡ ለዓለም ፡ ምሕረቱ ።

2 ለይበሉ ፡ እለ ፡ አድኀኖሙ ፡ እግዚአብሔር ፤ እለ ፡ አድኀኖሙ ፡ እምእደ ፡ ፀሮሙ ። ወአስተጋብኦሙ ፡ እምበሓውርት ፤

3 እምጽባሕ ፡ ወእምዐረብ ፡ ወመስዕ ፡ ወባሕር ።

4 ወሳኰዩ ፡ ውስተ ፡ በድው ፡ ዘአልቦ ፡ ማየ ፤ ወኢረከቡ ፡ ፍኖተ ፡ ሀገረ ፡ ብሔሮሙ ።

5 ጸምኡ ፡ ወርኅቡ ፤ ወኀልቀት ፡ ነፍሶሙ ፡ በላዕሌሆሙ ።

6 ወዐውየዉ ፡ ኀበ ፡ እግዚአብሔር ፡ ሶበ ፡ ተመንደቡ ፤ ወአድኀኖሙ ፡ እምንዳቤሆሙ ።

7 ወመርሖሙ ፡ ፍኖተ ፡ ርቱዐ ፤ ከመ ፡ ይሖሩ ፡ ፍኖተ ፡ ሀገሮሙ ።

8 ንግሩ ፡ ለእግዚአብሔር ፡ ምሕረቶ ፤ ወመንክሮሂ ፡ ለእጓለ ፡ እመሕያው ።

9 እስመ ፡ አጽገበ ፡ ነፍሰ ፡ ርኅብተ ፤ ወመልአ ፡ ነፍሰ ፡ ዕራቃ ፡ በረከተ ።

10 ለእለ ፡ ይነብሩ ፡ ውስተ ፡ ጽልመት ፡ ወጽላሎተ ፡ ሞት ፤ ወመቁሓን ፡ በንዴት ፡ ወበኀጺን ።

11 እስመ ፡ አምረሩ ፡ ቃለ ፡ እግዚአብሔር ፤ ወአምዕዑ ፡ ምክረ ፡ ልዑል ።

12 ወሰርሐ ፡ በሕማም ፡ ልቦሙ ፤ ደወዩ ፡ ወኀጥኡ ፡ ዘይቀብሮሙ ።

13 ወዐውየዉ ፡ ኀበ ፡ እግዚአብሔር ፡ ሶበ ፡ ተመንደቡ ፤ ወአድኀኖሙ ፡ እምንዳቤሆሙ ።

14 ወአውፅኦሙ ፡ እምጽልመት ፡ ወጽላሎተ ፡ ሞት ፤ ወሰበረ ፡ መዋቅሕቲሆሙ ።

15 ንግሩ ፡ ለእግዚአብሔር ፡ ምሕረቶ ፤ ወመንክሮሂ ፡ ለእጓለ ፡ እመሕያው ።

16 እስመ ፡ ሰበረ ፡ ኆኃተ ፡ ብርት ፤ ወቀጥቀጠ ፡ መናስግተ ፡ ኀጺን ።

17 ወተወክፎሙ ፡ እምፍኖተ ፡ ጌጋዮሙ ፤ እስመ ፡ ሐሙ ፡ በኃጢአቶሙ ።

18 ወኵሎ ፡ መብልዐ ፡ አስቆረረት ፡ ነፍሶሙ ፤ ወቀርቡ ፡ ኀበ ፡ አናቅጸ ፡ ሞት ።

19 ወዐውየዉ ፡ ኀበ ፡ እግዚአብሔር ፡ ሶበ ፡ ተመንደቡ ፤ ወአድኀኖሙ ፡ እምንዳቤሆሙ ።

20 ወፈነወ ፡ ቃሎ ፡ ወአሕየዎሙ ፤ ወአድኀኖሙ ፡ እሞቶሙ ።

21 ንግሩ ፡ ለእግዚአብሔር ፡ ምሕረቶ ፤ ወመንክሮሂ ፡ ለእጓለ ፡ እመሕያው ።

22 ወይሡዑ ፡ ሎቱ ፡ መሥዋዕተ ፡ ስብሐት ፤ ወይንግሩ ፡ ግብሮ ፡ በትፍሥሕት ።

23 እለ ፡ ይወርዱ ፡ ውስተ ፡ ባሕር ፡ በአሕማር ፤ ወይትጌበሩ ፡ ተግባሮሙ ፡ ውስተ ፡ ማይ ፡ ብዙኅ ።

24 እሙንቱሰ ፡ ያአምሩ ፡ ግብረ ፡ እግዚአብሔር ፤ ወመንክሮሂ ፡ በውስተ ፡ ልጐት ።

25 ይቤ ፡ ወመጽአ ፡ መንፈሰ ፡ ዐውሎ ፤ ወተለዐለ ፡ ማዕበል ።

26 የዐርጉ ፡ እስከ ፡ ሰማይ ፡ ወይወርዱ ፡ እስከ ፡ ቀላይ ፤ ወተመስወት ፡ ነፍሶሙ ፡ በሕማም ።

27 ደንገፁ ፡ ወተሀውኩ ፡ ከመ ፡ ስኩር ፤ ወተሰጥመ ፡ ኵሉ ፡ ጥበቦሙ ።

28 ወዐውየዉ ፡ ኀበ ፡ እግዚአብሔር ፡ ሶበ ፡ ተመንደቡ ፤ ወአድኀኖሙ ፡ እምንዳቤሆሙ ።

29 ወአጥፍኦ ፡ ለዐውሎ ፡ ወአርመመ ፡ ባሕር ፤ ወአርመመ ፡ ማዕበል ።

30 ወተፈሥሑ ፡ እስመ ፡ አዕረፉ ፤ ወመርሖሙ ፡ ውስተ ፡ መርሶ ፡ ኀበ ፡ ፈቀዱ ።

31 ንግሩ ፡ ለእግዚአብሔር ፡ ምሕረቶ ፤ ወመንክሮሂ ፡ ለእጓለ ፡ እመሕያው ።

32 ወያዐብይዎ ፡ በማኅበረ ፡ አሕዛብ ፤ ወይሴብሕዎ ፡ በመንበረ ፡ ሊቃውንት ።

33 ወረሰዮሙ ፡ ለአፍላግ ፡ በድወ ፤ ወረሰየ ፡ ምጽማአ ፡ ሙሓዘ ፡ ማይ ።

34 ወረሰየ ፡ ጼወ ፡ ለምድር ፡ እንተ ፡ ትፈሪ ፤ በእከዮሙ ፡ ለእለ ፡ ይነብርዋ ።

35 ወረሰዩ ፡ ለበድው ፡ ሙሓዘ ፡ ማይ ፤ ወለምድረ ፡ በድው ፡ ቀላያተ ፡ ማያት ።

36 ወአንበረ ፡ ህየ ፡ ርኁባነ ፤ ወሐነጹ ፡ አህጉረ ፡ ኀበ ፡ ይነብርዋ ።

37 ወዘርዑ ፡ ገራውሀ ፡ ወተከሉ ፡ ወይነ ፤ ወገብሩ ፡ ማእረረ ፡ እክል ።

38 ወባረኮሙ ፡ ወበዝኁ ፡ ፈድፋደ ፤ ወኢያውኀደ ፡ ሎሙ ፡ እንስሳሆሙ ።

39 ወደወዩ ፡ ወውኅዱ ፤ በሕማም ፡ እኩይ ፡ ወበጻዕር ።

40 ወተክዕወ ፡ ኀሳር ፡ ዲበ ፡ መላእክት ፤ ወአስሐቶሙ ፡ ውስተ ፡ በድው ፡ ዘኢኮነ ፡ ፍኖተ ።

41 ወረድኦ ፡ ለነዳይ ፡ በተጽናሱ ፤ ወረሰዮ ፡ ከመ ፡ አባግዐ ፡ ብሔር ።

42 ይርአዩ ፡ ራትዓን ፡ ወይትፌሥሑ ፤ ወትትፈፀም ፡ አፉሃ ፡ ኵላ ፡ ዐመፃ ።

43 መኑ ፡ ጠቢብ ፡ ዘየዐቅቦ ፡ ለዝ ፤ ወያአምር ፡ ከመ ፡ መሓሪ ፡ እግዚአብሔር ።

107 ማኅኬት ፡ መዝሙር ፡ ዘዳዊት ።

1 ጥቡዕ ፡ ልብየ ፡ እግዚኦ ፡ ጥቡዕ ፡ ልብየ ፤ እሴብሕ ፡ ወእዜምር ፡ ወይትነሣእ ፡ ክብርየ ።

2 ወእትነሣእ ፡ በመዝሙር ፡ ወበመሰንቆ ፤ ወእትነሣእ ፡ በጽባሕ ።

3 እገኒ ፡ ለከ ፡ በውስተ ፡ አሕዛብ ፡ እግዚኦ ፤ ወእዜምር ፡ ለከ ፡ በውስተ ፡ ሕዝብ ።

4 እስመ ፡ ዐብየት ፡ እስከ ፡ ሰማያት ፡ ምሕረትከ ፤ ወእስከ ፡ ደመናት ፡ ጽድቅከ ።

5 ተለዐለ ፡ እግዚአብሔር ፡ መልዕልተ ፡ ሰማያት ፤ ወበኵሉ ፡ ምድር ፡ ስብሐቲሁ ። ከመ ፡ ይድኀኑ ፡ ፍቁራኒከ ፤

6 አድኅን ፡ በየማንከ ፡ ወስምዐኒ ። እግዚአብሔር ፡ ነበበ ፡ በመቅደሱ ፡

7 እትሐሠይ ፡ ወእትካፈል ፡ ሰቂማ ፤ ወእሳፈር ፡ አዕጻዳተ ፡ ቈላት ።

8 ዚአየ ፡ ውእቱ ፡ ገላዐድ ፡ ወዚአየ ፡ ምናሴ ፡ ወኤፍሬም ፡ ስዋቀ ፡ ርእስየ ፤

9 ወይሁዳ ፡ ንጉሥየ ። ወሞአብ ፡ ካህን ፡ ተስፋየ ፤

10 ዲበ ፡ ኢዶምያስ ፡ እሰፍሕ ፡ መካይድየ ፤ ሊተ ፡ ይገንዩ ፡ አሎፍሊ ።

11 መኑ ፡ ይወስደኒ ፡ ሀገረ ፡ ጥቅም ፤ ወመኑ ፡ ይመርሐኒ ፡ እስከ ፡ ኢዶምያስ ።

12 አኮኑ ፡ አንተ ፡ ዘገዳፍከነ ፡ እግዚኦ ፤ ወኢትወፅእ ፡ አምላክነ ፡ ምስለ ፡ ኀይልነ ።

13 ሀበነ ፡ ረድኤተ ፡ በምብዳቤነ ፤ ወከንቱ ፡ ተአምኖ ፡ በሰብእ ።

14 በእግዚአብሔር ፡ ንገብር ፡ ኀይለ ፤ ወወእቱ ፡ ያኀስሮሙ ፡ ለእለ ፡ ይሣቅዩነ ።

108 ፍጻሜ ፡ መዝሙር ፡ ዘዳዊት ።

1 እግዚኦ ፡ ኢትጸመመኒ ፡ ስእለትየ ። እስመ ፡ አፈ ፡ ዐመፃ ፡ ወአፈ ፡ ኃጥእ ፡ አብቀወ ፡ ላዕሌየ ፤

2 ወነበቡ ፡ ላዕሌየ ፡ በልሳነ ፡ ዐመፃ ። ወዐገቱኒ ፡ በጽልእ ፤ ወፀብኡኒ ፡ በከንቱ ።

3 ወዘእምአፍቀሩኒ ፡ አስተዋደዩኒ ፤ ወአንሰ ፡ እጼሊ ።

4 ገደዩኒ ፡ እኪተ ፡ ህየንተ ፡ ሠናይት ፤ ወጸልኡኒ ፡ ህየንተ ፡ ዘአፍቀርክዎሙ ።

5 ሢም ፡ ላዕሌሁ ፡ ኃጥአ ፤ ወሰይጣን ፡ ይቁም ፡ በየማኑ ።

6 ወሶበሂ ፡ ይትዋቀሥ ፡ ይፃእ ፡ ተመዊኦ ፤ ወጸሎቱሂ ፡ ትኩኖ ፡ ጌጋየ ።

7 ወይኩና ፡ መዋዕሊሁ ፡ ኅዳጠ ፤ ወሢመቶሂ ፡ ይንሣእ ፡ ባዕድ ።

8 ወይኩኑ ፡ ደቂቁ ፡ እጓለ ፡ ማውታ ፤ ወብእሲቱሂ ፡ ትኩን ፡ መበለተ ።

9 ወይትሀውኩ ፡ ደቂቁ ፡ ወይፍልሱ ፡ ወያስተፍእሙ ፤ ወይስድድዎሙ ፡ እምአብያቲሆሙ ።

10 ወይበርበሮ ፡ ባዕለ ፡ ዕዳ ፡ ኵሎ ፡ ንዋዮ ፤ ወይሐብልዩ ፡ ነቢር ፡ ኵሎ ፡ ተግባሮ ።

11 ወኢይርከብ ፡ ዘይረድኦ ፤ ወኢይምሐርዎሙ ፡ ለእጓለ ፡ ማውታሁ ።

12 ወይሠረዉ ፡ ደቂቁ ፤ በአሕቲ ፡ ትውልድ ፡ ትደምሰስ ፡ ስሙ ።

13 ወትዘከር ፡ ኅጢአተ ፡ አቡሁ ፡ በቅድመ ፡ እግዚአብሔር ፤ ወኢይደምሰስ ፡ ጌጋያ ፡ ለእሙ ።

14 ወየሀሉ ፡ ቅድመ ፡ እግዚአብሔር ፡ በኵሉ ፡ ጊዜ ፤ ወይጥፋእ ፡ እምድር ፡ ዝክሩ ። እስመ ፡ ኢተዘከረ ፡ ይግበር ፡ ምጽዋተ ፤

15 ወሰደደ ፡ ብእሴ ፡ ነዳየ ፡ ወምስኪነ ፡ ወጥቡዕ ፡ ልቡ ፡ ለቀቲል ።

16 ወአብደረ ፡ መርገመ ፡ ወትመጽኦ ፤ ወአበያ ፡ ለበረከት ፡ ወትርሕቅ ፡ አምኔሁ ።

17 ወለብሳ ፡ ለመርገም ፡ ከመ ፡ ልብስ ፤ ወቦአት ፡ ከመ ፡ ማይ ፡ ውስተ ፡ አማዑቱ ፤ ወከመ ፡ ቅብእ ፡ ውስተ ፡ አዕጽምቲሁ ።

18 ወትኩኖ ፡ ከመ ፡ ልብስ ፡ ዘይትዐጸፍ ፤ ወከመ ፡ ቅናት ፡ ዘይቀንት ፡ ዘልፈ ።

19 ዝግብር ፡ ለእለ ፡ ያስተዋድዩኒ ፡ ኀበ ፡ እግዚአብሔር ፤ ወለእለ ፡ ይነቡ ፡ እኩየ ፡ ላዕለ ፡ ነፍስየ ።

20 ወአንተሰ ፡ እግዚኦ ፡ እግዚእየ ፡ ግበር ፡ ሣህለከ ፡ ላዕሌየ ፡ በእንተ ፡ ስምከ ፤ እስመ ፡ ሠናይ ፡ ምሕረትከ ፡ አድኅነኒ ።

21 እስመ ፡ ነዳይ ፡ ወምስኪን ፡ አነ ፤ ልብየኒ ፡ ደንገፀኒ ፡ በውስጥየ ።

22 ወኀለቁ ፡ ከመ ፡ ጽላሎት ፡ ዘኀለፈ ፤ ወተነገፍኩ ፡ ከመ ፡ አንበጣ ።

23 ወደክመኒ ፡ ብረክየ ፡ በጾም ፤ ወስሕከ ፡ ሥጋየ ፡ በኀጢአ ፡ ቅብእ ።

24 ወአንሰ ፡ ተጸአልኩ ፡ በኀቤሆሙ ፤ ሶበ ፡ ይሬእዩኒ ፡ የሐውሱ ፡ ርእሶሙ ።

25 ርድአኒ ፡ እግዚኦ ፡ አምላኪየ ፤ ወአድኅነኒ ፡ በእንተ ፡ ምሕረትከ ።

26 ወያእምሩ ፡ ከመ ፡ እዴከ ፡ ይእቲ ፡ ዛቲ ፤ ወአንተ ፡ እግዚኦ ፡ ገበርከ ።

27 እሙንቱሰ ፡ ይረግሙ ፡ ወአንተ ፡ ባርክ ፤ ይትኀፈሩ ፡ እለ ፡ ይትነሥኡ ፡ ላዕሌየ ፡ ወገብርከሰ ፡ ይትፌሣሕ ።

28 ለይልበሱ ፡ ኀፍረተ ፡ እለ ፡ ያስተዋድዩኒ ፤ ወይትዐጸፍዋ ፡ ከመ ፡ ዐጽፍ ፡ ለኃጢአቶሙ ።

29 እገኒ ፡ በአፉየ ፡ ለእግዚአብሔር ፡ ፈድፋደ ፤ ወእሴብሖ ፡ በማእከለ ፡ ብዙኃን ።

30 እስመ ፡ ቆመ ፡ በየማነ ፡ ነዳይ ፤ ከመ ፡ ያድኅና ፡ ለነፍስየ ፡ እምእለ ፡ ሮድዋ ።

109 መዝሙር ፡ ዘዳዊት ።

1 ይቤሎ ፡ እግዚእ ፡ ለእግዚእየ ፡ ንበር ፡ በየማንየ ፤

2 እስከ ፡ ኣገብኦሙ ፡ ለጸላእትከ ፡ ታሕተ ፡ መከየደ ፡ እገሪከ ።

3 በትረ ፡ ኀይል ፡ ይፈኑ ፡ ለከ ፡ እግዚአብሔር ፡ እምጽዮን ፤ ወትኴንን ፡ በማእከለ ፡ ጸላእትከ ።

4 ምስሌከ ፡ ቀዳማዊ ፡ በዕለተ ፡ ኀይል ። ወብርሃኖሙ ፡ ለቅዱሳን ፡ ወለድኩከ ፡ እምከርሥ ፡ እምቅድመ ፡ ኮከበ ፡ ጽባሕ ።

5 መሐለ ፡ እግዚአብሔር ፡ ወኢይኔስሕ ፤ አንተ ፡ ካህኑ ፡ ለዓለም ፤ በከመ ፡ ሢመቱ ፡ ለመልከ ፡ ጼዴቅ ።

6 እግዚአብሔር ፡ በየማንከ ፤ ይቀጠቅጦሙ ፡ ለነገሥት ፡ በዕለተ ፡ መዐቱ ።

7 ወይኴንኖሙ ፡ ለአሕዛብ ፡ ወያበዝኅ ፡ አብድንተ ፤ ወይሰብር ፡ አርእስተ ፡ ብዙኃን ፡ በዲበ ፡ ምድር ።

8 እምውሒዝ ፡ ሰትዩ ፡ ማየ ፡ በፍኖት ፤ ወበእንተዝ ፡ ይትሌዐል ፡ ርእስ ።

110 ሀሌሉያ ።

1 እገኒ ፡ ለከ ፡ እግዚኦ ፡ በኵሉ ፡ ልብየ ፤ በምክረ ፡ ራትዓን ፡ ወበማኅበር ።

2 ዐቢይ ፡ ግብረ ፡ እግዚአብሔር ፤ ወትትኀሠሥ ፡ ውስተ ፡ ኵሉ ፡ ፈቃዱ ።

3 አሚን ፡ ወዕበየ ፡ ስብሐት ፡ ምግባሩ ፤ ወጽድቁኒ ፡ ይነብር ፡ ለዓለም ።

4 ተዝካረ ፡ ገብረ ፡ ለስብሐቲሁ ፤ መሓሪ ፡ ወመስተሣህል ፡ እግዚአብሔር ። ወወሀቦሙ ፡ ሲሳዮሙ ፡ ለእለ ፡ ይፈርህዎ ፤

5 ወተዘከረ ፡ ኪዳኖ ፡ ዘለዓለም ። ወአርአዮሙ ፡ ለሕዝቡ ፡ ኀይለ ፡ ምግባሩ ፤

6 ከመ ፡ የሀቦሙ ፡ ርስተ ፡ ዘአሕዛብ ። ግብረ ፡ እደዊሁ ፡ ጽድቅ ፡ ወርትዕ ፤

7 ወእሙን ፡ ኵሉ ፡ ትእዛዙ ። ወጽኑዕ ፡ ለዓለመ ፡ ዓለም ፤ ወግቡር ፡ በጽድቅ ፡ ወበርትዕ ።

8 መድኀኒተ ፡ ፈነወ ፡ እግዚአብሔር ፡ ለሕዝቡ ፡ ወአዘዘ ፡ ሥርዐቶ ፡ ዘለዓለም ፤

9 ቅዱስ ፡ ወግሩም ፡ ስመ ፡ ዚአሁ ። ቀዳሚሃ ፡ ለጥበብ ፡ ፈሪሀ ፡ እግዚአብሔር ፡

10 ወምክር ፡ ሠናይት ፡ ለኵሉ ፡ ዘይገብራ ፤ ወስብሐቲሁኒ ፡ ይነብር ፡ ለዓለም ።

111 ሀሌሉያ ።

1 ብፁዕ ፡ ብእሲ ፡ ዘይፈርሆ ፡ ለእግዚአብሔር ፤ ወዘይፈቅድ ፡ ትእዛዞ ፡ ፈድፋደ ።

2 ወይከውን ፡ ጽኑዐ ፡ ዘርዑ ፡ ውስተ ፡ ምድር ፤ ትውልደ ፡ ጻድቃን ፡ ይትባረኩ ።

3 ክብር ፡ ወብዕል ፡ ውስተ ፡ ቤቱ ፤ ወጽድቁኒ ፡ ይነብር ፡ ለዓለመ ፡ ዓለም ።

4 ሠረቀ ፡ ብርሃን ፡ ለራትዓን ፡ በውስተ ፡ ጽልመት ፤ መሓሪ ፡ ወመስተሣህል ፡ እግዚአብሔር ፡ ወጻድቅ ፡ አምላክነ ።

5 ብእሲ ፡ መሓሪ ፡ መስተሣህል ፡ ወኄር ፤ ወይዔቅም ፡ ቃሎ ፡ በውስተ ፡ ፍትሕ ። ወኢይትሀወክ ፡ ለዓለም ፤

6 ዝክረ ፡ ጻድቅ ፡ ለዓለም ፡ ይሄሉ ። ወኢይፈርህ ፡ እምነገር ፡ እኩይ ፤

7 ጥቡዕ ፡ ልቡ ፡ ለተወክሎ ፡ በእግዚአብሔር ። ጽኑዕ ፡ ልቡ ፡ ወኢይትሀወክ ፡ ለዓለም ፤ እስከ ፡ ይሬኢ ፡ በጸላእቱ ።

8 ዘረወ ፡ ወወሀበ ፡ ለነዳይ ፡ ወጽድቁኒ ፡ ይነብር ፡ ለዓለመ ፡ ዓለም ፤ ወይትሌዐል ፡ ቀርኑ ፡ በክብር ።

9 ይሬኢ ፡ ኃጥእ ፡ ወይትመዓዕ ፡ ወይሐቂ ፡ ስነኒሁ ፡ ወይትመሰው ፤ ወተኀልቅ ፡ ፍትወቶሙ ፡ ለኃጥኣን ፡፡

112 ሀሌሉያ ።

1 ሰብሕዎ ፡ አግብርቲሁ ፡ ለእግዚአብሔር ፤ ወሰብሑ ፡ ለስመ ፡ እግዚአብሔር ።

2 ወይኩን ፡ ብሩከ ፡ ስሙ ፡ ለእግዚአብሔር ፤ እምይእዜ ፡ ወእስከ ፡ ለዓለም ።

3 እምሥራቀ ፡ ፀሐይ ፡ ወእስከነ ፡ ዐርብ ፤ ይትአኰት ፡ ስሙ ፡ ለእግዚአብሔር ።

4 ልዑል ፡ እግዚአብሔር ፡ መልዕልተ ፡ ኵሉ ፡ አሕዛብ ፤ ወውስተ ፡ ሰማያት ፡ ስብሐቲሁ ።

5 መኑ ፡ ከመ ፡ እግዚአብሔር ፡ አምላክነ ፤ ዘይነብር ፡ ውስተ ፡ አርያም ። ወይሬኢ ፡ ዘበታሕቱ ፤ በሰማይኒ ፡ ወበምድርኒ ።

6 ዘያነሥኦ ፡ ለነዳይ ፡ እምድር ፤ ወያሌዕሎ ፡ እመሬት ፡ ለምስኪን ።

7 ከመ ፡ ያንብሮ ፡ ምስለ ፡ መላእክቲሁ ፤ ወምስለ ፡ መላእክተ ፡ ሕዝቡ ።

8 ዘያነብራ ፡ ለመካን ፡ ውስተ ፡ ቤቱ ፤ ወያስትፌሥሓ ፡ ለእመ ፡ ውሉድ ።

113 ሀሌሉያ ።

1 አመ ፡ ይወፅኡ ፡ እስራኤል ፡ እምግብጽ ፤ ወቤተ ፡ ያዕቆብ ፡ እምሕዝበ ፡ ፀር ።

2 ወኮነ ፡ ይሁዳ ፡ መቅደሶ ፤ ወእስራኤልኒ ፡ ምኵናኖ ።

3 ባሕርኒ ፡ ርእየት ፡ ወጐየት ፤ ወዮርዳኖስኒ ፡ ገብአ ፡ ድኅሬሁ ።

4 ወአድባር ፡ አንፈርዐጹ ፡ ከመ ፡ ሐራጊት ፤ ወአውግርኒ ፡ ከመ ፡ መሓስአ ፡ አባግዕ ፤

5 ምንተ ፡ ኮንኪ ፡ ባሕር ፡ ዘጐየይኪ ፤ ወአንተኒ ፡ ዮርዳኖስ ፡ ዘገባእከ ፡ ድኅሬከ ።

6 ወአድባር ፡ ዘአንፈርዐጽክሙ ፡ ከመ ፡ ሐራጊት ፤ ወአውግርኒ ፡ ከመ ፡ መሓስአ ፡ አባግዕ ፤

7 እምቅድመ ፡ ገጹ ፡ ለእግዚአብሔር ፡ አድለቅለቀት ፡ ምድር ፤ እምቅድመ ፡ ገጹ ፡ ለአምላከ ፡ ያዕቆብ ።

8 ዘይሬስያ ፡ ለኰኵሕ ፡ አንቅዕተ ፡ ማያት ፤ ወለእዝኅ ፡ ዐዘቃተ ፡ ማያት ።

9 አኮ ፡ ለነ ፡ እግዚኦ ፡ አኮ ፡ ለነ ፤ ለስመ ፡ ዚአከ ፡ ሀብ ፡ ስብሐተ ፤

10 በምሕረትከ ፡ ወበጽድቅከ ። ከመ ፡ ኢይበሉነ ፡ አሕዛብ ፤ አይቴ ፡ ውእቱ ፡ አምላኮሙ ።

11 አምላክነሰ ፡ ውስተ ፡ ሰማይ ፡ ላዕለ ፤ በሰማይኒ ፡ ወበምድርኒ ፡ ኵሎ ፡ ዘፈቀደ ፡ ገብረ ፡ እግዚአብሔር ።

12 አማልክቲሆሙ ፡ ለአሕዛብ ፡ ዘወርቅ ፡ ወብሩር ፤ ግብረ ፡ እደ ፡ እጓለ ፡ እመሕያው ።

13 አፈ ፡ ቦሙ ፡ ወኢይነቡ ፤ ዐይነ ፡ ቦሙ ፡ ወኢይሬእዩ ።

14 እዝነ ፡ ቦሙ ፡ ወኢይሰምዑ ፤ አንፈ ፡ ቦሙ ፡ ወኢያጼንዉ ።

15 እደ ፡ ቦሙ ፡ ወኢይገሱ ፤ እግረ ፡ ቦሙ ፡ ወኢየሐውሩ ፤ ወኢይነቡ ፡ በጐራዒቶሙ ። ወአልቦሙ ፡ መንፈሰ ፡ ውስተ ፡ አፉሆሙ ።

16 ከማሆሙ ፡ ለይኩኑ ፡ ኵሎሙ ፡ እለ ፡ ገብርዎሙ ፤ ወኵሎሙ ፡ እለ ፡ ይትዌከሉ ፡ ቦሙ ።

17 ቤተ ፡ እስራኤል ፡ ተወከሉ ፡ በእግዚአብሔር ፤ ረዳኢሆሙ ፡ ውእቱ ፡ ወምእመኖሙ ።

18 ቤተ ፡ አሮን ፡ ተወከሉ ፡ በእግዚአብሔር ፤ ረዳኢሆሙ ፡ ውእቱ ፡ ወምእመኖሙ ።

19 እለ ፡ ትፈርህዎ ፡ ለእግዚአብሔር ፡ ተወከሉ ፡ በእግዚአብሔር ፤ ረዳኢሆሙ ፡ ውእቱ ፡ ወምእመኖሙ ።

20 እግዚአብሔር ፡ ተዘከረነ ፡ ወባረከነ ፤

21 ባርክ ፡ ቤተ ፡ እስራኤል ፤ ወባርክ ፡ ቤተ ፡ አሮን ።

22 ባርኮሙ ፡ ለኵሎሙ ፡ እለ ፡ ይፈርህዎ ፡ ለእግዚአብሔር ፤ ለንኡሶሙ ፡ ወለዐቢዮሙ ።

23 ይዌስክ ፡ እግዚአብሔር ፡ ላዕሌክሙ ፤ ላዕሌክሙ፡ ወላዕለ ፡ ውሉድክሙ ።

24 ብሩካን ፡ አንትሙ ፡ ለእግዚአብሔር ፤ ዘገብረ ፡ ሰማየ ፡ ወምድረ ።

25 ሰማየ ፡ ሰማያት ፡ ለእግዚአብሔር ፤ ወምድረሰ ፡ ወሀበ ፡ ለእጓለ ፡ እመሕያው ።

26 ዘአኮ ፡ ምዉታን ፡ ይሴብሑከ ፡ እግዚኦ ፤ ወኢኵሎሙ ፡ እለ ፡ ይወርዱ ፡ ውስተ ፡ ሲኦል ።

27 ንሕነ ፡ ሐያዋን ፡ ንባርኮ ፡ ለእግዚአብሔር ፤ እምይእዜ ፡ ወእስከ ፡ ለዓለም ።

114 ሀሌሉያ ።

1 አፍቀርኩ ፡ እስመ ፡ ሰምዐኒ ፡ እግዚአብሔር ፡ ቃለ ፡ ስእለትየ ።

2 ወአፅምአ ፡ እዝኖ ፡ ኀቤየ ፤ ወጸዋዕክዎ ፡ በመዋዕልየ ።

3 አኀዘኒ ፡ ጻዕረ ፡ ሞት ፡ ወረከበኒ ፡ ሕማመ ፡ ሲኦል ፤

4 ሕማም ፡ ወምንዳቤ ፡ ረከበኒ ። ወጸዋዕኩ ፡ ስመ ፡ እግዚአብሔር ፤

5 እግዚኦ ፡ ባልሓ ፡ ለነፍስየ ። መሓሪ ፡ እግዚአብሔር ፡ ወጻድቅ ፤ ወአምላክነሂ ፡ መስተሣህል ።

6 የዐቅብ ፡ ሕፃናተ ፡ እግዚአብሔር ፤ ተመንደብኩሂ ፡ ወአድኀነኒ ።

7 ግብኢ ፡ ነፍስየ ፡ ውስተ ፡ ዕረፍትኪ ፤ እስመ ፡ እግዚአብሔር ፡ ረዳኢኪ ።

8 እስመ ፡ አድኀና ፡ ለነፍስየ ፡ እሞት ፤ ወለአዕይንትየኒ ፡ እምአንብዕ ፡ ወለእገርየኒ ፡ እምዳኅፅ ።

9 ከመ ፡ አሥምሮ ፡ ለእግዚአብሔር ፡ በብሔረ ፡ ሕያዋን ።

115 ሀሌሉያ ።

1 አመንኩ ፡ በዘነበብኩ ፤ ወአንሰ ፡ ብዙኀ ፡ ሐመምኩ ።

2 አንሰ ፡ አቤ ፡ እምግዕዝየ ፤ ኵሉ ፡ ሰብእ ፡ ሐሳዊ ፡ ውእቱ ።

3 ምንተኑ ፡ አዐስዮ ፡ ለእግዚአብሔር ፤ በእንተ ፡ ኵሉ ፡ ዘገብረ ፡ ሊተ ።

4 ጽዋዐ ፡ ሕይወት ፡ እትሜጦ ፤ ወስመ ፡ እግዚአብሔር ፡ እጼውዕ ።

5 [ወእሁብ ፡ ብፅአትየ ፡ ለእግዚአብሔር ፤ በቅድመ ፡ ኵሉ ፡ ሕዝቡ ።] ክብር ፡ ሞቱ ፡ ለጻድቅ ፡ በቅድመ ፡ እግዚአብሔር ።

6 እግዚኦ ፡ አነ ፡ ገብርከ ፤ ገብርከ ፡ ወልደ ፡ አመትከ ፤

7 ወሰበርከ ፡ መዋቅሕትየ ። ለከ ፡ እሠውዕ ፡ መሥዋዕተ ፡ ስብሓት ፤ [ወስመ ፡ እግዚአብሔር ፡ እጼውዕ ፡]

8 ወእሁብ ፡ ብፅአትየ ፡ ለእግዚአብሔር ፤ በቅድመ ፡ ኵሉ ፡ ሕዝቡ ። በዐጸደ ፡ ቤተ ፡ እግዚአብሔር ፤ ወበማእከሌኪ ፡ ኢየሩሳሌም ።

116 ሀሌሉያ ።

1 ሰብሕዎ ፡ ለእግዚአብሔር ፡ ኵልክሙ ፡ አሕዛብ ፤ ወይሴብሕዎ ፡ ኵሎሙ ፡ ሕዝብ ።

2 እስመ ፡ ጸንዐት ፡ ምሕረቱ ፡ ላዕሌነ ፤ ወጽድቁሰ ፡ ለእግዚአብሔር ፡ ይሄሉ ፡ ለዓለም ።

117 ሀሌሉያ ።

1 ግነዩ ፡ ለእግዚአብሔር፡ እስመ ፡ ኄር ፤ እስመ ፡ ለዓለም ፡ ምሕረቱ ።

2 ንግሩ ፡ ቤተ ፡ እስራኤል ፡ ከመ ፡ ኄር ፤ ከመ ፡ ለዓለም ፡ ምሕረቱ ።

3 ንግሩ ፡ ቤተ ፡ አሮን ፡ ከመ ፡ ኄር ፤ ከመ ፡ ለዓለም ፡ ምሕረቱ ።

4 ንግሩ ፡ ኵልክሙ ፡ እለ ፡ ትፈርህዎ፡ ለእግዚአብሔር ፡ ከመ ፡ ኄር ፤ ከመ ፡ ለዓለም ፡ ምሕረቱ ።

5 ሶበ ፡ ተመንደብኩ ፡ ጸዋዕክዎ ፡ ለእግዚአብሔር ፤ ወሰምዐኒ ፡ ወአርሐበ ፡ ሊተ ።

6 እግዚአብሔር ፡ ይረድአኒ ፡ ኢይፈርህ ፤ እጓለ ፡ እመሕያው፡ ምንተ ፡ ይሬስየኒ ።

7 እግዚአብሔር ፡ ይረድአኒ ፤ ወአነ ፡ እሬእዮሙ ፡ ለጸላእትየ ።

8 ይኄይስ ፡ ተአምኖ ፡ በእግዚአብሔር ፤ እምተአምኖ ፡ በእጓለ ፡ እመሕያው ።

9 ይኄይስ ፡ ተአምኖ ፡ በእግዚአብሔር ፤ እምተሰፍዎ ፡ በመላእክት ።

10 ኵሎሙ ፡ አሕዛብ ፡ ዐገቱኒ ፤ ወበስመ ፡ እግዚአብሔር ፡ ሞአክዎሙ ።

11 ዐጊተሰ ፡ ዐገቱኒ ፤ ወበስመ ፡ እግዚአብሔር ፡ ሞአክዎሙ ።

12 ዐገቱኒ ፡ ከመ ፡ ንህብ ፡ መዓረ ፡ ወነዱ ፡ ከመ ፡ እሳት ፡ ውስተ ፡ አስዋክ ፤ ወበስመ ፡ እግዚአብሔር ፡ ሞአክዎሙ ።

13 ተንተንኩ ፡ ለወዲቅ ፤ ወእግዚአብሔር ፡ አንሥአኒ ።

14 ኀይልየኒ ፡ ወዝክርየኒ ፡ እግዚአብሔር ፤ ወውእቱ ፡ ኮነኒ ፡ መድኀንየ ።

15 ቃለ ፡ ትፍሥሕት ፡ ውስተ ፡ አብያቲሆሙ ፡ ለጻድቃን ፤

16 የማነ ፡ እግዚአብሔር ፡ ገብረት ፡ ኀይለ ። የማነ ፡ እግዚአብሔር ፡ አልዐለተኒ ፤ የማነ ፡ እግዚአብሔር ፡ ገብረት ፡ ኀይለ ።

17 ኢይመውት ፡ ዘእንበለ ፡ ዘአሐዩ ፤ ወእነግር ፡ ግብሮ ፡ ለእግዚአብሔር ።

18 ገሥጾሰ ፡ ገሠጸኒ ፡ እግዚአብሔር ፤ ወለሞትሰ ፡ ባሕቱ ፡ ኢመጠወኒ ።

19 አርኅዉ ፡ ሊተ ፡ አናቅጸ ፡ ጽድቅ ፤ እባእ ፡ ውስቴቶን ፡ ወእግነየ ፡ ለእግዚአብሔር ። ዝአንቀጽ ፡ እንተ ፡ እግዚአብሔር ፤ ጻድቃን ፡ ይበውኡ ፡ ውስቴታ ።

20 እገኒ ፡ ለከ ፡ እግዚኦ ፡ እስመ ፡ ሰማዕከኒ ፤ ወኮንከኒ ፡ መድኀንየ ።

21 እብን ፡ ዘመነንዋ ፡ ነደቅት ፤ ይእቲ ፡ ኮነት ፡ ውስተ ፡ ርእሰ ፡ ማዕዘንት ።

22 እምኀበ ፡ እግዚአብሔር ፡ ኮነት ፡ ዛቲ ፤ ወነካር ፡ ይእቲ ፡ ለአዕይንቲነ ።

23 ዛቲ ፡ ዕለት ፡ እንተ ፡ ገብረ ፡ እግዚአብሔር ፤ ንትፈሣሕ ፡ ወንትሐሠይ ፡ ባቲ ።

24 ኦእግዚኦ ፡ አድኅንሶ ፤ ኦእግዚኦ ፡ ሠርሐሶ ። ቡሩክ ፡ ዘይመጽእ ፡ በስመ ፡ እግዚአብሔር ፤

25 በረክናክሙ ፡ እምቤተ ፡ እግዚአብሔር ። እግዚአብሔር ፡ እግዚእ ፡ ወአስተርአየ ፡ ለነ ፤

26 ግበሩ ፡ በዓለ ፡ በትፍሥሕት ፡ በኀበ ፡ እለ ፡ ያስተሓምምዎ ፡ እስከ ፡ አቅርንቲሁ ፡ ለምሥዋዕ ።

27 አምላኪየ ፡ አንተ ፡ ወእገኒ ፡ ለከ ፤ አምላኪየ ፡ አንተ ፡ ወኣሌዕለከ ።

28 እገኒ ፡ ለከ ፡ እግዚኦ ፡ እስመ ፡ ሰማዕከኒ ፡ ወኮንከኒ ፡ መድኀንየ ።

29 ግነዩ ፡ ለእግዚአብሔር፡ እስመ ፡ ኄር ፤ እስመ ፡ ለዓለም፡ ምሕረቱ ።

118 ሀሌሉያ ።

1 ፩ ፤ አሌፍ ። ብፁአን ፡ እለ ፡ ንጹሓን ፡ በፍኖቶሙ ፤ እለ ፡ ይሐውሩ ፡ በሕገ ፡ እግዚአብሔር ።

2 ብፁዓን ፡ እለ ፡ ይኀሡ ፡ ስምዖ ፤ ወበኵሉ ፡ ልቦሙ ፡ ይኀሥዎ ።

3 ወእለሰ ፡ ይገብሩ ፡ ዐመፃ ፤ ፍኖተ ፡ ዚአሁ ፡ ኢሖሩ ።

4 አንተ ፡ አዘዝከ ፡ ይዕቀቡ ፡ ትእዛዘከ ፡ ፈድፋደ ።

5 ይረትዕሰ ፡ ይርታዕ ፡ ፍኖትየ ፤ ከመ ፡ እዕቀብ ፡ ኵነኔከ ።

6 ውእቱ ፡ ጊዜ ፡ ኢይትኀፈር ፤ በርእየ ፡ ኵሉ ፡ ትእዛዝከ ።

7 እገኒ ፡ ለከ ፡ እግዚኦ ፡ በልብ ፡ ርቱዕ ፤ ሶበ ፡ ተመሀርኩ ፡ ኵነኔ ፡ ጽድቅከ ።

8 ወአዐቅብ ፡ ኵነኔከ ፤ ወኢትግድፈኒ ፡ ለዝሉፉ ።

9 ፪ ፤ ቤት ። በምንተ ፡ ያረትዕ ፡ ወሬዛ ፡ ፍኖቶ ፤ በዐቂበ ፡ ነቢብከ ።

10 በኵሉ ፡ ልብየ ፡ ኀሠሥኩከ ፤ ኢታርሕቀኒ ፡ እምትእዛዝከ ።

11 ውስተ ፡ ክብየ ፡ ኀባእኩ ፡ ነቢበከ ፤ ከመ ፡ ኢየአብስ ፡ ለከ ።

12 ብሩክ ፡ አንተ ፡ እግዚኦ ፡ ወምህረኒ ፡ ኵነኔከ ።

13 በከናፍርየ ፡ ነገርኩ ፡ ኵሎ ፡ ኰነኔ ፡ አፉከ ።

14 በፍኖተ ፡ ስመዕከ ፡ ተፈሣሕኩ ፤ ከመ ፡ ዘበኵሉ ፡ ብዕል ።

15 ወእዛዋዕ ፡ በትእዛዝከ ፤ ወአኀሥሥ ፡ ፍናዊከ ።

16 ወኣነብብ ፡ ትእዛዛቲከ ፤ ወኢይረስዕ ፡ ቃለከ ።

17 ፫ ፤ ጋሜል ። ዕስዮ ፡ ለገብርከ ፡ ከመ ፡ እሕዮ ፤ ወእዕቀብ ፡ ነቢበከ ።

18 ክሥቶን ፡ ለአዕይንትየ ፡ ወእርአይ ፤ መድምመከ ፡ እምሕግከ ።

19 ፈላሲ ፡ አነ ፡ ውስተ ፡ ምድር ፤ ኢትኅባእ ፡ እምኔየ ፡ ትእዛዘከ ።

20 አፍቀረት ፡ ነፍስየ ፡ ወፈተወት ፡ ኵነኔከ ፡ በኵሉ ፡ ጊዜ ።

21 ገሠጽኮሙ ፡ ለዕቡያን ፤ ርጉማን ፡ እለ ፡ ይትገሐሡ ፡ እምትእዛዝከ ።

22 ኣእትት ፡ እምኔየ ፡ ጽእለተ ፡ ወኀሳረ ፤ እስመ ፡ ትእዛዘከ ፡ ኀሠሥኩ ።

23 እስመ ፡ ነበሩ ፡ መላእክት ፡ ወኪያየ ፡ ሐመዩ ፤ ወገብርከሰ ፡ ይዛዋዕ ፡ በኵነኔከ ።

24 እስመ ፡ ስምዕከ ፡ ተመሀርየ ፡ ውእቱ ፤ ወምክርየኒ ፡ ኵነኔ ፡ ዚአከ ።

25 ፬ ፤ ዳሌጥ ። ጠግዐት ፡ ነፍስየ ፡ በምድር ፤ ኣሕይወኒ ፡ በከመ ፡ ነቢብከ ።

26 ነገርኩ ፡ ፍናዊከ ፡ ወሰማዕከኒ ፤ ወምህረኒ ፡ ኵነኔከ ።

27 ፍኖተ ፡ ጽድቅከ ፡ አለብወኒ ፤ ወእዛዋዕ ፡ በመንክርከ ።

28 ደቀሰት ፡ ነፍስየ ፡ እምሐዘን ፤ አጽንዐኒ ፡ በነቢብከ ።

29 ፍኖተ ፡ ዐመፃ ፡ አርሕቅ ፡ እምኔየ ፤ ወበሕግከ ፡ ተሣሀለኒ ።

30 ፍኖተ ፡ ጽድቅከ ፡ አብደርኩ ፤ ወኵነኔከሰ ፡ ኢረሳዕኩ ።

31 ተለውኩ ፡ ስምዐከ ፤ እግዚኦ ፡ ኢታስተኀፍረኒ ።

32 ፍኖተ ፡ ትእዛዝከ ፡ ሮጽኩ ፤ ሶበ ፡ አርሐብኮ ፡ ለልብየ ።

33 ፭ ፤ ሄ ። ምህረኒ ፡ እግዚኦ ፡ ፍኖተ ፡ ጽድቅከ ፤ ወእኅሥሣ ፡ በኵሉ ፡ ጊዜ ።

34 አለብወኒ ፡ ወእኅሥሥ ፡ ሕገከ ፤ ወእዕቀቦ ፡ በኵሉ ፡ ልብየ ።

35 ምርሐኒ ፡ ፍኖተ ፡ ትእዛዝከ ፤ እስመ ፡ ኪያሃ ፡ ፈቀድኩ ።

36 ሚጥ ፡ ልብየ ፡ ውስተ ፡ ስምዕከ ፤ ወአኮ ፡ ውስተ ፡ ትዕግልት ።

37 ሚጦን ፡ ለአዕይንትየ ፡ ከመ ፡ ኢይርአያ ፡ ከንቶ ፤ ወኣሕይወኒ ፡ በፍኖትከ ።

38 አቅም ፡ ለገብርከ ፡ ዘነበብከ ፡ ውስተ ፡ ነቢብከ ።

39 ኣእትት ፡ እምኔየ ፡ ጽእለተ ፡ ዘተሐዘብኩ ፤ እስመ ፡ ሠናይ ፡ ኵነኔከ ።

40 ናሁ ፡ ፈተውኩ ፡ ትእዛዘከ ፤ ወኣሕይወኒ ፡ በጽድቅከ ።

41 ፮ ፤ ዋው ። ወይምጻእ ፡ ላዕሌየ ፡ ምሕረትከ ፡ እግዚኦ ፤ እግዚኦ ፡ አድኅኖትከ ፡ በከመ ፡ ነቢብከ ።

42 አውሥኦሙ ፡ ቃለ ፡ ለእለ ፡ ይጼእሉኒ ፤ እስመ ፡ ተወከልኩ ፡ በቃልከ ።

43 ወኢታእትት ፡ ቃለ ፡ ጽድቅ ፡ እምአፉየ ፡ ለግሙራ ፤ እስመ ፡ ተወከልኩ ፡ በኵነኔከ ።

44 ወአዐቅብ ፡ ሕገከ ፡ በኵሉ ፡ ጊዜ ፤ ለዓለም ፡ ወለዓለመ ፡ ዓለም ።

45 ወአሐውር ፡ ስፉሕ ፤ እስመ ፡ ትእዛዘከ ፡ ኀሠሥኩ ።

46 ወእነግር ፡ ስምዐከ ፡ በቅድመ ፡ ነገሥተ ፤ ወኢይትኀፈር ።

47 ወኣነብብ ፡ ትእዛዘከ ፤ ዘአፍቀርኩ ፡ ጥቀ ።

48 ወኣነሥእ ፡ እደውየ ፡ ኀበ ፡ ትእዛዝከ ፡ ዘአፍቀርኩ ፤ ወእዛዋዕ ፡ በትእዛዝከ ።

49 ፯ ፤ ዛይ ። ተዘከር ፡ ቃለከ ፡ ዘአሰፈውኮ ፡ ለገብርከ ።

50 ወይእቲ ፡ አስተፈሥሐተኒ ፡ በሕማምየ ፤ እስመ ፡ ቃልከ ፡ ኣሕየወኒ ።

51 ዕቡያን ፡ ዐመፃ ፡ ፈድፋደ ፤ ወእምሕግከሰ ፡ ኢተገሐሥኩ ።

52 ወተዘከርኩ ፡ ፍትሐከ ፡ ዘእምዓለም ፤ ወተፈሣሕኩ ፡ እግዚኦ ።

53 ሐዘን ፡ አኀዘኒ ፡ እምኃጥኣን ፤ እለ ፡ ኀደጉ ፡ ሕገከ ።

54 መዝሙር ፡ ኮነኒ ፡ ኵነኔከ ፤ በብሔር ፡ ኀበ ፡ ፈለስኩ ።

55 ተዘከርኩ ፡ በሌሊት ፡ ስመከ ፡ እግዚኦ ፤ ወዐቀብኩ ፡ ሕገከ ።

56 ወይእቲ ፡ ኮነተኒ ፤ እስመ ፡ ኵነኔከ ፡ ኀሠሥኩ ።

57 ፰ ፤ ሔት ። ክፍልየ ፡ እግዚአብሔር ፤ ወእቤ ፡ ይዕቀቡ ፡ ሕገከ ።

58 ሰአልኩ ፡ ገጸከ ፡ እግዚኦ ፡ በኵሉ ፡ ልብየ ፤ ተሣሀለኒ ፡ በከመ ፡ ነቢብከ ።

59 ወሐለይኩ ፡ በእንተ ፡ ፍናዊከ ፤ ወሜጥኩ ፡ እግርየ ፡ ውስተ ፡ ስምዕከ ።

60 አጥባዕኩ ፡ ወኢናፈቁ ፤ ለዐቂበ ፡ ትእዛዝከ ።

61 አሕባለ ፡ ኃጥኣን ፡ ተፀፍራ ፡ ላዕሌየ ፤ ወሕገከሰ ፡ ኢረሳዕኩ ።

62 መንፍቀ ፡ ሌሊት ፡ እትነሣእ ፡ ከመ ፡ እግነይ ፡ ለከ ፤ በእንተ ፡ ኵነኔ ፡ ጽድቅከ ።

63 ከማሆሙ ፡ አነ ፡ ለኵሎሙ ፡ እለ ፡ ይፈርሁከ ፤ ወለእለ ፡ የዐቅቡ ፡ ትእዛዘከ ።

64 ሣህልከ ፡ እግዚኦ ፡ መልአ ፡ ምድረ ፤ ወምህረኒ ፡ ኵነኔከ ።

65 ፱ ፤ ጤት ። ሠናይተ ፡ ገበርከ ፡ ላዕለ ፡ ገብርከ ፤ እግዚኦ ፡ በከመ ፡ ቃልከ ።

66 ሠናይተ ፡ ምክር ፡ ወጥበበ ፡ ምህረኒ ፤ እስመ ፡ ተአመንኩ ፡ በትእዛዝከ ።

67 ወአንሰ ፡ ዘእንበለ ፡ እሕምም ፡ ነሳሕኩ ፤ ወበእንተዝ ፡ አነ ፡ ዐቀብኩ ፡ ነቢበከ ።

68 ኄር ፡ አንተ ፡ እግዚኦ ፤ ወበኂሩትከ ፡ ምህረኒ ፡ ኵነኔከ ።

69 በዝኀ ፡ ላዕሌየ ፡ ዐመፃሆሙ ፡ ለዕቡያን ፤ ወአንሰ ፡ በኵሉ ፡ ልብየ ፡ ኀሠሥኩ ፡ ትእዛዘከ ።

70 ረግዐ ፡ ከመ ፡ ሐሊብ ፡ ልቦሙ ፤ ወአንሰ ፡ ኣነብብ ፡ በሕግከ ።

71 ደለወኒ ፡ ዘኣሕመምከኒ ፤ ከመ ፡ አእምር ፡ ኵነኔከ ።

72 ይኄይሰኒ ፡ ሕገ ፡ አፉከ ፤ እምኣእላፍ ፡ ወርቅ ፡ ወብሩር ።

73 ፲ ፤ ዮድ ። እደቂከ ፡ ገብራኒ ፡ ወለሐኳኒ ፤ ኣለብወኒ ፡ ወእትመሀር ፡ ትእዛዘከ ።

74 እለ ፡ ይፈርሁከ ፡ ይርእዩኒ ፡ ወይትፌሥሑ ፤ እስመ ፡ ተወከልኩ ፡ በነቢብከ ።

75 ኣእመርኩ ፡ እግዚኦ ፡ ከመ ፡ ጽድቅ ፡ ኵነኔከ ፤ ወበርቱዕ ፡ ኣሕመምከኒ ።

76 ይኩነኒ ፡ ምሕረትከ ፡ ከመ ፡ ያስተፈሥሐኒ ፤ ወበከመ ፡ ነቢብከ ፡ ይኩኖ ፡ ለገብርከ ።

77 ይምጽአኒ ፡ ሣህልከ ፡ ወእሕየው ፤ እስመ ፡ ተመሀርየ ፡ ውእቱ ፡ ሕግከ ።

78 ይትኀፈሩ ፡ ዕቡያን ፡ እስመ ፡ ዐመፃ ፡ መከሩ ፡ ላዕሌየ ፤ ወአንሰ ፡ እዛዋዕ ፡ በትእዛዝከ ።

79 ይግብኡኒ ፡ እለ ፡ ይፈርሁከ ፤ ወእለ ፡ ያአምሩ ፡ ስምዐከ ።

80 ለይኩን ፡ ልብየ ፡ ንጹሐ ፡ በኵነኔከ ፤ ከመ ፡ ኢይተኀፈር ።

81 ፲፩ ፤ ካፍ ። ኀለፈት ፡ ነፍስየ ፡ ውስተ ፡ አድኅኖትከ ፤ ወተወከልኩ ፡ በቃልከ ።

82 ደክማ ፡ አዕይንትየ ፡ ለመድኀኒትከ ፤ እንዘ ፡ ይብላ ፡ ማእዜ ፡ ታስተፌሥሐኒ ።

83 እስመ ፡ ኮንኩ ፡ ከመ ፡ ዝቅ ፡ ውስተ ፡ አስሐትያ ፤ ወኵነኔከሰ ፡ ኢረሳዕኩ ።

84 ሚመጠን ፡ እማንቱ ፡ መዋዕሊሁ ፡ ለገብርከ ፤ ወማእዜ ፡ ትፈትሕ ፡ ሊተ ፡ እምእለ ፡ ይሰዱኒ ።

85 ነገሩኒ ፡ ኃጥኣን ፡ ዘውዐ ፤ ወአኮሰ ፡ ከመ ፡ ሕግከ ፡ እግዚኦ ።

86 ኵሉ ፡ ትእዛዝከ ፡ ጽድቅ ፤ በዐመፃ ፡ ሰደዱኒ ፡ ርድአኒ ።

87 ሕቀ ፡ ከመ ፡ ዘእምደምሰሱኒ ፡ ውስተ ፡ ምድር ፤ ወአንሰ ፡ ኢኀደጉ ፡ ትእዛዘከ ።

88 በከመ ፡ ምሕረትከ ፡ ኣሕይወኒ ፤ ወእዕቀብ ፡ ስምዐ ፡ አፉከ ።

89 ፲፪ ፤ ላሜድ ። እግዚኦ ፡ ለዓለም ፡ ይነብር ፡ ቃልከ ፡ ውስተ ፡ ሰማይ ።

90 ወለትውልደ ፡ ትውልድ ፡ ጽድቅከ ፤ ሳረርካ ፡ ለምድር ፡ ወትነብር ።

91 ወበትእዛዝከ ፡ ይቀውም ፡ ዕለት ፤ እስመ ፡ ኵሎ ፡ ቀነይከ ።

92 ሶበ ፡ አኮ ፡ ሕግከ ፡ ተመሀርየ ፡ ውእቱ ፤ ትካት ፡ እምተሐጐልኩ ፡ በኀሳርየ ።

93 ለዓለም ፡ ኢይረስዕ ፡ ኵነኔከ ፤ እስመ ፡ ቦቱ ፡ አሕየውከኒ ።

94 ዘዚአከ ፡ አነ ፡ አድኅነኒ ፤ እስመ ፡ ኵነኔከ ፡ ኀሠሥኩ ።

95 ኪያየ ፡ ይጸንሑ ፡ ኃጥኣን ፡ ይቅትሉኒ ፤ እስመ ፡ ስምዐከ ፡ ለበውኩ ።

96 ለኵሉ ፡ ግብር ፡ ርኢኩ ፡ ማኅለቅቶ ፤ ወትእዛዝከሰ ፡ ርሒብ ፡ ፈድፋደ ።

97 ፲፫ ፤ ሜም ። ጥቀ ፡ አፍቀርኩ ፡ ሕገከ ፡ እግዚኦ ፤ ኵሎ ፡ አሚረ ፡ ተምሀርየ ፡ ውእቱ ።

98 እምጸላእትየ ፡ አጥበበኒ ፡ ትእዛዝከ ፤ እስመ ፡ ለዓለም ፡ ሊተ ፡ ውእቱ ።

99 እምኵሎሙ ፡ እለ ፡ መሀሩኒ ፡ ጠበብኩ ፤ እስመ ፡ ተመሀርየ ፡ ውእቱ ፡ ትእዛዝከ ።

100 ወእምአእሩግኒ ፡ ጠበብኩ ፤ እስመ ፡ ትእዛዘከ ፡ ኀሠሥኩ ።

101 እምኵሉ ፡ ፍኖተ ፡ ዐመፃ ፡ ከላእኩ ፡ እግርየ ፤ ከመ ፡ እዕቀብ ፡ ነቢበከ ።

102 ወኢተገሐስኩ ፡ እምኵነኔከ ፤ እስመ ፡ አንተ ፡ መሀርከኒ ።

103 ጥዑም ፡ ለጕርዔየ ፡ ነቢብከ ፤ እምዓር ፡ ወሶከር ፡ ጥዕመኒ ፡ ለአፉየ ።

104 እምትእዛዝከ ፡ ለበውኩ ፤ በእንተዝ ፡ ኵሎ ፡ ፍኖተ ፡ ዐመፃ ፡ ጸላእኩ ።

105 ፲፬ ፤ ኖን ። ማሕቶት ፡ ለእግርየ ፡ ሕግከ ፤ ብርሃን ፡ ለፍኖትየ ።

106 መሐልኩ ፡ ወአጥባዕኩ ፤ ከመ ፡ እዕቀብ ፡ ኵነኔ ፡ ጽድቅከ ።

107 ሐመምኩ ፡ ፈድፋደ ፤ እግዚኦ ፡ ኣሕይወኒ ፡ በከመ ፡ ነቢብከ ።

108 ሥመር ፡ እግዚኦ ፡ ቃለ ፡ አፉየ ፤ ወምህረኒ ፡ ኵነኔከ ።

109 ነፍስየ ፡ ውስተ ፡ እዴከ ፡ በኵሉ ፡ ጊዜ ፤ ወኢረሳዕኩ ፡ ሕገከ ።

110 ሠርዑ ፡ ሊተ ፡ ኃጥኣን ፡ መሥገርተ ፤ ወኢስሕትኩ ፡ እምትእዛዝከ ።

111 ወረስኩ ፡ ስምዐከ ፡ ለዓለም ፤ እስመ ፡ ሐሤቱ ፡ ለልብየ ፡ ውእቱ ።

112 ሜጥኩ ፡ ልብየ ፡ ከመ ፡ እግበር ፡ ትእዛዘከ ፤ ለዓለም ፡ ዘእንበለ ፡ ሒስ ።

113 ፲፭ ፤ ሳምኬት ። ዐማፂያነ ፡ ጻላእኩ ፤ ወሕገከሰ ፡ አፍቀርኩ ።

114 ረዳኢየ ፡ ወምስካይየ ፡ አንተ ፤ ወበቃልከ ፡ ተወከልኩ ።

115 ተገሐሡ ፡ እምኔየ ፡ ዐማፂያን ፤ ወእኅሥሥ ፡ ትእዛዞ ፡ ለአምላኪየ ።

116 ተወከፈኒ ፡ በከመ ፡ ነቢብከ ፡ ወእሕየው ፤ ወኢታስተኀፍረኒ ፡ እምተስፋየ ።

117 ርድእኒ ፡ ወአድኅነኒ ፤ ወኣነብብ ፡ በኵነኔከ ፡ በኵሉ ፡ ጊዜ ።

118 ኣኅሰርኮሙ ፡ ለኵሎሙ ፡ እለ ፡ ይርሕቁ ፡ እምትእዛዝከ ፤ እስመ ፡ ዐመፃ ፡ ፍትወቶሙ ።

119 ዐላውያን ፡ እሙንቱ ፡ ኵሎሙ ፡ ኃጥኣነ ፡ ምድር ፤ በእንተዝ ፡ አፍቀርኩ ፡ ስምዐከ ።

120 አውድድ ፡ ውስተ ፡ ሥጋየ ፡ ፈሪሆተከ ፤ እስመ ፡ ፈራህኩ ፡ እምኵነኔከ ።

121 ፲፮ ፤ ዔ ፡ ገበርኩ ፡ ፍትሐ ፡ ወጽድቀ ፤ ኢትመጥወኒ ፡ ለእለ ፡ ይሣቅዩኒ ።

122 ጽንሖ ፡ ለገብርከ ፡ ውስተ ፡ ሠናይ ፤ ወኢይትዐገሉኒ ፡ ዕቡያን ።

123 ደክማ ፡ አዕይንትየ ፡ ለአድኅኖትከ ፤ ወለቃለ ፡ ጽድቅከ ።

124 ግበር ፡ ለገብርከ ፡ በከመ ፡ ምሕረትከ ፤ ወምህረኒ ፡ ኵነኔከ ።

125 ገብርከ ፡ አነ ፡ ኣለብወኒ ፤ ወኣእምር ፡ ስምዐከ ።

126 ጊዜ ፡ ለገቢር ፡ ለእግዚአብሔር ፤ ወዐለዉ ፡ ሕገከ ።

127 በእንተዝ ፡ አፍቀርኩ ፡ ትእዛዘከ ፤ እምወርቅ ፡ ወእምጳዝዮን ።

128 በእንተዝ ፡ አርታዕኩ ፡ ኀበ ፡ ኵሉ ፡ ትእዛዝከ ፤ ኵሎ ፡ ፈኖተ ፡ ዐመፃ ፡ ጸላእኩ ።

129 ፲፯ ፤ ፌ ። መንክር ፡ ስምዕከ ፤ በእንተዝ ፡ ኀሠሠቶ ፡ ነፍስየ ።

130 ነገረ ፡ ቃልከ ፡ ያበርህ ፤ ወያጠብብ ፡ ሕፃናተ ።

131 አፉየ ፡ ከሠትከ ፡ ወነፍስየ ፡ አናኅኩ ፤ እስመ ፡ ትእዛዘከ ፡ አፍቀርኩ ፤

132 ነጽር ፡ ላዕሌየ ፡ ወተሣሀለኒ ፤ በከመ ፡ ፍትሖሙ ፡ ለእለ ፡ ያፍቅሩ ፡ ስመከ ።

133 አርትዕ ፡ ፍኖትየ ፡ ወሑረትየ ፡ በከመ ፡ ነቢብከ ፤ ወአይምአኒ ፡ ኵሉ ፡ ኀጢአት ።

134 አድኅነኒ ፡ እምትእግልተ ፡ እጓለ ፡ እመሕያው ፤ ወእዕቀብ ፡ ትእዛዘከ ።

135 አብርህ ፡ ገጸከ ፡ ላዕለ ፡ ገብርከ ፤ ወምህረኒ ፡ ኵነኔከ ።

136 ሙሓዘ ፡ ማይ ፡ ወረደ ፡ እምአዕይንትየ ፤ ወእመአኮሰ ፡ እምኢዐቅብኩ ፡ ሕገከ ።

137 ፲፰ ፤ ጻዴ ። ጻድቅ ፡ አንተ ፡ እግዚኦ ፤ ወርቱዕ ፡ ኳነኔከ ።

138 ወአዘዝከ ፡ ስምዐከ ፡ በጽድቅ ፤ ወርቱዓ ፡ ፈድፋደ ።

139 መሰወኒ ፡ ቅንአተ ፡ ቤትከ ፤ እስመ ፡ ረስዑ ፡ ትእዛዘከ ፡ ጸላእትየ ።

140 ርሱን ፡ ቃልከ ፡ ፈድፋደ ፤ ወገብርከሰ ፡ አፍቀሮ ።

141 ወሬዛ ፡ አነ ፡ ወትሑት ፤ ወሕገከሰ ፡ ኢረሳዕኩ ።

142 ጽድቅከሰ ፡ ጽድቅ ፡ ዘለዓለም ፤ ወቃልከኒ ፡ እሙን ፡ ውእቱ ።

143 ሕማም ፡ ወምንዳቤ ፡ ረከበኒ ፤ ወትእዛዝከሰ ፡ ተመሀርየ ፡ ውእቱ ።

144 ጽድቅ ፡ ውእቱ ፡ ስምዕከ ፡ ለዓለም ፤ ኣለብወኒ ፡ ወኣሕይወኒ ።

145 ፲፱ ፤ ቆፍ ። ጸራኅኩ ፡ በኵሉ ፡ ልብየ ፡ ስምዐኒ ፡ እግዚኦ ፤ ወኀሠሥኩ ፡ ኵነኔከ ።

146 ጸራኅኩ ፡ ኀቤከ ፡ ስምዐኒ ፡ ወአድኅነኒ ፤ ወእዕቀብ ፡ ስምዐከ ።

147 በጻሕኩ ፡ ማእከለ ፡ አድባር ፡ ወከላሕኩ ፤ እስመ ፡ ቃለከ ፡ ተሰፈውኩ ።

148 በጽሓ ፡ አዕይንትየ ፡ ለገዪስ ፤ ከመ ፡ ኣንብብ ፡ ቃለከ ።

149 ሰማዕ ፡ እግዚኦ ፡ ቃልየ ፡ በከመ ፡ ሣህልከ ፤ ወኣሕይወኒ ፡ በከመ ፡ ፍትሕከ ።

150 ቀርቡ ፡ እለ ፡ ሮዱኒ ፡ በዐመፃ ፤ ወእምሕግከሰ ፡ ርሕቁ ።

151 ቅሩብ ፡ አንተ ፡ እግዚኦ ፤ ወርቱዕ ፡ ኵሉ ፡ ፍናዊከ ።

152 እምትካት ፡ አእመርኩ ፡ እምስምዕከ ፤ ከመ ፡ ለዓለም ፡ ሳረርኮን ።

153 ፳ ፤ ሬስ ። ርኢ ፡ ሕማምየ ፡ ወአድኅነኒ ፤ እስመ ፡ ኢረሳዕኩ ፡ ሕገከ ።

154 ፍታሕ ፡ ፍትሕየ ፡ ወባልሐኒ ፤ ወበእንተ ፡ ቃልከ ፡ ኣሕይወኒ ።

155 ርሑቅ ፡ ሕይወት ፡ እምኃጥኣን ፤ እስመ ፡ ኢኀሠሡ ፡ ኵነኔከ ።

156 ብዙኅ ፡ ሣህልከ ፡ እግዚኦ ፡ ፈድፋደ ፤ ወኣሕይወኒ ፡ በከመ ፡ ፍትሕከ ።

157 ብዙኃን ፡ እለ ፡ ሮዱኒ ፡ ወአመንደቡኒ ፤ ወኢተገሐስኩ ፡ እምስምዕከ ።

158 ርኢኩ ፡ አብደነ ፡ ወተከዝኩ ፤ እስመ ፡ ኢዐቀቡ ፡ ቃለከ ።

159 ርኢ ፡ ከመ ፡ አፍቀርኩ ፡ ትእዛዘከ ፤ እግዚኦ ፡ ኣሕይወኒ ፡ በሣህልከ ።

160 ቀዳሜ ፡ ቃልከ ፡ ጽድቅ ፡ ውእቱ ፤ ወለዓለም ፡ ኵሉ ፡ ኵነኔከ ፡ ጽድቅ ።

161 ፳፩ ፤ ሳን ። መላእክት ፡ ሰደዱኒ ፡ በከንቱ ፤ ወእምቃልከ ፡ ደንገፀኒ ፡ ልብየ ።

162 ወበቃልከ ፡ ተፈሣሕኩ ፤ ከመ ፡ ዘረከበ ፡ ምህርካ ፡ ብዙኀ ።

163 ዐመፃ ፡ ጸላእኩ ፡ ወአስቆረርኩ ፤ ወሕገከሰ ፡ አፍቀርኩ ።

164 ስብዐ ፡ ለዕለትየ ፡ እሴብሐከ ፤ በእንተ ፡ ኵነኔ ፡ ጽድቅከ ።

165 ሰላም ፡ ብዙኅ ፡ ለእለ ፡ ያፍቅሩ ፡ ስመከ ፤ ወአልቦሙ ፡ ዕቅፍተ ።

166 ተሰፈውኩ ፡ አድኅኖተከ ፡ እግዚኦ ፤ ወዐቀብኩ ፡ ትእዛዘከ ።

167 ዐቀበት ፡ ነፍስየ ፡ ስምዐከ ፤ ወአፍቀረቶ ፡ ፈድፋደ ።

168 ዐቀብኩ ፡ ትእዛዘከ ፡ ወስምዐከኒ ፤ እስመ ፡ ኵሉ ፡ ፍናዊየ ፡ ቅድሜከ ፡ እግዚኦ ።

169 ፳፪ ፤ ታው ። ለትቅረብ ፡ ስእለትየ ፡ ኀቤከ ፡ እግዚኦ ፤ ወበከመ ፡ ቃልከ ፡ አለብወኒ ።

170 ትብጻሕ ፡ አስተብቍዖትየ ፡ ቅድሜከ ፡ እግዚኦ ፤ ወበከመ ፡ ቃልከ ፡ አድኅነኒ ።

171 ጐሥዐ ፡ ከናፍርየ ፡ ስብሐቲከ ፤ እስመ ፡ መሀርከኒ ፡ ኵነኔከ ።

172 ነበበ ፡ ልሳንየ ፡ ቃለከ ፤ እስመ ፡ ጽድቅ ፡ ኵሉ ፡ ትእዛዝከ ።

173 ይኩነኒ ፡ የማንከ ፡ ከመ ፡ ያድኅነኒ ፤ እስመ ፡ ትእዛዘከ ፡ አፍቀርኩ ።

174 አፍቀርኩ ፡ አድኅኖተከ ፡ እግዚኦ ፤ ወሕግከሰ ፡ ተመሀርየ ፡ ውእቱ ።

175 ትሕየወኒ ፡ ነፍስየ ፡ ወእሰብሐከ ፤ ወይርድአኒ ፡ ኵነኔ ፡ ዚአከ ።

176 ተረሳዕኩ ፡ ከመ ፡ በግዕ ፡ ዘተገድፈ ፡ ኅሥሦ ፡ ለገብርከ ፡ እስመ ፡ ትእዛዘከ ፡ ኢረሳዕኩ ።

119 ማኅሌት ፡ ዘበመዓርጊሁ ።

1 ኀቤከ ፡ እግዚኦ ፡ ጸራኅኩ ፡ ሶበ ፡ ተመንደብኩ ፡ ወሰማዕከኒ ።

2 እግዚኦ ፡ አድኅና ፡ ለነፍስየ ፡ እምከናፍረ ፡ ዐመፃ ፤ ወእምልሳነ ፡ ጽልሑት ።

3 ምንተ ፡ ይሁብከ ፡ ወምንተ ፡ ይዌስኩከ ፡ በእንተ ፡ ከናፍረ ፡ ጕሕሉት ።

4 አሕጻሁ ፡ ለኀያል ፡ ስሑል ፤ ከመ ፡ አፍሓመ ፡ ሐቅል ።

5 ሴልየ ፡ ዘርሕቀ ፡ ማኅደርየ ፤ ወኀደርኩ ፡ ውስተ ፡ አዕጻዳተ ፡ እለ ፡ ቄዳር ።

6 ብዙኀ ፡ ተዐገሠት ፡ ነፍስየ ፤ ምስለ ፡ እለ ፡ ይጸልኡ ፡ ሰላመ ።

7 እንዘ ፡ ሰላማዊ ፡ አነ ፤ ወሶበ ፡ እትነገሮሙ ፡ ይፀብኡኒ ፡ በከንቱ ።

120 ማኅሌት ፡ ዘበመዓርጊሁ ።

1 አንሣእኩ ፡ አዕይንትየ ፡ መንገለ ፡ አድባር ፤ እምአይቴ ፡ ይምጻእ ፡ ረድኤትየ ።

2 ረድኤትየሰ ፡ እምኀበ ፡ እግዚአብሔር ፤ ዘገብረ ፡ ሰማየ ፡ ወምድረ ።

3 ወኢይሁቦን ፡ ሁከተ ፡ ለእገሪከ ፤ ወኢይዴቅስ ፡ ዘየዐቅበከ ።

4 ናሁ ፡ ኢይዴቅስ ፡ ወኢይነውም ፡ ዘየዐቅቦ ፡ ለእስራኤል ።

5 እግዚአብሔር ፡ ይዕቀብከ ፤ ወእግዚአብሔር ፡ ይክድንከ ፡ በየማነ ፡ እዴሁ ።

6 መዐልተ ፡ ፀሐይ ፡ ኢያውዒከ ፤ ወኢወርኅ ፡ በሌሊት ።

7 እግዚአብሔር ፡ ይዕቀብከ ፡ እምኵሉ ፡ እኩይ ፤ ወይትማኅፀና ፡ ለነፍስከ ፡ እግዚአብሔር ።

8 እግዚአብሔር ፡ ይዕቀብከ ፡ በንግደትከ ፡ ወበእትወትከ ፤ እምይእዜ ፡ ወእስከ ፡ ለዓለም ።

121 ማኅሌት ፡ ዘበመዓርጊሁ ።

1 ተፈሣሕኩ ፡ እስመ ፡ ይቤሉኒ ፤ ቤተ ፡ እግዚአብሔር ፡ ነሐውር ።

2 ወቆማ ፡ እገሪነ ፡ ውስተ ፡ አዕጻዲኪ ፡ ኢየሩሳሌም ።

3 ኢየሩሳሌምሰ ፡ ሕንጽት ፡ ከመ ፡ ሀገር ፤ እለ ፡ ከማሃ ፡ ኅቡረ ፡ ምስሌሁ ።

4 እስመ ፡ ህየ ፡ ዐርጉ ፡ አሕዛብ ፡ ሕዝበ ፡ እግዚአብሔር ፡ ስምዐ ፡ እሰአኤል ፤ ከመ ፡ ይግነዩ ፡ ለስምከ ፡ እግዚኦ ።

5 እስመ ፡ ህየ ፡ አንበሩ ፡ መናብርቲሆሙ ፡ ለኰንኖ ፤ መናብረተ ፡ ቤተ ፡ ዳዊት ።

6 ተዘያነዉ ፡ ደኅናሃ ፡ ለኢየሩሳሌም ፤ ወፍሥሓሆሙ ፡ ለእለ ፡ ያፍቅሩ ፡ ስመከ ።

7 ይኩን ፡ ሰላመ ፡ በኀይልከ ፤ ወትፍሥሕት ፡ ውስተ ፡ ማኅፈደ ፡ ክበዲከ ።

8 በእንተ ፡ አኀውየ ፡ ወቢጽየ ፤ ይትናገሩ ፡ ሰላመ ፡ በእንቲአኪ ።

9 ወበእንተ ፡ ቤተ ፡ እግዚአብሔር ፡ አምላኪየ ፡ ኀሠሥኩ ፡ ሠናይተኪ ።

122 ማኅሌት ፡ ዘበመዓርጊሁ ።

1 ኀቤከ ፡ አንቃዕዶነ ፡ አዕይንቲነ ፤ ዘትነብር ፡ ውስተ ፡ ሰማይ ።

2 ናሁ ፡ ከመ ፡ አዕይንተ ፡ አግብርት ፡ ውስተ ፡ እደ ፡ አጋእስቲሆሙ ፤

3 ወከመ ፡ ዐይነ ፡ አመት ፡ ውስተ ፡ እደ ፡ እግዝእታ ፤ ከማሁ ፡ አዕይንቲነ ፡ ኀበ ፡ እግዚአብሔር ፡ አምላክነ ፡ እስከ ፡ አመ ፡ ይሣሀለነ ።

4 ተሣሀለነ ፡ እግዚኦ ፡ ተሣሀለነ ፤ እስመ ፡ ፈድፋደ ፡ ጸገብነ ፡ ጽእለተ ።

5 ወፈድፋደ ፡ ጸግበት ፡ ነፍስነ ፤ ጽእለተ ፡ ብዑላን ፡ ወኀሳረ ፡ ዕቡያን ።

123 ማኅሌት ፡ ዘበመዓርጊሁ ።

1 ሶበ ፡ አኮ ፡ እግዚአብሔር ፡ ምስሌነ ፤ ይብል ፡ እስራኤል ።

2 ሶበ ፡ አኮ ፡ እግዚአብሔር ፡ ምስሌነ ፤ እንተ ፡ ጊዜ ፡ ተንሥአ ፡ ሰብእ ፡ ላዕሌነ ። አሕዛብ ፡ ሕያዋኒነ ፡ እምውኅጡነ ፤

3 በከመ ፡ አንሥኡ ፡ ቍጥዓ ፡ መዐቶሙ ፡ ላዕሌነ ። አሕዛብ ፡ በማይ ፡ እምአስጠሙነ ፤

4 እምውሒዝ ፡ አምሰጠት ፡ ነፍስነ ። አምሰየት ፡ ነፍስነ ፡ እማየ ፡ ሀከክ ።

5 ይትባረክ ፡ እግዚአብሔር ፡ አምላክነ ፤ ዘኢያግብአነ ፡ ውስተ ፡ መሥገርተ ፡ ማዕገቶሙ ።

6 ነፍስነሰ ፡ አምሰጠት ፡ ከመ ፡ ዖፍ ፡ እመሥገርት ፡ ነዓዊት ፤

7 መሥገርትሰ ፡ ተቀጥቀጠት ፡ ወንሕነሰ ፡ ድኅነ ።

8 ረድኤትነ ፡ በስመ ፡ እግዚአብሔር ፤ ዘገብረ ፡ ሰማየ ፡ ወምድረ ።

124 ማኅሌት ፡ ዘበመዓርጊሁ ።

1 እለ ፡ ተወከሉ ፡ በእግዚአብሔር ፡ ከመ ፡ ደብረ ፡ ጽዮን ፤ ኢይትሀወክ ፡ ለዓለም ፡ ዘየኀድር ፡ ውስተ ፡ ኢየሩሳሌም ።

2 አድባር ፡ የዐውዳ ፤ ወእግዚአብሔር ፡ ይሜግብ ፡ ሕዝቦ ፡ እምይእዜ ፡ ወእስከ ፡ ለዓለም ።

3 እስመ ፡ ኢየኀድግ ፡ እግዚአብሔር ፡ በትረ ፡ ኃጥኣን ፡ ዲበ ፡ መክፈልተ ፡ ጻድቃን ፤ ከመ ፡ ኢያንሥኡ ፡ እደዊሆሙ ፡ ጻድቃን ፡ በዐመፃ ።

4 አሠኒ ፡ እግዚኦ ፡ ለኄራን ፡ ወለርቱዓነ ፡ ልብ ።

5 ወእለሰ ፡ ይትመየጡ ፡ ውስተ ፡ ፁግ ፤ ይወስዶሙ ፡ እግዚአብሔር ፡ ምስለ ፡ ገበርተ ፡ ዐመፃ ። ሰላም ፡ ላዕለ ፡ አስራኤል ።

125 ማኅሌት ፡ ዘበመዓርጊሁ ።

1 አመ ፡ ሜጠ ፡ እግዚአብሔር ፡ ፄዋ ፡ ጽዮን ፤ ኮነ ፡ ፍሡሓን ።

2 አሜሃ ፡ መልአ ፡ ፍሥሓ ፡ አፉነ ፤ ወተሐሥየ ፡ ልሳንነ ።

3 አሜሃ ፡ ይቤሉ ፡ አሕዛብ ፤ ኣዕበየ ፡ ገቢረ ፡ ሎሙ ፡ እግዚአብሔር ።

4 [ኣዕበየ ፡ ገቢረ ፡ ለነ ፡ እግዚአብሔር ።] ወኮነ ፡ ፍሡሓነ ።

5 ሚጥ ፡ እግዚኦ ፡ ፄዋነ ፤ ከመ ፡ ውሒዝ ፡ ውስተ ፡ አዜብ ።

6 እለ ፡ ይዘርዑ ፡ በአንብዕ ፡ በሐሤት ፡ የአርሩ ።

7 ሶበሰ ፡ የሐውሩ ፡ ወፈሩ ፡ እንዘ ፡ ይበክዩ ፡ ወጾሩ ፡ ዘርዖሙ ፤

8 ወሶበ ፡ የአትዉ ፡ ምጽኡ ፡ እንዘ ፡ ይትፌሥሑ ፡ ወጾሩ ፡ ከላስስቲሆሙ ።

126 ማኅሌት ፡ ዘበመዓርጊሁ ።

1 እመ ፡ እግዚአብሔር ፡ ኢሐነጸ ፡ ቤተ ፡ ከንቶ ፡ ይጻምዉ ፡ እለ ፡ የሐንጹ ።

2 እመ ፡ እግዚአብሔር ፡ ኢዐቀበ ፡ ሀገረ ፡ ከንቶ ፡ ይተግሁ ፡ እለ ፡ ይሔልዉ ።

3 ወከንቱ ፡ ገይሶትክሙ ፤ ተንሥኡ ፡ እምድኅረ ፡ ነበርክሙ ፡ እለ ፡ ትሴሰዩ ፡ እክለ ፡ ሕማም ፡ ሶበ ፡ ይሁቦሙ ፡ ንዋመ ፡ ለፍቁራኒሁ ።

4 ናሁ ፡ ጸጋሁ ፡ ለእግዚአብሔር ፡ ውሉድ ፤ ዕሤተ ፡ ፍሬሃ ፡ ለከርሥ ።

5 ከመ ፡ አሕጻ ፡ ውስተ ፡ እደ ፡ ኀያል ፤ ከማሁ ፡ ደቂቆሙ ፡ ለንጉፋን ።

6 ብፁዕ ፡ ብእሲ ፡ ዘይፌጽም ፡ ፍትወቶ ፡ እምኔሆሙ ፤ ወኢይትኀፈር ፡ ሶበ ፡ ይትናገሮሙ ፡ ለጸላእቱ ፡ በአናቅጽ ።

127 ማኅሌት ፡ ዘበመዓርጊሁ ።

1 ብፁዓን ፡ ኵሎሙ ፡ እለ ፡ ይፈርህዎ ፡ ለእግዚአብሔር ፤ እለ ፡ የሐውሩ ፡ በፍናዊሁ ።

2 ፍሬ ፡ ጻማከ ፡ ትሴሰይ ። ብፁዕ ፡ አንተ ፡ ወሠናይ ፡ ለከ ።

3 ብእሲትከ ፡ ከመ ፡ ወይን ፡ ስሙር ፡ ውስተ ፡ ጽርሐ ፡ ቤትከ ፤

4 ወውሉድከ ፡ ከመ ፡ ተክለ ፡ ዘይት ፡ ሐይት ፡ ሐዲስ ፡ ዐውድ ፡ ማእድከ ።

5 ናሁ ፡ ከመዝ ፡ ይትባረክ ፡ ብእሲ ፡ ዘይፈርሆ ፡ ለእግዚአብሔር ።

6 ይባርከከ ፡ እግዚአብሔር ፡ እምጽዮን ፤ ወትሬኢ ፡ ሠናይታ ፡ ለኢየሩሳሌም ፡ በኵሉ ፡ መዋዕለ ፡ ሕይወትከ ።

7 ወትሬኢ ፡ ውሉደ ፡ ውሉድከ ፤ ሰላም ፡ ላዕለ ፡ እስራኤል ።

128 ማኅሌት ፡ ዘበመዓርጊሁ ።

1 ዘልፈ ፡ ይፀብኡኒ ፡ እምንእስየ ፤ ይብል ፡ እስራኤል ።

2 ዘልፈ ፡ ይፀብኡኒ ፡ እምንእስየ ፤ ወባሕቱ ፡ ኢክህሉኒ ።

3 ዲበ ፡ ዘባንየ ፡ ዘበጡ ፡ ኃጥኣን ፤ ወአስተርሐቅዋ ፡ ለኃጢአቶሙ ።

4 እግዚአብሔር ፡ ጻድቅ ፡ ሰበረ ፡ አሕዳፊሆሙ ፡ ለኃጥኣን ። ይትኀፈሩ ፡ ወይግብኡ ፡ ድኅሬሆሙ ፤ ኵሎሙ ፡ እለ ፡ ይጸልእዋ ፡ ለጽዮን ።

5 ወይኩኑ ፡ ከመ ፡ ሣዕረ ፡ አንሕስት ፤ ወይየብስ ፡ ዘእንበለ ፡ ይምሐውዎ ።

6 ወኢይመልእ ፡ እዴሁ ፡ ለዘ ፡ የዐፅዶ ፤ ወኢሕፅኖ ፡ ለዘ ፡ ያስተጋብእ ፡ ከላስስቲሁ ።

7 ወኢይበሉ ፡ እለ ፡ የኀልፉ ፡ በረከተ ፡ እግዚአብሔር ፡ ምስሌሆሙ ፤ ባረክናክሙ ፡ በስመ ፡ እግዚአብሔር ።

129 ማኅሌት ፡ ዘበመዓርጊሁ ።

1 እምዕምቅ ፡ ጸዋዕኩከ ፡ እግዚኦ ። እግዚኦ ፡ ስምዐኒ ፡ ቃልየ ፤

2 ወይኩን ፡ እዝንከ ፡ ዘያፀምእ ፡ ቃለ ፡ ስእለትየ ።

3 እመሰ ፡ ኃጢአተኑ ፡ ትትዐቀብ ፡ እግዚኦ ፤ እግዚኦ ፡ መኑ ፡ ይቀውም ።

4 እስመ ፡ እምኀቤከ ፡ ውእቱ ፡ ሣህል ፤ በእንተ ፡ ስምከ ።

5 ተሰፈውኩከ ፡ እግዚኦ ፤ ተዐገሠት ፡ ነፍስየ ፡ በሕግከ ። ተወከለት ፡ ነፍስየ ፡ በእግዚአብሔር ፤

6 እምሰዓት ፡ ጽባሕ ፡ እስከ ፡ ሌሊት ። እምሰዓት ፡ ጽባሕ ፡ ተወከለ ፡ እስራኤል ፡ በእግዚአብሔር ።

7 እስመ ፡ እምኀበ ፡ እግዚአብሔር ፡ ሣህል ፤ ወብዙኅ ፡ አድኅና ፡ በኀቤሁ ።

8 ወውእቱ ፡ ያድኅኖ ፡ ለእስራኤል ፡ እምኵሉ ፡ ኃጢአቱ ።

130 ማኅሌት ፡ ዘበመዓርጊሁ ።

1 እግዚኦ ፡ ኢይትዐበየኒ ፡ ልብየ ፡ ወኢይዛዋዕ ፡ አዕይንትየ ።

2 ወኢሖርኩ ፡ ምስለ ፡ ዐበይት ፡ ወኢምስለ ፡ እለ ፡ ይከብሩ ፡ እምኔየ ።

3 ዘእንበለ ፡ ዘአትሐትኩ ፡ ርእስየ ፡ ወከላሕኩ ፡ በቃልየ ፤

4 ከመ ፡ ዘአኅደግዎ ፡ ጥበ ፡ እሙ ፤ ከመ ፡ ትዕስያ ፡ ለነፍስየ ።

5 ተወከለ ፡ እስራኤል ፡ በእግዚአብሔር ፤ እምይእዜ ፡ ወእስከ ፡ ለዓለም ።

131 ማኅሌት ፡ ዘበመዓርጊሁ ።

1 ተዘከሮ ፡ እግዚኦ ፡ ለዳዊት ፤ ወለኵሉ ፡ የዋሀቱ ።

2 ዘከመ ፡ መሐለ ፡ እግዚአብሔር ፤ ወበፅአ ፡ ለአምላከ ፡ ያዕቆብ ።

3 ከመ ፡ ኢይበውእ ፡ ውስተ ፡ ጽላሎተ ፡ ቤትየ ፤ ወከመ ፡ ኢያዐርግ ፡ ውስተ ፡ ዐራተ ፡ ምስካብየ ።

4 ከመ ፡ ኢይሁቦን ፡ ንዋመ ፡ ለአዕይንትየ ፤ ወኢድቃሰ ፡ ለቀራንብትየ ፡

5 ወኢዕረፍተ ፡ ለመላትሕየ ። እስከ ፡ እረክብ ፡ መካኖ ፡ ለእግዚአብሔር ፤ ወማኅደሮ ፡ ለአምላከ ፡ ያዕቆብ ።

6 ናሁ ፡ ሰማዕናሁ ፡ በኤፍራታ ፤ ወረከብናሁ ፡ ውስተ ፡ ዖመ ፡ ገዳም ።

7 ንበውእ ፡ እንከሰ ፡ ውስተ ፡ አብያቲሁ ፤ ወንሰግድ ፡ ውስተ ፡ መካን ፡ ኀበ ፡ ቆመ ፡ እግረ ፡ እግዚእነ ።

8 ተንሥእ ፡ እግዚኦ ፡ ውስተ ፡ ዕረፍትከ ፤ አንተ ፡ ወታቦተ ፡ መቅደስከ ።

9 ካህናቲከ ፡ ይለብሱ ፡ ጽድቀ ፤ ወጻድቃኒከ ፡ ትፍሥሕተ ፡ ይትፍፈሥሑ ።

10 በእንተ ፡ ዳዊት ፡ ገብርከ ፤ ወኢትሚጥ ፡ ገጸከ ፡ እመሲሕከ ።

11 መሐለ ፡ እግዚአብሔር ፡ ለዳዊት ፡ በጽድቅ ፡ ወኢይኔስሕ ፤ እስመ ፡ እምፍሬ ፡ ከርሥከ ፡ ኣነብር ፡ ዲበ ፡ መንበርከ ።

12 ወለእመ ፡ ዐቀቡ ፡ ደቂቅከ ፡ ሕግየ ፡ ወሰምዑኒ ፡ ዘንተ ፡ ዘእሜህሮሙ ፤

13 ወደቂቆሙኒ ፡ እስከ ፡ ለዓለም ፤ ይበንሩ ፡ ዲበ ፡ መንበርከ ።

14 እስመ ፡ ኀረያ ፡ እግዚአብሔር ፡ ለጽዮን ፤ ወአብደራ ፡ ከመ ፡ ትኩኖ ፡ ማኅደሮ ።

15 ዛቲ ፡ ይእቲ ፡ ምዕራፍየ ፡ ለዓለም ፤ ዝየ ፡ አኀደር ፡ እስመ ፡ ኀረይክዋ ።

16 ለእቤራቲሃኒ ፡ ባርኮ ፡ እባርኮን ፤ ወለነዳያኒሃኒ ፡ ኣጸግቦሙ ፡ እክለ ።

17 ወለካህናቲሃኒ ፡ ኣለብሶሙ ፡ ሕይወተ ፤ ወጻድቃኒሃኒ ፡ ትፍሥሕተ ፡ ይትፍፌሥሑ ።

18 ወበህየ ፡ ኣበቍል ፡ ቀርነ ፡ ለዳዊት ፤ ወኣስተዳሉ ፡ ማኅቶተ ፡ ለመሲሕየ ።

19 ወኣለብሶሙ ፡ ኀፍረተ ፡ ለጸላእቱ ፤ ወቦቱ ፡ ይፈሪ ፡ ቅድሳትየ ።

132 ማኅሌት ፡ ዘበመዓርጊሁ ።

1 ናሁ ፡ ሠናይ ፡ ወናሁ ፡ አዳም ፤ ሶበ ፡ ይሄልዉ ፡ አኀው ፡ ኅቡረ ።

2 ከመ ፡ ዕፍረት ፡ ዘይውሕዝ ፡ እምርእሱ ፡ እስከ ፡ ጽሕሙ ፤ ጽሕሙ ፡ ለአሮን ፡ ዘይወርድ ፡ ዲበ ፡ ኅባኔ ፡ መልበሱ ።

3 ከመ ፡ ጠለ ፡ አርሞንኤም ፡ ዘይወርድ ፡ ዲበ ፡ አድባረ ፡ ጽዮን ፤

4 እስመ ፡ ህየ ፡ አዘዘ ፡ እግዚአብሔር ፡ በረከቶ ፡ ወሕይወተ ፡ እምይእዜ ፡ ወእስከ ፡ ለዓለም ።

133 ማኅሌት ፡ ዘበመዓርጊሁ ።

1 ናሁ ፡ ይባርክዎ ፡ ለእግዚአብሔር ፡ ኵሎሙ ፡ አግብርተ ፡ እግዚአብሔር ፤

2 እለ ፡ ይቀውሙ ፡ ውስተ ፡ ቤተ ፡ እግዚአብሔር ፡ ውስተ ፡ ዐጸደ ፡ ቤተ ፡ አምላክነ ።

3 በሌሊት ፡ አንሥኡ ፡ እደዊክሙ ፡ በቤተ ፡ መቅደስ ፤ ወባርክዎ ፡ ለእግዚአብሔር ።

4 ይባርከከ ፡ እግዚአብሔር ፡ እምጽዮን ፤ ዘገብረ ፡ ሰማየ ፡ ወምድረ ።

134 ሀሌሉያ ።

1 ሰብሑ ፡ ለስመ ፡ እግዚአብሔር ፤ ሰብሕዎ ፡ አግብርቲሁ ፡ ለእግዚአብሔር ።

2 እለ ፡ ትቀውሙ ፡ ውስተ ፡ ቤተ ፡ እግዚአብሔር ፤ ውስተ ፡ ዐጸደ ፡ ቤተ ፡ አምላክነ ።

3 ሰብሕዎ ፡ ለእግዚአብሔር ፡ እስመ ፡ ኄር ፡ እግዚአብሔር ፤ ወዘምሩ ፡ ለስሙ ፡ እስመ ፡ ሠናይ ።

4 እስመ ፡ ለያዕቆብ ፡ ኀረዮ ፡ እግዚአብሔር ፤ ወለእስራኤልኒ ፡ ሎቱ ፡ ለርስቱ ።

5 እስመ ፡ አነ ፡ ኣእመርኩ ፡ ከመ ፡ ዐቢይ ፡ እግዚአብሔር ፤ ወአምላክነሂ ፡ እምኵሉ ፡ አማልክት ።

6 ኵሎ ፡ ዘፈቀደ ፡ ገብረ ፡ እግዚአብሔር ፤ በሰማይኒ ፡ ወበምድርኒ ፤ በባሕርኒ ፡ ወበኵሉ ፡ ቀላያት ።

7 ያዐርግ ፡ ደመናተ ፡ እምአጽናፈ ፡ ምድር ፤ ወገብረ ፡ መብረቀ ፡ ለጊዜ ፡ ዝናም ።

8 ዘያወፅኦሙ ፡ ለነፋሳት ፡ እመዛግብቲሆሙ ። ዘቀተለ ፡ ኵሎ ፡ በኵሮሙ ፡ ለግብጽ ፤ እምሰብእ ፡ ወእስከ ፡ እንስሳ ።

9 ፈነወ ፡ ተኣምረ ፡ ወመንክረ ፡ ማእከሌኪ ፡ ግብጽ ፤ ላዕለ ፡ ፈርዖን ፡ ወላዕለ ፡ አግብርቲሁ ።

10 ዘቀተለ ፡ አሕዛበ ፡ ብዙኃነ ፤ ወቀተለ ፡ ነገሥተ ፡ ጽኑዓነ ፤

11 ለሴዎን ፡ ንጉሠ ፡ አሞሬዎን ፡ ወለዖግ ፡ ንጉሠ ፡ ባሳን ፤ ወለኵሎሙ ፡ ነገሥተ ፡ ከናዐን ።

12 ወወሀበ ፡ ምድሮሙ ፡ ርስተ ፤ ርስተ ፡ እስራኤል ፡ ገብሩ ።

13 ስምኬ ፡ እግዚኦ ፡ ለዓለም ፤ ወዝክርከኒ ፡ ለትውልደ ፡ ትውልድ ።

14 እስመ ፡ ይኴንን ፡ እግዚአብሔር ፡ ሕዝቦ ፤ ወይትናበብ ፡ በእንተ ፡ አግብርቲሁ ።

15 አማልክቲሆሙ ፡ ለአሕዛብ ፡ ዘወርቅ ፡ ወብሩር ፤ ግብረ ፡ እደ ፡ እጓለ ፡ እመሕያው ።

16 አፈ ፡ ቦሙ ፡ ወኢይነቡ ፤ አዕይንተ ፡ ቦሙ ፡ ወኢይሬእዩ ።

17 እዝነ ፡ ቦሙ ፡ ወኢይሰምዑ ፤ አንፈ ፡ ቦሙ ፡ ወኢያጼንዉ ። እደ ፡ ቦሙ ፡ ወኢይገሱ ፤ እግረ ፡ ቦሙ ፡ ወኢየሐውሩ ፤ ወኢይነቡ ፡ በጐራዒቶሙ ። ወአልቦሙ ፡ መንፈሰ ፡ ውስተ ፡ አፉሆሙ ።

18 ከማሆሙ ፡ ለይኩኑ ፡ ኵሎሙ ፡ እለ ፡ ገብርዎሙ ፤ ወኵሎሙ ፡ እለ ፡ ይትአመኑ ፡ ቦሙ ።

19 ቤተ ፡ እስራኤል ፡ ባርክዎ ፡ ለእግዚአብሔር ፤ ቤተ ፡ አሮን ፡ ባርክዎ ፡ ለእግዚአብሔር ።

20 ቤተ ፡ ሌዊ ፡ ባርክዎ ፡ ለእግዚአብሔር ፤ እለ ፡ ትፈርህዎ ፡ ለእግዚአብሔር ፡ ባርክዎ ፡ ለእግዚአብሔር ።

21 ቡሩክ ፡ እግዚአብሔር ፡ በጽዮን ፤ ዘየኀድር ፡ ውስተ ፡ ኢየሩሳሌም ።

135 ሀሌሉያ ።

1 ግነዩ ፡ ለእግዚአብሔር ፡ እስመ ፡ ኄር ፤ እስመ ፡ ለዓለም ፡ ምሕረቱ ።

2 ግነዩ ፡ ለአምላከ ፡ አምልክት ፤ እስመ ፡ ለዓለም ፡ ምሕረቱ ።

3 ግነዩ ፡ ለእግዚአ፡ አጋእዝት ፤ እስመ ፡ ለዓለም ፡ ምሕረቱ ።

4 ዘገብረ ፡ ዐቢየ ፡ መንክረ ፡ ባሕቲቱ ፤ እስመ ፡ ለዓለም ፡ ምሕረቱ ።

5 ዘገብረ ፡ ሰማያተ ፡ በጥበቡ ፤ እስመ ፡ ለዓለም ፡ ምሕረቱ ።

6 ዘአጽንዓ ፡ ለምድር ፡ ዲበ ፡ ማይ ፤ እስመ ፡ ለዓለም ፡ ምሕረቱ ።

7 ዘገብረ ፡ ብርሃናተ ፡ ዐበይተ ፡ በሕቲቱ ፤ እስመ ፡ ለዓለም ፡ ምሕረቱ ።

8 ለፀሐይ ፡ ዘአኰነኖ ፡ መዐልተ ፤ እስመ ፡ ለዓለም ፡ ምሕረቱ ።

9 ለወርኅ ፡ ወለከዋክብተ ፡ ዘአኰነኖሙ ፡ ሌሊተ ፤ እስመ ፡ ለዓለም ፡ ምሕረቱ ።

10 ዘቀተሎሙ ፡ ለግብጽ ፡ ምስለ ፡ በኵሮሙ ፤ እስመ ፡ ለዓለም ፡ ምሕረቱ ።

11 ወአውፅኦሙ ፡ ለእስራኤል ፡ እማእከሎሙ ፤ እስመ ፡ ለዓለም ፡ ምሕረቱ ።

12 በእድ ፡ ጽንዕት ፡ ወበመዝራዕት ፡ ልዕልት ፤ እስመ ፡ ለዓለም ፡ ምሕረቱ ።

13 ዘነፈቃ ፡ ለባሕረ ፡ ኤርትራ ፡ ወከፈላ ፤ እስመ ፡ ለዓለም ፡ ምሕረቱ ።

14 ወአውፅኦሙ ፡ ለእስራኤል ፡ እንተ ፡ ማእከላ ፤ እስመ ፡ ለዓለም ፡ ምሕረቱ ።

15 ዘነፅኆ ፡ ለፈርዖን ፡ ወለኀይሉ ፡ ውስተ ፡ ባሕረ ፡ ኤርትራ ፤ እስመ ፡ ለዓለም ፡ ምሕረቱ ።

16 ዘአውፅኦሙ ፡ ለሕዝቡ ፡ ውስተ ፡ ገዳም ፤ እስመ ፡ ለዓለም ፡ ምሕረቱ ። ዘአውፅአ ፡ ማየ ፡ እምኰኵሕ ፤ እስመ ፡ ለዓለም ፡ ምሕረቱ ።

17 ዘቀተለ ፡ ነገሥተ ፡ ዐበይተ ፤ እስመ ፡ ለዓለም ፡ ምሕረቱ ።

18 ወቀተለ ፡ ነገሥተ ፡ ጽኑዓነ ፤ እስመ ፡ ለዓለም ፡ ምሕረቱ ።

19 ለሴዎን ፡ ንጉሠ ፡ አሞሬዎን ፤ እስመ ፡ ለዓለም ፡ ምሕረቱ ።

20 ወለዖግ ፡ ንጉሠ ፡ ባሳን ፤ እስመ ፡ ለዓለም ፡ ምሕረቱ ።

21 ወወሀበ ፡ ምድሮሙ ፡ ርስተ ፤ እስመ ፡ ለዓለም ፡ ምሕረቱ ።

22 ርስተ ፡ እስራኤል ፡ ገብሩ ፤ እስመ ፡ ለዓለም ፡ ምሕረቱ ።

23 እስመ ፡ ተዘከረነ ፡ እግዚአብሔር ፡ በሕማምነ ፤ እስመ ፡ ለዓለም ፡ ምሕረቱ ።

24 ወአድኀነነ ፡ እምእደ ፡ ፀርነ ፤ እስመ ፡ ለዓለም ፡ ምሕረቱ ።

25 ዘይሁብ ፡ ሲሳየ ፡ ለኵሉ ፡ ዘሥጋ ፤ እስመ ፡ ለዓለም ፡ ምሕረቱ ።

26 ግነዮ ፡ ለአምላከ ፡ ሰማይ ፤ እስመ ፡ ለዓለም ፡ ምሕረቱ ።

136 ዘዳዊት ።

1 ውስት ፡ አፍላገ ፡ ባቢሎን ፡ ህየ ፡ ነበርነ ፡ ወበከይነ ፤ ሶበ ፡ ተዘከርናሃ ፡ ለጽዮን ።

2 ውስተ ፡ ኲሓቲሃ ፡ ሰቀልነ ፡ ዕንዚራቲነ ።

3 እስመ ፡ በህየ ፡ ተስእሉነ ፡ እለ ፡ ፄወዉነ ፡ ነገረ ፡ ማኅሌት ፡

4 ወእለሂ ፡ ይወስዱነ ፡ ይቤሉነ ፡ ኅልዩ ፡ ለነ ፡ እምኃልዪሃ ፡ ለጽዮን ።

5 ወእፈ ፡ ነኀሊ ፡ ማኅሌተ ፡ እግዚአብሔር ፡ በምድረ ፡ ነኪር ።

6 እመሰ ፡ ረሳዕኩኪ ፡ ኢየሩሳሌም ፡ ለትርስዐኒ ፡ የማንየ ።

7 ወይጥጋዕ ፡ ልሳንየ ፡ በጕርዔየ ፡ ለእመ ፡ ኢተዘከርኩኪ ፤

8 ወለእመ ፡ ኢበፃእኩ ፡ ለኢየሩሳሌም ፡ በቀዳሚ ፡ ትፍሥሕትየ ።

9 ተዘከሮሙ ፡ እግዚኦ ፡ ለደቂቀ ፡ ኤዶም ፡ በዕለተ ፡ ኢየሩሳሌም ።

10 እለ ፡ ይብሉ ፡ ንሥቱ ፡ ንሥቱ ፡ እስከ ፡ መሰረታቲሃ ።

11 ወለተ ፡ ባቢሎን ፡ ኅስርት ፤ ብፁዕ ፡ ዘይትቤቀለኪ ፡ በቀለ ፡ ተበቀልክነ ።

12 ብፁዕ ፡ ዘይእኅዞሙ ፡ ለደቂቅኪ ፡ ወይነፅኆሙ ፡ ውስተ ፡ ኰኵሕ ።

137 ዘዳዊት ።

1 እገኒ ፡ ለከ ፡ እግዚኦ ፡ በኵሉ ፡ ልብየ ፡

2 በቅድመ ፡ መላእክቲከ ፡ እዜምር ፡ ለከ ፤ እስመ ፡ ሰማዕከኒ ፡ ኵሎ ፡ ቃለ ፡ አፉየ ። ወእሰግድ ፡ ውስተ ፡ ጽርሐ ፡ መቅደስከ ፡ ወእገኒ ፡ ለስምከ ፤

3 በምሕረትከ ፡ ወበጽድቅከ ፤ እስመ ፡ ኣዕበይከ ፡ ዲበ ፡ ኵሉ ፡ ስመከ ፡ ቅዱሰ ።

4 አመ ፡ ዕለተ ፡ እጼውዐከ ፡ ፍጡነ ፡ ስምዐኒ ፤ ብዙኀ ፡ አጽናዕካ ፡ ለነፍስየ ፡ በኀይልከ ።

5 ይገንዩ ፡ ለከ ፡ እግዚኦ ፡ ኵሎሙ ፡ ነገሥተ ፡ ምድር ፤ እስመ ፡ ሰምዑ ፡ ኵሎ ፡ ቃለ ፡ አፉከ ።

6 ወየኀልዩ ፡ በስብሐተ ፡ እግዚአብሔር ፤ እስመ ፡ ዐቢይ ፡ ክቡረ ፡ እግዚአብሔር ።

7 እስመ ፡ ልዑል ፡ እግዚአብሔር ፡ ወይሬኢ ፡ ዘበታሕቱ ፤ ወለነዋኅኒ ፡ እምርሑቅ ፡ ያአምሮ ።

8 እመኒ ፡ ሖርኩ ፡ ማእከለ ፡ ምንዳቤ ፡ አንተ ፡ ታሐይወኒ ፤ ዲበ ፡ መዐተ ፡ አሕዛብ ፡ ሰፋሕከ ፡ እደውየ ። ወአድኀነኒ ፡ የማንከ ።

9 እግዚአብሔር ፡ ይትቤቀል ፡ ሊተ ፤ እግዚኦ ፡ ሣህልከ ፡ ለዓለም ፡

10 እግዚኦ ፡ ተግባረ ፡ እደዊከ ፡ ኢትትሀየድ ።

138 ፍጻሜ ፡ መዝሙር ፡ ዘዳዊት ።

1 እግዚኦ ፡ አመከርከኒ ፡ ወኣእመርከኒ ። አንተ ፡ ታአምር ፡ ንብረትየ ፡ ወተንሥኦትየ ፤

2 ወአንተ ፡ ታአምር ፡ ኵሎ ፡ ሕሊና ፡ ልብየ ፡ እምርሑቅ ። ፍኖትየ ፡ ወአሰርየ ፡ አንተ ፡ ቀጻዕከ ፤

3 ወኵሉ ፡ ፍናውየ ፡ አንተ ፡ አቅደምከ ፡ ኣእምሮ ። ከመ ፡ አልቦ ፡ ቃለ ፡ ዐመፃ ፡ ውስተ ፡ ልሳንየ ፤

4 ናሁ ፡ አንተ ፡ እግዚኦ ፡ ኣእመርከ ፡ ኵሎ ፡ ዘቀዳሚ ፡ ወዘደኃሪ ። አንተ ፡ ፈጠርከኒ ፡ ወወደይከ ፡ እዴከ ፡ ላዕሌየ ።

5 ተነክረ ፡ ኣእምሮትከ ፡ በላዕሌየ ፤ ጸንዐተኒ ፡ ወኢይክል ፡ ምስሌሃ ።

6 አይቴኑ ፡ አሐውር ፡ እመንፈስከ ፤ ወአይቴኑ ፡ እጐይይ ፡ እምቅድመ ፡ ገጽከ ።

7 እመኒ ፡ ዐረጉ ፡ ውስተ ፡ ሰማይ ፡ ህየኒ ፡ አንተ ፤ ወእመኒ ፡ ወረድኩ ፡ ውስተ ፡ ቀላይ ፡ ህየኒ ፡ ሀሎከ ።

8 ወእመኒ ፡ ነሣርኩ ፡ ክንፈ ፡ ከመ ፡ ንስር ፤ ወሠረርኩ ፡ እስከ ፡ ማሕለቅተ ፡ ባሕር ።

9 ህየኒ ፡ እዴከ ፡ ትመርሐኒ ፤ ወታነብረኒ ፡ የማንከ ።

10 ወእቤ ፡ ጽልመትኑ ፡ እንጋ ፡ ኬደኒ ፤ ወሌሊትኒ ፡ ብሩህ ፡ ውስተ ፡ ትፍሥሕትየ ።

11 እስመ ፡ ጽልመትኒ ፡ ኢይጸልም ፡ በኀቤከ ፤ ወሌሊትኒ ፡ ብሩህ ፡ ከመ ፡ መዐልት ፤ በአምጣነ ፡ ጽልመታ ፡ ከማሁ ፡ ብርሃነ ።

12 እስመ ፡ አንተ ፡ ፈጠርከ ፡ ኵልያትየ ፡ እግዚኦ ፤ ወተወከፍከኒ ፡ ከመ ፡ ኣእምር ።

13 እገኒ ፡ ለከ ፡ እግዚኦ ፡ እስመ ፡ ግሩመ ፡ ተሰባሕከ ፤ መንክር ፡ ግብርከ ፡ ወነፍስየ ፡ ትጤይቆ ፡ ጥቀ ።

14 ወኢይትኀባእ ፡ እምኔከ ፡ አዕጽምትየ ፡ ዘገበርከ ፡ በኅቡእ ፤ ወኢአካልየ ፡ በመትሕት ፡ ምድር ።

15 ወዘሂ ፡ ኢገበርኩ ፡ ርእያ ፡ አዕይንቲከ ፡ ወኵሊ ፡ ይጸሐፍ ፡ ወስተ ፡ መጽሐፍከ ፤ መዐልተ ፡ ይትፈጠሩ ፡ ወኢይሄሉ ፡ አሐዱ ፡ እምኔሆሙ ።

16 ወበኀቤየሰ ፡ ፈድፋደ ፡ ክቡራን ፡ አዕርክቲከ ፡ እግዚኦ ፤ ወፈድፋደ ፡ ጸንዑ ፡ እምቀደምቶሙ ።

17 ወእኌልቆሙ ፡ እምኆፃ ፡ ይበዝኁ ፤ ተንሣእኩሂ ፡ ወዓዲ ፡ ሀሎኩ ፡ ምስሌከ ።

18 እመሰ ፡ ቀተልኮሙ ፡ ለኃጥኣን ፡ እግዚኦ ፤ ዕድወ ፡ ደም ፡ ተገሐሠ ፡ እምኔየ ።

19 እስመ ፡ ይዜሀሩ ፡ በሕሊናሆሙ ፤ ወይነሥእዎን ፡ ለአህጉሪከ ፡ በከንቱ ።

20 አኮኑ ፡ ጸላእተከ ፡ ጸላእኩ ፡ እግዚኦ ፤ ወተመንሰውኩ ፡ በእንተ ፡ ፀርከ ።

21 ፍጹመ ፡ ጽልአ ፡ ጸላእክዎሙ ፤ ወኮኑኒ ፡ ፀርየ ።

22 ፍትነኒ ፡ እግዚኦ ፡ ወአመክር ፡ ልብየ ፤ አመክረኒ ፡ ወርኢ ፡ ፍናውየ ።

23 ወርኢ ፡ እመ ፡ ትረክብ ፡ ዐመፃ ፡ በላዕሌየ ፤ ወምርሐኒ ፡ ፍኖተ ፡ ዘለዓለም ።

139 ፍጻሜ ፡ መዝሙር ፡ ዘዳዊት ።

1 አድኅነኒ ፡ እግዚኦ ፡ እምብእሲ ፡ እኩይ ፤ ወእምሰብእ ፡ ዐመፂ ፡ ባልሐኒ ።

2 እለ ፡ ዐመፃ ፡ መከሩ ፡ በልቦሙ ፤ ኵሎ ፡ አሚረ ፡ ይረውዱኒ ፡ ይቅትሉኒ ።

3 ወአብልኁ ፡ ልሳኖሙ ፡ ከመ ፡ አርዌ ፡ ምድር ፤ ሕምዘ ፡ አርዌ ፡ ምድር ፡ ታሕተ ፡ ከናፍሪሆሙ ።

4 ዕቅበኒ ፡ እግዚኦ ፡ እምእደ ፡ ኃጥኣን ፡ ወእምብእሲ ፡ ዐመፂ ፡ አድኅነኒ ፤

5 እለ ፡ መከሩ ፡ ያዕቅጹ ፡ መከየድየ ። ወኀብኡ ፡ ሊተ ፡ መሥገርተ ፡ ዕቡያን ፤

6 ወሠተሩ ፡ አሕባለ ፡ መሣግር ፡ ለእገርየ ፤ ወአንበሩ ፡ ዕቅፍተ ፡ ውስተ ፡ ፍኖትየ ።

7 ወእቤሎ ፡ ለእግዚአብሔር ፡ አምላኪየ ፡ አንተ ፤ ወአፅምአኒ ፡ ቃለ ፡ ስእለትየ ።

8 እግዚኦ ፡ እግዚኦ ፡ ኀይለ ፡ መድኀኒትየ ፤ ሰወርከኒ ፡ በዕለተ ፡ ቀትል ፡ መልዕልተ ፡ ርእስየ ።

9 ኢትመጥወኒ ፡ እግዚኦ ፡ እምፍትወትየ ፡ ለኃጥኣን ፤ ተማከሩ ፡ ላዕሌየ ፡ ወኢትኅድገኒ ፡ ከመ ፡ ኢይዘሀሩ ።

10 ርእሰ ፡ ማዕገቶሙ ፡ ወጻማ ፡ ከናፍሪሆሙ ፡ ይድፍኖሙ ።

11 ወይደቅ ፡ ላዕሌሆሙ ፡ አፍሓመ ፡ እሳት ፤ ትንፅኆሙ ፡ ውስተ ፡ ምድር ፡ በምንዳበ ፡ ከመ ፡ ኢይክሀሉ ፡ ቀዊመ ።

12 ብእሲ ፡ ነባቢ ፡ ኢያረትዕ ፡ በዲበ ፡ ምድር ፤ ወለብእሲ ፡ ዐማፂ ፡ ትንዕዎ ፡ እኪት ፡ ለአማስኖ ።

13 ኣእመርኩ ፡ ከመ ፡ ይገብር ፡ እግዚአብሔር ፡ ኵነኔ ፡ ለነዳያን ፤ ወፍትሐ ፡ ለምስኪናን ።

14 ወባሕቱ ፡ ጻድቃን ፡ ይገንዩ ፡ ለስምከ ፤ ወይነብሩ ፡ ራትዓን ፡ ቅድመ ፡ ገጽከ ።

140 መዝሙር ፡ ዘዳዊት ።

1 እግዚኦ ፡ ጸራኅኩ ፡ ኀቤከ ፡ ስምዐኒ ፤ ወአፅምእ ፡ ቃለ ፡ ስእለትየ ፡ ዘጸራኅኩ ፡ ኀቤከ ።

2 ተወከፈኒ ፡ ጸሎትየ ፡ ከመ ፡ ዕጣን ፡ በቅድሜከ ፤ አንሥኦ ፡ እደውየ ፡ መሥዋዕተ ፡ ሰርክ ።

3 ሢም ፡ እግዚኦ ፡ ዐቃቤ ፡ ለአፉየ ፤ ወማዕጾ ፡ ዘዐቅም ፡ ለከናፍርየ ።

4 ኢትሚጦ ፡ ለልብየ ፡ ውስተ ፡ ነገር ፡ እኩይ ፡ ወአመክንዮ ፡ ምክንያት ፡ ለኃጢአት ፡

5 ምስለ ፡ ሰብእ ፡ ገበርተ ፡ ዐመፃ ፤ ወኢይትኀበር ፡ ምስለ ፡ ኅሩያኒሆሙ ።

6 ገሥጸኒ ፡ በጽድቅ ፡ ወተዛለፈኒ ፡ በምሕረት ፤ ወቅብአ ፡ ኃጥኣንሰ ፡ ኢይትቀባእ ፡ ርእስየ ።

7 እስመ ፡ ዓዲ ፡ ጸሎትየኒ ፡ ከመ ፡ ኢተሣሀሎሙ ፤ ተሰጥሙ ፡ በጥቃ ፡ ኰኵሕ ፡ ጽኑዓኒሆሙ ።

8 ሰምዑኒ ፡ ቃልየ ፡ እስመ ፡ ተክህለኒ ። ከመ ፡ ግዝፈ ፡ ምድር ፡ ተሠጥቁ ፡ ዲበ ፡ ምድር ፤

9 ወተዘርወ ፡ አዕጽምቲሆሙ ፡ በኀበ ፡ ሲኦል ፡ እስመ ፡ ኀቤከ ፡ እግዚኦ ፡ እግዚኦ ፡ አዕይንትየ ፤ ብከ ፡ ተወከልኩ ፡ ኢታውፅኣ ፡ ለነፍስየ ።

10 ዕቀበኒ ፡ አመሥገርት ፡ እንተ ፡ ኀብኡ ፡ ሊተ ፤ ወእማዕቀፎሙ ፡ ለገበርተ ፡ ዐመፃ ።

11 ለይደቁ ፡ ውስተ ፡ መሥገርቶሙ ፡ ኃጥኣን ፤ እስመ ፡ አኀልፍ ፡ አነ ፡ ባሕቲትየ ።

141 ኣእምሮ ፡ ዘዳዊት ፤ አመ ፡ ሀሎ ፡ ውስተ ፡ በአት ።

1 ቃልየ ፡ ኀበ ፡ እግዚአብሔር ፡ ጸራኅኩ ፤ ቃልየ ፡ ኀበ ፡ እግዚአብሔር ፡ ሰአልኩ ።

2 ወእክዑ ፡ ቅድሜሁ ፡ ስእለትየ ፤ ወእነግር ፡ ቅድሜሁ ፡ ሕማምየ ።

3 ሶበ ፡ ተኀልቅ ፡ ነፍስየ ፡ በላዕሌየ ፤ አንተ ፡ እግዚኦ ፡ ታአምር ፡ ፍናትየ ፤

4 በዛቲ ፡ ፍኖት ፡ እንተ ፡ ሖርኩ ፡ ኀብኡ ፡ ሊተ ፡ መሥገርተ ።

5 ተመየጥኩ ፡ መንገለ ፡ የማንየ ፡ ወርኢኩ ፤ ወኀጣእኩ ፡ ዘያአምረኒ ፤

6 ወኀበሂ ፡ ኣመስጥ ፡ አልብየ ፡ ወአልቦ ፡ ዘይትኃሠሥ ፡ በእንተ ፡ ነፍስይ ።

7 ኀቤከ ፡ እግዚኦ ፡ ጸራኅኩ ፤ ወእቤለከ ፡ አንተ ፡ ተስፋየ ፤ ወአንተ ፡ መክፈልትየ ፡ በምድረ ፡ ሕያዋን ።

8 ነጽር ፡ ስእለትየ ፡ እስመ ፡ ሐመምኩ ፡ ፈድፋደ ፤

9 አድኅነኒ ፡ እምእለ ፡ ሮዱኒ ፡ እስመ ፡ ይኄይሉኒ ። ወአውፅኣ ፡ እሞቅሕ ፡ ለነፍስየ ፡ ከመ ፡ እግነይ ፡ ለስምከ ፡ እግዚኦ ፤ ኪያየ ፡ ይፀንሑ ፡ ጻድቃን ፡ እስከ ፡ ሶበ ፡ ተዐስየኒ ።

142 መዝሙር ፡ ዘዳዊት ፤ ዘአመ ፡ ይሰዶ ፡ ወልዱ ።

1 እግዚኦ ፡ ስምዐኒ ፡ ጸሎትየ ፡ ወአፅምአኒ ፡ ስእለትየ ፡ በጽድቅከ ፤ ወስምዐኒ ፡ በርትዕከ ።

2 ወኢትባእ ፡ ውስተ ፡ ቅሥት ፡ ምስለ ፡ ገብርከ ፤ እስመ ፡ ኢይጸድቅ ፡ ኵሉ ፡ ሕያው ፡ በቅድሜከ ።

3 እስመ ፡ ሮዳ ፡ ጸላኢ ፡ ለነፍስየ ፡ ወኣኅሰራ ፡ ውስተ ፡ ምድር ፡ ለሕይወትየ ፤

4 ወአንበሩኒ ፡ ውስተ ፡ ጽልመት ፡ ከመ ፡ ምዉተ ፡ ትካት ። ወቀብጸተኒ ፡ በፍስየ ፡ በላዕሌየ ፤ ወደንገፀኒ ፡ ልብየ ፡ በውስጥየ ።

5 ወተዘከርኩ ፡ መዋዕለ ፡ ትካት ፡ ወአንበብኩ ፡ በኵሉ ፡ ግብርከ ፤ ወአንብብ ፡ ግብረ ፡ እደቂከ ።

6 ወአንሣእኩ ፡ እደውየ ፡ ኀቤከ ፤ ነፍስየኒ ፡ ከመ ፡ ምድረ ፡ በድው ፡ ጸምአተከ ።

7 ፍጡነ ፡ ስምዐኒ ፡ እግዚኦ ፡ ኀለፈት ፡ ነፍስየ ፤

8 ወኢትሚጥ ፡ ገጸከ ፡ እምኔየ ፤ ወኢይኩን ፡ ከመ ፡ እለ ፡ ይወርዱ ፡ ውስተ ፡ ዐዘቅት ።

9 ዘይሰማዕ ፡ ግበር ፡ ሊተ ፡ ምሕረትከ ፡ በጽባሕ ፡ እስመ ፡ ኪያከ ፡ ተወከልኩ ፡ እግዚኦ ፤

10 ምርሐኒ ፡ እግዚኦ ፡ ፍኖተ ፡ እንተ ፡ ባቲ ፡ አሐውር ፤ እስመ ፡ ኀቤከ ፡ አንቃዕደኩ ፡ ነፍስየ ።

11 አድኅነኒ ፡ እግዚኦ ፡ እምፀርየ ፤ እስመ ፡ ኀቤከ ፡ ተማኅፀንኩ ። ምህረኒ ፡ እግዚኦ ፡ ለገቢረ ፡ ፈቃድከ ፡ እስመ ፡ አምላኪየ ፡ አንተ ፤

12 ወመንፈስከ ፡ ቅዱስ ፡ ይምርሐኒ ፡ በምድረ ፡ ጽድቅ ። በእንተ ፡ ስምከ ፡ እግዚኦ ፡ ኣሕይወኒ ፡ በጽድቅከ ፡

13 ወአውፅኣ ፡ እምንዳቤሃ ፡ ለነፍስየ ። ወበሥምረትከ ፡ ሠርዎሙ ፡ ለፀርየ ፤

14 ወታጠፍኦሙ ፡ ለኵሎሙ ፡ እለ ፡ ያሐምዋ ፡ ለነፍስየ ፡ እስመ ፡ አነ ፡ ገብርከ ።

143 ዘዳዊት ፡ ዘአመ ፡ ይትባአስ ፡ ምስለ ፡ ጎልያድ ።

1 ይትባረክ ፡ እግዚአብሔር ፡ አምላኪየ ፡ ዘመሀሮን ፡ ፀብአ ፡ ለእደውየ ፤ ወቀትለ ፡ ለአጻብእየ ።

2 መሓሪየ ፡ ወጸወንየ ፡ ምስካይየ ፡ ወመድኀኒየ ፤

3 ምእመንየ ፡ ወኪያሁ ፡ ተወከልኩ ፡ ዘያገርር ፡ ሊተ ፡ አሕዛበ ፡ በመትሕቴየ ።

4 እግዚኦ ፡ ምንትኑ ፡ ውእቱ ፡ ሰብእ ፡ ከመ ፡ ታስተርኢ ፡ ሎቱ ፤ ወእጓለ ፡ እመሕያው ፡ ዘተሐስቦ ።

5 ሰብእሰ ፡ ከንቶ ፡ ይመስል ፤ ወመዋዕሊሁኒ ፡ ከመ ፡ ጽላሎት ፡ የኀልፍ ።

6 እግዚኦ ፡ አጽንን ፡ ሰማያቲከ ፡ ወረድ ፤ ግስሶሙ ፡ ለአድባር ፡ ወይጠይሱ ።

7 አብርቅ ፡ መባርቅቲከ ፡ ወዝርዎሙ ፤ ፈኑ ፡ አሕጻከ ፡ ወሁኮሙ ፤

8 ፈኑ ፡ እዴከ ፡ እምአርያም ፤ አድኅነኒ ፡ ወባልሐኒ ፡ እማይ ፡ ብዙኅ ፡ ወእምእዴሆሙ ፡ ለደቂቀ ፡ ነኪር ።

9 እለ ፡ ከንቶ ፡ ነበበ ፡ አፉሆሙ ፤ ወየማኖሙኒ ፡ የማነ ፡ ዐመፃ ።

10 እግዚኦ ፡ ስብሐተ ፡ ሐዲሰ ፡ እሴብሐከ ፤ ወበመዝሙር ፡ ዘዐሠርቱ ፡ አውታሪሁ ፡ እዜምር ፡ ለከ ።

11 ዘይሁቦሙ ፡ ለነገሥት ፡ መድኀኒተ ፤ ዘአድኀኖ ፡ ለዳዊት ፡ ገብሩ ፡ አምኲናት ፡ እኪት ።

12 አድኅነኒ ፡ ወባልሐኒ ፡ እምእዲሆሙ ፡ ለደቂቀ ፡ ነኪር ፤ እለ ፡ ከንቶ ፡ ነበበ ፡ አፉሆሙ ። ወየማኖሙኒ ፡ የማነ ፡ ዐመፃ ።

13 እለ ፡ ደቂቆሙ ፡ ከመ ፡ ተክል ፡ ሐዲስ ፡ ጽኑዓን ፡ በውርዙቶሙ ፤

14 ወአዋልዲሆሙኒ ፡ ርሱያት ፡ ወስርግዋት ፡ ከመ ፡ እንተ ፡ ጽርሕ ።

15 ወአብያቲሆሙኒ ፡ ምሉእ ፡ ወይሰወጥ ፡ እምዝ ፡ ውስተዝ ፤

16 ወአባግዒሆሙኒ ፡ ብዙኀ ፡ ይትዋለዱ ፡ ወይትባዝኃ ፡ በሙፋሪሆን ። ወአልህምቲሆሙኒ ፡ ሥቡሓን ፤

17 ወአልቦ ፡ ድቀተ ፡ ለቅጽሮሙ ፡ ወአልቦ ፡ እንተ ፡ ኀበ ፡ ያበውእዎሙ ፤ ወአልቦ ፡ ዐውያተ ፡ ውስተ ፡ ሀገሮሙ ።

18 አስተብፅዕዎ ፡ ለዘ ፡ ከመዝ ፡ ሕዝብ ፤ ብፁዕ ፡ ሕዝብ ፡ ዘእግዚአብሔር ፡ አምላኩ ።

144 አኰቴት ፡ መዝሙር ፡ ዘዳዊት ።

1 ኣሌዕለከ ፡ ንጉሥየ ፡ ወአምላኪየ ፤ ወእባርክ ፡ ለስምከ ፡ ለዓለም ፡ ወለዓለመ ፡ ዓለም ።

2 ኵሎ ፡ አሚረ ፡ እባርከከ ፤ ወእሴብሕ ፡ ለስምከ ፡ ለዓለም ፡ ወለዓለመ ፡ ዓለም ።

3 ዐቢይ ፡ እግዚአብሔር ፡ ወብዙኅ ፡ አኰቴቱ ፤ ወአልቦ ፡ ጽንፈ ፡ ዕበየ ፡ ዚአሁ ።

4 ትውልደ ፡ ትውልድ ፡ ይንእዱ ፡ ምግባሪከ ፤ ወይዜንዉ ፡ ኀይለከ ።

5 ወይነግሩ ፡ ዕበየ ፡ ክብረ ፡ ስብሐተ ፡ ቅዱሳቲከ ፤ ወያየድዑ ፡ መንክረከ ።

6 ወይብሉ ፡ ግሩም ፡ ኀይልከ ፤ ወይነግሩ ፡ ኀይለ ፡ ግርማከ ፤ ወያየድዑ ፡ ጽንዐከ ።

7 ወይጐሥዑ ፡ ተዝካረ ፡ ብዝኀ ፡ ምሕረትከ ፤ ወይትሐሠዩ ፡ በጽድቅከ ።

8 መሓሪ ፡ ወመስተሣህል ፡ እግዚአብሔር ፤ ርሑቀ ፡ መዐት ፡ ወብዙኀ ፡ ምሕረት ፡ ወጻድቅ ።

9 ኄር ፡ እግዚአብሔር ፡ ለእለ ፡ ይትዔገስዎ ፤ ወሣህሉ ፡ ላዕለ ፡ ኵሉ ፡ ተግባሩ ።

10 ይገንዩ ፡ ለከ ፡ እግዚኦ ፡ ኵሉ ፡ ተግባርከ ፤ ወይባርኩከ ፡ ጻድቃኒከ ።

11 ስብሐት ፡ ይብሉ ፡ ለመንግሥትከ ፤ ወይነግሩ ፡ ኀይለከ ።

12 ከመ ፡ ይንግርዎሙ ፡ ለእጓለ ፡ እመሕያው ፡ ኀይለከ ፤ ወዕበየ ፡ ክብረ ፡ ስብሐተ ፡ መንግሥትከ ።

13 መንግሥትከሰ ፡ መንግሥት ፡ ዘለኵሉ ፡ ዓለም ፤ ወምኵናኒከኒ ፡ ለትውልደ ፡ ትውልድ ።

14 ምእመን ፡ እግዚአብሔር ፡ በኵሉ ፡ ቃሉ ፤ ወጽድቅ ፡ በኵሉ ፡ ምግባሩ ።

15 ያሰውቆሙ ፡ እግዚአብሔር ፡ ለእለ ፡ ተንተኑ ፤ ወያነሥኦሙ ፡ እግዚአብሔር ፡ ለእለ ፡ ወድቁ ።

16 ዐይነ ፡ ኵሉ ፡ ነፍስ ፡ ይሴፎ ፡ ኪያከ ፤ ወአንተ ፡ ትሁቦመ ፡ ሲሳዮሙ ፡ በጊዜሁ ።

17 ተሰፍሕ ፡ የማነከ ፤ ወታጸግብ ፡ ለኵሉ ፡ እንስሳ ፡ ዘበሥርዐትከ ።

18 ጻድቅ ፡ እግዚአብሔር ፡ በኵሉ ፡ ፍናዊሁ ፤ ወኄር ፡ በኵሉ ፡ ምግባሩ ።

19 ቅሩብ ፡ እግዚአብሔር ፡ ለኵሎሙ ፡ እለ ፡ ይጼውዕዎ ፤ ለኵሎሙ ፡ እለ ፡ ይጼውዕዎ ፡ በጽድቅ ።

20 ይገብር ፡ ፈቃዶሙ ፡ ለእለ ፡ ይፈርህዎ ፤ ወይሰምዖሙ ፡ ጸሎቶሙ ፡ ወያድኅኖሙ ።

21 የዐቅቦሙ ፡ እግዚአብሔር ፡ ለኵሎሙ ፡ እለ ፡ ይፈርህዎ ፤ ወይሤርዎሙ ፡ ለኵሎሙ ፡ ኃጥኣን ።

22 ስብሐተ ፡ እግዚአብሔር ፡ ይነግር ፡ አፉየ ፤ ወኵሉ ፡ ዘሥጋ ፡ ይባርክ ፡ ለስሙ ፡ ቅዱስ ፡ ለዓለም ፡ ወለዓለመ ፡ ዓለም ።

145 ሀሌሉያ ፡ ዘሐጌ ፡ ወዘካርያስ ።

1 ታአኵቶ ፡ ነፍስየ ፡ ለእግዚአብሔር ። እሴብሖ ፡ ለእግዚአብሔር ፡ በሕይወትየ ፤ ወእዜምር ፡ ለአምላኪየ ፡ በአምጣነ ፡ ሀለውኩ ።

2 ኢትትአመኑ ፡ በመላእክት ፤ ወኢበእጓለ ፡ እመሕያው ፡ እለ ፡ ኢይክሉ ፡ አድኅኖ ።

3 ትወፅእ ፡ ነፍሶሙ ፡ ወይገብኡ ፡ ውስተ ፡ መሬቶሙ ፤ ውእተ ፡ አሚረ ፡ ይጠፍእ ፡ ኵሉ ፡ ምክሮሙ ።

4 ብፁዕ ፡ ብእሲ ፡ ዘአምላከ ፡ ያዕቆብ ፡ ረዳኢሁ ፤ ወትውክልቱኒ ፡ ላዕለ ፡ እግዚአብሔር ፡ አምላኩ ። ዘገብረ ፡ ሰማየ ፡ ወምድረ ፡ ባሕረ ፡ ወኵሎ ፡ ዘውስቴታ ፤

5 ዘየዐቅባ ፡ ለጽድቅ ፡ ለዓለም ። ወይፈትሕ ፡ ሎሙ ፡ ለግፉዓን ፡ ዘይሁቦሙ ፡ ሲሳዮሙ ፡ ለርኁባን ፤

6 እግዚአብሔር ፡ ይፈትሖሙ ፡ ለሙቁሓን ። እግዚአብሔር ፡ ያነሥኦሙ ፡ ለእለ ፡ ወድቁ ፤

7 እግዚአብሔር ፡ ያጠብቦሙ ፡ ለዕዉራን ፤ እግዚአብሔር ፡ ያፍቅሮሙ ፡ ለጻድቃን ።

8 እግዚአብሔር ፡ የዐቅቦሙ ፡ ለፈላስያን ፡ ወይትወከፎሙ ፡ ለአቤራት ፡ ወለእጓለ ፡ ማውታ ፤ ወያመስን ፡ ፍኖተ ፡ ኃጥኣን ።

9 ይነግሥ ፡ እግዚአብሔር ፡ ለዓለም ፤ አምላክኪ ፡ ጽዮን ፡ ለትውልደ ፡ ትውልድ ።

146 ሀሌሉያ ።

1 ሰብሕዎ ፡ ለእግዚአብሔር ፡ እስመ ፡ ሠናይ ፡ መዝሙር ፤ ወለአምላክነ ፡ ሐዋዝ ፡ ሰብሖ ።

2 የሐንጻ ፡ እግዚአብሔር ፡ ለኢየሩሳሌም ፤ ወያስተጋብእ ፡ ዝርወቶሙ ፡ ለእስራኤል ።

3 ዘይፌውሶሙ ፡ ለቍሱላነ ፡ ልብ ፤ ወይፀምም ፡ ሎሙ ፡ ቍስሎሙ ።

4 ዘይኌልቆሙ ፡ ለከዋክብት ፡ በምልኦሙ ፤ ወይጼውዖሙ ፡ ለኵሎሙ ፡ በበአስማቲሆሙ ።

5 ዐቢይ ፡ እግዚአብሔር ፡ ወዐቢይ ፡ ኀይሉ ፤ ወአልቦ ፡ ኍልቆ ፡ ጥበቢሁ ።

6 ያነሥኦሙ ፡ እግዚአብሔር ፡ ለየዋሃን ፤ ወያኀስሮሙ ፡ ለኃጥኣን ፡ እስከ ፡ ምድር ።

7 ሰብሕዎ ፡ ለእግዚአብሔር ፡ በአሚን ፤ ወዘምሩ ፡ ለአምላክነ ፡ በመሰንቆ ።

8 ዘይገለብቦ ፡ ለሰማይ ፡ በደመና ፡ ወያስተዴሉ ፡ ክረምተ ፡ ለምድር ፤

9 ዘያበቍል ፡ ሣዕረ ፡ ውስተ ፡ አድባር ፡ ወኀመልማል ፡ ለቅኔ ፡ እጓለ ፡ እመሕያው ።

10 ዘይሁቦሙ ፡ ሲሳዮሙ ፡ ለእንስሳ ፤ ወለእጕለ ፡ ቋዓት ፡ እለ ፡ ይጼውዕዎ ።

11 ኢይፈቅድ ፡ ኀይለ ፡ ፈረስ ፤ ወኢይሠምር ፡ በአቍያጸ ፡ ብእሲ ።

12 ይሠምር ፡ እግዚአብሔር ፡ በእለ ፡ ይፈርህዎ ፤ ወበኵሎሙ ፡ እለ ፡ ይትዌከሉ ፡ በምሕረቱ ።

147 ሀሌሉያ ።

1 ትሴብሖ ፡ ኢየሩሳሌም ፡ ለእግዚአብሔር ፤ ሰብሕዮ ፡ ለአምላክኪ ፡ ጽዮን ።

2 እስመ ፡ አጽንዐ ፡ መናስግተ ፡ ኆኃቲኪ ፤ ወባረኮሙ ፡ ለውሉድኪ ፡ በውስቴትኪ ።

3 ወረሰየ ፡ ሰላመ ፡ ለበሓውርትኪ ፤ ወአጽገበኪ ፡ ቄቅሐ ፡ ስርናይ ።

4 ዘይፌኑ ፡ ቃሎ ፡ ለምድር ፤ ወፍጡነ ፡ ይረውጽ ፡ ነቢቡ ።

5 ዘይሁብ ፡ በረደ ፡ ከመ ፡ ፀምር ፤ ወይዘርዎ ፡ ለጊሜ ፡ ከመ ፡ ሐመድ ።

6 ወያወርድ ፡ በረደ ፡ ከመ ፡ ፍተታት ፤ መኑ ፡ ይትቃወሞ ፡ ለቍሩ ።

7 ይፌኑ ፡ ቃሎ ፡ ወይመስዎ ፤ ያነፍኅ ፡ መንፈሶ ፡ ወያውሕዝ ፡ ማያተ ።

8 ዘነገረ ፡ ቃሎ ፡ ለያዕቆብ ፤ ፍትሖ ፡ ወኵነኔሁ ፡ ለእስራኤል ።

9 ወኢገብረ ፡ ከማሁ ፡ ለባዕዳን ፡ አሕዛብ ፤ ወኢነገሮሙ ፡ ፍትሖ ።

148 ሀሌሉያ ፡ ዘሐጌ ፡ ወዘዘካርያስ ።

1 ሰብሕዎ ፡ ለእግዚአብሔር ፡ እምሰማያት ፤ ይሴብሕዎ ፡ በአርያም ።

2 ይሴብሕዎ ፡ ኵሎሙ ፡ መላእክቲሁ ፤ ይሴብሕዎ ፡ ኵሉ ፡ ኀይሉ ።

3 ይሴብሕዎ ፡ ፀሓይ ፡ ወወርኅ ፤ ይሴብሕዎ ፡ ኵሉ ፡ ከዋክብት ፡ ወብርሃን ።

4 ይሴብሕዎ ፡ ሰማያተ ፡ ሰማያት ፤ ወማይኒ ፡ ዘመልዕልተ ፡ ሰማያት ። ይሴብሕዎ ፡ ለስመ ፡ እግዚአብሔር ፤

5 እስመ ፡ ውእቱ ፡ ይቤ ፡ ወኮኑ ፡ ወውእቱ ፡ አዘዘ ፡ ወተፈጥሩ ።

6 ወአቀሞሙ ፡ ለዓለም ፡ ወለዓለመ ፡ ዓለም ፤ ትእዛዘ ፡ ወሀቦሙ ፡ ወኢኀለፉ ።

7 ሰብሕዎ ፡ ለእግዚአብሔር ፡ እምድር ፤ አክይስትኒ ፡ ወኵሉ ፡ ቀላያት ።

8 እሳት ፡ ወበረድ ፡ አስሐትያ ፡ ወሐመዳ ፤ መንፈሰ ፡ ዐውሎ ፡ ዘይገብር ፡ ነቢቦ ።

9 አድባርኒ ፡ ወኵሉ ፡ አውግር ፤ ዕፀውኒ ፡ ዘይፈሪ ፡ ወኵሉ ፡ አርዝ ።

10 አራዊትኒ ፡ ወኵሉ ፡ እንስሳ ፤ ዘይትሐወስኒ ፡ ወአዕዋፍ ፡ ዘይሠርር ።

11 ነገሥተ ፡ ምድርኒ ፡ ወኵሉ ፡ አሕዛብ ፤ መላእክትኒ ፡ ወኵሉ ፡ መኳንንተ ፡ ምድር ።

12 ወራዙትኒ ፡ ወደናግል ፤ ሊቃናትኒ ፡ ወመሐዛት ። ይሰብሑ ፡ ለስመ ፡ እግዚአብሔር ፡ እስመ ፡ ተለዐለ ፡ ስሙ ፡ ለባሕቲቱ ፤

13 ይገንዩ ፡ ሎቱ ፡ በሰማይ ፡ ወበምድር ። ወያሌዕል ፡ ቀርነ ፡ ሕዝቡ ፡

14 ወስብሐተ ፡ ኵሉ ፡ ጻድቃኑ ፤ ለደቂቀ ፡ እስራኤል ፡ ሕዝብ ፡ ዘቅሩብ ፡ ሎቱ ።

149 ሀሌሉያ ።

1 ሰብሕዎ ፡ ለእግዚአብሔር ፡ ስብሐተ ፡ ሐዲሰ ፤ ስብሐቲሁ ፡ በማኅበረ ፡ ጻድቃኑ ።

2 ይትፌሣሕ ፡ እስራኤል ፡ በፈጣሪሁ ፤ ወደቂቀ ፡ ጽዮን ፡ ይትሐሠዩ ፡ በንጉሦሙ ።

3 ወይሴብሑ ፡ ለስሙ ፡ በትፍሥሕት ፤ በከብሮ ፡ ወበመዝሙር ፡ ይዜምሩ ፡ ሎቱ ።

4 እስመ ፡ ሠምረ ፡ እግዚአብሔር ፡ በሕዝብ ፤ ወያሌዕሎሙ ፡ ለየዋሃን ፡ በአድኅኖቱ ።

5 ይትሜክሑ ፡ ጻድቃን ፡ በክብሩ ፤ ወይትሐሠዩ ፡ በዲበ ፡ ምስካቢሆሙ ።

6 ወያሌዕልዎ ፡ ለእግዚአብሔር ፡ በጐራዒቶሙ ፤ ሰይፍ ፡ ዘክልኤ ፡ አፉሁ ፡ ውስተ ፡ እደዊሆሙ ።

7 ከመ ፡ ይግበር ፡ በቀለ ፡ ውስተ ፡ አሕዛብ ፤ ወከመ ፡ ይዛለፎሙ ፡ ለአሕዛብ ።

8 ከመ ፡ ይእሥሮሙ ፡ ለነገሥቶሙ ፡ በመዋቅሕት ፤ ወለክቡራኒሆሙኒ ፡ በእደ ፡ ሰናስለ ፡ ኀጺን ።

9 ከመ ፡ ይግብር ፡ ኵነኔ ፡ ዘጽሑፍ ፡ ላዕሌሆሙ ፡ ክብር ፡ ይእቲ ፡ ዛቲ ፡ ለኵሉ ፡ ጻድቃኑ ።

150 ሀሌሉያ ።

1 ሰብሕዎ ፡ ለእግዚአብሔር ፡ በቅዱሳኑ ፤ ሰብሕዎ ፡ በጽንዐ ፡ ኀይሉ ።

2 ሰብሕዎ ፡ በክሂሎቱ ፤ ሰብሕዎ ፡ በከመ ፡ ብዝኀ ፡ ዕበዩ ።

3 ሰብሕዎ ፡ በቃለ ፡ ቀርን ፤ ሰብሕዎ ፡ በመዝሙር ፡ ወበመሰንቆ ።

4 ሰብሕዎ ፡ በከበሮ ፡ ወበትፍሥሕት ፤ ሰብሕዎ ፡ በአውታር ፡ ወበዕንዚራ ።

5 ሰብሕዎ ፡ በጸናጽል ፡ ዘሠናይ ፡ ቃሉ ፤ ሰብሕዎ ፡ በጸናጽል ፡ ወበይባቤ ። ኵሉ ፡ ነፍስ ፡ ይሴብሖ ፡ ለእግዚአብሔር ።

መዝሙር ፡ ዘርእሱ ፡ ዘዳዊት ፡ ዘጸሐፈ ፤ ወውፁእ ፡ ውእቱ ፡ እምኈልቍ ፤ ዘአመ ፡ ይትበሐቶ ፡ ወይትበአስ ፡ ምስለ ፡ ጎልያድ ፡ ወይቤ ።

11 ንኡስ ፡ አነ ፡ እምአኀውየ ፡ ወወሬዛ ፡ በቤተ ፡ አቡየ ፤ ወእሬዒ ፡ አባግዐ ፡ አቡየ ።

12 እደውየ ፡ ይገብራ ፡ መሰንቆ ፤ ወአጻብዕየ ፡ ያስተዋድዳ ፡ መዝሙረ ።

13 መኑ ፡ ነገሮ ፡ ለእግዚእየ ፤ ውእቱ ፡ እግዚአብሔር ፡ ውእቱ ፡ ሰምዐኒ ።

14 ውእቱ ፡ ፈነወ ፡ መልአኮ ፡ ወአድኀነኒ ፤ ወነሥአኒ ፡ እምአባግዐ ፡ አቡየ ፡ ወቀብአኒ ፡ ቅብአ ፡ ቅዱሰ ።

15 አኀውየሰ ፡ ሠናያን ፡ ወልሂቃን ፤ ወኢሠምረ ፡ ቦሙ ፡ እግዚአብሔር ።

16 ወወፃእኩ ፡ ለተኣኅዞቲ ፡ ለሕዝብ ፡ ነኪር ፤ ወረገመኒ ፡ በአማልክቲሁ ፡ ርኩሳን ።

17 ወአንሰ ፡ ነሣእኩ ፡ ሠለስተ ፡ አእባነ ፡ ወወጸፍክዎ ፡ ውስተ ፡ ፍጽሙ ፡ ወሞተ ። ወዓዲ ፡ ነሣእኩ ፡ ዘእምላዕሌሁ ፡ ሰይፈ ፡ ወመተርኩ ፡ ርእሶ ፤ ወአሰሰልኩ ፡ ጽእለተ ፡ እምደቂቀ ፡ እስራኤል ። ተፈጸመ ፡ ዳዊት ።